1. Kum Sâng Rorêl chhûnga thleng tûr eng thilthleng phûrawm takin nge min hmuak?

 KRISTA Kum Sâng Rorêl chhûnga he leia mitthite kaihthawh an nih ṭan hun chu a va phûrawm dâwn tak êm! An hmangaih tak chântu zawng zawngte chuan anni chu hmuh leh an châk tawh hle a. Pathian Jehova pawhin a châk tawh hle a ni. (Job. 14:15) An hmangaih takte kaihthawh an nih huna leia mite hlim dân tûr chu han mitthla teh. Thuziak hmasaa kan hriat tâk ang khân, nunna bu-a hming chuang “mi felte” chu “nunna changin an tho leh” ang. (Tirh. 24:15; Joh. 5:29) Kan hmangaih takte chu leia kaihthawh hmasakte zîngah an tel mai thei a. * Chu bâkah, Jehova hriatna hun remchâng ṭha nei lo ‘mi fel lote,’ a nih loh leh an thih hmaa rinawm taka Jehova rawngbâwl theihna hun remchâng nei lote chu ‘thiam loh changin an tho leh’ ang.

2-3. (a) Isaia 11:9, 10-naa târ lan angin, mihring chanchin tluan chhuaka zirtîrna hna ropui ber chu eng nge ni ang? (b) He thuziakah hian eng nge kan sawiho vang?

² Chûng mitthi tho leh zawng zawngte chu zirtîr an ngai dâwn a. (Is. 26:9; 61:11) Chuvângin, mihring chanchin tluan chhuaka la neih ngai loh zirtîrna hna ropui ber chu neih a ngai dâwn a ni. (Isaia 11:9, 10 chhiar rawh.) Engvângin nge?  A chhan pakhatah chuan, tho lehte zînga mi fel lote chuan Isua Krista chanchin te, Lalram ruahmanna te, tlanna te, leh Jehova hming leh a lalchungnunna nêna inkûngkaih lei leh vâna buainate chungchâng chu an zir a ngaih dâwn vâng a ni. Mi fel tho lehte pawhin, Pathian Jehova’n a mite hnêna a hrilh leilung tâna a thiltumte chu an zir a ngai ang. Chûng mi rinawmte zînga ṭhenkhat chu Bible ziah zawh a nih hma daiha thi tawhte an ni a. Chuvângin, mi felte leh mi fel lote chuan zir tûr tam tak an nei dâwn a ni.

³ He thuziakah hian, hêng zawhnate hi sawiho a ni ang: Chu zirtîrna hna ropui tak thawhnaah chuan engte nge tel ang? Mite’n chu zirtîrna an chhân lêt dân chuan nunna bu-a kumkhuaa an hming chuantîr a nih leh nih loh tûr a hril ang em? tihte hi. Chûng zawhnate chhânna hriat chu kan tân a pawimawh hle a ni. Kan la hriat tûr angin, Daniela bu leh Thu Puan bu-a târ lan hrilh lâwkna ngaihvenawm tak ṭhenkhat chuan mitthite kaihthawh an nih huna thilthleng tûrte kan hriatthiamna chu a tifiah lehzual ang. A hmasain, Daniela 12:1, 2-nain a hrilh lâwk thilthleng phûrawm takte chu i lo sawiho vang u.

4-5. Daniela 12:1-na chuan tâwpna hun chungchâng eng nge a târ lan?

⁴ Daniela 12:1 chhiar rawh. Daniela bu chuan tâwpna hun chhûnga thilthleng tûr phûrawm tak takte chu a târ lang a. Entîr nân, Daniela 12:1-na chuan Isua Krista, Mikaela chu Pathian mite tâna “ding” a nih thu a târ lang a. Chu hrilh lâwkna ṭhenkhat chu kum 1914-a Pathian vân lam Lalrama Lal atâna Isua ruat a nih khân a thleng famkim ṭan a ni.

⁵ Mahse, Daniela chuan Isua chu “buaina hun, hnam awm tirh ata chumi hun thleng pawha la awm ngai lo” hun chhûngin Pathian mite tân a “ding” ang tih a sawi bawk a. Chu “buaina hun” chu Matthaia 24:21-a târ lan “hrehawm nasa tak” a ni. Isua chuan buaina hun tâwp Armageddon-ah Pathian mite vênghim tûrin a ding, a nih loh leh hma a la ang. Chûng mite chu Thu Puan bu chuan “mipui tam tak,” “hrehawm nasa tak ata chhuakhote,” tiin a sawi a ni.—Thup. 7:9, 14.

6. Hrehawm nasa tak ata mipui tam tak an dam khawchhuah hnuah eng thil nge thleng ang? Hrilhfiah rawh. (Tûn ṭum chhuaka lei lam nunna changa thawhlehna chungchânga “Chhiartute Zawhna,” tih thuziak chu en bawk rawh.)

⁶ Daniela 12:2 chhiar rawh. Buaina hun aṭanga mipui tam takte an dam khawchhuah hnuah eng thil nge thleng ang? Chu hrilh lâwkna chu tûn hmaa kan hriatthiam dân anga entîr nei thawhlehna, Pathian chhiahhlawhte chunga thleng tûr thlarau lama harh tharna sawina a ni lo. * Chu aiin, chûng thute chu lo thleng tûr khawvêl thara mitthi thawhlehna sawina zâwk a ni. Engvângin nge chutianga kan sawi theih? ‘Vaivut’ tih ṭawngkam hi Joba 17:16-naah chuan “seol,” a nih loh leh thlân tih sawi nâna hman a ni bawk. Chu chuan Daniela 12:2-na thu hi ni hnuhnûng tâwp hnuah leh Armageddon indona a tâwp huna thleng tûr thlân aṭanga thawhlehna tak tak a kâwk tih a târ lang a ni.

7. (a) Eng kawngin nge mi ṭhenkhat chu ‘chatuana nung’ tûra an thawhleh ang? (b) Engtin nge chu chu “thawhlehna ṭha lehzual” a nih?

⁷ A nih leh, Daniela 12:2-nain mi ṭhenkhat chu ‘chatuana nung’ tûrin an tho leh ang, tia a sawi awmzia hi eng nge ni? Chu chu kum 1,000 chhûnga Jehova leh Isua chungchâng hria, a nih loh leh hre zawm zêl a, an thu awihtu mitthi tho lehte chuan chatuan nunna an  chang ang tihna a ni. (Joh. 17:3) Chu chu hun kal tawha mitthi kaihthawhna nêna khaikhinin “thawhlehna ṭha lehzual” a ni ngei ang. (Heb. 11:35) Engvângin nge? Chûng mihring ṭha famkim lo kaihthawhte chu a hnua an thih leh avângin.

8. Eng kawngin nge mi dangte chu ‘zahna leh chatuan hmuhsitawmna’ chang tûra an thawhleh ang?

⁸ Mahse, mitthi tho leh zawng zawngte chuan Jehova zirtîrna chu an pawm vek lo vang. Daniela hrilh lâwkna chuan mi ṭhenkhat chu ‘zahna leh chatuan hmuhsitawmna’ chang tûrin an tho leh ang tih a sawi si a. Anni chuan helna rilru put hmang an lantîr dâwn avângin, an hming chu nunna buah ziah a ni lo vang a, chatuan nuna pawh an chang hek lo vang. Chu aiin, ‘chatuan hmuhsitawmna,’ a nih loh leh tihboralna an chang ang. Chuvângin, Daniela 12:2-na hi mitthi tho leh zawng zawngte chu an thawhleh hnua an thiltihte ṭanchhana rorêlsak an nih tûr thu sawina a ni. * (Thup. 20:12) Mi ṭhenkhat chuan chatuan nunna an chang ang a; mi dangte chu tiboral an ni thung ang.

9-10. Hrehawm nasa tak a thlen hnuah eng thil dang nge thleng ang a, ‘vân êng anga êng tûrte’ chu tute nge ni?

⁹ Daniela 12:3 chhiar rawh. “Buaina hun” a thlen hnuah eng thil dang nge thleng ang? Daniela 12:2 leh châng 3-na chuan hrehawm nasa tak a thlen hnua thilthleng ṭhenkhat a târ lang a ni.

¹⁰ ‘Vân êng anga êng tûrte’ chu tute nge ni? Matthaia 13:43-naa Isua thusawi: “Chumi hunah chuan mi felte chu an Pa ramah chuan ni angin an êng tawh ang,” tih aṭang hian kan hre thei a. Chûng thute chu Isua’n vân lam Lalrama a rorêlpui tûr hriak thih a unaute, “ram fate” chungchâng a sawina a ni. (Mt. 13:38) Chuvângin, Daniela 12:3-na hi hriak thihte leh Kum Sâng Rorêl chhûnga an tih tûrte sawina a ni ngei ang.

11-12. Kum 1,000 chhûngin mi 1,44,000 te chuan eng hna nge an thawh ang?

¹¹ Engtin nge hriak thihte chuan “mi tam tak [chu] felnaa” an hawi kîrtîr ang? Kum 1,000 chhûnga hlen chhuah tûr zirtîrna hna kaihhruainaah Isua Krista leh hriak thihte chu an thawkho ang. Mi 1,44,000 te chuan lalte nia ro an rêl mai bâkah, puithiamte niin rawng an bâwl bawk ang. (Thup. 1:6; 5:9, 10; 20:6) Chuvângin, anni chuan “hnam tin tihdamna” hna an thawk ang a, mihringte chu zawi zawia ṭha famkim tûrin an ṭanpui ang. (Thup. 22:1, 2; Ezek. 47:12) Chu chu hriak thihte tân a va hlimawm dâwn tak êm!

¹² Felnaa hawi kîr ‘mi tam takte’ zîngah chuan tute nge tel ang? Chutah chuan mitthi tho lehte leh Armageddon-a dam khawchhuakte bâkah, khawvêl thara lo la piang tûrte pawh a tel ang. Kum 1,000 tâwpah chuan leia mi zawng zawngte chu an ṭha famkim tawh ang. A nih leh, eng hunah nge an hming chu nunna bu-a pencil ni lo va, lehkha tui, a nih loh leh pen hmanga kumkhua atâna ziah a nih ang?

13-14. Leia mi ṭha famkim zawng zawngte chuan chatuan nunna an neih hmain eng nge an lantîr ngai ang?

¹³ Chu ṭhat famkimna chu miin chatuan nunna a nei nghâl dâwn tihna a ni lo tih hre reng ang che. Adama leh Evi kha han ngaihtuah teh. Ṭha famkim ni mah se, chatuana nunna pêk an nih hmain Pathian Jehova thu an awihzia an lantîr a ngai a. Mahse, lungchhiatthlâk takin, Pathian thu chu an awih ta lo a ni.—Rom 5:12.

¹⁴ Kum 1,000 tâwp huna leia awmte dinhmun chu eng ang nge ni ang? Mi zawng zawng chu ṭha famkim an ni tawh ang. Chûng mi ṭha famkim zawng zawngte chuan Jehova rorêlna chu chatuanin an thlâwp vek ang em? Nge ni a, ṭha famkim an ni chung pawha rinawm lo Adama leh Evi ang an ni zâwk dâwn? Chûng zawhnate chu chhân a ngai ang; mahse, engtin nge chhân a nih ang?

15-16. (a) Eng hunah nge mi zawng zawngin Jehova chunga an rinawmna lantîrna hun remchâng an neih ang? (b) Fiahna hnuhnûng ber chuan eng nge a rah chhuah ang?

¹⁵ Setana chu kum 1,000 chhûng phuar a ni ang a. Chutih hun chhûng chuan, mite chu a bum thei lo vang. Mahse, kum 1,000 tâwpah Setana chu chhuah a ni ang a. Ani chuan mi ṭha famkimte chu bum a tum ang. Chu fiahna hun chhûng chuan,  leia mi ṭha famkim zawng zawngte chuan Pathian hming leh a lalchungnunna thubuaia an ṭanna lam lantîrna hun remchâng an nei ang. (Thup. 20:7-10) Mi mal taka Setana beihna an chhân lêt dân chuan, nunna bu-a kumkhuaa an hming a chuan dâwn leh dâwn loh chu a hril dâwn a ni.

¹⁶ Mi tam tak chuan Adama leh Evi ang bawkin Jehova thuneihna chu an hnâwl ang. Chûng mite chungah chuan eng thil nge thleng ang? Thu Puan 20:15-na chuan: “Tu hming pawh nunna bu-a ziak an hmuh loh chuan meidîlah an paih bawk a,” tiin min hrilh a ni. Ni e, chûng hel hmangte chu chatuan atâna tihboral an ni ang. Mahse, mihring ṭha famkim a tam zâwkte chuan chu fiahna chu an pal tlang ang a. Nunna buah kumkhuain an hming a chuang tawh ang.

17. Daniela chuan kan hun laia thleng tûr eng nge a sawi? (Daniela 12:4, 8-10)

¹⁷ Chûng nakin huna thilthleng tûrte chungchâng ngaihtuah chu a va phûrawm tak êm! Mahse, Daniela chuan vântirhkoh pakhat hnên aṭangin “tâwpna hun,” kan tûn lai hun nêna inkûngkaih hriattîrna pawimawh tak ṭhenkhat a dawng bawk a. (Daniela 12:4, 8-10 chhiar rawh; 2 Tim. 3:1-5) Vântirhkoh chuan a hnênah: “Hriatnate  a pung dâwn a ni,” tiin a hrilh a ni. Ni e, Daniela bu-a hrilh lâwkna thute chu Pathian mite chuan an hre thiam lehzual ang. Vântirhkoh chuan chu hun chhûng chuan “mi suaksualte chuan sual takin an ti ang a, mi suaksual tu mahin a ngaihna an hre lo vang,” tiin a sawi belh bawk a ni.

18. Mi suaksualte chungah eng thil nge thleng thuai ang?

¹⁸ Tûn laiah, mi suaksualte chuan an thiltih man an seng lo niin a lang mai thei. (Mal. 3:14, 15) Mahse, Isua chuan kêl ang mite chu berâm ang mite zîng ata thliar hrangin an chungah ro a rêl thuai ang. (Mt. 25:31-33) Chûng mi suaksualte chu hrehawm nasa takah an dam khawchhuak lo vang a, khawvêl thara nung tûra kaihthawh an ni hek lo vang. An hming chu Malakia 3:16-a târ lan ‘hriat rengna lehkhabuah’ a chuang bawk hek lo vang.

19. Tûn hi kan tân eng tih hun nge ni a, engvângin nge? (Malakia 3:16-18)

¹⁹ Tûn hi kan tân mi suaksualte zînga mi kan ni lo tih lantîrna hun a ni. (Malakia 3:16-18 chhiar rawh.) Jehova chuan “ro chuam,” a nih loh leh a tâna mi hlu takte chu a khâwm mêk a. Chûng mite zînga tel chu kan duh ngei ang.

20. Daniela hnênah eng thutiam hnuhnûng ber nge tiam a nih a, engvângin nge chu thutiam thlen famkim hun chu i nghahhlelh?

²⁰ Hun phûrawm takah kan a awm mêk a. Chutih rualin, thil ropui zâwkte a thlen hun chu a hnai tawh hle. Nakin lawkah, mi suaksual zawng zawngte tihboral an nih lai chu kan hmu ang a. Chumi hnuah: “Tâwpna a lo thlen hunah i awmna tûr hmun ruatah chuan i awm dâwn nia,” tia Daniela hnêna Jehova thutiam thlen famkimna chu kan hmu bawk ang. (Dan. 12:13, C.L. Re-edited.) Daniela leh i hmangaih takte an lo “awm” leh hun chu i nghâkhlel tawh em? I nghâkhlel tawh hle a nih chuan, tûn aṭangin rinawm tlat tûrin theih tâwp chhuah ang che. Chutianga i tih chuan, nunna buah i hming a chuang reng ang tih i chiang thei a ni.