1. Mi rinawmte chuan Jehova nên eng ang inlaichînna nge an neih theih?

 JEHOVA betu chhûngkaw zîngah chuan “thil siam zawng zawnga piang hmasa ber” Isua leh vântirhkoh tam tak an tel a. (Kol. 1:15; Sâm 103:20) Isua leia a awm lai khân, mi rinawmte chuan Jehova chu an Pa angin an thlîr thei tih a sawi a. A zirtîrte hnênah, Jehova chu “ka Pa, in Pa,” tiin a sawi a ni. (Joh. 20:17) Jehova hnêna inpumpêk a, baptisma kan chan hian, hmangaihna nei tak, chu chhûngkaw zîngah kan tel a ni.—Mk. 10:29, 30.

2. He thuziakah hian eng nge kan sawiho vang?

² Mi ṭhenkhat chuan Jehova chu hmangaihna nei tak Pa anga thlîr chu harsa an ti a. Mi dangte chuan an unaute chunga hmangaihna lantîr dân an hre lo pawh a ni thei. He thuziakah hian, Jehova chu kan hnaih theih leh hmangaihna nei tak Pa anga thlîr thei tûra Isua min ṭanpui dân kan sawiho vang a. Kan unaute kan cheibâwl dân kawnga Jehova kan entawn theih dânte pawh sawiho a ni bawk ang.

3. Engtin nge lal ṭawngṭaina chuan Jehova min hnaihtîr theih?

³ Jehova chu hmangaihna nei tak Pa a ni a. Isua chuan Jehova chu thunei tak leh mi ngawichawi tak ang ni lovin, pan nuam tak leh hmangaihna nei tak Pa angin a thlîr a, chutianga thlîr ve tûrin min duh a ni. Chu chu a zirtîrte hnêna ṭawngṭai dân a zirtîrnaah a lang a. Ani chuan lal ṭawngṭaina chu hetiang hian a ṭan a ni: “Kan Pa,” tiin. (Mt. 6:9) Isua chuan Jehova chu “Engkimtitheia,” “Siamtu,” a nih loh leh “Lalber, chatuana awm,” tia ko tûrin min hrilh thei a, chûngte chu Bible-a târ lan Pathian nihnate a nih avângin, chutianga koh chu a sual lo. (Gen. 49:25; Is. 40:28; 1 Tim. 1:17) Mahse, Isua chuan innêlna ṭawngkam “Pa,” tih chu a hmang a ni.

4. Engtin nge Jehova’n amah hnaih tûrin min duh tih kan hriat theih?

 ⁴ Jehova chu hmangaihna nei tak Pa anga thlîr chu harsa i ti em? Kan zînga ṭhenkhat chuan harsa an ti a. Min enkawl seiliantu kan pa chu ngilneihna nei lo tak a nih chuan, min hmangaihtu pa han mitthla chu a harsa thei a ni. Jehova’n kan rilru awm dânte a hre thiam vek tih hriat chu a va thlamuanthlâk tak êm! Ani chuan amah hnaih tûrin min duh a. Chuvângin, a Thu, Bible chuan heti hian min fuih a ni: “Pathian hnaih rawh u; tichuan, anin a hnaih ang che u,” tiin. (Jak. 4:8) Jehova chuan min hmangaih a, kan neih theih azawnga Pa ṭha ber nih a intiam a ni.

5. Luka 10:22-a sawi angin, engtin nge Isua’n Jehova hnaih tûra min ṭanpui theih?

⁵ Isua chuan Jehova hnaih tûrin min ṭanpui thei a. Ani chuan Jehova chu a hriat chian êm avângin, A miziate chu ṭha famkimin a lantîr thei a; chuvângin, heti hian a sawi a ni: “Tu pawh mi hmu chu Pa hmu a ni,” tiin. (Joh. 14:9) Isua chuan kan u angin, kan Pa, Jehova zaha a thu kan âwih theih dân te, a lâwm loh zâwng pumpelh theih dânte, leh a duhsakna dawn theih dân te min zirtîr a. Mahse, he leia a nun kawng zawh chuan Jehova ngilneihzia leh hmangaihna neihziate a târ lang lehzual a ni. (Luka 10:22 chhiar rawh.) Entîrna ṭhenkhat i lo ngaihtuahho vang u.

6. Jehova’n Isua ṭawngṭainate a ngaihthlâksak dân entîrna pe rawh.

⁶ Jehova chuan a fate thusawi chu a ngaihthlâksak ṭhîn a. A Fapa hmasaber thusawi a ngaihthlâk dân hi han ngaihtuah teh. Jehova chuan a Fapa leia a awm lai khân, a hnêna vawi tam tak a ṭawngṭai chu a ngaihthlâksak a. (Lk. 5:16) Isua’n a tirhkoh 12 a thlan hun ang chi thu tlûkna pawimawh tak a siam dâwna a ṭawngṭaina chu Jehova’n a ngaithla a. (Lk. 6:12, 13) Rilru manganga a awm laia a ṭawngṭaina pawh a ngaithlâksak bawk. Chu bâkah, Isua chuan phatsana a awm hma lawk khân, a hmachhawn tûr fiahna khirh tak chungchângah a Pa hnênah tih tak zetin a ṭawngṭai a. Jehova chuan Isua ṭawngṭainate chu a ngaihthlâksak mai ni lovin, a Fapa duh tak tichak tûrin vântirhkoh a tîr bawk a ni.—Lk. 22:41-44.

7. Engtin nge Jehova’n kan ṭawngṭainate min chhânsak tih kan hriat theih?

 ⁷ Jehova chuan tûn laia a chhiahhlawhte ṭawngṭaina pawh a ngaithla a, a hun takah leh a ṭha thei ang berin a chhâng ṭhîn a ni. (Sâm 116:1, 2) India rama Unaunu pakhatin chumi dikzia mi mal taka a tawn dân hi han ngaihtuah teh. Lungkhamna nasa tak a neih avângin hrehawm a ti hle a, chumi chungchângah Jehova hnênah tih tak zetin a ṭawngṭai a. Unaunu chuan heti hian a ziak a ni: “Lungkhamna leh manganna chinfel dân târ lanna kum 2019, May thla chhuak JW Broadcasting^® program chu ka mamawh chiah a ni a. Chu chu ka ṭawngṭainate chhânna a ni,” tiin a sawi.

8. Eng kawngin nge Jehova’n Isua chungah hmangaihna a lantîr?

⁸ Jehova chuan Isua’n a lei lam mawhphurhna harsa tak a thawh chhûnga a chunga hmangaihna leh ngaihsakna a lantîr ang bawkin, keini pawh min hmangaihin min ngaihsak hle a. (Joh. 5:20) Ani chuan Isua thlarau lam te, rilru lam te, leh tisa lam mamawh zawng zawng chu a phuhhrûksak a. Chu bâkah, a Fapa chu a hmangaihzia leh a chunga a lâwmzia pawh hrilh lovin a awm lo. (Mt. 3:16, 17) Isua chuan vâna a Pain a hmangaih reng tih a hriat avângin mal nia inhriatna a nei ngai lo.—Joh. 8:16.

9. Jehova’n min hmangaih tih eng finfiahna nge kan neih?

⁹ Isua angin, kan za hian Jehova hmangaihna chu kawng tam takin kan dawng ṭheuh va. Heihi han ngaihtuah teh: Jehova chuan a ṭhian min nihtîr theih bâkah, kan mangan huna min tihlimtu leh min chaktu unau tam tak min pe a ni. (Joh. 6:44) Thlarau lam chaw pawh hnianghnâr takin min pe a. Kan nî tin tisa lam mamawhte ngaihsak tûrin min ṭanpui bawk. (Mt. 6:31, 32) Jehova min hmangaihzia kan ngaihtuah hian, amah kan hmangaihna a pung lehzual a ni.

10. Jehova’n kan unaute a cheibâwl dân aṭangin eng nge kan zir theih?

¹⁰ Jehova chuan kan unaute chu a hmangaih a. Mahse, kan thlarau lam chhûngkuaa unaute hmangaih leh an chunga hmangaihna lantîr chu awlsam kan ti reng lo thei a. Dik tak chuan, kan za hian kan hnam dânte leh kan ṭo bulte chu a inang lo ṭheuh va. Chu bâkah, thil kan tisual palh theiin, chûngte chuan mi dangte rilru a tinuam lovin, a tihrehawm thei a ni. Chuti chung pawhin, kan thlarau lam chhûngkaw hmangaihna chu kan tinghet lehzual thei a ni. Engtin nge? Kan unaute chunga hmangaihna lantîrna kawnga kan Pa vâna mi entawnna hmangin a ni. (Eph. 5:1, 2; 1 Joh. 4:19) Jehova entawn tûr siam aṭanga kan zir theihte chu i lo enho vang u.

11. Engtin nge Isua’n Jehova “khawnaihna” a lantîr?

¹¹ Jehova chuan “khawngaihna” a lantîr a. (Lk. 1:77) Mi khawngaih thei tak chuan hrehawm tuarte a hmuhin a khawngaih a, ṭanpui leh thlamuan theih dân kawng a zawng ṭhîn. Isua’n mite a cheibâwl dânah Jehova’n mite chunga khawngaihna a neihzia a lang a. (Joh. 5:19) Ṭum khat chu, Isua’n mipui a hmuhin, “vêngtu nei lo berâmte anga hrehawm leh darha an awm avângin a khawngaih ta êm êm a.” (Mt. 9:36) Isua khawngaihna chu rilrua khawngaihna neih mai aiin a thûk a. Ani chuan dam lote a tidam a, ‘thawk rim leh phurrit phurte’ hnênah hahdamna a pe a ni.—Mt. 11:28-30; 14:14.

12. Khawngaihna kan lantîr theih dân entîrna pe rawh.

¹² Kan unaute chunga khawngaihna kan lantîr hmain, an hmachhawn harsatnate kan ngaihtuah hmasat a ngai a. Entîr nân, unaunu chuan hrisêlna lamah harsatna lian tak a nei thei a. Chumi chungchâng chu vawi khat mah sawi chhuak lo mah se, ṭanpuina ṭhenkhat  a dawnte avângin a lâwm hle ngei ang. Engtin nge a chhûngte tisa lam mamawhte chu a ngaihsak? Ei rawng bâwlsak emaw, in tihfaisak emaw ang chi ṭanpuina tlêm azâwng a mamawh ang em? A nih loh leh, unaupa chuan a hna a chân a. Hna dang a hmuh leh hmaa a lo khawsak theih nân, mi dangte hriat lohvin sum tlêm azâwng kan ṭanpui theih ang em?

13-14. Engtin nge Jehova anga thilphalna kan lantîr theih?

¹³ Jehova chu a thilphal a. (Mt. 5:45) Kan unaute’n an chunga khawngaihna lantîr tûra ṭanpuina min dîl hun thleng kan nghâk tûr a ni lo. Jehova angin, hma kan la hmasa thei a ni. Ani chuan kan dîl pawh ngai lovin, nî tin kan chungah nî a chhuahtîr a! Ni lum nuam tak chu lâwm nachâng hre mite hnênah chauh ni lovin, mi zawng zawng hnênah a pe a. Kan mamawhte min pein, kan chungah a hmangaihna a lantîr tih i pawm a ni lâwm ni? Jehova chu a ngilneihna leh a thilphalna avângin kan va hmangaih tak êm!

¹⁴ Kan unau tam tak chuan kan Pa vâna mi entawnin, thilphalna lantîrna kawngah hma an la hmasa a. Entîr nân, kum 2013 khân, Philippines ramah Super Typhoon Haiyan thlipui avângin chhiatna nasa tak a thleng a. Kan unau tam tak chuan an in leh thilneihte chu an chân a. Mahse, khawvêl puma an thlarau lam chhûngkaw zînga mite chu anmahni ṭanpui tûrin an kal khâwm a. Unau tam tak chuan sum leh paite an pein, in saknaahte theih tâwp chhuahin an tel a, kum khat pawh a liam hmain in 750 vêl chu siam ṭhat, a nih loh leh sak ṭhat leh a ni! COVID-19 hripui a lên chhûng hian, Thuhretute chuan an unaute chu theih tâwp chhuahin an ṭanpui bawk. Kan thlarau lam chhûngkuaa unaute kan ṭanpui nghâl vat hian, kan hmangaihzia kan lantîr a ni.

15-16. Luka 6:36-a sawi angin, kan Pa vâna mi kan entawn theih dân kawng pawimawh tak chu eng nge ni?

¹⁵ Jehova chu mi khawngaih thei tak leh ngaihdam peih tak a ni a. (Luka 6:36 chhiar rawh.) Nî tin hian kan Pa vâna mi khawngaihna kan dawng a ni. (Sâm 103:10-14) Isua hnungzuitute chu ṭha famkim lo ni mah se, ani chuan an chungah khawngaihna lantîrin, a ngaidam ṭhîn a. Chu bâkah, kan sualte  ngaihdam a nih theih nân, inhuam takin a nun a pe hial a ni. (1 Joh. 2:1, 2) Jehova leh Isua chu khawngaihna nei tak leh ngaihdam peih tak an nih avângin an lama hîp niin i inhria a ni lâwm ni?

¹⁶ Kan “inngaidam tawn” hian kan thlarau lam chhûngkuaa awm hmangaihna chu kan tinghet a ni. (Eph. 4:32) Ni e, a châng chuan, mi dangte ngaihdam chu thil harsa tak a nih theih avângin, hemi kawngah hian theih tâwp kan chhuah zawm zêl a ngai a. Unaunu pakhat chuan Vênnainsâng pakhata “Inngaidam Tawn Rawh U,” tih thuziakin chutianga ti tûrin a ṭanpui tih a sawi. * Ani chuan: “Chu thuziak zirna chuan mi dangte ngaihdam chu mahni ngeiin ka hlâwkpui tih hre thiam tûrin min ṭanpui a ni. Chu thuziakah chuan mite ngaihdam duhna neih chu an thil sual tihte kan pawmpui emaw, a tichhiat tâkte chu kan ngaizam mai emaw tihna a ni lo. Chu aiin, ngaidam tih chu chutiang thil sual tihna avânga lo awm thinrimnate chu liamtîr a, rilru hahdam taka awm hi a ni,” tiin a ziak a. Kan unaute kan ngaihdam hian, anni chu kan hmangaihin, kan Pa vâna mi, Pathian Jehova kan entawn tihna a ni.

17. Matthaia 5:16-a sawi angin, engtin nge kan Pa vâna mi chu kan chawimawih theih?

¹⁷ Hmangaihna nei tak khawvêl pum huap chhûngkuaa kan tel thei chu chanvo hlu tak a ni a. Pathian kan biaknaah mi a tam thei ang ber lo tel tûrin kan duh a. Chu chu hre rengin, Jehova mite leh kan Pa vâna mi chunga nghawng ṭha lo nei thei thil eng mah ti lo tûrin kan fîmkhur tûr a ni a. Mite chu chanchin ṭha avânga hîpa an awm theih nân, nungchang mawi lantîr chu kan tum tlat tûr a ni.—Matthaia 5:16 chhiar rawh.

18. Huaisen taka thu hril tûrin engin nge min ṭanpui thei?

¹⁸ A châng chuan, kan Pa vâna mi thu kan âwih avângin, mite chuan min sawisêlin, min tiduhdah hial pawh a ni thei. Mi dangte hnênah kan rinna chungchâng kan hrilh ngam lo a nih chuan, eng tin nge ni ang? Jehova leh a Fapain min ṭanpui ang tih kan ring tlat thei a. Isua chuan a zirtîrte chu an thusawi tûrte leh an  sawi dân tûrte lungkham lo tûrin a hrilh a ni. Engvângin nge an lungkham a ngaih loh? “In sawi tûr chu a hun takah chuan a hriattîr dâwn si che u a. A sawitu chu nangni in ni dâwn si lo va, in Pa thlarauvin nangmahniah a sawi zâwk dâwn a ni,” tiin a hrilh a ni.—Mt. 10:19, 20.

19. Huaisen taka thu hrilhtu tu emaw chungchâng entirna pe rawh.

¹⁹ Unau Robert-a entawn tûr siam hi han ngaihtuah teh. Hun eng emaw kal ta khân, Pathian thu lama hriatna nei tlêm tak Bible zirlai ṭantîr mai a la ni a, chutih lai chuan, South Africa rama sipai rorêlna hmaah a ding a. A Kristian unaute a hmangaih avânga tualdâwiha awm reng a duh thu rorêltu hnênah chuan huaisen takin a hrilh a ni. Kan thlarau lam chhûngkuaa a hmun chan chu a va ngaihlu tak êm! Rorêltu chuan “I unaute chu tute nge an nih?” tiin rin loh takin a zâwt thut mai a. Unau Robert-a chuan chutianga a zawh chu a ring miah lo; mahse, chumi nîa nichâng chu a rilruah a lo lang nghâl a. Chu chu Matthaia 12:50-a thu: “Tu pawh ka Pa vâna mi duh zâwng ti apiang chu ka unau te, ka farnu te, ka nu te an ni,” tih hi a ni a. Unau Robert-a chu Bible zirlai thar mai ni mah se, Jehova thlarau thianghlim chuan chu zawhna leh beisei loh zawhna dang tam tak chhâng thei tûrin a ṭanpui a ni. Jehova chuan Unau Robert-a chu a chhuang hle ngei ang! Keini pawh dinhmun harsa tak kâra huaisen taka thu kan hrilh theih nâna amah kan rinchhan hian min chhuang hle a ni.

20. Eng nge tih kan tum tlat ang? (Johana 17:11, 15)

²⁰ Hmangaihna nei tak thlarau lam chhûngkuaa kan tel theih avânga malsâwmna kan dawnte chu i ngaihlu zawm zêl ang u. Pa azawnga Pa ṭha ber kan neih bâkah, A hnêna inpumpêk unau tam tak kan nei bawk a. Chûngte chu thil pângngai ve mai angin kan ngai tûr a ni lo. Setana leh a hnungzuitute chuan kan Pa vâna mi chungah rinhlelhna nei tûr leh kan inpumkhatna chu tihchhiat an tum a. Mahse, Isua chuan min vêng tûr leh inpumkhata awm reng tûrin kan Pa Jehova hnênah ṭawngṭaiin min dîlsak a ni. (Johana 17:11, 15 chhiar rawh.) Jehova chuan chu ṭawngṭaina chu a chhâng a. Isua angin, kan Pa vâna mi hmangaihna leh min ṭanpuinate chu i ringhlel ngai suh ang u. Chu aiin, kan thlarau lam chhûngkua chu hnaih zawm zêl i tum tlat zâwk ang u.