1. Jehova’n mi inngaitlâwmte chu engtin nge a ngaih? Hrilhfiah rawh.

JEHOVA chuan mi inngaitlâwmte chu a hmangaih a. Inngaitlâwm tak zettute chauhvin amah nêna inlaichînna duhawm tak an nei thei a ni. Kawng leh lamah chuan, “mi chapote erawh chu hla tak aṭangin a hre ṭhîn.” (Sâm 138:6) Kan vai hian Jehova tihlâwm a, a hmangaihna duhawm tak dawn kan duh avângin inngaihtlâwmna mizia neih chhan tûr ṭha tak kan nei a ni.

2. He thuziakah hian eng nge kan sawiho vang?

² He thuziakah hian, hêng zawhna pathumte chhânna hi sawiho a ni ang: (1) Inngaihtlâwmna chu eng nge ni? (2) Engvângin nge chu mizia chu kan neih ang? (3) Eng dinhmunte’n nge kan inngaihtlâwmna chu fiah thei? Inngaihtlâwmna kan neih hian Jehova thinlung kan tilâwmin, mahni ngei pawhin kan hlâwkpui a ni tih kan la hria ang.—Thuf. 27:11; Is. 48:17.

3. Inngaihtlâwmna chu eng nge ni?

³ Inngaihtlâwmna chu rilru inphahhniamna leh chapona, leh intihveina laka fihlîmna a ni a. Mi inngaitlâwm chuan Pathian Jehova leh mi dangte nêna a inlaichînnaah thlîr dân dik tak a nei tih Bible chuan a sawi a. Chutiang mi chuan mi dangte chu kawng engemaw ti takin an ṭha zâwk tih a pawm a ni.—Phil. 2:3, 4.

4-5. Engvângin nge inngaihtlâwmna dik tak chu a pâwnlâng chauhva lang mai a ni lo tia kan sawi theih?

⁴ Mi ṭhenkhat chu a pâwnlâng chauhvin an inngaitlâwm a. An mize dik tak chu an tilang lo mai thei a ni. Anni chuan an hnam dân leh an ṭobulte avângin mite chungah zahna leh hawihhâwmna an lantîr mai thei bawk. Mahse, chhûngril takah chuan an chapo hle thei a. An mize dik tak chu rei vak lovah, a lo lang chhuak ṭhîn a ni.—Lk. 6:45.

 ⁵ Kawng leh lamah chuan, mahni inrintâwkna neite leh tlang taka thu sawi ṭhînte chu mi chapo an ni kher lo. (Joh. 1:46, 47) Mahse, thiamna engemaw bîk tak neite chu an pianpui thiamnate rinchhan lo tûrin an fîmkhur tûr a ni. Thusawi thiam tak leh thiamna engemaw bîk tak nei kan ni emaw, ni lo emaw pawh ni se, kan vai hian inngaihtlâwmna thinlung nei tûrin theih tâwp kan chhuah tûr a ni.

6. Korinth thawn khat 15:10-a târ lan angin, tirhkoh Paula entawn tûr siam aṭangin eng nge kan zir theih?

⁶ Tirhkoh Paula entawn tûr siam hi han ngaihtuah teh. Jehova’n ani chu khaw hrang hrangah kohhhran tharte din tûrin nasa takin a hmang a. Rawngbâwlnaah Isua Krista tirhkoh dangte aiin a thawk nasa zâwk pawh a ni thei. Chuti chung pawhin, Paula chuan a unaute aia ṭha zâwkah a inngai lo va. Inngaitlâwm takin heti hian a sawi a ni: “Kei zawng tirhkoh zînga tê ber, Pathian kohhranho ka tihduhdah avânga tirhkohva vuah tlâk loh ka ni si a,” tiin. (1 Kor. 15:9) Chumi hnuah, Paula chuan Jehova hmaa a hming ṭhatna chu, a mizia leh a thiltih vâng ni lovin, Pathian khawngaihna vâng zâwk a ni tih chiang takin a sawi a. (1 Korinth 15:10 chhiar rawh.) Paula chu inngaihtlâwmna kawngah entawn tûr ṭha tak a ni. Korinth khuaa mite hnêna lehkha a thawn khân, kohhrana mi ṭhenkhatin an sawisêl chung pawhin, chapona a nei chuang lo!—2 Kor. 10:10.

7. Tûn laia hriat hlawh tak unau ṭhenkhat chuan engtin nge inngaihtlâwmna an lantîr? Entîrna pe rawh.

⁷ Jehova mite zînga tam tak chu Governing Body nia rawng lo bâwl ṭhîn Unau Karl F. Klein-a nun kawng chanchin chuan a tichak hle a. A nun kawng chanchinah, ani chuan kum tam tak chhûng chu harsatnate a tuar tih inngaitlâwm takin a sawi a. Entîr nân, kum 1920 chho bâwr vêl khân, in tina rawngbâwlna  chu harsa a tih êm avângin vawi khat a kal hnuah, kum hnih chhûng chu in tin a kal leh tawh lo a ni. A hnuah, Bethel-a rawng a bâwl laia, zilhna a tawh avângin hun engemaw tichhûng chu lung ni lovin a awm a. Chu bâkah, manganna leh lungkhamna a neih avângin rilru lam natna a nei a; mahse a hnuah a ṭha chho va. Chuti chung pawhin, chanvo pawimawh tak takte phûr takin a chelh a ni. Hriat hlawh tak unaupa tân mahni chak lohnate tlang taka sawi chhuak tûra inngaihtlâwmna neih a ṭûl dân tûr chu han ngaihtuah teh! Unau tam takte chuan tlang taka thusawi ṭhîn Unau Klein-a leh a nun kawng chanchin chu an theihnghilh thei lo a ni. *

8. Engtin nge Petera thawn khat 5:6-na chuan inngaihtlâwmnain Jehova a tilâwm tih hre tûra min ṭanpui?

⁸ Inngaihtlâwmna kan neih a pawimawh chhan ber chu, chu chuan Jehova a tihlâwm vâng a ni. Tirhkoh Petera’n chumi dikzia chu a tichiang a. (1 Petera 5:6 chhiar rawh.) Petera thusawi chu “Come Be My Follower” tih lehkhabu chuan heti hian a hrilhfiah a ni: “Chapona chu tûr ang a ni a. A nghawng chu a râpthlâk hle thei a ni. Chu chuan mize ropui tak neite pawh Pathian tâna hman tlâk lovah a siam thei a. Kawng leh lamah chuan, inngaihtlâwmna chuan mi hman tlâk lo ber pawh Pathian tâna mi ṭangkai takah a siam thei thung. . . . [Pathian] chuan . . . i inngaihtlâwmna avânga lâwmman pêk che a duh a ni,” tiin. * Dik tak chuan, Jehova thinlung tihlâwm aia ṭha zâwk thil dang kan beisei thei dâwn em ni?—Thuf. 23:15.

9. Engtin nge inngaihtlâwmna chuan mi dangte nên min inhnaihtîr?

⁹ Inngaihtlâwmna kan neih hian Jehova kan tilâwm mai ni lovin, keimahni ngei pawhin nasa takin kan hlâwkpui a ni. Inngaihtlâwmna chuan mi dangte nên min inhnaihtîr a. A chhan chu mi dangte dinhmun hriatthiamna min neihtîr vâng a ni. (Mt. 7:12) Kan zîngah hian mahni ngaih dân chauh kalpuitute leh thurâwn pawm duh lotute bula awm nuam ti chu kan awm meuh lo vang. Chumi nêna inkalh takin, kan unaute’n ‘inlainat tawnna, inhmangaih tawnna, khawngaihna, inngaihtlâwmna’ an lantîr hian an zînga awm nuam kan ti a ni. (1 Pet. 3:8) Chutiang mite nêna awm chu nuam kan tih chuan, anni pawhin, inngaihtlâwmna kan neih chhûng chu kan bula awm nuam an ti ve ngei ang.

10. Engtin nge inngaihtlâwmna chuan nun a tihawlsam lehzual?

 ¹⁰ Inngaihtlâwmna chuan kan nun a tiawlsam lehzual bawk. Dik tak chuan, nunah hian thil dik lo leh fel lo nia kan hriatte chu kan hmu mai thei a ni. Lal fing Solomona chuan: “Chhiahhlawh ka hmu, sakawr chungah, hotu a kal kêin, chhiahhlawh angin,” tiin a sawi a. (Thur. 10:7) Theihna danglam bîk tak neite chuan hriat an hlawh reng lo va. Theihna nei tlêm zâwkte’n chawimawi an hlawh zâwk châng pawh a awm thei bawk. Chutiang chu ni mah se, Solomona chuan dinhmun ṭha lote avânga rilru hrehawma awm aiin, a nihna ang taka hmachhawn chu a finthlâk zâwk tih a hria a ni. (Thur. 6:9) Inngaihtlâwmna kan neih chuan kan duh dâna thil a kal tluan loh hunah pawh, a nih dân ang anga pawm a tiawlsam ang.

11. Zilhna kan dawn hunah engtin nge kan chhân lêt ang?

¹¹ Nî tin hian inngaihtlâwmna lantîr theihna hun remchâng tam tak kan nei a. Dinhmun ṭhenkhat han ngaihtuah ta ila. Zilh kan nih hunah. Zilhna kan dawng a nih chuan, rin aiin kan lo kal sual thui hle tawh a ni thei tih kan pawm tûr a ni. Tuemawin min rawn zilh hian, zilhna chu lâwm takin kan pawm nghâl lo mai thei a. Zilhna min petu, a nih loh leh min zilh dân chu kan sawisêl mai thei bawk. Mahse, mi inngaitlâwm kan nih chuan, rilru put hmang dik tak lantîr kan tum ang.

12. Thufingte 27:5, 6-a sawi angin, zilhna min petu chungah engvângin nge lâwmna kan lantîr ang? Entîrna pe rawh.

¹² Mi inngaitlâwm chuan zilhna a dawn hian a lâwm a. Entîr nân, Kristian inkhâwmnaa tel angah han inmitthla teh. Unau engemaw zât i biak hnuah, an zînga tuemaw chuan, hruai hrang chein, i hâah thil a bet tiin a rûktêa a hrilh che chuan i zâk deuh mai thei. Mahse, chutianga a hrilh che avângin i lâwm dâwn lâwm ni? A nihna takah chuan, tuemawin chumi hmâ daihin lo hrilh ta che se tih i duh ngei ang! Chutiang bawkin, kan mamawh huna zilhna min pe ngamtu kan unau chungah inngaitlâwm takin lâwmna kan lantîr tûr a ni. Ani chu hmêlma ang ni lovin, ṭhian angin kan thlîr tûr a ni.—Thufingte 27:5, 6 chhiar rawh; Gal. 4:16.

13. Mi dangin rawngbâwlna chanvo hlu an dawn hunah engtin nge inngaihtlâwmna kan lantîr theih?

¹³ Mi dangin rawngbâwlna chanvo hlu an dawn hunah. “Mi dangin chanvo hlu an dawng ka hmuh hian engvângin nge keimah zâwkin ka dawn loh tia ngaihtuah châng ka nei,”  tiin kohhran upa Jason-a chuan a sawi. Chutiang chuan i ngaihtuah ngai em? Tam lehzuala rawngbâwlna chanvo hlu dawn ‘duhna’ kan nei chu thil sual a ni lo. (1 Tim. 3:1) Mahse, kan ngaihtuahna chu kan vên ṭhat a ngai a ni. Kan fîmkhur loh chuan, kan thinlungah chapona a lo awm thei a. Entîr nân, Kristian unaupa chuan chanvo engemaw chelh tûra tling ber niin a inngai ṭan thei a ni. A nih loh leh, Kristian nupui chuan, ‘Ka pasal hi unau dangte aiin a tling ber,’ tiin a ngaihtuah mai thei bawk! Mahse, kan inngaihtlâwm tak zet chuan chutiang chapona rilru chu kan pumpelh ang.

14. Mi dangin chanvo hlu an dawn huna Mosia chhân lêt dân aṭangin eng nge kan zir theih?

¹⁴ Mi dangin chanvo hlu an dawn huna Mosia chhân lêt dân aṭangin kan inzir thei a. Mosia chuan Israel hnam hruaitu nia a chanvo chu a hlut hle a. Jehova’n mi dangte chu Mosia nêna thawk dûn tûra a tih khân, engtin nge Mosia’n a chhân lêt? Ani chuan a thîk lo va. (Num. 11:24-29) Mite ro a rêlsaknaah, inngaitlâwm takin a hna ṭhenkhat chu mi dangte a thawhtîr a ni. (Ex. 18:13-24) Israel mite chuan rorêltute an neih tam tawh dâwn avângin rorêlnaah rei tak an nghah a ngai tawh lo vang. Chutiang kawng chuan, Mosia’n a chanvo aiin mi dangte ṭhatna tûr chu a dah pawimawh zâwk a ni. Kan tân entawn tûr ṭha a va ni tak êm! Jehova tâna mi ṭangkai tak nih kan duh chuan kan inngaihtlâwmna chu kan theihna aiin a pawimawh zâwk tih kan hre tûr a ni. “LALPA chu chungnung tak a ni nâ a, mi tlâwmte chu a ngaihsak ṭhîn” si a.—Sâm 138:6.

15. Mi tam takin eng dinhmun tharte nge an hmachhawn?

¹⁵ Dinhmun tharte kan hmachhawn hunah. Tûn hnai kumahte khân, kum sâwm têl thiltawn lo nei tawh unau tam takte chanvo chu thlâk danglam a ni a. Entîr nân, kum 2014-ah khân, district overseer-te leh an nupuite chu kawng danga hunbi kima rawngbâwl tûra tih an ni a. Chumi kum aṭang chuan, bial kantute chu kum 70 an tlin chuan an chanvo an chelh  zawm thei tawh lo a ni. Kum 80, a nih loh leh chu aia upa unaupate chuan kohhranah kohhran upate râwn khâwmtu niin rawng an bâwl thei tawh lo bawk. Chu bâkah, kum engemaw kal ta khân, Bethel chhûngkaw zînga unau tam tak chu thlawhhmaa rawngbâwl tûra tih an ni a. Mi dangte chuan hrisêl lohna te, chhûngkaw mawhphurhna te, leh mi mal harsatna dangte avângin hunbi kima rawngbâwl chu an chawlhsan a ngai a ni.

16. Kan unaute chuan dinhmun thar mila an insiamremnaah engtin nge inngaihtlâwmna an lantîr?

¹⁶ Chutianga insiamremna neih chu chûng unaute tân chuan thil awlsam a ni lo. Dik tak chuan, an chanvo hmasa chu an ngaina hle a, a tam zâwkte tân chuan, kum rei tak chhûng hlim taka an lo thawh tawh vâng a ni. Anni chuan dinhmun thar mila an insiamrem laiin hun engemaw tichhûng chu an “lung chhia” a. Mahse, hunte a liam zêl chuan, an insiamrem thei a ni. Engvângin nge? Jehova an hmangaihna chu an ngaih pawimawh ber vâng a ni. Anni chuan an hna, an nihna, leh an chanvo neihtea inpumpêk lovin, Pathian hnênah an inpumpêk tih an hria a. (Kol. 3:23, 24) Inngaitlâwm takin Jehova rawngbâwlnaa an chanvo dawn engpawh chu lâwm takin an thawk zawm zêl a. Jehova’n a ngaihsak tih an hriat avângin an ‘manganna zawng zawng chu ama chungah an nghat vek a ni.’—1 Pet. 5:6, 7.

17. Inngaihtlâwmna nei reng tûra Pathian Thu-in min fuih chu engvânga lâwm tûr nge kan nih?

¹⁷ Inngaihtlâwmna nei reng tûra Pathian Thu-in min fuih avângin kan lâwm hle a ni lâwm ni? He mize duhawm tak hi kan neih chuan keimahni leh mi dangte’n kan hlâwkpui ang a. Nuna harsatnate chu kan hmachhawn thei lehzual ang. A pawimawh ber chu, kan Pa vâna mi kan hnaih lehzual hi a ni. Ani chu ‘Mi chungnung leh Chawisân’ ni mah se, ani chuan a chhiahhlawh inngaitlâwmte chu a hmangaihin, a hlut tih kan hriat avângin kan va lâwm tak êm!—Is. 57:15.