1. Hmangaih tak hnawhchhuah tawhnain unau ṭhenkhat chungah eng nghawng nge a neih?

 I HMANGAIH tak tu emaw chu kohhran aṭanga hnawhchhuah a ni tawh ngai em? Chu chu lungchhiatthlâk tak a ni thei! Unanu Hilda-i * chuan “Kan inneih aṭanga kum 41 a liam hnuah, ka pasal rinawm takin min boralsan a, chu chu ka thiltawn azawnga tawrh hrehawm ber niin ka lo ngai a. Mahse, ka fapain a nupui fanau leh thutak a chhuahsan chuan, chu chu a lêtin tawrh harsa ka ti zâwk,” tiin a sawi.

2-3. Sâm 78:40, 41-a sawi angin, engtin nge Jehova chu a chhiahhlawhte’n an kalsan hunah a awm?

² A vân lam chhûngkaw zînga vântirhkoh ṭhenkhatin an kalsan huna Jehova rilru nat dân tûr chu han ngaihtuah teh. (Jud 6) A hmangaih tak a mi Israelte’n a chungah vawi tam tak an hel laia a rilru nat dân tûr pawh han mitthla teh. (Sâm 78:40, 41 chhiar rawh.) Hmangaihna nei tak kan Pa vâna mi chu i hmangaih tak tu emawin a kalsan hunah a rilru a na hle tih i chiang thei a ni. Ani chuan i tawrhnate chu a hre thiam a. I mamawh fuihna leh ṭanpuinate pawh hmangaihna nei takin a pe ang che.

³ He thuziakah hian, chutiang chânna kan hmachhawn hunah Jehova ṭanpuina dawng thei tûra kan tihtheihte sawiho a ni ang a. Chutiang harsatna hmachhawntu kohhrana unaute kan ṭanpui theih dân pawh kan sawiho bawk ang. Tûnah chuan, kan pumpelh ngai a thim zâwnga ngaihtuahna chu i lo sawiho hmasa ang u.

4. Engtin nge nu leh pa tam tak chu an fate’n Jehova an kalsan hian an awm?

⁴ Nu leh pate tân chuan an fanu, a nih loh leh fapa duh takin Jehova a kalsan hian, an fa chu thutaka awm reng tûrin theih  tâwp chhuah tâwk lo nia inhriatna neih chu thil pângngai tak a ni a. Unau Luke-a chuan a fapa hnawhchhuah a nih hnu chuan: “Mahni inthiam lohna ka nei a. Mumang ṭha lote ka nei hial a. A châng chuan, ka thinlung na lutuk hi ka ṭap chhuak hlawl ṭhîn,” tiin a sawi. Chutiang dinhmun hmachhawntu Unaunu Elizabeth-i chuan: “Nu ka nih angin, eng thil nge ka lo tihsual tâk le? Ka fapa thinlungah thutak ka lo tuh nghet lo ni hian ka inhria,” tiin rilru na ti takin a sawi a ni.

5. Miin Jehova a kalsan hian chu chu tu mawhphurhna nge?

⁵ Jehova chuan zalên taka duh thlan theihna min pe ṭheuh tih kan hriat a ngai a. Chu chu a thu kan âwih dâwn nge, dâwn lo tih chungchângah duh kan thlang thei tihna a ni. Ṭha taka enkawl seilen ni lêm lo ṭhalai ṭhenkhat chuan Jehova rawngbâwl tûrin thu tlûkna an siam a, rawngbâwlna hlawhtling tak an nei a ni. Kawng leh lamah chuan, nu leh pate’n theih tâwp chhuahin Bible thu bulte nêna an enkawl seilen ṭhalaite chuan an lo puitlin chhohvin thutak an chhuahsan a ni. A tâwpah chuan, mi mal tin hian, Jehova rawng kan bâwl dâwn nge, dâwn lo tih chungchângah thu tlûkna kan siam a ngai a ni. (Jos. 24:15) Chuvângin, rilru hrehawma awm nu leh pate u, chûng chhiatna lo thlengte avângin mahni inmawhpuh suh u!

6. Nu emaw, pa ber emawin Pathian a kalsan hian, engtin nge an fate chungah nghawng a neih theih?

⁶ A châng chuan, nu ber emaw, pa ber emawin thutak leh a chhûngkua a kalsan hial pawh a ni thei. (Sâm 27:10) Chu chu entawn atâna nu leh pate thlîrtu naupangte tân a lungchhiatthlâk hle thei a. A pa hnawhchhuah tâwktu Unaunu Esther-i chuan: “Ka pa chu thutak aṭangin a tawlh bo mai a ni lo tih ka hriat avângin ka ṭap zing hle a. A duh thua Jehova kalsan a ni a. Ka pa chu ka hmangaih êm êm a, hnawhchhuah a nih tâkah chuan, a dam leh dam loh ngaihtuahin ka rilru a hah hle a. Ka rilru a chiaiin ngaihtuah mumal pawh ka nei thei lo,” tiin a sawi.   

7. A nu emaw, a pa emaw hnawhchhuah tâwk ṭhalai chunga Jehova rilru put hmang chu eng nge ni?

⁷ Ṭhalaite u, i nu emaw, i pa emaw hnawhchhuah a nih chuan kan tawrhpui tak zet che u a! Jehova pawhin a tawrhpui êm êm che u tih hre reng ang che u. Ani chuan a hmangaih che uin, in rinawmna avângin a lâwm hle a, keini in unaute pawh chutiang bawk chu kan ni. I nu emaw, i pa emaw thu tlûkna siam chu i mawhphurhna a ni lo. A chunga târ lan tawh angin, Jehova chuan mi tinte hnênah duh thlan theihna a pe ṭheuh va. Jehova hnêna inpumpêka baptisma chang tawh zawng zawngte chuan ‘mahni phur an phur ṭheuh dâwn a ni.’—Gal. 6:5.

8. Chhûngkuaa rinawmna vawngtute chuan Jehova hnêna an hmangaih tak lo kîr leh hun an nghah laiin eng nge an tih theih? (“ Jehova Hnênah Kîr Leh Ang Che,” tih bâwm chu en rawh.)

⁸ I hmangaih takin Jehova a kalsan a nih chuan, engtik nîah emaw chuan Jehova hnêna a rawn kîr leh i beisei chu hriatthiamawm tak a ni. Chutih hun chhûng chuan eng nge i tih theih? I rinna nghet reng tûra i tih theih apiang ti ang che. Chutianga tiin, i chhûngkaw zînga mi dangte tân leh hnawhchhuah tâwka tân ngei pawh entawn tûr ṭha i siam a ni ang. Rilru lama i tawrhnate hmachhawn thei tûra i mamawh chakna pawh i nei bawk ang. A nih chuan, i rinna nghet reng tûrin eng nge i tih theih?

9. Eng kawngtein nge Jehova hnên aṭanga chakna kan neih theih? (“ I Hmangaih Takin Jehova A Kalsan Chuan Thlamuan Thei Tak Bible Chângte,” tih bâwm chu en bawk rawh.)

⁹ Thlarau lam hun duan ṭha neiin, zui tlat ang che. Mahni leh chhûngkuaa mi dangte tihchak zawm zêl chu thil pawimawh tak a ni a. Chu chu engtin nge i tih theih? Bible chhiar leh chhût ngun nâna hun duan ṭha neiha zui tlatna leh inkhâwma tel ziahna hmangin Jehova hnên aṭangin chakna i hmu thei a ni. A pa leh a u hmeichhiain thutak an chhuahsan chuan, Unaunu Joanna-i chuan: “Bible-a Abigaili te, Estheri te, Joba te, Josefa te, leh Isua chanchinte ka chhiar hian rilrua thlamuanna ka nei a. An entawn tûr siamte chuan thinlung leh rilrua ka tawrhte tirehtu ngaihtuahna ṭhate min neihtîr a. Chu bâkah, kan tûn lai hlate pawh hian mi tichak tak zetin ka hria,” tiin a sawi.

10. Sâm 32:6-8-nain rilru hahna hmachhawn dân chungchâng eng nge a târ lan?

¹⁰ I lungkhamnate chu Jehova hnênah leih bua la. Rilru hah taka i awm hunah, a hnêna ṭawngṭai chu bânsan suh. Hmangaihna nei tak kan Pathian hnênah dinhmunte chu a thlîr anga thlîr thiam tûr leh ‘i kalna tûr kawng entîr chea; rem ruatsak zêl tûr chein’ ngên ang che. (Sâm 32:6-8 chhiar rawh.) I rilru chhûngrîla awmte Jehova hnêna hrilh chu nuam i ti lo hle pawh a ni thei. Mahse, ani chuan i rilru hahnate chu a hriatthiampui tak zet che a. Chu bâkah, a hmangaih êm êm chein, a hnêna i thinlung phawrh tûrin a fuih che a ni.—Ex. 34:6; Sâm 62:7, 8.

11. Hebrai 12:11-a sawi angin, engvângin nge hmangaihna nei taka Jehova zilhna pêk chu kan rin tlat ang? (“ Hnawhchhuahna—Hmangaihna Nei Taka Jehova Zilhna,” tih bâwm chu en bawk rawh.)

¹¹ Kohhran upate thu tlûkna siam chu thlâwp ang che. Hnawhchhuahna hi Jehova ruahmanna siam zînga pakhat a ni a. Hmangaihna nei taka a ruahman, chu siamremna chu thil sual  titu pawh tiamin, mitin tâna ṭha ber tûr a ni. (Hebrai 12:11 chhiar rawh.) Kohhrana unau ṭhenkhat chuan zilhna pêk chungchânga upate thu tlûkna siam chu dik tâwk lo niin an sawi mai thei. Mahse, chutiang mite chuan thil tisualtu thiltih dik lote chu an sawi lang duh lo tlângpui ṭhîn tih hre reng ang che. Thil nih dân engkim kan hre vek lo va. Chuvângin, rorêlna thiltiha tel upate chuan Bible thu bulte chu theih tâwp chhuaha zuiin, “LALPA tân” ro an rêl a ni tih rin chu a finthlâk hle.—2 Chro. 19:6.

12. Unau ṭhenkhatin zilhna chungchânga Jehova ruahmanna an thlâwp avângin eng hlâwknate nge an hmuh?

¹² Kohhran upate’n i hmangaih tak tu emaw hnawtchhuak tûra thu tlûkna an siam i tlâwp tlatna chu, dik tak chuan, ani chu Jehova hnêna lo kîr leh tûrin i ṭanpui tihna a ni. A chunga târ lan tâk Elizabeth-i chuan: “Kan fapa be pawh miah lova awm chu a hrehawm tak zet a. Mahse, Jehova hnêna a lo kîr leh hnu chuan, hnawhchhuah a phû rêng a ni tih a sawi a. A hnuah, hnawhchhuah a nih laia a thil zirte avângin a lâwm hle a. Jehova zilhna chu englai pawhin a dik tih ka hre ta a,” tiin a sawi. A pasal Mar-a pawhin: “Kan fapain lo kîr leh a duh chhan pakhat chu keini a nu leh pate hian kan tih tûr dik tak kan tih vâng a ni tih a hnuah min hrilh a. Jehova’n thuâwih tûra min ṭanpui avângin ka lâwm tak zet,” tiin a sawi belh bawk.   

13. Rilru hahna chingfel tûrin engin nge ṭanpui thei che?

¹³ I rilru hrehawm dân hriatthiampuitu ṭhiante chu bia la. Rilru put hmang dik nei tûra ṭanpui theitu Kristian mi puitlingte chu kâwm ang che. (Thuf. 12:25; 17:17) Kan târ lan tâk Unaunu Joanna-i chuan: “Chhûngrilah, mal nia inhriatna ka nei a. Mahse, rinchhan tlâk ṭhiante biakna chuan chumi hneh tûrin min ṭanpui,” tiin a sawi. A nih leh, kohhrana unau ṭhenkhatin i rilru tihrehawm zual zâwngin thu an sawi niin lang ta se, engtin nge ni ang?

14. Engvângin nge ‘indawh tawna inngaihdam tawn’ chu thil pawimawh tak a nih?

¹⁴ I unaute chungah dawihtheihna lantîr ang che. A nihna takah chuan, unau zawng zawngin a êng zâwngin an chhâng lêt vek lo vang. (Jak. 3:2) Kan za hian ṭha famkim lo kan nih avângin, unau ṭhenkhatin sawi tûr ber pawh an hre lo emaw, tum loh takin i rilru tina zâwngin thu an sawi emaw a nih pawhin mak ti suh ang che. Tirhkoh Paula he fuihna hi hre reng ang che: “Tu pawhin tu chungah pawh thupawi nei ang ula, indawh tawnin inngaidam tawn ula,” tih hi. (Kol. 3:13) A chhûngkhat hnai hnawhchhuah tâwk unaunu pakhat chuan: “Jehova chuan thil dik tih tumtu kan unau ṭha famkim lote chu ngaidam tûrin min ṭanpui a ni,” tiin a sawi. A nih chuan, kohhranin chhûngkaw zînga mi rinawmte ṭanpui tûrin eng nge a tih theih?

15. Tûn hnai maia an hmangaih tak hnawhchhuaha awm chhûngte chu engtin nge kan ṭanpui theih?

¹⁵ Chhûngkaw zînga mi rinawmte chu ṭha takin lâwm ang che. Unaunu Miriam-i chuan a nau hnawhchhuah a nih hnu chuan inkhâwm kal pawh nuam a tih loh thu a sawi a. Ani chuan: “Mite sawi tûr chu ka ngaithla ngam lo. Mahse,  hnawhchhuah tâwk ka nau avânga lungnih lohna lantîr lo va, ka lungngaihna min tawrhpuitu ṭhian ṭha takte an awm a. Mahni chauhva lungngaia ka awm loh avângin an chungah ka lâwm hle,” tiin a sawi. Unaunu dang pakhat chuan: “Kan fapa hnawhchhuah a nih hnu chuan, ṭhian ṭhate chuan min rawn thlamuan a. Ṭhenkhat chuan sawi tûr ber pawh an hre lo tih min hrilh a. Min ṭahpui a, fuihna lehkhate min pe a. An thiltih chuan min ṭanpui tak zet!” tiin a sawi.

16. Engtin nge kohhranin ṭanpuina an pêk zawm zêl theih?

¹⁶ Chhûngkaw zînga mi rinawmte chu ṭanpui zawm zêl ang che. Anni chuan i hmangaihna leh i fuihnate chu tûn hma zawng aiin an mamawh a. (Heb. 10:24, 25) Hnawhchhuah tâwktu chhûngkaw zînga mite chuan kohhrana unaute’n an kâwm duh lo anga inhriat chângte pawh an nei a. Chutianga inhriatna neia an awm chu kan duh lo a ni. Ṭhalaite chuan an nu leh pate’n thutak an chhuahsan hian fakna leh fuihna an mamawh lehzual a. Unaunu Maria-i pasal chuan hnawhchhuah a tawh bâkah, a chhûngkua a kalsan a, Maria-i chuan: “Ka ṭhian ṭhenkhat chuan ka inah lo kalin ei rawngte min bâwlsak a, ka fate nên inzirnate min neihpui a. Min ṭahpuiin min tawrhpui tak zet a. Mite’n ka chungchâng dik lo taka an sawi hian ka tân min sawisak ṭhîn a. Ka rilru an chhâwk zângkhai hle!” tiin a sawi.—Rom 12:13, 15.

17. Engtin nge kohhran upate chuan hmangaihna nei taka ṭanpuina an pêk theih?

¹⁷ Kohhran upate u, chhûngkaw zînga mi rinawmte tihchak theihna hun remchâng chu hmang ṭangkai ang che u. An hmangaih takin Jehova a kalsan avânga rilru hrehawma awm in Kristian unaute thlamuan tûrin mawhphurhna in nei lehzual a ni. (1 Thes. 5:14) Kristian inkhâwm ṭan hma leh bân hnuahte anmahni thlamuan tûrin hma la hmasa ang che u. Anni chu va tlawhin ṭawngṭaipui ṭhîn bawk ang che u. Rawngbâwlnaah thawhpui ula, a nih loh leh chhûngkuaa Pathian biakna in neih hunah sâwm ṭhîn ang che u. Nangni thlarau lama berâm vêngtute hian Jehova berâm lungchhiate chungah khawngaihna te, hmangaihna te, leh an mamawh ngaihsaknate chu in lantîr a ngai a ni.—1 Thes. 2:7, 8.

18. Petera thawn hnih 3:9-a sawi angin, Pathianin thil sual titute chu eng ti tûrin nge a duh?

¹⁸ Jehova chuan ‘tu ma boral duh lo vin, mi zawng zawng lo sim a duh a.’ (2 Petera 3:9 chhiar rawh.) Mi chuan thil sual lian tak ti palh thei mah se, a nunna chu Pathian tân a la hlu reng a ni. Jehova’n mi sualte nuna atâna man tam tak—a hmangaih tak a Fapa tlanna inthâwina—pea min lei hi han ngaihtuah teh. Chûng mite chu a lama lo kîr leh tûrin a duh ngawih ngawih a. Isua tehkhin thua kan hmuh fapa tlân bo angin, an lo kîr leh ang tih a beisei tlat a ni. (Lk. 15:11-32) Thutak chhuahsantu mi tam tak chu a hnuah hmangaihna nei tak an Pa vâna mi hnênah an lo kîr leh a. Kohhrana unau zawng zawng pawhin chûng mite chu lâwm takin an lo pawm a. Kan sawi tâk Unaunu Elizabeth-i chuan a fapa a inlamlêt leh avângin a lâwm hle a. A han ngaihtuah lêt leh chuan, heti hian a sawi a ni, “Beiseina hloh lo tûra min fuihtute chungah ka lâwm tak zet a ni,” tiin.

19. Engvângin nge Jehova chu kan rinchhan zawm zêl theih?

¹⁹ Pathian Jehova chu englai pawhin kan rinchhan thei a. Ani chuan kan chhiatna tûrin kaihhruaina min pe ngai lo vang. Ani chu amah hmangaiha chibai bûktu zawng zawng chunga hmangaihna thûk tak neitu a nih bâkah, mi thilphal tak leh khawngaihna ngah tak Pa a ni a. I lungngaih mangan hunah a thlahthlam ngai lo vang che tih ring tlat ang che. (Heb. 13:5, 6) Kan târ lan tâk Unau Mark-a chuan: “Jehova’n min thlahthlam ngai lo va. Harsatnate kan tawh laiin min hlat ngai hek lo,” tiin a sawi. Jehova chuan ‘thiltihtheihna nasa tak’ chu a pe chhunzawm zêl ang che. (2 Kor. 4:7) Ni e, i hmangaih takin Jehova a kalsan hunah pawh i rinawm tlatin, beiseina i vawng reng thei a ni.