1-2. Engtin nge Thuhriltu 11:6-na hi Lalram chanchin ṭha hrilhna nên a inkûngkaih?

RAM ṭhenkhatah chuan mite’n chanchin ṭha an hriat hian phûr takin an chhâng lêt a. Chu tak chu a ni an lo beisei chu! Ram dang lehah chuan, mite chuan Pathian leh Bible chu an ngaihven meuh lo. I awmna hmuna mite chhân lêt dân tlângpui chu eng nge ni? An chhân lêt dân chu eng pawh ni se, Jehova chuan tâwk a tih hma loh chu rawngbâwlnaa tel zawm zêl tûrin min beisei a ni.

² Jehova hun ruatah chuan, thu hrilh rawngbâwlna chu tihtâwp a ni ang a; tichuan, “tâwpna chu a lo thleng ang.” (Mat. 24:14, 36) Chumi hun a thlen hma chuan, “I kut sûm suh,” tih fuihna chu engtin nge kan zawm theih? *—Thuhriltu 11:6 chhiar rawh.

3. He thuziakah hian eng nge kan sawiho vang?

³ Thuziak hmasaah khân, hlawhtling taka ‘mihring mantute’ ni tûra kan tih ngai thil pali sawiho a ni tawh a. (Mt. 4:19) He thuziakah hian eng dinhmun pawh hmachhawn mah ila, thu hrilh zawm zêl kan tumna tihngheh lehzual theih dân kawng thum kan sawiho vang a. Chu bâkah, (1) ngaihven tlatna, (2) dawhtheihna, leh (3) rinna nghet tak neih reng a pawimawh chhante kan hre bawk ang.

4. Engvângin nge Jehova’n thawk tûra min pêk hna chu kan ngaihven tlat ang?

⁴ Isua chuan ni hnuhnûng chhinchhiahnate leh thu hrilh rawngbâwlna laka a hnungzuitute rilru la pêng thei thilthlengte  leh dinhmunte chungchâng a sawi lâwk a. A zirtîrte chu: “Ngaihven rawh u,” tiin a fuih a ni. (Mt. 24:42) Nova hun laia, a vaukhânna thusawi ngaihven thei lo khawpa mite rilru la pêngtu dinhmun ang chu tûn laiah pawh kan hmachhawn a. (Mt. 24:37-39; 2 Pet. 2:5) Chuvângin, Jehova’n thawk tûra min pêk hna chu ngaihven tlat kan duh a ni.

5. Engtin nge Tirhkohte 1:6-8-nain thu hrilh rawngbâwlna a darh zau dân tûr chu a sawi?

⁵ Tûn laiah, Lalram thu hrilh rawngbâwlna chu kan ngaihven tlat a ngai a. Isua chuan he rawngbâwlna hi a thih hnu hun rei tak thlengin a darh zauvin, a pung zêl ang tih a sawi lâwk a ni. (Joh. 14:12) A thih hnuah, a zirtîr ṭhenkhat chu sangha mana ei zawnnaah an kîr leh a. A thawhleh hnuah, a zirtîr ṭhenkhat chu thilmak tihna hmangin sangha tam tak a mantîr a ni. Chu hun chu mihring mantute nih theihna chanvo an dawn chu hna dang zawng aiin a pawimawh zâwk tih hriattîr nân a hmang a. (Joh. 21:15-17) Vâna a lâwn chhoh hma lawkah, Isua chuan a zirtîrte hnênah thu hrilh rawngbâwlna chu Israel ram mai ni lo, ram dang thlenga a darh zau zêl tûr thu a hrilh a ni. (Tirhkohte 1:6-8 chhiar rawh.) Kum tam tak hnuah, ‘Lalpa nîa’ * thilthleng tûrte chu tirhkoh Johana hnênah inlârnain a hmuhtîr a. Johana hmuh thilmak ropui tak takte zîngah chuan: Vântirhkoh kaihhruaina hnuaia “hnam tinrêng te, chi tinrêng te, ṭawng tinrêng te, mi tinrêng te” hnêna “chatuana chanchin ṭha” hrilhna pawh a tel a ni. (Thup. 1:10; 14:6) Chuvângin, Jehova chuan chanchin ṭha hrilh chu tâwk a tih hma loh hril zawm zêl tûrin min duh tih a chiang hle.

6. Engtin nge thu hrilh rawngbâwlna chu kan ngaihven tlat theih?

⁶ Jehova min ṭanpui nasatzia kan ngaihtuah  chuan, thu hrilh rawngbâwlna chu kan ngaihven tlat thei ang. Entîr nân, ani chuan lehkhabu te, phone leh tablet te, aw ngaihthlâk tûr leh video en tûr te, leh online-a thusawite hmangin thlarau lam chaw hnianghnâr takin min pe a. Han ngaihtuah teh: Kan official website hi ṭawng 1,000 chuanga hmuh theih a ni ta! (Mt. 24:45-47) Politics te, sakhuana te, leh sumdâwnnate avânga inṭhendarhna khawvêlah hian Pathian chhiahhlawh mi maktaduai riat aia tamte chu khawvêl pum huapah an inpumkhat tlat a ni. Entîr nân, kum 2019, April 19, Zirtâwp ni khân, khawvêl puma Thuhretute chuan ni châng ṭanchhana buatsaih video chu an en a. Chumi zân chuan mi 20,919,041-te chu Isua thih Hriatrengna hmang tûrin an kalkhâwm a ni. Tûn laia he thilthleng mak tak kan hmu thei leh chuta tel ve theihna chanvo hlu kan nei tih kan ngaihtuah chuan, Lalram thu hrilh rawngbâwlna ngaihven tlat tûra chêttîrin kan awm ang.

7. Engtin nge Isua entawn tûr siam chuan ngaihven tlat tûra min ṭanpui?

⁷ Thu hrilh rawngbâwlna kan ngaihven tlat theih dân kawng dang leh chu Isua entawn tûr siam zui hi a ni. Ani chuan thutak a hriattîrna chu thil dang engmahin a tihbuai a phal lo. (Joh. 18:37) Setana’n “khawvêl ram zawng zawng leh a ropuina” pêk a tum khân thlêm thlûkin a awm lo va, mite’n lala siam an tum pawh khân thlêm thlûkin a awm hek lo. (Mt. 4:8, 9; Joh. 6:15) Khawvêl lama hausak duhnain a thunun thei lo ang bawkin, dodâlna nasa tak pawhin a hneh thei hek lo. (Lk. 9:58; Joh. 8:59) Kan rinna fiah a nih huna tirhkoh Paula fuihna kan hriat reng chuan thu hrilh rawngbâwlna chu kan ngaihven tlat thei ang. Ani chuan Kristiante chu ‘inthlahdah lo leh hah lova’ an awm theih nân Isua entawn tûr siam zui tûrin a fuih a ni.—Heb. 12:3.

8. Dawhtheihna chu eng nge ni a, engvângin nge chu chu tûna a pawimawh lehzual?

⁸ Dawhtheihna chu dinhmun inthlâk danglam hun tûr rilru dam taka nghah theihna hi a ni a. Dinhmun ṭha lo tâwp hun tûr kan nghâk emaw, dinhmun ṭha zâwk thlen hun tûr kan nghâk emaw pawh ni se, dawhtheihna kan neih a ngai a ni. Zâwlnei Habakuka chuan Judai rama tharum thawhna a tâwp hun tûr chu a nghâkhlel hle a. (Hab. 1:2) Isua zirtîrte pawhin Lalram chu “lo lang nghâl tûr” angin leh Rom mite awpbehna laka chhan chhuak nghâl tûr angin an lo beisei a ni. (Lk. 19:11) Pathian ramin suahsualna zawng zawng nuaibo va, felna khawvêl thara a thlâk hun tûr chu kan nghâkhlel hle a. (2 Pet. 3:13) Mahse, Jehova hun ruat chu dawhthei taka kan nghah a ngai a ni. Jehova’n dawhtheihna nei tûra min zirtîr dân ṭhenkhat chu i lo en ang u.

9. Eng entîrnate’n nge Jehova dawhtheihna târ lang?

⁹ Jehova chuan dawhtheihna chungchângah entawn tûr ṭha famkim a siam a. Nova chu lawng tuk nân leh “felna thu hriltu” nia rawng a bâwl theih nân hun tam tâwk a pe a ni. (2 Pet. 2:5; 1 Pet. 3:20) Chu bâkah, khaw suaksual tak Sodom leh Gomorra-a chêngte tiboral tûra thu tlûkna a siam chungchânga Abrahama’n zawhna a zawh nawn fo khân a ngaihthlâksak bawk a. (Gen. 18:20-33) Kum zabi tam tak chhûng chu, Israel hnam rinawm lote chungah dawhtheihna nasa tak a lantîr bawk. (Neh. 9:30, 31) Tûn laiah pawh, a lama a hîp zawng zawngte tâna ‘simna’ hun remchâng a pêkna aṭangin Jehova dawhtheihzia kan hmu thei a. (2 Pet. 3:9; Joh. 6:44; 1 Tim. 2:3, 4) A entawn tûr siam chuan thu hrilh leh zirtîrnaa kan tel zawm zêl laia dawhtheihna lantîrna tûr chhan ṭha tak min pe a ni. A Thu, Bible-a kan hmuh tehkhin thute chuan dawhtheihna nei tûrin min zirtîr bawk.

10. Jakoba 5:7, 8-a kan hmuh, lo neitu entîrnain eng nge min zirtîr?

 ¹⁰ Jakoba 5:7, 8 chhiar rawh. Lo neitu chungchâng entîrna chuan dawhtheihna neih dân min zirtîr a. Thlai ṭhenkhat chu a ṭhang chak hle a. Mahse, thlai a tam zâwk, a bîk takin rah thei chi thlaite chu puitling tûr chuan hun rei tak nghah a ngai a ni. Israel rama thlai enkawl chhûng chu thla ruk vêl a ni a. Lo neitu chuan a thlai chi chu favâng ruah hmasa tlâk hunah a tuh a, nipui ruah hnuhnûng sûr hnu lamah a seng ṭhîn a ni. (Mk. 4:28) Lo neitu dawhtheihna entawn chu kan tân a finthlâk ang. Mahse, chu chu thil awlsam a ni lo mai thei.

11. Engtin nge dawhtheihna chuan kan rawngbâwlnaah min ṭanpui ang?

¹¹ Ṭha famkim lo mihringte hian kan thawhrim rah seng nghâl kan duh ṭhîn a. Mahse, huanah thlai tam tak thar kan duh chuan lei laih te, thlai phun te, hlo thlawh te, leh tui pêkte a ngai a, chutianga kan ngaihsak reng a ngai a ni. Zirtîr siamnaah pawh kan thawhrim reng a ngai a. Kan Bible zirpuite thinlung aṭanga thlei bîk neihna leh mi dang huatna paih bosak tûrin hun tam tak kan pêk a ngai a. Kan dawhtheihna chuan harsatnate kan hmachhawn huna lunghnual mai lo tûrin min ṭanpui ang. Mi ṭhenkhatin ṭha taka min chhân lêt hunah pawh, dawhtheihna kan lantîr a ngai thei tho a ni. Kan Bible zirpui chu rinnaa ṭhang chho tûrin kan tilui thei si lo va. A châng chuan, Isua zirtîrte pawhin, a zirtîrna chu an hre thiam nghâl mai lo. (Joh. 14:9) A phuntu leh tui petu kan ni a, a ṭhantîrtu erawh Pathian a ni tih i hre reng ang u.—1 Kor. 3:6.

12. Ring lotu kan chhûngte hnêna thu kan hrilh hunah engtin nge dawhtheihna kan lantîr theih?

¹² Dawhtheihna lantîr harsa kan tih mai theihna dinhmun pakhat chu ring lotu kan chhûngte hnêna thu kan hrilh hunah a ni. Thuhriltu 3:7-a kan hmuh thu bul chuan  min ṭanpui thei a. Chutah chuan: “Ngawih hun a awm a, ṭawng hun a awm,” tiin a sawi. Nungchang ṭha lantîrna hmangin ngawi rengin thu kan hril thei a; mahse, thutak sawi theihna hun remchâng chu kan zawng reng tûr a ni. (1 Pet. 3:1, 2) Ṭhahnemngai taka kan thu hrilhna leh zirtîrnaah, kan chhûngte pawh tiamin, mi zawng zawng chungah dawhtheihna kan lantîr a ni.

13-14. Dawhtheihna chungchânga kan entawn theih entîrna ṭhenkhat chu engte nge ni?

¹³ Bible-a mi rinawmte leh tûn laia mi rinawmte entawn tûr siam aṭangin dawhtheihna kan zir thei a. Habakuka chuan suahsualna tâwp hun tûr chu a nghakhlel hle a; mahse, rinnghehna nei takin: “Ka vênnaah ka ding,” tiin a sawi a ni. (Hab. 2:1) Tirhkoh Paula chuan a rawngbâwlna ‘thawh zawh’ a duh tak zet thu a sawi a. Chuvângin, dawhthei takin ‘chanchin ṭha chu a hriattîr’ zawm zêl a ni.—Tirh. 20:24.

¹⁴ Thuhretu mi tlêm tê chauh awmna leh Kristian ni lo sakhaw lalna rama rawngbâwla awm Gilead school zir chhuak nupa tuak khat thiltawn hi han ngaihtuah teh. Mi tam tak chuan Bible zir chu an duh lo va. Kawng lehlamah, ram danga rawngbâwla awm Gilead school an kalpuite chuan Bible zirpui hmasâwn tak takte an neih thu an rawn hrilh ṭhîn a ni. Mahse, an rawngbâwlna biala mite’n an ngaithla duh lo chung pawhin, dawhthei takin thu an hril zawm zêl a. Hmasâwnna awm lo anga lang thu hrilhna biala kum riat chhûng zet thu an hrilh hnua an Bible zirpui pakhatin baptisma a chan chuan an lâwm hle a ni. Hmân lai leh tûn laia mi rinawmte entawn tûr siam chuan eng nge inanna a neih? Chûng mi rinawmte chu an inthlahdah lovin, an kut an sûm lo va, Jehova’n an dawhtheihna chu mal a sâwm a ni. ‘Rinna leh nghah peihna avânga thutiamte rochung tawhte zirtu’ nih i tum ṭheuh vang u.—Heb. 6:10-12.

15. Rinnain thu hril tûra kan tumna a tihngheh theih dân kawng khat chu eng nge ni?

¹⁵ Kan thuchah puanchhuah chu kan rin tlat avângin mi a tam thei ang berte hnêna hrilh kan duh a. Pathian Thua kan hmuh thutiamte pawh kan ring bawk. (Sâm 119:42; Is. 40:8) Bible hrilh lâwknate chu tûn laiah a thleng famkim mêk tih kan hmu a ni. Mite’n Bible fuihna an nunpui ṭan hian, nun ṭha zâwk nei tûra an inthlâk danglam dân chu kan hmu a. Chu chuan Lalram chanchin ṭha chu mi zawng zawng hriat ngai thuchah a ni tih min rin nghehtîr a ni.

16. Sâm 46:1-3 nêna inmilin, engtin nge Jehova leh Isua rinna chuan thu hrilh kan tumna chu a tihngheh?

¹⁶ Kan thuchah ken lo chhuahna Hnâr leh Lalrama Lal ni tûra Isua ruattu Jehova chu kan ring tlat bawk. (Joh. 14:1) Eng dinhmun pawh hmachhawn ila, Jehova chu kan inhumhimna leh kan chakna a ni reng ang. (Sâm 46:1-3 chhiar rawh.) Chu bâkah, Isua chuan vân aṭangin kan thu hrilh rawngbâwlna chu Jehova pêk thiltihtheihna leh thuneihna hmangin a kaihruai tih kan ring tlat bawk.—Mt. 28:18-20.

17. Thu kan hrilh zawm zêl a ngaih chhan entîrna pe rawh.

¹⁷ Rinna chuan Jehova’n kan thawhrimnate chu mal a sâwmin, a châng chuan, kan beisei loh kawngte pawhin mal a sâwm ang tih rinnghehna min neihtîr a. (Thur. 11:6) Entîr nân, nî tin hian mi sâng tam tak chuan nawrlirh hmanga kan thu leh hla pho chhuahte chu an hmu a. Chu thu hrilh dân chu a hlawhtling em? Hlawhtling teh meuh mai! November 2014 chhuak Kan Lalram Rawngbâwlna chuan Jehova Thuhretute chanchin ziak duhtu university zirlai pakhat chungchâng a târ  lang a ni. Ani chuan Kingdom Hall awmna a zawng hmu zo lo va; mahse, university hung chhûnga kan thu leh hla pho chhuah chu a hmu a, a thu ziah tûr atâna ṭanpuitu thute pawh a hmu bawk. A tâwpah, baptisma chang tawh Thuhretu rawn niin, tûnah chuan regular pioneer a thawk a. Chûng thiltawnte chuan Lalram thuchah hre duhtute an la awm tih a târ lan avângin thu hril zawm zêl tûrin min chêttîr a ni.

18. Engvângin nge Lalram thu hrilh rawngbâwlna chu Jehova duh anga hlen chhuah a ni ang tih kan chian theih?

¹⁸ Lalram thu hrilh rawngbâwlna chu a hun takah thawh zawh a ni ang tih kan chiang thei a. Nova hun laia thilthlengte kha han ngaihtuah teh. Jehova chuan Hun Vawng Diktu ṭha famkim a nihzia a lantîr tawh a. Ani chuan a hma kum 120 vêl aṭangin Tuilêt hun tûr chu a lo ruat tawh a ni. Kum sâwmbi tam tak a liam hnu chuan, Nova chu lawng tuk tûrin a hrilh a. Tuilêt hma kum 40 emaw, 50 emaw chhûngin, hna a thawk chhunzawm zêl a. Mite’n ṭha takin chhâng lêt lo mah se, Jehova’n lawng chhûnga ramsate khung tûra a hrilh hma chu vaukhânna thuchah a hrilh zawm zêl a ni. Chumi hnu chuan, a hun dik takah, “LALPAN ani chu a khâr khum ta a.”—Gen. 6:3; 7:1, 2, 16.

19. Kan kut kan sûm loh chuan eng nge kan beisei theih?

¹⁹ Nakin lawkah, Jehova’n Lalram thu hrilh rawngbâwlna chu titâwpin, Setana khawvêl tân ‘kawng a khâr’ ang a, felna khawvêl tharin a thlâk tawh ang. Chumi hun a thlen hma chu Nova te, Habakuka te, leh an kut sûm lotu mi dangte chu i entawn ṭheuh vang u. Ngaihven tlatna leh dawhtheihna neiin, Jehova leh a thutiamte chungah rinna nghet tak i nei chhunzawm zêl ang u.