1. Thilmak tihna hmanga sangha an man hnuah Petera chu engtin nge a awm?

 PETERA chuan sangha man tumin zankhuain lên a lo dêng tawh a. Isua’n a hlawhchham tih a hmuhin: “Li thûk lam pan la, sangha man tûrin in lênte dêng rawh,” tiin a hrilh a ni. (Lk. 5:4) Petera chuan sangha man inring lo mah se, hrilh a nih ang chuan a ti a. Lên ṭet khawpin sangha chu an man ta ṭeuh va. Chu thilmak tih chu an hmuhin Petera leh a thawhpuite chuan “mak an ti hle” a ni. Chu veleh, Petera chuan: “Lalpa, mi kalsan rawh, mi sual ka nih hi,” a ti a. (Lk. 5:6-9) Ani chu Isua bula awm tlâkah a inngai lo a ni mai thei.

2. Engvângin nge Petera chungchâng zirna chuan min ṭanpui theih?

² Petera chu a sawi angin “mi sual” a ni. Bible chuan a hnua a inchhîr lehna tûr thute sawiin thilte a tih thu a târ lang a. Petera ang chu i ni ve em? Mize ṭha lovin emaw, sual tihduhnain emaw a tibuai che em? Chutiang a nih chuan, Petera chungchâng zirna aṭangin beiseina i nei thei a ni. Engtin nge? Hei hi han ngaihtuah teh: Petera tlin lohnate chu Bible-a ziah lan loh theih a ni a. Mahse, chûngte chu kan inzirna atân thlarauva thâwk khuma telh a ni. (2 Tim. 3:16, 17) Keimahni anga chak lohnate leh rilru put hmangte neitu Petera chungchâng zirna aṭangin Jehova’n kan lakah famkimna a phût lo tih kan hre thei a. Ani chuan chak lohnate nei mah ila, beidawng lova bei fan fan tûrin min duh a ni.

3. Engvângin nge kan beidawn mai loh vang?

 ³ Engvângin nge kan beidawn loh a pawimawh? Thil eng emaw beidawng lova kan zir hian kan thiamna a pung a. Entîr nân, rimawi tum zir mi chuan kum tam tak chhûng rimawi tum thiam tûrin a zir a. Chutih chhûng chuan, vawi tam tak tihsual châng a nei ang; mahse, beidawng lova a zir ṭâng ṭâng erawh chuan hma a sâwn phah dâwn a ni. Rimawi tum thiam a nih hnuah pawh tihsual châng chu a la nei zeuh zeuh thei a. Mahse, a beidawng lo. A thiam lehzual nân rimawi chu a tum chhunzawm zêl a ni. Chutiang bawkin, chak lohna eng emaw hneh tawh nia kan inhriat hnuah pawh tihsual leh châng kan nei thei a. Mahse, hmasâwn tumin beidawng lovin kan bei a ni. Kan za hian kan inchhîr lehna tûr thute sawiin thilte kan ti ṭhîn a; chuti chung pawhin, kan beidawn loh chuan hmasâwn zêl tûrin Jehova’n min ṭanpui ang. (1 Pet. 5:10) Petera beidawn lohna chungchâng lo ngaihtuah ta ila. Tlin lohnate a nei chung pawha a chunga Isua lantîr khawngaihna chuan Jehova rawngbâwl chhunzawm zêl tûrin min chêttîr thei a ni.

4. Luka 5:5-10-a kan hmuh angin, Petera chuan eng angin nge a insawi a, Isua’n engtin nge a thlamuan?

⁴ Petera’n “mi sual” tia a insawi chhan emaw, sualna nei nia a inhriat chhan emaw chu Bible-in a târ lang lo. (Luka 5:5-10 chhiar rawh.) Mahse, thil sual lian tak a ti a nih a rinawm. Tling lo nia a inngaih avânga Petera hlauhna chu Isua’n a hria a. A rinawm reng thei tih a hre bawk. Chuvângin, Petera hnênah ngilnei takin “Hlau suh,” tiin a hrilh a ni. A chunga Isua rin tâwkna chuan Petera nunah nghawng thui tak a nei a. A hnuah, Petera leh a unaupa Andria chuan sangha mana sumdâwnna chu kalsanin hunbi kimin Messia hnung an zui a, chu chuan an nunah malsâwmna tam tak a thlen a ni.—Mk. 1:16-18.

5. Petera chuan a hlauhna hneha Isua sâwmna a pawmna aṭangin eng malsawmnate nge a dawn?

⁵ Petera chuan Krista hnungzuitu a nihna aṭangin thilthleng ropui tak tak a hmu a. Isua’n mite a tihdam laite, ramhuai a hnawt chhuah laite leh, mitthi a kaihthawh laite pawh a hmu a ni. b (Mt. 8:14-17; Mk. 5:37, 41, 42) Chu bâkah, a chunga nghawng nasa tak neitu Isua Lalram ropuina inlârna chu a hmu bawk. (Mk. 9:1-8; 2 Pet. 1:16-18) Ni e, Petera chuan a beisei phâk loh thil tam tak a hmu a ni. Chûng malsâwmnate dawng lo  tûra a thim zâwnga mahni inthlîrna a indâltîr lo chu a va lâwm dâwn tak êm!

6. Petera’n a chak lohnate chu awlsam takin a hneh em? Hrilhfiah rawh.

⁶ Chûng thilte chu Petera’n hmuin hre mah se, a chak lohnate avângin harsatna a la nei reng tho va. Thilthleng ṭhenkhat lo ngaihtuah ta ila. Isua’n Bible hrilh lâwk anga hrehawm tuara a thih tûr thu a sawi khân Petera’n ani chu a zilh a. (Mk. 8:31-33) Tirhkoh dangte nên ropui ber nih tumin an inhnial fo a ni. (Mk. 9:33, 34) Isua thih hma zân khân Petera’n mi pakhat chu beiin a beng a sah thlâksak a. (Joh. 18:10) Chumi zân vêk chuan, a hlauhna thununa awmin a ṭhian Isua chu vawi thum lai a phat bawk. (Mk. 14:66-72) Chuvângin, a hnuah Petera chu a ṭap ta zawih zawih a ni.—Mt. 26:75.

7. Isua’n a thawhleh hnuah Petera chu eng chanvo nge a pêk?

⁷ Isua chu a tirhkoh lunghnual tak chungah a beidawng lo. A thawhleh hnuah, Petera chu amah a la hmangaih tih lantîr theihna hun remchâng a pe a. Isua’n ani chu inngaitlâwm taka a berâmte vêng tûrin a sâwm a ni. (Joh. 21:15-17) A sâwmna chu Petera’n lâwm takin a pawm a. Ani chu Pentikost nîa Jerusalema thlarau thianghlima hriak thih hmasakte zîngah a tel a ni.

8. Petera’n Antiokei khuaah eng thilsual lian tak nge a tih?

⁸ Petera chuan thlarauva hriak thih a nih hnuah pawh a chak lohnate chu a do zêl a la ngai a. C.E. 36-a Jentail mi Kornelia thlarau thianghlima hriak thih a nih khân Petera chu a awm ve a, chu thilthleng chuan “Pathianin mi duhsak bîk a nei lo,” tih leh Jentailte chu Kristian kohhranah an tel thei tih chiang takin a târ lang a ni. (Tirh. 10:34, 44, 45) Chuta chin chu Jentailte hnênah chaw a ei ṭhîn a, chu chu tûn hmaa a la tih ngai loh thil a ni. (Gal. 2:12) Mahse, Juda Kristian ṭhenkhat chuan Jentailte nêna chaw ei tlân theih loh tûrah an ngai a. Chutiang ngaih dân neite Antiokei khuaa an kal chuan, anni chu tihlungnih loh a hlauh avângin Petera chuan a Jentail unaute chu chaw a eipui duh ta lo va. Tirhkoh Paula’n a vervêkna chu a hmuhin vântlâng hmaah a zilh ta a ni. (Gal. 2:13, 14) Chutianga tihsual châng nei mah se, Petera chu a beidawng lo. Engin nge ani chu ṭanpui?

9. Engtin nge Johana 6:68, 69-nain Petera rinawmzia a târ lan?

⁹ Petera chu a rinawm a; Isua hnungzui lo tûrin eng thil mah indâltîr a phal lo. Ṭum khat chu, Isua’n a zirtîrte hriatthiam loh tûr thu a sawi khân ani chuan a rinawmna a lantîr a ni. (Johana 6:68, 69 chhiar rawh.) Isua hnungzuitu tam tak chuan a hrilhfiah hun nghâk lo leh a hrilhfiahna zâwt lovin an kalsan ta mai a. Mahse, Petera chuan chutiang chuan a ti ve lo. Ani chuan Isua hnênah chauh “chatuana nunna thu” a awm tih a hria a ni.

10. Engtin nge Isua’n Petera a rinzia a lantîr? (Milem en bawk rawh.)

¹⁰ Isua’n Petera chu a thlahthlam lo va. A nun tâwp dâwn zânah Petera leh tirhkoh dangte’n an thlahthlam dâwn tih a hria a ni. Chuti chung chuan, Petera chu rawn kîr lehin a rinawm reng dâwn tih a rinzia a sawi a. (Lk. 22:31, 32) Ani chuan “thlarau zawngin a peih a, tisa erawh chu a chak lo” tih a hria a ni. (Mk. 14:38) Chuvângin, Petera’n a hriat thu a phat hnunah pawh Isua chu a chungah a beidawng lo. A thawhleh hnuah, Petera chu amah chauhva a awm laiin a hnênah a inlâr a ni. (Mk. 16:7; Lk. 24:34; 1 Kor. 15:5) Chu  chuan tirhkoh lungngai tak chu a va tichak dâwn êm!

11. Engtin nge Isua’n Petera chu Jehova’n a ṭanpui ang tih a rinnghehtîr?

¹¹ Isua’n Petera chu Jehova’n a ngaihsak ang tih a hriat chiantîr a. Tholeh Isua chuan Petera leh tirhkoh dangte chu thilmak tihna hmangin sangha a mantîr leh a ni. (Joh. 21:4-6) Chu thilmak tih chuan Petera chu a tisa lam mamawhte Jehova’n awlsam takin a pe thei tih a rinnghehtîr ngei ang. Ani chuan Jehova’n ‘a ram zawng hmasatute’ a ṭanpui ang tih Isua sawi chu a hre chhuak mai thei. (Mt. 6:33) Chuvângin, Petera chuan a nunah sangha mana sumdâwnna aiin rawngbâwlna chu a dah hmasa ber a ni. C.E. 33, Pentikost nîah huaisen taka thu hrilin mi a sâng telte chu thutak pawm tûrin a ṭanpui a. (Tirh. 2:14, 37-41) Chumi hnuah, Samari mite leh Jentailte chu Krista hnungzui tûrin a ṭanpui bawk. (Tirh. 8:14-17; 10:44-48) Jehova’n Petera chu hnam chi hrang hranga mite kohhrana hruai lût tûrin a hmang tih a chiang hle.

12. Chak lohna do reng ngai kan nei a nih chuan, engtin nge Petera entawn tûr siamin min ṭanpui theih?

¹² Jehova’n beidawng lo tûrin min ṭanpui thei a. Mahse, kan chak lohna do hneh harsa kan tih chuan hma lâk zawm zêl a harsa thei a ni. Kan chak lohnate chu Petera hmachhawn chak lohnate aia do harsa zâwk anga lan châng a awm thei a. Mahse, Jehova chuan beidawng lo tûrin chakna min pe thei a ni. (Sâm 94:17-19) Entîr nân, unaupa pakhat chu thutak a hriat hmain kum tam tak chhûng neih inang kawp chîng mi a lo ni ṭhîn a. Chûng nungchang bawlhhlawhnate chu a bânsan hmak a ni. Chutichung chuan, châkna ṭha lo chuan tihbuai châng a la nei a. Engin nge ani chu beidawng lo tûra ṭanpui? Ani chuan: “Jehova’n min tichak a. A thlarau thianghlim ṭanpuinain . . . , thutak kawng ka zawh [zawm zêl] thei tih ka hria a . . . Jehova mi hman ka ni theiin, ṭha famkim lo ka ni chung pawhin min tichak chhunzawm zêl a ni,” tiin a sawi.

13. Tirhkohte 4:13, 29, 31-a chhinchhiah angin, engtin nge Petera chu kan entawn theih? (Milem en bawk rawh.)

¹³ Kan hriat tawh angin, Petera chuan mihring a hlauh avângin vawi khat aia tam thil a tisual a. Mahse, chakna dîla a ṭawngṭai hnu chuan huaisen takin thil a ti thei  a ni. (Tirh. 4:13, 29, 31 chhiar rawh.) Keini pawhin kan hlauhna chu kan hneh thei a. Nazi Germany rama chêng ṭhalai unau Horst-a chunga thilthleng hi han ngaihtuah teh. Ani chuan school-a nawr luihna a tawh avângin “Heil Hitler!” tia Hitler-a chibai bûkna chu vawi khat aia tam a sawi ve a. A nu leh pate chuan hau mai lovin Jehova hnênah huaisenna dîlin an ṭawngṭaipui a. A nu leh pate ṭanpuina leh Jehova a rinchhan avângin Horst-a chuan nghet taka ding tûrin huaisenna a nei chho ta a ni. A hnuah, ani chuan: “Jehova’n min thlahthlam ngai lo,” tiin a sawi. c

14. Engtin nge lunghnualna neite chu hmangaihna nei tak berâm pute’n an ṭanpui theih?

¹⁴ Jehova leh Isua chu kan chungah an beidawng lo vang. Petera chuan Krista a phatsan hnuin a nunah thu tlûkna pawimawh tak a siam a ngai a. Krista zirtîr nih a bânsan dâwn nge, a ni chhunzawm dâwn? Petera’n a rinna a hloh loh nân Isua’n Jehova hnênah a lo ngensak tawh a. Chutianga a ṭawngṭaisakna chu Petera hnêna hrilhin, a hnuah a unaute a tichak leh thei ang tih a rinngheh tlatzia a hrilh a ni. (Lk. 22:31, 32) Isua thusawite ngaihtuah lêtna chuan Petera chu a tichak ngei ang! Nuna thu tlûkna pawimawh tak siam a ngaih hunah, Jehova chuan rinawm reng tûra min ṭanpui tûrin berâm pu hmangaihna nei takte chu a hmang thei a. (Eph. 4:8, 11) Hun rei tak chhûng upa lo ni tawh Paul-a chuan chutiang thlamuanna chu pêk a tum a. Beidawng lek lekte chu Jehova’n thutaka a hîp ṭan dân ngaihtuah lêt tûrin a hrilh a ni. A hmangaihna rinawm avângin Jehova chu an chungah a beidawng lo vang tih a hriat chiantîr a. Ani chuan, “Lunghnualna  nei mi tam takin Jehova ṭanpuinain beidawng lovin hma an la ṭan leh tih ka hmu,” tiin a sawi.

15. Engtin nge Petera leh Horst-a te thiltawn chuan Matthaia 6:33-a thute dikzia a târ lan?

¹⁵ Jehova’n Petera leh tirhkoh dangte tisa lam mamawh a ṭanpui ang bawkin, kan nuna rawngbâwlna kan dah hmasak ber chuan kan tisa lam mamawh min ṭanpui ve ang. (Mt. 6:33) Kan târ lan tâk Horst-a chuan Khawvêl Indopui II-na a tâwp hnu chuan pioneer thawh a tum a. Mahse, a retheih êm avângin mahnia inchâwma hunbi kima rawng a bâwl theih a ring lo va. Eng nge a tih tâk? Ani chuan bial kan kâr chhûng zawnga rawngbâwlnaa telin Jehova fiah chu a tum ta a ni. Chawlhkâr tâwpa bial kantuin tu tih hriat loh hnên aṭanga lehkha ip a pêk chuan mak a ti hle a. Chu lehkha ipah chuan thla eng emaw zât chhûng pioneer a thawh theihna tûra a mamawh sum a awm a ni. Horst-a chuan chu thilpêk chu Jehova’n a mamawhte a pe ang tih a tiam nawnna angin a ngai a. Lalram dah hmasa berin a nun pum a hmang ta a ni.—Mal. 3:10.

16. Engvângin nge Petera chanchin leh a lehkha thawnte zir chu kan tân a ṭhat?

¹⁶ A ngen anga Isua’n a kalsan loh avângin Petera chu a va lâwm dâwn êm! Krista’n tirhkoh rinawm tak ni tûr leh Kristiante tâna entawn tûr ṭha tak ni tûrin a zirtîr zawm zêl a ni. Petera dawn chu zirtîrna aṭang chuan thil hlu takte kan zir ṭheuh thei a. Kum zabi khatnaa kohhrante hnêna thlarauva thâwk khum a lehkha thawn pahnihah chûng a zirtîrna dawnte leh thil dangte chu a târ lang a ni. A dawta thuziakah, chûng lehkha thawntea chuang hriat nawntîrna ṭhenkhat tûn laia kan nunpui theih dân sawiho a ni ang.