1. Eng hunah nge Jehova rawngbâwl a harsat mai theih?

JEHOVA rawngbâwl nân eng hun hi nge harsa ber nia i ngaih? Harsatna khirh tak i hmachhawn hunah nge ni a, i hmachhawn loh hunah zâwk? Harsatna kan hmachhawn hian Jehova kan rinchhan nghâl vat ṭhîn a. A nih leh, hun muanawma kan awm hian eng nge kan tih ṭhin? Pathian rawngbâwl a pawimawhzia theihnghilh châng kan nei em? Jehova chuan chutiang thilthleng thei lakah Israel mite chu a lo vaukhân a ni.—Deut. 6:10-12.

2. Lal Asa’n entawn tûr eng nge a hnutchhiah?

² Lal Asa chu Jehova rinchhan pumhlûma fing taka thil titu entawn tlâk tak a ni a. Hun ṭha lovah chauh ni lovin, hun muanawmah pawh Jehova rawng a bâwl a ni. A naupan lai aṭangin, “Asa thinglung chu . . . LALPA lamah a ṭha famkim a ni.” (1 Lal. 15:14.) Asa’n Pathian hnêna a inpumpêkzia a lantîr dân kawng khat chu Judai ram aṭanga biakna dik lo a thenfaina hi a ni a. Bible chuan: “Ram dang pathian maichâmte leh hmun sângte a thehthang bo va, lungphunte a tichim a, Aseri-te a kit a,” tiin a sawi. (2 Chro. 14:3, 5) A pi Maaki pawh ram chhûnga lal nu a nihna ata a bân hial a ni. Engvângin nge? Milem biakna a chawilâr vâng a ni.—1 Lal. 15:11-13.

3. He thuziakah hian eng nge kan sawiho vang?

³ Asa chuan biakna dik lo thenfai mai aia tam a ti a. Biakna dik chu din ṭha lehin Juda mite chu Jehova hnêna kîr leh tûrin a ṭanpui a ni. Jehova chuan Asa leh Israel mite chu hun muanawm *  tak pein mal a sâwm a. Kum sâwm a lal chhûngin, “ram chu râlmuangin a awm a.” (2 Chro. 14:1, 4, 6) He thuziakah hian, Asa’n chu hun muanawm tak a hman dân sawiho a ni ang a. Chumi hnuah, Asa anga ṭangkai taka hun muanawm hmangtu kum zabi khatnaa Kristiante entawn tûr siam pawh sawiho a ni ang. A tâwpah: Zalên taka Pathian biak theihna rama chêng i nih chuan, chu hun muanawm tak chu engtin nge i hman theih? tih zawhna hi chhân a ni ang.

4. Chronicles pahnihna 14:2, 6, 7-a sawi angin, engtin nge Asa’n hun muanawm chu a hman?

⁴ Chronicles pahnihna 14:2, 6, 7 chhiar rawh. Asa chuan mite hnênah Jehova chu ‘râlmuanga awmna petu a ni,’ tih a hrilh a. Ani chuan chu hun muanawm tak chu hahdam taka awmna hun angin a thlîr lo. Chu aiin, khua te, kulh te, in sâng te, leh kulh kawngkhârte a sa ṭan a. Juda mite hnênah: “Ram chu kan hnuaiah a lo awm ta,” tiin a hrilh a ni. Asa sawi tum chu eng nge ni? Mite chu Pathian pêk an ram chhûngah chuan zalên takin an khawsa thei a, hmêlmate dodâlna awm lovin inte an sa thei a tihna a ni. Mite hnênah chu hun muanawm chu ṭangkai taka hmang tûrin a fuih bawk.

5. Engvângin nge Asa’n a sipai rual chu a tihchak?

⁵ Asa chuan hun muanawm chu a sipai rual tihchak nân a hmang bawk. (2 Chro. 14:8) Chu chu Jehova a rinchhan lo tihna a ni em? Ni lo ve. Chu aiin, Asa chuan lal a nih angin nakina an hmachhawn mai theih harsatna atâna mite buatsaih tûrin mawhphurhna a nei tih a hria a. Ani chuan Judai rama hun muanawm tak chu kumkhuain a awm dâwn lo tih a hria a, chutiang chuan a lo thleng dik ta rêng a ni.

6. Engtin nge kum zabi khatnaa Kristiante chuan hun muanawm tak chu an hman?

⁶ Kum zabi khatnaa Kristiante chuan tihduhdahna tâwk fo mah se, hun muanawm taka awm châng an nei bawk. Zirtîrte chuan chûng hunte chu engtin nge an hman? Chûng Kristian rinawm a pui a pangte chuan bâng lovin chanchin ṭha an hril a. Tirhkohte thuziak chuan anni chu ‘Lalpa ṭih dêkin an awm a,’ tiin a sawi. Chanchin ṭha an hrilh zawm zêl avângin, “an lo pung ta telh telh a.” Jehova’n chûng hun muanawm tak chhûnga ṭhahnemngai taka thu an hrilhna chu mal a sâwm tih a chiang hle.—Tirh. 9:26-31.

7-8. Paula leh mi dangte chuan hun remchâng an neih hunah eng nge an tih? Hrilhfiah rawh.

⁷ Kum zabi khatnaa zirtîrte chuan chanchin ṭha theh darh nân hun remchâng apiang an hmang a. Entîr nân, Ephesi khuaa a awm laiin, tirhkoh Paula chuan a tân kawngka zau tak a inhawng tih a hria a, chu chu thu hrilh leh zirtîr siam nâna hun remchângah a hmang a ni.—1 Kor. 16:8, 9.

⁸ C.E. 49-a serhtan chungchânga thu buai chinfel a nih khân, Paula leh Kristian dangte tân hun remchâng dang a lo awm leh a. (Tirh. 15:23-29) Thu tlûkna chu kohhrante hnêna hriattîr a nih hnu chuan, zirtîrte chuan “Lalpa thu” chu theih tâwp chhuahin an puang a ni. (Tirh. 15:30-35) Eng nge a rah chhuah? Bible chuan: “Kohhran pâwlte chu rinnaah chuan an nghet ta a, nî tin an pung ta deuh deuh va,” tiin a sawi a ni.—Tirh. 16:4, 5.

9. Tûn laia ram tam tak dinhmun chu eng nge ni a, eng nge kan inzawh theih?

⁹ Tûn laia ram tam takah chuan zalên takin thu kan hril thei a. Chutianga zalên taka Pathian biak theihna rama chêng i ni em? I nih chuan, heti hian inzâwt ang che: ‘Chu hun remchâng chu engtin nge ka hman?’ tiin. He ni hnuhnûng phûrawm tak chhûng hian, Jehova inawpna pâwl chuan khawvêlin a hriat tawh azawnga thu hrilh leh zirtîr siamna campaign ropui ber chu a kaihruai mêk a. (Mk. 13:10) Chu hnaah chuan tih theih tam tak kan nei a ni.

10. Timothea thawn hnih 4:2-na chuan eng ti tûrin nge min fuih?

¹⁰ Engtin nge hun muanawm tak chu i hman ṭangkai theih? (2 Timothea 4:2 chhiar rawh.) Nang leh i chhûngte zînga tuemawin pioneer thawh ang chi thu hrilh rawngbâwlna zauh theih dân kawng a awm leh awm loh hre tûrin engvângin nge in dinhmunte chu in endik loh vang? Tûn hi hrehawm nasa taka boral mai tûr khawvêl sum leh pai leh hausaknate khâwl khâwm hun a ni lo.—Thuf. 11:4; Mt. 6:31-33; 1 Joh. 2:15-17.

11. Unau ṭhenkhat chuan mi a tam thei ang berte hnêna chanchin ṭha an hrilh theih nân eng nge an tih?

¹¹ Thuchhuahtu tam tak chuan Jehova chungchâng zir tûra mite an ṭanpui theih nân ṭawng thar an zir a. Pathian inawpna pâwl chuan anni chu ṭawng tam taka tihchhuah Bible ṭanchhan thu leh hla chhuahte hmangin a ṭanpui a ni. Entîr nân, kum 2010 khân kan thu leh hla chhuahte chu ṭawng 500 vêla hmuh theih a ni a. Tûnah chuan, ṭawng 1,000 aia tama hmuh theih a ni tawh!

12. Mite’n an pianpui ṭawnga Lalram thuchah an hriat hian engtin nge an hlâwkpui? Entîrna pe rawh.

¹² Mite’n Pathian Thua thutak chu an pianpui ṭawng ngeia an hriat hian an chungah eng nghawng nge a neih? United States-a neih regional inkhâwmpui pakhat hlâwkpuitu unaunu thiltawn hi han ngaihtuah teh. Inkhâwmpui chu Rwanda te, Congo (Kinshasa) te, leh Uganda rama an hman Kinyarwanda ṭawnga  neih a ni a. Inkhâwmpui zawh chuan, Kinyarwanda ṭawng hmang unaunu chuan: “Hei hi kum 17 kaltaa United States-a ka insawn aṭanga thlarau lam chaw a kima ka hriatthiamna hmasa ber a ni,” tiin a sawi. A pianpui ṭawng ngeia hman inkhâwmpuia a telna chuan unaunu thinlung chu a khawih tih a chiang hle. I dinhmunin a zir chuan, in rawngbâwlna biala mite ṭanpui tûrin ṭawng dang i zîr thei ang em? In rawngbâwlna biala mite hnênah an pianpui ṭawngin chachin ṭha hril ta la, an ngaithla duh zâwk ang em? I thawhrimna chuan hlimna nasa tak a thlen ang che.

13. Russia rama kan unaute chuan hun muanawm an neih chu engtin nge an hman?

¹³ Kan unau zawng zawngte chuan zalên takin thu an hril vek thei lo va. Sawrkârte chuan kan rawngbâwlnate chu nasa taka khuahkhirh châng an nei a ni. Entîr nân, Russia rama kan unaute hi han ngaihtuah teh. Kum sâwmbi têl tihduhdahna an tawrh hnuah, kum 1991, March thla khân zalên takin thu an hril thei ta a. Chutih hun lai chuan, Russia ramah Lalram thuchhuahtu mi 16,000 vêl an awm a ni. Kum sawmhnih a liam hnu chuan, thuchhuahtu chu 1,60,000 aiin an tam ta! Kan unaute chuan zalên taka thu hrilh theihna an neih chu fing takin an hmang tih a chiang hle. Chutiang hun muanawm chu a awm reng lo. Mahse, dinhmun inthlâk danglamna chuan biakna thianghlim tihmasâwn tûra an ṭhahnemngaihna chu a tikiam chuang lo. Anni chuan Jehova rawng bâwl zawm zêl tûrin an tih theih apiang an ti a ni.

14-15. Engtin nge Jehova’n Asa ṭanpui tûrin a thiltihtheihna chu a hman?

¹⁴ Lal Asa hun lai khân, hun muanawm chu a awm reng lo va. Sipai rual maktaduai khat chu Ethiopia ram aṭangin anmahni bei tûrin an lo kal a. An hruaitu Zera chuan a sipai rualte  nên Judai ram chu an hneh ngei a ring a ni. Mahse, Lal Asa chuan sipai rualte ni lovin, a Pathian Jehova chu a rinchhan tlat zâwk a. Ani chuan: “Aw LALPA kan Pathian, min ṭanpui rawh khai; nangmah ringin i hmingin hêng mipuiho hi kan rawn bei a ni,” tiin a ṭawngṭai a ni.—2 Chro. 14:11.

¹⁵ Ethiopia sipai rualte chu a leh hnih dâwn laiin tam zâwk mah se, Asa chuan Pathian Jehova’n a mite chhan chhuak tûrin thiltihtheihna leh chakna a nei tih a hria a. Jehova chuan Asa rin ang ngeiin thil a ti ta; Ethiopia sipai rual chu mualpho takin an tlâwm a ni.—2 Chro. 14:8-13.

16. Hun muanawm chu a awm reng dâwn lo tih engtin nge kan hriat?

¹⁶ Nakina mi mal tin chunga thilthleng tûrte chu chipchiar takin hre lo mah ila, tûna Pathian mite neih hun muanawm tak hi a awm reng dâwn lo tih erawh kan hria a ni. Dik tak chuan, Isua’n ni hnuhnûngah chuan a zirtîrte chu “hnam zawng zawng huat” an ni ang tih a sawi lâwk a. (Mt. 24:9) Chutiang bawkin, tirhkoh Paula chuan: “Tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a sawi. (2 Tim. 3:12) Setana chu a ‘thinur êm êm a,’ a thinurna chu kawng engemawti taka pumpelh thei tûra kan inngai a nih chuan mahni inbum mai kan ni ang.—Thup. 12:12.

17. Eng kawngtein nge kan rinna chu fiah a nih mai theih?

¹⁷ Nakin lawkah, kan rinawmna chu fiah a ni ṭheuh dâwn a. He khawvêl hian ‘hrehawm nasa tak, leilung pian tirh ata tûn thlenga la awm ngai lo’ chu a hmachhawn thuai ang. (Mt. 24:21) Chutih hun chhûng chuan, kan chhûngkaw zînga mite’n min dodâl theiin, kan rawngbâwlnate khap beh a ni thei bawk. (Mt. 10:35, 36) Asa angin, mi mal takin Jehova ṭanpuina leh humhimna chu kan rinchhan ang em?

18. Hebrai 10:38, 39-a sawi angin, hun muanawm tâwp hun atâna inbuatsaih tûrin engin nge min ṭanpui ang?

¹⁸ Jehova chuan kan hmaa thil lo thleng tûrte atân thlarau lamah min buatsaih reng a. Ani chuan rinawm taka Amah be reng thei tûra min ṭanpuitu atân “a hun apianga” thlarau lam chaw min pe tûrin “bâwih rinawm, fing tak” chu a kaihruai a. (Mt. 24:45) Mahse, keini pawhin, Jehova chunga rinna nghet tak  nei tûra kan tih ngaite chu kan ti ve tûr a ni.—Hebrai 10:38, 39 chhiar rawh.

19-20. Chronicles pakhatna 28:9 kan chhiar hnuah, eng zawhnate nge kan inzawh ang a, engvângin nge?

¹⁹ Lal Asa angin, keini pawhin ‘Pathian kan zawn’ a ngai a. (2 Chro. 14:4; 15:1, 2) Pathian Jehova kan hriat a, baptisma channa hmangin chutiang chuan kan zawng ṭan a ni. Amah kan hmangaihna tinghet lehzual tûrin kan tihtheih apiang kan ti a. Chumi chungchânga kan dinhmun hriat nân: ‘Kohhran inkhâwmahte ka tel ziah em?’ tiin kan inzâwt thei a ni. Jehova inawpna pâwl min buatsaihsak inkhâwmahte kan tel hian, unaute nêna inkawmkhâwmna ṭha tak kan neih bâkah, thlarau lama tihchakin kan awm ṭhîn. (Mt. 11:28) Hetiang hian kan inzâwt thei bawk: ‘Mi mala inzirna ṭha tak ka nei ziah em?’ Chhûngte bula chêng ka nih chuan, chawlhkâr tin hian chhûngkuaa Pathian biakna kan nei em? Mahni chauhva khawsa ka nih pawhin, chhûngte bula ka awm lai angin chumi atân hun ka la pe zêl em? A nih loh leh, thu hrilhna leh zirtîr siam rawngbâwlnaah a tam thei ang berin ka tel em? tiin.

²⁰ Engvângin nge chûng zawhnate chu kan inzawh ang? Bible chuan Jehova’n kan ngaihtuahnate leh thinlunga awmte a endik ṭhîn tia a sawi avângin, keini pawhin chutiang chuan kan ti ve tûr a ni. (1 Chronicles 28:9 chhiar rawh.) Kan thiltumah te, rilru put hmangah te, leh ngaihtuah dânahte thlâk danglam ngai a awm tih kan hmuh chuan, chutianga thlâk danglam thei tûrin Jehova hnênah a ṭanpuina kan dîl tûr a ni. Tûn hi nakin lawka kan hmachhawn tûr fiahnate atâna inbuatsaih hun a ni. Hun muanawm fing taka i hmanna tûr chu engmahin dâl suh se!