Ngaihtuahna chawktho thei tak he Bible chângah hian: “Ram bialah rethei hnehchhiahna te, pâwngnêknain rorêlna leh diknate a tibo a ni tih i hmuh pawhin mak ti suh; hotu sâng chu a sâng lehzualin a mit sîr ru reng si a, anni aia sâng lehzualte pawh an awm zêl a ni,” tiin kan chhiar a.—Thur. 5:8.

Mihring thlîrna aṭang chuan, he Bible châng hi sawrkâr thuneitute sawina niin a lang a. Mahse, ngun taka kan ngaihtuah chuan, he châng hian thlamuanna leh rinnghehna min neihtîrtu tûr Jehova chungchâng thutak a târ lang bawk.

Thuhriltu 5:8-na hian retheite hnehchhiah a, an chunga dik lo taka rorêltu chungchâng a sawi a. Chu rorêltu chuan amah aia sâng zâwk rorêltu, a nih loh leh thuneihna sâng zâwk chelhtuin a mit sîr ru reng tih a hre tûr a ni. Dik tak chuan, anni aia nihna sâng zâwk chelhtu mi dangte pawh an awm thei a ni. Lungchhiatthlâk takin, mihring sawrkâra chûng rorêltu zawng zawngte chuan dik lo takin thil an ti mai thei a, an khua leh tuite chuan an rorêl dik lohna chu an tawrh a ngai thei a ni.

Dinhmunte chu eng ang khawpa beiseibovin lang mah se, Jehova chuan mihring sawrkâra ‘hotu sângte chu a mit sîr ru’ reng tih hriain thlamuanna kan nei thei a ni. Pathian hnênah ṭawngṭaiin, kan phurritte chu a chungah kan nghat thei a. (Sâm 55:22; Phil. 4:6, 7) “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn,” tih kan hria a ni.—2 Chro. 16:9.

Chuvângin, Thuhriltu 5:8-na hian sawrkâr thuneitute dinhmun dik tak; an aia thuneihna sâng zâwk chelhtu an awm reng tih min hriattîr a. Chu aia pawimawh zâwk chu, he Bible châng hian Jehova chu lei leh vâna Thuneitu Sâng Ber a ni tih ngaihtuah tûrin min ṭanpui thei a ni. Tûnah hian, ani chuan A Lalrama Lal, a Fapa Isua Krista hmangin ro a rêl mêk a. Thil engkim hmutu Engkimtitheia chu a dikin, a fel famkim a, a Fapa pawh chutiang bawk chu a ni.