Chûng zawhnate Bible-in a chhân dân chu han ngaihtuah teh.

Tirhkohte 24:15-na chuan “mi felte leh fel lote thawhlehna” chungchâng min hrilh a. Mi felte chu an thih hmaa Pathian thu awihtute an nih avângin nunna buah an hming a chuang a ni. (Mal. 3:16) Mi fel lote zîngah chuan Jehova chungchâng hriatna hun remchâng ṭha nei lova thite pawh an tel a; chuvângin, nunna buah an hming a chuang ve lo.

Johana 5:28, 29-na hi Tirhkohte 24:15-naa târ lan mi chi hnihte chungchâng sawina tho a ni a. Isua chuan “thil ṭha titute chu nunna changin an tho leh ang a, thil sual titute chu thiam loh changin an tho leh ang,” tih a sawi a ni. Mi felte chuan an thih hmain thil ṭha an ti a. An thih hnuah pawh nunna bu-a an hming a la chuan reng avângin nunna changin an tho leh ang. Mahse, mi fel lote chuan an thih hmain thil sualte an ti a. Chuvângin, anni chu thiam loh changin an tho leh dâwn a ni. An hming chu nunna bu-a a la chuan loh avângin rorêlna hun, a nih leh fiahna hun an hmachhawn ang a. Chutih hun chhûng chuan, Jehova chungchâng zir theihna leh nunna bu-a an hming chuantîr theihna hun remchâng an nei ang.

Thu Puan 20:12, 13-na chuan mitthi tho leh zawng zawngte’n “lehkhabutea ziak” thute chu an zawm a ngaih tûr thu a sawi a, chu chu khawvêl thara Pathian min pêk tûr dân tharte a ni. Chûng dân tharte zâwm duh lotu apiangte chu tihboral an ni ang.—Is. 65:20.

Daniela 12:2-na chuan thihnaa muhîl tawhte zînga ṭhenkhat chu ‘chatuan nunna chang tûr leh ṭhenkhat chu zahna leh chatuan hmuhsitawmna chang tûra’ kaihthawh an nih tûr thu a sawi a. He Bible châng hian tho lehte chunga rorêlna hnuhnûng ber chungchâng a sawi a ni—‘chatuan nunna’ nge an chan dâwn ‘chatuan hmuhsitawmna’ zâwk tih chu. Chuvângin, kum 1,000 tâwpah chuan mi ṭhenkhat chuan chatuan nunna an chang ang a, mi dangte erawh chu chatuana tihboral an ni ang.—Thup. 20:15; 21:3, 4.

Entîrna pakhat hi han ngaihtuah teh. Mi fel leh fel lo kaihthawhte dinhmun chu ram danga pêm duhtu ram dang mite nêna tehkhin theih a ni. Mi felte chu hnathawh phalna visa, a nih loh leh awm phalna visa dawngtute ang an ni a, chu chuan hriatpuina bâkah, zalênna eng emaw chen a pe a ni. Chumi nêna inkalh takin, mi fel lote chu rei lo te chhûng chauh awm phalna visa, a nih loh leh kual zin anga tlawh theihna visa dawngtute ang an ni a. Chutiang mi chuan a pêm duhna rama awm zawm zêl phalna a neih theih nân, dânte chu ṭha taka a zawm a ngai ngei ang. Chutiang bawkin, mi fel lo anga tho lehte pawhin Jehova dânte an zawm a ngaih dâwn bâkah, Paradis-a awm thei tûr chuan mi felte zîngah an tel tih anmahni ngeiin an lantîr a ngai ang. Miin ram danga a luh theih nân a tîrin eng visa pawh hmu mah se, mi ṭhenkhat chuan a hnuah khua leh tui nihna an dawng hial pawh a ni thei a; chutih laiin, ṭhenkhat chuan hnawhchhuah an tâwk pawh a ni thei bawk. Thu tlûkna hnuhnûng ber chu an pêm duhna rama an awm dân leh thiltihte ṭanchhana siam a ni ang. Chutiang bawkin, mitthi tho leh zawng zawngte chunga rorêlna hnuhnûng ber chu khawvêl thara an rinawmna leh an thiltihte ṭanchhana rêl a ni ang.

Jehova chu hmangaihna Pathian chauh a ni lo; rorêltu fel leh dikna ngainatu Pathian a ni bawk. (Deut. 32:4; Sâm 33:5) A hmangaihna chu mi felte leh fel lote kaihthawhna hmangin a lantîr ang. Chutih rualin, mitthi tho leh zawng zawngte chu nungchang lama a tehna sâng takte zâwm tûrin a beisei ang a. Amah hmangaih a, a tehna nunpuitute chauh khawvêl thara awm zawm zêl a phalsak ang.