1. Malakia 3:16-naa sawi angin, Jehova’n eng lehkhabuah nge ziah a neih a, chutah chuan eng nge chuang?

 KUM sâng tam tak chhûng chu, Jehova’n lehkhabu pawimawh tak pakhatah ziah a nei a. Chu lehkhabuah chuan thuhretu rinawm hmasa ber Abela pawh tiamin, hming tam tak a chuang a ni. * (Lk. 11:50, 51) Kum zabi tam tak chhûngin, Pathian Jehova chuan hming a ziah belh zêl a; tûnah chuan, hming maktaduai tam tak a chuang tawh a ni. Bible-ah hian, chu lehkhabu chu “hriat rengna lehkhabu,” tih leh “nunna bu,” tia sawi a ni a. He thuziakah hian, “nunna bu,” tia sawi a ni ang.—Malakia 3:16 chhiar rawh; Thup. 3:5; 17:8.

2. Tute hming nge nunna buah chuang a, engtin nge chu lehkhabuah chuan kan hming kan chuantîr ve theih?

² Chu lehkhabu pawimawh takah chuan ṭih chunga Jehova betu te, amah zahna thûk tak neitu te, leh a hming ngaihlutu zawng zawngte hming a chuang a. Anni chuan chatuana nun neih theihna hun remchâng an nei ang. Tûn laiah pawh, a Fapa Isua Krista tlanna inthawina ṭanchhana Jehova nêna mi mal inlaichînna ṭha tak kan neih chuan, chu lehkhabuah chuan kan hming a chuang ve thei a ni. (Joh. 3:16, 36) Kan beisei chu vân lam nun emaw, lei lam nun emaw pawh ni se, kan za hian chu lehkhabu-a kan hming chuantîr chu kan duh ṭheuh a ni.

3-4. (a) Tûna nunna bu-a kan hming a chuan avâng maiin chatuanin kan nung dâwn tihna a ni em? Hrilhfiah rawh. (b) He thuziakah leh a dawta thuziakah eng nge kan sawiho vang?

³ Chu lehkhabu-a hming chuang zawng zawngte chu chatuan nunna chang tûra nemngheh an ni tihna a ni em?  Chu zawhna chhânna chu Exodus 32:33-naa Mosia hnêna Jehova thusawiah kan hmu a ni. Ani chuan: “Tu pawh ka chunga thil tisual apiang chu ka lehkhabu ata ka thai bo vang,” tiin a sawi a. Chuvângin, chu lehkhabu-a hming chuang mêkte chu nuai bo theih, a nih loh leh nawh reh theih a ni. Chu chu Jehova’n hmingte chu pencil-in a ziak hmasa phawt ang a ni a. (Thup. 3:5) Chuvângin, kan hming chu nunna buah lehkhatui, a nih loh leh pen hmanga nawh reh theih tawh lova ziah a nih hma chu a chuang reng tih kan chian tûr a ni.

⁴ Chu chuan zawhna ṭhenkhat a tichhuak mai thei. Entîr nân, Bible chuan nunna bu-a hming chuangte leh chuang ve lote chungchâng eng nge a sawi? Chu lehkhabu-a hming chuangte chuan engtikah nge chatuan nunna chu an dawn ang? Pathian Jehova chanchin hriatna hun remchâng nei lova thite chungchâng hi eng nge ni ve? Chu lehkhabuah chuan an hming chuantîr theih a ni ang em? Chûng zawhnate chhânna chu he thuziakah leh a dawta thuziakah sawiho a ni ang.

NUNNA BUAH TUTE HMING NGE CHUANG?

5-6. (a) Philippi 4:3-a târ lan angin, nunna bu-a hming chuangte zîngah tute nge tel? (b) Engtikah nge an hming chu nunna bu-a kumkhuaa chuantîr a nih ang?

⁵ Entîr nei nunna buah chuan tute hming nge chuang? Chu zawhna chhâng tûr chuan, mi chi ngate chungchâng kan sawiho vang. Chûng zînga ṭhenkhat chu nunna bu-a an hming a chuan laiin, mi dangte erawh chu an chuang ve lo.

⁶ Pâwl khatna chu vâna Isua nêna rorêl tûra thlante hmanga din a ni. An hming chu nunna buah a chuang tawh em? Chuang tawh e. Tirhkoh Paula’n Philippi khuaa rawngbâwlnaa a ‘thawhpuite’ hnêna a sawi angin,  Isua nêna rorêl tûra sâwmna dawng hriak thihte hming chu nunna buah a chuang tawh a. (Philippi 4:3 chhiar rawh.) Mahse, chu entîr nei lehkhabu-a an hming chuantîr reng an duh chuan, an rinawm reng tûr a ni. Tichuan, an thih hmain emaw, hrehawm nasa tak inṭan hmain emaw chhinchhiahna hnuhnûng ber an dawn hunah an hming chu nunna buah kumkhuaa chuantîr a ni tawh ang.—Thup. 7:3.

7. Nunna bu-a berâm dangte zînga mi, mipui tam takte hming kumkhuaa a chuan hun tûr chungchângah Thu Puan 7:16, 17-na aṭangin eng nge kan hriatthiam?

⁷ Pâwl hnihna chu berâm dang zînga mi, mipui tam takte an ni. An hming chu nunna buah a chuang tawh em? Chuang tawh e. Armageddon-a an dam khawchhuah hnuah an hming chu nunna buah a la chuang ang em? Aw, chuang ang. (Thup. 7:14) Isua chuan chûng berâm ang mite chu “kumkhaw nunnaah” an kal ang tih a sawi a ni. (Mt. 25:46) Mahse, Armageddon-a dam khawchhuakte chuan chatuan nunna chu an dawng nghâl lo vang. An hming chu nunna buah chuan pencil-a ziah a la ni ang a. Kum Sâng Rorêl chhûngin, Isua chu “an vêngtu a ni ang a, nunna tuikhurahte a hruai ang.” Thuawih taka Krista kaihhruaina zâwmtute leh fiahna hnuhnûng ber chhûnga Jehova chunga rinawm tlattute hming chu nunna buah kumkhuain a chuang tawh ang.—Thu Puan 7:16, 17 chhiar rawh.

8. Nunna bu-a hming chuang lote chu tute nge ni a, an chungah eng thil nge thleng ang?

⁸ Pâwl thumna chu Armageddon-a tihboral tûr kêlte an ni a. An hming chu nunna buah a chuang lo. Isua chuan anni chu “kumkhaw hremnaah an kal ang,” tiin a sawi. (Mt. 25:46) Thlarau thâwk khumin Paula chuan, chûng “mite chuan hrem an tuar ang, . . . chatuana boralna chu,” tiin min hrilh a ni. (2 Thes. 1:9, 10; 2 Pet. 2:9) Chutiang chiah chu Jehova duh zâwngte chiang taka hre reng chung sia zâwm duh lotute chungah pawh a thleng ang a. Anni chuan chatuan nunna ni lovin, chatuan boralna an chang ang. Chûng mite chu kaihthawh an ni tawh lo vang tih a chiang hle. (Mt. 12:32; Mk 3:28, 29; Heb. 6:4-6) Tûnah, leia tho leh tûr pâwl pahnihte chungchâng chu i lo bih chiang ang u.

THO LEH TURTE

9. Tirhkohte 24:15-a târ lan angin, leiah eng pâwl pahnihte nge tho leh ang a, chûng pâwl pahnihte inan lohna chu eng nge ni?

⁹ Bible chuan leia chatuan nun beisei theihna neia tho leh tûr pâwl pahnih, “mi felte leh fel lote” chungchâng a sawi a. (Tirhkohte 24:15 chhiar rawh.) “Mi felte” chu an dam laia rinawm taka Jehova rawngbâwltute an ni a. Kawng leh lamah chuan, ‘mi fel lote’ chuan rinawm takin Jehova rawng an bâwl lo. A nihna takah chuan, an khawsak dân tam tak chu a fel lo hle zâwk a ni. Chûng pâwl pahnihte chu kaihthawh leh an nih dâwn avângin, an hming chu nunna buah a chuang niin kan sawi thei ang em? Chu zawhna chhâng tûr chuan, chûng pâwl pahnihte chu a hrangin i lo bih chiang ang u.

10. Engvângin nge “mi felte” chu an thawhleh ang a, eng chanvo hlu nge mi ṭhenkhatin an dawn ang? (Tûn ṭum chhuaka leia thawhlehna chungchâng târ lanna “Chhiartute Zawhna,” tih chu en bawk rawh.)

¹⁰ “Mi felte” chu pâwl li-na an ni a. An thih hmain nunna buah an hming a chuang a ni. An thih hunah chu lehkhabu aṭang chuan an  hming thai bo a ni ang em? Ni lo vang, Pathian hriat rengnaah an la “nung” reng si a. Jehova chu ‘mitthi Pathian a ni lo va, mi nung Pathian a ni zâwk a; ani ngaih chuan mi zawng zawng an nung vek’ a ni. (Lk. 20:38) Chumi awmzia chu, leia kaihthawh leh an nih hunah mi felte hming chu pencil-a ziah la ni mah se, nunna buah a la chuang reng dâwn tihna a ni. (Lk. 14:14) Tho lehte zînga ṭhenkhat chuan ‘lei chung zawng zawngah hian mi lian’ anga rawngbâwl theihna chanvo hlu an dawng ang tih rinhlelh rual a ni lo.—Sâm 45:16.

11. ‘Mi fel lote’ chuan nunna bu-a an hming a chuan hmain eng nge an zir ngai ang?

¹¹ A tâwpnaah chuan, pâwl pangana, ‘mi fel lote’ chungchâng hi lo ngaihtuah ta ila. An thih hmain felna nun kawng an zawh lo; chu chu Pathian dânte an hriat loh vâng a nih ngei a rinawm. Chuvângin, an hming chu nunna buah a chuang lo. Mahse, anmahni kaihthawh lehna hmangin, Pathianin nunna bu-a an hming chuantîr theihna hun remchâng a pe a ni. Chûng ‘mi fel lote’ chu nasa taka ṭanpui an ngai ang. An zînga ṭhenkhat chu an thih hmaa thil râpthlâk tak tak ti ṭhîntute an ni a. Chuvângin, Jehova tehna felte mila nung tûrin zirtîr a ngai dâwn a ni. Chutianga zirtîr tûr chuan, Pathian Ramin mihring chanchina kan la hriat ngai loh zirtîrna ropui ber chu a kaihruai ang.

12. (a) Tute’n nge mi fel lote chu zirtîr ang? (b) An thu zirte nunpui duh lotute chungah eng thil nge thleng ang?

¹² Tute’n nge mi fel lote chu zirtîr ang? Mipui nasa tak leh mi fel tho lehte an ni. Nunna bu-a an hming a chuan theih nân, mi fel lote chuan Pathian Jehova nêna inlaichînna ṭha an neih a, a hnêna an inpumpêk a ngai ang. Isua Krista leh a rorêlpuite chuan, chûng mi fel lote’n zirtîrna an chhan lêt dân chu vân aṭangin ngun takin an en reng ang a. (Thup. 20:4) Chutiang ṭanpuina duhawm tak chhâng lêt duh lotu apiangte chu kum 100-a upa pawh ni tawh mah se, tihboral an ni ang. (Is. 65:20) Jehova leh Isua chuan thinlung an hre thei a, khawvêl tharah chhiatna thlen theitu tûr tu mah awm an phal lo vang.—Is. 11:9; 60:18; 65:25; Joh. 2:25.

 NUNNA CHANGA THO LEH TURTE LEH THIAM LOH CHANGA THO LEH TURTE

13-14. (a) Tûn hmain, Johana 5:29-naa kan hmuh Isua thusawite hi engtin nge kan hriatthiam? (b) Chûng thute chungchânga kan chhinchhiah ngai chu eng nge ni?

¹³ Isua chuan leia tho leh tûrte chungchâng pawh a sawi a. Entîr nân, ani chuan: “A hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang; thil ṭha titute chu nunna changin an tho leh ang a, thil sual titute chu thiam loh changin an tho leh ang,” tiin a sawi a ni. (Joh. 5:28, 29) Isua sawi tum chu eng nge ni?

¹⁴ Tûn hma chuan Isua thusawi awmzia chu, mi ṭhenkhat chuan an thawhleh hnuah thil ṭha an tih laiin, mi dangte erawh chuan an thawhleh hnuah thil sual an ti ang, tia thawhlehna thlen hnua mite awm dân tûr sawina niin kan hre thiam a. Mahse, Isua chuan hriat rengna thlân aṭanga rawn tho lehte chuan an rawn thawhleh rualin thil ṭha emaw, thil sual emaw an ti ang tih a sawi lo tih chhinchhiah ang che. Ani chuan thilthleng tawh sawina ṭawngkam a hmang a ni. “Thil ṭha titute” leh “thil sual titute” chungchâng a sawi a. Hei hian an thiltihte chu an thih hmaa an tihte a ni tih a târ lang a ni. Chu chuan awmzia a nei hle a ni lâwm ni? Dik tak chuan, khawvêl tharah thil sual titu tu mah awm phal an ni lo vang. Chuvângin, mi fel lote chu an thih hmaa thil sual titute an nih ngei a ngai a ni. A nih leh, ‘nunna changa tho leh’ tûrte leh ‘thiam loh changa tho leh’ tûrte chungchânga Isua thusawi awmzia chu eng nge ni?

15. ‘Nunna changa tho leh’ tûrte chu tute nge ni a, engvângin nge?

¹⁵ An thih hmaa thil ṭha titu mi felte chu nunna bu-a an hming a chuan tawh avângin “nunna changin an tho leh” ang. Chumi awmzia chu, Johana 5:29-naa târ lan “thil ṭha titute” thawhlehna leh Tirhkohte 24:15-a târ lan “mi felte” thawhlehna chu a inang tihna a ni a. He hrilhfiahna hi Rom 6:7-na thu: “Tu pawh thi tawh chu sual lakah a chhuak tawh si a,” tih nên a inmil a ni. Chûng mi felte chu an thih rualin an sualte thai bo a ni a; mahse, thil ṭha an tihte erawh ṭha taka chhinchhiah a ni thung. (Heb. 6:10) Chutih rualin, mi fel tho lehte chuan nunna bu-a an hming chuantîr reng an duh chuan an rinawm zawm zêl a ngai ang.

16. ‘Thiam loh changa tho leh,’ tih awmzia chu eng nge ni?

¹⁶ A nih leh, an thih hmaa thil sual titute chungchâng hi eng nge ni ve? An sualte chu an thih ruala thai bo ni tawh mah se, an dam laiin rinawm takin Jehova rawng an bâwl lo va. Nunna buah an hming a chuang lo a ni. Chuvângin, “thil sual titute” thawhlehna chu Tirhkohte 24:15-a târ lan, ‘mi fel lote’ thawhlehna nên a inang a ni. Anni chu ‘thiam loh changin an tho leh ang.’ * Chumi awmzia chu, Isua’n mi fel lote chu ngun taka thlîr rengin, a fiah dâwn tihna a ni. (Lk. 22:29, 30) Nunna bu-a an hming chuantîr tlâk a nih leh nih loh chungchânga thu tlûkna siam tûr chuan hun a duh ang. Chûng mi fel lote chuan tûn hmaa an nun kawng sual takte an hnâwl a, Jehova  hnêna an inpumpêk chauhvin, nunna buah an hming chuantîr a ni ang.

17-18. Leia nung tûra kaihthawh zawng zawngte chuan eng nge an tih ngai ang a, Thu Puan 20:12, 13-naa “thiltih” tih ṭawngkam chuan eng nge kawh?

¹⁷ Tûn hmain mi felte zînga mi an ni emaw, mi fel lote zînga mi an ni emaw pawh ni se, mitthi tho lehte chuan kum 1,000 chhûnga hawn tûr lehkhabu thartea inziak dânte chu an zawm a ngai ang. Tirhkoh Johana chuan inlârnaa a hmuhte chu heti hian a sawi a ni: “Mitthite chu a lian a tein lalṭhutphah hmaa ding ka hmu a; tin, lehkhabute an hawng a; tin, lehkhabu dang, nunna bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a,” tiin.—Thup. 20:12, 13.

¹⁸ Eng an ‘thiltihte’ ṭanchhanin nge mitthi tho lehte chu rorêlsak an nih ang? An thih hmaa an thiltihte ṭanchhanin a ni ang em? Ni lo! Tûn hmaa an sualnate chu an thih rualin thai bo a ni tawh tih hre reng ang che. Chuvângin, heta “an thiltih” tih ṭawngkam hi an thih hmaa an thiltihte sawina a ni thei lo. Chu aiin, khawvêl thara zirtîrna an dawnte an chhân lêtna kawnga an thiltihte sawina a ni ngei ang. Mi rinawm Nova te, Samuela te, Davida te, leh Daniela te pawhin Isua Krista chungchâng an zir a ngaih dâwn bâkah, a inthawina chunga rinna an lantîr pawh a ngai ang. Chutiang a nih chuan, mi fel lote phei chuan zir tûr an va ngah lehzual dâwn êm!

19. Zirtîrna an dawnte chhân lêt theihna hun remchâng ropui tak hnâwltute chungah chuan eng thil nge thleng ang?

¹⁹ Zirtîrna an dawnte chhân lêt theihna hun remchâng ropui tak hnâwltute chungah chuan eng thil nge thleng ang? Thu Puan 20:15-na chuan: “Tu hming pawh nunna bu-a ziak an hmuh loh chuan mei dîlah an paih bawk a,” tiin min hrilh a ni. Ni e, anni chu chatuana tihboral an ni ang. Chuvângin, nunna bu-a kan hming chuantîr leh chutianga chuantîr reng thei tûra theih tâwp chhuah chu a va pawimawh tak êm!

20. Kum Sâng Rorêl chhûngin eng hna phûrawm tak nge thawh a nih ang? (A kâwma milem en rawh.)

²⁰ Kum Sâng Rorêl hun chu a va phûrawm dâwn tak êm! Chutah chuan, he leia neih tawh azawnga zirtîrna hna ropui ber thawh pawh a tel ang a. Chu bâkah, chu hun chu mi felte leh fel lote awm dân ngaihtuah hun a ni bawk ang. (Is. 26:9; Tirh. 17:31) A nih leh, engtin nge chu zirtîrna chu thawh a nih ang? A dawta thuziak chuan chu ruahmanna ropui tak chu hre thiam tûr leh ngaihlu tûrin min ṭanpui ang.