1. Eng dinhmun harsa tak nge Joasa te, Uzia te, leh, Josia te’n an hmachhawn?

 NAUPANG mai emaw, tleirâwl emaw i nih laia Pathian mite tâna lal angin han inmitthla teh! Engtin nge i thiltihtheihna leh thuneihna chu i hman ang? Bible chuan naupan lai aṭanga Juda lal ni ṭhînte chungchâng tam tak min hrilh a. Entîr nân, Joasa chu kum 7 mi a ni a, Uzia chu kum 16 mi niin, Josia chu kum 8 mi a ni. An tâna a harsat dân tûr chu han ngaihtuah teh! An dinhmun chu a awlsam lo hle nachungin, Jehova leh mi dangte ṭanpuina avângin thil ṭha tam tak an ti thei a ni.

2. Engvângin nge Joasa te, Uzia te, leh, Josia te entawn tûr siam zir chu a ṭhat?

² Lal emaw, lalnu emaw ni lo mah ila, Bible-a mi pathumte hnên aṭangin zir tûr pawimawh tak kan zir thei a ni. Anni chuan thu tlûkna ṭha an siam a; thu tlûkna ṭha lo pawh an siam bawk. An entîrna aṭangin, ṭhian ṭha thlan te, inngaihtlâwmna neih reng te leh, Jehova kan zawn zawm zêl a pawimawh chhante kan hria ang.

3. Engtin nge Lal Joasa chuan Puithiam Lal Jehoiadaa kaihhruaina chu a chhân lêt?

³ Joasa thu tlûkna fing siam chu entawn rawh. Lal Joasa chu naupang tê a nih laiin, thu tlûkna fing a siam a. Pa nei tawh lo mah se, ani chuan Puithiam Lal rinawm tak, Jehoiada kaihhruaina chu a zâwm a ni. Chu puithiam Jehoiada chuan a fapa angin a kaihruai a. Chuvângin, Joasa chuan biakna dikah hma hruaiin, Jehova rawngbâwl tûrin thu tlûkna fing a siam a ni. Chu bâkah, Jehova biak in thuam ṭha tûrin ruahmanna a siam bawk.—2 Chro. 24:1, 2, 4, 13, 14.

4. Engtin nge Jehova thu pêkte kan ngainat a, kan zawm hian kan hlâwkpui? (Thufingte 2:1, 10-12)

⁴ Jehova hmangaih tûr leh a tehnate nunpui tûra zirtîr i nih  chuan thilpêk hlu tak i dawng a ni. (Thufingte 2:1, 10-12 chhiar rawh.) Nu leh pate chuan kawng chi hrang hrangin zirtîrna an pe thei a. Unaunu Katya-i chu a pain thu tlûkna ṭha siam tûra a ṭanpui dân hi lo ngaihtuah teh. A pa chuan nî tin school-ah a thlah ṭhîn a, ni châng a sawipui ṭhîn a ni. Ani chuan, “Chutianga sawihona chuan chumi nîa ka tawh harsatnate hmachhawn thei tûrin min ṭanpui a ni,” tiin a sawi. Mahse, i nu leh pate’n Bible ṭanchhan kaihhruaina an pêk che chuan i zalênna neih chu khuahkhirh lutuk angin i ngai em? Engin nge an kaihhruaina pawm tûra ṭanpui thei che? Unaunu Anastasia-i nu leh pate chuan dân an zam chhan an hrilhfiah a. Ani chuan, “An hrilhfiahna chuan chûng dânte chu min khuahkhirhna ni lovin, hmangaihna avânga min vênhimna a ni tih hre thiam tûrin min ṭanpui a ni,” tiin a sawi a ni.

5. Engtin nge i thiltih chuan i nu leh pate leh Jehova chu a nghawng ang? (Thufingte 22:6; 23:15, 24, 25)

⁵ Bible ṭanchhan thurâwn an pêkte i nunpui chuan i nu leh pate chu an hlim ang a. A pawimawh ber chu Pathian i tilâwmin, amah nêna in inṭhianna pawh a nghet lehzual ang. (Thufingte 22:6; 23:15, 24, 25 chhiar rawh.) Chu chu Joasa’n a naupan laia entawn tûr a siam chu i entawm chhan tûr ṭha tak a ni lâwm ni?

6. Joasa chuan tute thurâwn pêk nge a ngaihthlâk a, chu chuan eng nge a rah chhuah? (2 Chronicles 24:17, 18)

⁶ Joasa thu tlûkna ṭha lo siam aṭangin inzir rawh. Jehoiada thih hnu chuan, Joasa’n ṭhian ṭha lo a kâwm a. (2 Chronicles 24:17,18 chhiar rawh.) Ani chuan Jehova hmangaih lotu Juda hotute thurâwn pêk chu a ngaithla a. Joasa chuan chûng buaina siamtute chu a pumpelh tûr a ni tih i pawm ngei ang. (Thuf. 1:10) Chu aiin, ani chuan a ṭhian ṭha lote thu chu a ngaithla a. A nihna takah chuan Joasa laichîn unaupa Zekaria’n siam ṭhat a tum chuan ani chu a that ta a ni. (2 Chro. 24:20, 21; Mt. 23:35) A râpthlâkin, a va âtthlâk tak êm! Joasa chu a tîr lamah chuan a nun a ṭha hle a; mahse, lungchhiatthlâk takin, a kalpên a, a nunrâwng ta hle a. A tâwpah, a chhiahhlawhte’n an that ta a ni. (2 Chro. 24:22-25) Jehova thu ngaithla zawm zêlin, Pathian hmangaihtute chauh ṭhianah siam se chuan, a nunah chutiang chu a thleng lo ngei ang! A entawn tûr siam aṭangin tih loh tûr eng nge i zir theih?

7. Tute nge ṭhian atân i thlan ang? (Milem en bawk rawh)

⁷ Joasa’n thu tlûkna ṭha lo a siam aṭanga kan zir theih pakhat chu kan chunga nghawng ṭha tak neitu—Jehova hmangaihtute leh amah tihlâwm duhtute ṭhiana kan thlan a ngai  tih hi a ni. Kan rualpuite chauh ṭhianah kan siam kher a ngai lo. Joasa chu a ṭhian Jehoiada aiin a naupang hle tih hre reng ang che. Ṭhian i thlan dân chungchângah heti hian inzâwt ang che: ‘Anni chuan Jehova ka rinna tinghet tûrin min ṭanpui em? Anni chuan Pathian tehnate nunpui tûrin min fuih em? Jehova chungchâng leh thutak hlutnate chu an sawi ṭhîn em? Pathian tehnate zahna an lantîr em? Kawng sual ka zawh hunah ka hriat duhte min hrilh mai nge ni a, min siam ṭhat tumin min fuih zâwk?’ tiin. (Thuf. 27:5, 6, 17) Tlang taka sawi chuan, Jehova hmangaih lotu i ṭhiante chu i mamawh lo a ni. Mahse, Jehova hmangaihtu ṭhian i neih chuan anni chu thlah suh—i tân mi ṭha tak an ni dâwn si a!—Thuf. 13:20.

8. Social media kan hmang a nih chuan, eng nge kan ngaihtuah ang?

⁸ Social media aṭangin chhûngte leh ṭhiante nên inbiak pawhna ṭha tak kan nei thei a. Mahse, mi tam tak chuan mi dangte ngaihsân an hlawh theih nân thlalâk te, leh an thil lei leh thiltih video-te an pho chhuak ṭhîn a ni. Social media i hmang a nih chuan heti hian inzâwt rawh: ‘Mi dangte ngaihsân ka hlawh duh vâng a ni em? Mi dangte siam ṭhat ka tum vâng nge ni a, fak ka hlawh duh vâng zâwk? He hmanrua hmangtute chu ka ngaihtuahna te, ka thusawi dân te leh, ka thiltih dânte a dik lo zâwngin ka inthununtîr em?’ tiin. Governing Body member Unau Nathan Knorr-a chuan he thurâwn hi min pe a ni: “Mihring tihlâwm tum suh. Tumah i tilâwm zo lo vang. Jehova tilâwm la, amah hmangaihtu zawng zawng i tilâwm ang,” tiin.

9. Jehova chuan Uzia chu eng ti tûrin nge a ṭanpui? (2 Chronicles 26:1-5)

⁹ Uzia thu tlûkna ṭha siam chu entawn rawh. Naupang tê a nih laiin, Lal Uzia chu a inngaitlâwm a. Ani chuan “Pathian zawng tûrin” theih tâwp a chhuah a ni. Jehova malsâwmna nasa tak nên kum 68 chhûng a dam a ni. (2 Chronicles 26:1-5 chhiar rawh.) Uzia chuan hmêlma tam tak a hneh a, Jerusalem chu ṭha takin a vênghim bawk. (2 Chro. 26:6-15) Uzia chu chutiang thil ti thei tûra Pathianin a ṭanpui avângin a lâwm hle ngei ang.—Thur. 3:12, 13.

10. Engtin nge Uzia dinhmun chu a awm?

¹⁰ Uzia thu tlûkna ṭha lo siam aṭangin inzir rawh. Lal Uzia chuan mi dangte chu kaihhruaina a pe ṭhîn a. Chu chuan a duh apiang ti thei nia inhriatna a neihtîr em? Ni khat chu, Uzia chuan lalte tâna tih phal loh maichâma rimtui hâl tumin Pathian biak inah a lût a. (2 Chro. 26:16-18) Puithiam hotu Azaria chuan a khap a; mahse, Uzia chu a thinur hle a ni. Lungchhiatthlâk takin, Uzia chuan rinawm taka rawng a lo bâwl tawhna chu a tichhe zo ta a, phâr hri veia hrem a ni ta a ni. (2 Chro. 26:19-21) Inngaihtlâwmna nei reng se chuan a nunah chutiang thil chu a thleng lo ngei ang!

11. Eng thiltihte’n nge kan inngaihtlâwm leh tlâwm loh lantîr thei? (Milem en bawk rawh.)

¹¹ Uzia chuan thiltihtheihna a lo neih tâkah chuan, chakna leh hausakna Petu Jehova chu a theihnghilh ta a. Zir tûr eng nge kan neih? Malsâwmnate leh chanvo hlu kan dawnte hi Jehova min pêk a ni tih kan hre reng tûr a ni. Kan thil hlen chhuahte chapopui ai chuan kan tihtheihte avângin Jehova kan chawimawi zâwk tûr a ni. b (1 Kor. 4:7) Kan ṭha famkim lova, thununna kan mamawh tih inngaitlâwm takin kan pawm tûr a ni. Kum 60 vêla upa unaupa chuan: “Ka thil tihsualte min  dangin min hrilh hian thinrim emaw, lunghnual emaw loh ka tum a. Atthlâk taka thil ka tihsual avânga zilh ka nih hian insiam ṭha a, hma lam pan tlat ka tum a ni,” tiin a sawi. Jehova thu kan awih a, inngaihtlâwmna kan neih reng chuan nunah hlimna dik tak kan nei ang.—Thuf. 22:4.

12. Naupang tê a nih laiin, engtin nge Josia chuan Jehova a zawn? (2 Chronicles 34:1-3)

¹² Josia thu tlûkna ṭha siam chu entawn rawh. Josia chuan tleirâwl a nih lai aṭangin Jehova a zawng ṭan a. Jehova chungchâng zir leh a duh zâwng tih a duh a ni. Mahse, chu lal naupang tak tân chuan nun a awlsam lo hle a. Ani chu biakna dik lo a hluar êm êm laiin, biakna dik tân huaisen takin a ding nghet tlat a. A huaisen tak zet! Josia chuan kum 20 a tlin hmain, biakna dik lote chu ram chhûng aṭangin a nuai bo ṭan a ni.—2 Chronicles 34:1-3 chhiar rawh.

13. Jehova hnêna i inpumpêkna chuan i tân eng awmzia nge a neih?

¹³ Naupang hle mah la, Jehova leh a mize hlu takte zir chianna hmangin Josia i entawn thei a ni. Chutianga i tihna chuan Pathian hnêna inpumpêk duhna a neihtîr ang che. Chutianga i inpumpêkna chuan nî tina i nunah engtin nge a nghawng ang che? Kum 14 mi nia baptisma changtu Luke-a chuan, “Tûn aṭang chuan, ka nunah Jehova rawngbâwl ka dah hmasa ber ang a, amah tihlâwm ka tum ang,” tiin a sawi. (Mk. 12:30) Chutianga tih ve duhna i nei a nih chuan, i tân malsâwmna a va ni dâwn tak êm!

14. Ṭhalai ṭhenkhatte’n Lal Josia an entawn dân chu entîrna pe rawh.

¹⁴ Jehova rawngbâwl ṭhalai pakhat i nih angin, eng harsatnate nge i hmachhawn? Kum 12 mi a niha baptisma chang Johan-a chuan a classmate-te’n vaping tia an koh, electronic cigarette zu ve tûra an nawr luih thu a sawi. Chutianga an nawrluihna chu hnâwl thei tûrin, Johan-a chuan chu cigarette zial a zûk chuan a hrisêlna leh Jehova nêna an inṭhianna pawh a tichhe thei tih a inhriatnawntîr ṭhîn a ni. Kum 14 mi nia baptisma chang Rachel-i chuan school-a a hmachhawn  harsatnate hneh tûra ṭanpuitu chu a sawi a. Ani chuan: “Ka thil hmuhte chu thlarau lam thilte nêna inthlun zawmtîr ka tum a. Entîr nân, hmân lai chanchinte ka zir hian, Bible-a thilthleng pakhat emaw, hrilh lâwkna emaw ka ngaihtuah a ni. A nih loh leh, school-a tuemaw nên kan inbiak hian Bible châng ka hman ṭangkai theihte min hriat chhuahtîr a,” tiin a sawi. I hmachhawn harsatnate leh Lal Josia hmachhawn harsatnate chu a inang lo hle thei a; mahse, amah ang bawkin fing tak leh rinawm takin i ti ve thei a ni. Naupan laia harsatnate i hmachhawn theihna chuan hun lo awm zêl tûra harsatna dang hmachhawn thei tûrin a buatsaih ang che.

15. Engin nge Josia chu rinawm taka Jehova rawngbâwl tûra ṭanpui? (2 Chronicles 34:14, 18-21)

¹⁵ Kum 26 mi a nih chuan Lal Josia chuan biak in hlui chu a thuam ṭha ṭan a. An hnathawh lai chuan, “Mosia hmanga pêk LALPA dân bu chu” hmuh chhuah a ni a. Lalin chu dân thute a han hriat chuan dânin a sawite chu zâwmin hma a la nghâl a ni. (2 Chronicles 34:14, 18-21 chhiar rawh.) Bible chhiar ziah i duh em? Nî tin i chhiar ṭhîn a nih chuan nuam i ti em? Mi mal taka ṭanpui thei che Bible chângte i chhinchhiah em? Kan târ lan tâk Luke-a chuan a thu chhiara ngaihnawm a tih laite chu ziakin a chhinchhiah a. Chutiang tihna chuan Bible chângte leh chuta ṭanga kan zir theihte hre reng tûrin a ṭanpui thei che a ni. Bible thute i hriat tam a, i ngainat poh leh Jehova rawngbâwl i duh lehzual ang a. Lal Josia ang bawkin, Pathian Thu anga thil ti tûrin a chêttîr ang che.

16. Engvângin nge Josia chuan thil sual lian tak a tih a, eng nge zir tûr kan neih?

¹⁶ Josia thu tlûkna ṭha lo siam aṭangin inzir rawh. Josia chu kum 39 mi a nih chuan, thil a tisual a, a nun a chân phah ta a ni. Ani chuan Jehova kaihhruaina zawng lovin, mahni a inrinchhan a. (2 Chro. 35:20-25) Zir tûr kan nei a ni. Kan kum upat lam emaw, Bible kan zir rei zâwng emaw chu eng ang pawh ni se, Jehova  kaihhruaina kan zawng zêl tûr a ni. Chutah chuan a kaihhruaina zawnga ṭawngṭaina te, a Thu zirna te, leh Kristian puitlingte thurâwn pêk hlâwkpuinate pawh a tel a ni. Tichuan, thilsual lian tak tihnate kan pumpelh ang a, kan hlim lehzual ang.—Jak. 1:25.

17. Juda lal pathumte chanchin aṭangin eng nge zir tûr kan neih?

¹⁷ I vâng lai hian thil tam tak tihna hun remchâng ṭha i nei a. Joasa te, Uzia te leh, Josia te chanchin aṭangin, ṭhalaite chuan duhthlanna fing an siam thei a, anni chuan Pathian tilâwm zâwngin an nung thei tih an târ lang a ni. Dik tak chuan, kan hriat tâk angin, hma lam huna kan nun awm dân tûr chu chiang taka sawi lâwk theih a ni lo ngei mai. Mahse, chûng lalte thil ṭha tih chu kan entawn thei a, an thilsual tihte chu kan pumpelh thei a ni. Chutianga kan tih chuan, nun hlimawm tak kan beisei thei a ni.

18. Bible-a eng entîrnain nge nun hlimawm tak i nei thei tih târ lang? (Milem en bawk rawh)

¹⁸ Bible-ah hian Jehova hnaih tlat a, a lawm hlawhte leh nun lungâwithlâk tak nei ṭhalai dangte hming pawh a chuang a. Chûng zînga pakhat chu Davida a ni. A naupan laiin Pathian ṭhian nih a thlang a, a hnuah lal rinawm tak a ni ta a ni. Thil tihsual châng nei mah se, Pathianin ani chu mi rinawm tak angin a thlîr a. (1 Lal. 3:6; 9:4, 5; 14:8) Davida chungchâng i zir chuan rinawm taka Jehova rawngbâwl tûra chêttîr i ni thei a. Chu bâkah, Marka leh Timothea entawn tûr siam aṭangin i inzir thei bawk. Anni chuan an naupan têt aṭangin Jehova rawng an bâwl a, rinawm takin an bâwl zâwm zêl a ni: chu chuan Jehova a tihlim a, anni pawh an hlim bawk a ni.

19. Eng ang nun nge i neih theih?

¹⁹ Tûna nun i hman dân hian nakin huna i nun dân tûr a thunun thei a. Jehova rinchhan la, nangma hriatnaah innghat suh; tichuan, thu tlûkna fing siam tûrin a ṭanpui ang che. (Thuf. 20:24) Nun hlimawm tak leh lungawithlâk tak i nei thei a ni. Jehova chuan a tâna i thiltihte chu a ngai hlu tih hre reng ang che. Hmangaihna ngah tak kan Pa vâna mi rawngbâwl nâna i nun i hman aia ṭha zâwk a awm thei dâwn em ni?