1. Engvângin nge mi tam takin mi dangte rin harsa an ti chu mak kan tih loh?

 SETANA khawvêla mite chuan rin tûr ber an hre lo. Sumdâwng mi te, politics hruaitu te, leh sakhaw hruaitute thiltihte chuan anni chu a tilungni lo fo va. Mi tam tak chuan an ṭhian te, vêng te, leh chhûngte pawh rin harsa an ti a ni. Chûng chu mak kan ti tûr a ni lo. Bible chuan: “Ni hnuhnûngahte chuan . . . [mite chu] . . . thianghlim lo te, . . . sawichhetute, . . . vervêkte” an ni ang tih a sawi lâwk a. Thu danga sawi chuan, mite chu rinchhan tlâk loh he khawvêl pathian Setana ang an ni ang tihna a ni.—2 Tim. 3:1-4; 2 Kor. 4:4.

2. (a) Tute nge kan rin pumhlûm theih? (b) Mi ṭhenkhatin eng nge an ngaihtuah mai theih?

² Kristiante kan nih angin, Jehova kan ring pumhlûm thei tih kan hria a. (Jer. 17:7, 8) Ani chuan min hmangaihin, a ṭhiante chu a ‘kalsan ngai lo’ tih kan ring nghet tlat a ni. (Sâm 9:10) Kan tâna a nun petu Krista Isua chu kan ring thei bawk. (1 Pet. 3:18) Chu bâkah, Bible-in kaihhruaina rinchhan tlâk min pe tih mahni thiltawn ngei aṭangin kan hria a ni. (2 Tim. 3:16, 17) Pathian Jehova, Isua, leh Bible chu kan ring tlat thei tih kan chiang a. Mahse, mi tam tak chuan kohhrana unaute chu eng lai pawha rin theih an nih leh nih loh chungchâng an ngaihtuah mai thei. A chhânna chu ring thei tih a nih chuan, engvângin nge anni chu kan rin theih?

3. Eng chanvo ropui tak nge kan neih? (Marka 10:29, 30)

³ Jehova chuan khawvêl pum huapa amah betu chhûngkaw zînga tel tûrin min thlang a. Chu chu hlâwkna tam tak thlentu chanvo ropui tak a ni. (Marka 10:29, 30 chhiar rawh.) Khawvêl pum huapah, keimahni anga Jehova hmangaihtute leh theih tâwp chhuaha a tehna mila nun tumtu unaute kan nei a.  Kan ṭawng te, hnam dân te, leh inthuam dânte chu inang lo mah se, vawi khat kan inhmuhna aṭangin kan inngaina nghâl a. A bîk takin, anmahni nêna hmangaihna nei tak kan Pa vâna mi chawimawi leh biak chu nuam kan ti hle a ni.—Sâm 133:1.

4. Engvângin nge kan unaute chu kan mamawh?

⁴ Tûn hma zawng aiin, kan unaute nêna kan inlungrual lehzual a ngai a. A châng chuan, anni chuan kan phurrit takte chu min chhâwk zângkhai ṭhîn a. (Rom 15:1; Gal. 6:2) Jehova rawngbâwlnaa tel zawm zêl tûr leh thlarau lama chak reng tûrin min fuih bawk a ni. (1 Thes. 5:11; Heb. 10:23-25) Kan hmêlmate—Diabol-Setana leh a khawvêl suaksual tak—laka ding nghet tlat tûra min ṭanpuitu kohhran vênhimna nei lo ta ila, kan awm dân tûr chu han ngaihtuah teh. Setana leh a thununna hnuaia awmte chuan Pathian chhiahhlawhte chu an bei thuai ang. Chutih hunah chuan, min ṭanpuitu unaute kan neih avângin kan va lâwm dâwn tak êm!

5. Engvângin nge mi ṭhenkhatin an unaute chu rin harsa an tih mai theih?

⁵ Mi ṭhenkhat chuan an Kristian unaute chu thurûkte an vawn loh avâng leh an thutiamte an hlen loh avângin rin harsa an ti a. A nih loh leh, kohhrana tu emawin an rilru tinatu thu a sawi emaw, thil a ti emaw pawh a ni thei. Chutiang thiltawn chuan mi dangte rin a tiharsa thei a ni. A nih leh, engin nge kan unaute ring tûra min ṭanpui thei?

6. Engtin nge hmangaihnain mi dangte ring tûra min ṭanpui theih? (1 Korinth 13:4-8)

⁶ Hmangaihna chu rinna kan neih chhan bul ber a ni a. Korinth thawn khat bung 13-na chuan mi dangte ring tûr,  a nih loh leh ring leh tûra min ṭanpui theitu hmangaihna hmêlhmang tam tak a târ lang a ni. (1 Korinth 13:4-8 chhiar rawh.) Entîr nân, châng 4-na chuan “hmangaihnain a dawhthei a, ngil a nei bawk ṭhîn,” tiin a sawi. Jehova chuan thil kan tihsual hunah pawh kan chungah dawhtheihna a lantîr a. Chuvângin, kan unaute’n an thusawi leh thiltiha min tithinrim emaw, kan rilru an tina emaw a nih chuan an chungah dawhtheihna kan lantîr tûr a ni. Châng 5-na chuan: “[Hmangaihna] chu a thinur duh lo va, sual lamah a ngaihtuah lo,” tiin a sawi belh a. Kan unaute min tihlungnih lohna chu nakin huna sawi chhuah leh atâna chhinchhiah a, ‘sual lam ngaihtuah’ chu kan duh lo ngei ang. Thuhriltu 7:9-na chuan “thinur hmanhmawh” lo tûrin min hrilh a ni. Chu aiin, Ephesi 4:26-naa kan hmuh: “In thinur chu niin tlâkpui suh se,” tih thute nunpui chu a va ṭha zâwk tak êm!

7. Engtin nge Matthaia 7:1-5-naa kan hmuh thu bulte chuan mi dangte ring tûra min ṭanpui?

⁷ Kan unaute kan rin theih dân dang leh chu, Jehova’n anmahni a thlîr anga thlîr hi a ni a. Pathianin anni chu a hmangaih a, an thil tihsualte chu a chhinchhiah reng lo. Keini pawhin chutiang chuan kan ti ve tûr a ni. (Sâm 130:3) An tlin lohna ngaihtuah reng ai chuan, theih tâwp chhuaha an mize ṭhatna laite hmuh tumin, thil ṭha tam tak an la tih theihte chu kan ngaihtuah zâwk tûr a ni. (Matthaia 7:1-5 chhiar rawh.) Hmangaihna chuan ‘engkim a rin’ avângin, thil ṭha tih an duh tih leh kan rilru tihnat an duh ngai lo tih kan ring tlat a ni. (1 Kor. 13:7) Chu chu Jehova’n mi dangte chu chhan ṭha awm lova pawngpaw ring tûrin min beisei tihna a ni lo; chu aiin, rinchhan tlâk an nihzia an lantîr avânga ring tûrin min beisei zâwk a ni. *

8. Engtin nge kan unaute chu kan rin theih?

⁸ Mi dangte zah hlawh tûra theih tâwp kan chhuah a ngai ang bawkin, an rin ngam ni tûr pawhin hun pêk a ngai a ni. Engtin nge kan unaute chu kan rin theih ang? Anni chu hriat chian lehzual tum la. Kohhran inkhâwmahte be thîn ang che. Rawngbâwlnaah thawhpui la. An chunga dawhtheihna lantîrin, rinchhan tlâk an nihzia lantîr theihna hun remchâng pe ang che. A tîr chuan, i la hriat chian loh tu emaw hnêna i rilrua awm zawng zawngte sawi chhuah chu i hreh mai thei. I hriat chian deuh hnu chuan, i rilrua awmte chu i hrilh ngam lehzual ngei ang. (Lk. 16:10) Mahse, i Kristian unau tu emawin amah i rinna tichhetu thil a ti a nih chuan, eng nge i tih theih? A chungah beidawng nghâl mai lo la; chu aiin, hun eng emaw chen pe ang che. An thiltih ṭhenkhat avâng maiin unaute i rinna chu hloh suh ang che. Hemi chungchângah, mi dangte’n an tilunghnual chung pawha an chunga rinna nei rengtu Jehova chhiahhlawh rinawm ṭhenkhatte entawn tûr siam kan sawiho vang.

9. (a) Engtin nge Hani chuan Jehova aiawhtu ṭhenkhatin thil sual an ti chung pawha Jehova ruahmanna chu a rin tlat? (b) Hani entawn tûr siam chuan Jehova ruahmanna rin tlatna chungchângah eng nge a zirtîr che? (Milem en rawh.)

⁹ Mawhphurhna nei unaupate thiltih avângin i lunghnual tawh ṭhîn em? I lunghnual tawh ṭhîn a nih chuan, Hani entawn tûr siam ngaihtuah chu i hlâwkpui thei a ni. Chutih hun lai chuan, Israel rama Jehova biaknaa hotu chu Puithiam Lalber Elia a ni a. Mahse, a chhûngkua chu entawn tlâk an ni lo. Puithiam nia rawngbâwl a fapate chu thil zahthlâk tak, nungchang bawlhhlawhnaah an inhmang ṭhîn a; chuti chung pawhin, an pa chuan anni chu khauh takin a zilh lo va. Mahse, Jehova’n Elia  chu puithiam lalber a nihna ata a bân nghâl mai lo. Chuti chung pawhin, Hani chuan Pathian ruahmanna chu a hnâwl lo va, Elia’n puithiam lalber nia rawng a bâwl chhûng zawng pawhin biak bûka Pathian be tûra kal a ṭhulh phah hek lo. Mangang êm êma Hani ṭawngṭai lai Elia’n a hmuh chuan, zu a rui niin a ngai a. Chu hmeichhe mangang êm êm chu a dinhmun hriat chian tum lovin a sawisêl a. (1 Sam. 1:12-16) Chuti chung pawhin, Hanni chuan fapa a nei a nih chuan Elia enkawlna hnuaia awm a, biakbûka rawngbâwl tûra a pêk tûr thu a tiam a ni. (1 Sam. 1:11) Elia fapate chu zilh an la ngai reng em? Ngai e, Pathian Jehova’n a hun takah a hrem a. (1 Sam. 4:17) Chutih lai chuan, Pathianin Hani chu fapa Samuela pein mal a sâwm a ni.—1 Sam. 1:17-20.

10. Engtin nge Davida chuan mi ṭhenkhatin an phatsan chung pawha mi dangte chunga rinna a neih tlat?

¹⁰ I ṭhian ṭha takin a phatsan che niin i inhre tawh ngai em? Chutiang a nih chuan Lal Davida thiltawn hi ngaihtuah ang che. A ṭhiante zînga pakhat chu Ahithophela a ni a. Mahse, Davida fapa Absaloma’n a pa lalna chuh tuma a laka a hel khân Ahithophela chu Absaloma lamah a ṭang a. Davida chuan a fapa leh a ṭhian nia a ngaihin an phatsan tih a hriat chuan a rilru a va na dâwn tak êm! Mahse, Davida chuan chu phatsanna chu mi dangte rin loh phah nân a hmang lo. Helnaa tel ve duh lo a ṭhian rinawm Husaia chu a la ring zawm zêl a ni. Davida chuan Husaia rin nachhan ṭha tak a nei a. Husaia chuan a nun thâp hial khawpa Davida ṭanpuiin, ṭhian ṭha a nihzia a lantîr a ni.—2 Sam. 17:1-16.

11. Eng kawngin nge Nabala chhiahhlawhte zînga pakhat chuan rinna a lantîr?

¹¹ Nabala chhiahhlawhte zînga pakhat entawn tûr siam hi han ngaihtuah bawk teh. Israel mi Nabala chhiahhlawhte chu Davida leh a mite chuan an vênghim ṭhîn a. A hnuah, Davida chuan chu mi hausa tak Nabala hnênah chuan a mite tâna ei tûr a neih ang ang pe tûrin a dîl a. Inngaitlâwm taka a dîlna chu Nabala’n a hnâwl chuan, a thinur êm avângin Nabala ina mipa tawh phawt chu thah a tum ta a ni. Nabala chhiahhlawh pakhatin thil awm dân chu a pi Abigaili hnênah a hrilh a. Chu ina chêng a nih angin, Abigaili chuan a chhanhim thei tih a hria a ni. Tlân bo aiin, chu dinhmun  chu Abigaili’n a siam ṭha thei ngei ang tih a ring tlat a. Hmeichhe fing tak nia hriat a nih avângin chutiang chuan a ring thei a ni. A rin ang ngeiin thil a thleng a. Abigaili chuan Davida chu a thiltum tipuitling lo tûra thlêmin huaisen takin hma a la a. (1 Sam. 25:2-35) Davida’n fing takin thil a ti ang tih a ring tlat a ni.

12. Isua’n a zirtîrte chu tlin lohna tam tak an nei chung pawhin a ring tlat tih engtin nge a târ lan?

¹² Isua chuan a zirtîrte chu tlin lohna tam tak an nei chung pawhin a ring tlat a. (Joh. 15:15, 16) Jakoba leh Johana’n Pathian Rama dinhmun sâng tak pe tûra Isua hnêna an dîl khân, ani chuan Jehova rawng an bâwl chhante chu a zâwt lo va, tirhkoh an nihna ata a bân hek lo. (Mk. 10:35-40) A hnuah, Isua man a nih zânah a zirtîr zawng zawngte chuan an thlahthlam ta vek a. (Mt. 26:56) Mahse, Isua’n anmahni a rinna chu a hloh lo. Ṭha famkim lo an ni tih a hre chiang hle a; chuvângin, “a tâwp thleng pawhin a hmangaih reng” a ni. (Joh. 13:1) Tholeh Isua chuan a tirhkoh rinawm 11-te chu zirtîr siam rawngbâwlna kaihruai tûr leh a berâm hlu takte enkawl tûrin chanvo pawimawh tak a pe a. (Mt. 28:19, 20; Joh. 21:15-17) Ani chuan chûng mi ṭha famkim lote chu rin nachhan tûr ṭha tak a nei a ni. An zain an lei lam nun a tâwp thlengin rinawm takin rawng an bâwl a. Hani te, Davida te, Nabala chhiahhlawh te, Abigaili te, leh Isua chuan mihring ṭha famkim lote rinna kawngah entawn tûr ṭha tak an siam a ni.

13. Engin nge mi dangte rin tiharsa thei?

¹³ Thurûkte hrilh ngam khawpa i mi rin tak unaupa pakhat chuan, a hnuah i thurûkte chu a sawi chhuak tih i hre tawh ṭhîn em? A beidawnthlâk hle ngei ang. Ṭum khat chu, unaunu pakhat chuan kohhran upa pakhat hnênah mi dang hriat atâna a duh loh a mi mal chungchâng a hrilh a. A tûkah, chu kohhran upa nupui chuan unaunu chu fuih tûrin a phone a, an pa hnêna unaunu thusawite chu a hre vek tih a chiang hle. Unaunuin chu kohhran upa rin harsa a ti tawh hle chu hriatthiamawm tak a ni. Mahse, ani chuan ṭanpuina a zawng leh a. A harsatnate hrilh tûrin kohhran upa dang a pan a, ani chuan upate chunga rinna nei leh tûrin a ṭanpui a ni.

14. Engin nge unaupa chu mi dangte chunga rinna nei leh tûra ṭanpui?

¹⁴ Unaupa pakhat chuan kohhran upa pahnih chu hun rei tak chhûng a ring thei lo va. Mahse, a mi zah tak unaupa pakhat thusawi chu a ngaihtuah chhuak a. Chu thu mâwlmang tak leh awmze nei tak chu: “Kan hmêlma chu Setana a ni, kan unaute ni lovin,” tih hi a ni. Unaupa chuan chu thusawi chu ngun takin a ngaihtuah a, Jehova hnêna ṭanpuina dîla a ṭawngṭai hnuah, upa pahnihte chungah chuan rinna a nei leh thei ta a ni.

15. Engvângin nge rinna nei leh tûra hun pêk a ngaih mai theih? Entîrna pe rawh.

¹⁵ Kohhranah chanvo hlu i chân tawh ngai em? Chu chu thiltawn hrehawm tak a ni thei. Grete-i leh a nu chu Nazi-ho rorêlna German rama kan rawngbâwlna khapbeh a nih lai kum 1930 chho bâwr vêla Thuhretu rinawm tak an ni a. Grete-i chuan a Kristian unaute tâna Vênnainsâng copy-te chhut chhuah theihna chanvo hlu a nei a. Mahse, unaupate chuan a pain thutak a dodâl tih an hriat chuan, min dodâltute hnêna kohhran chungchâng a hrilh an hlauh avângin, unaunu chu an hmang zawm ta lo a ni. Chutah chuan Grete-i hrehawm tawrhna chu a la tâwp mai lo. Indopui Pahnihna chhûngin, unaupate chuan Grete-i leh a nu chu magazine-te pawh an pe ngam lo va, kawnga an tawh pawhin an be ngai lo a ni. A va hrehawm dâwn tak êm! Chu chuan Grete-i rilru a tina hlein,  hun eng emawti chhûng chu chûng unaupate ngaihdam leh an chunga rinna neih leh chu harsa a ti hle a. Mahse, hunte a liam zêl chuan, Jehova’n anni chu a ngaidam a, ani pawhin a ngaihdam ve a ngai tih a hre ta a ni. *

16. Engvângin nge kan unaute chunga rinna nei tûra theih tâwp kan chhuah a ngaih?

¹⁶ Unaunu thiltawn ang chu i tawng ve a nih chuan, mi dangte chunga rinna nei leh tûrin theih tâwp chhuah ang che. Hun pêk ngai deuh mah se, theih tâwp i chhuahna chu manhla tak a ni ang. Entîr nân, thil kan ei sual tawh a nih chuan, kan thil ei tûrahte kan fîmkhur lehzual ngei a rinawm. Mahse, vawi khat ei sualna chu thil eng mah ei tawh loh phah nân kan hmang lo ngei ang. Chutiang bawkin, thiltawn ṭha lo pakhat kan neih chu kan unau zawng zawngte rin loh phah nân kan hmang tûr a ni lo; ṭha famkim lo vek kan ni tih kan hre si a. Mi dangte chunga rinna kan neih leh chuan, kan hlim lehzual ang a, chu chuan kohhrana inrin tawnna a awm theih nâna kan tihtheihte hre tûrin min ṭanpui ang.

17. Engvângin nge mi dangte kan rin chu a pawimawh êm êm a, a dawta thuziakah eng nge kan sawiho vang?

¹⁷ Setana khawvêlah hian mi dangte chunga rinna neih a harsa hle a; mahse, kan unaute chu kan hmangaih avâng leh anni pawhin min hmangaih avângin kan ring thei a ni. Chutiang rinna chuan tûnah ngei pawh hlimna leh inpumkhatna min neihtîrin, nakina hun harsa tak kan hmachhawn hunah pawh min vênghim ang. Tu emaw chu i ring thei tawh lo a nih chuan eng nge i tih ang? Thil awm dânte chu Jehova thlîr dân anga thlîr tum la, Bible thu bulte chu nunpuiin, unaute i hmangaihna chu tinghet lehzual la, Bible-a entîrnate aṭangin inzir ang che. Kan rilru natnate chu kan hneh theiin, mi dangte chungah rinna kan nei leh thei a ni. Chutianga kan tih chuan, “unau aia nghet zâwk” ṭhian tam tak neiin malsâwmna kan dawng ang. (Thuf. 18:24) Mahse, mi dangte kan rin chu a tâwk mai lo; anni pawhin min rin ngam a ngai a ni. A dawta thuziakah chuan, kan unaute tâna rinchhan tlâk kan nihzia kan lantîr theih dân sawiho a ni ang.