1. Jehova’n Petera chu a thih dâwn hnaihah eng ti tûrin nge a hman?

 TIRHKOH Petera chuan a thi mai tawh dâwn tih a hria a. Kum sâwmbi tam tak rinawm taka rawng a bâwl chhûng khân Isua nên an thawk dûn a, thu hrilhna tûr hmun tharte a hawng a, a hnuah Governing body member pakhat angin rawng a bâwl a ni. Mahse, a rawngbâwlna chu chutiang chuan a tâwp mai lo. C.E. 62-64 vêl khân, ani chu Bible-a Petera lehkha thawn pakhatna leh pahnihna ziak tûra thlarauva thâwk khum a ni a. Chûng a lehkha thawnte chuan a thih hnuah Kristiante chu a ṭanpui ang tih a beisei a ni.—2 Pet. 1:12-15.

2. Engvângin nge Petera lehkha thawnte chu a hun taka ziah a nih?

² Petera chuan chûng a lehkha thawn pahnihte chu a Kristian unaute ‘thlêmna tinrêng avânga an lungngaih’ laia a ziah a ni a. (1 Pet. 1:6) Mi suaksualte chuan zirtîrna dik lote leh nungchang bawlhhlawhnate chu kohhran chhûnga awmtîr an tum a. (2 Pet. 2:1, 2, 14) Jerusalem-a Kristiante chuan Rom sipaite hmanga Jerusalem khawpui leh Judate kalhmang tihchhiatna “thil zawng zawng tâwpna chu” an hmachhawn thuai dâwn a ni. (1 Pet. 4:7) Petera lehkha thawnte chuan Kristiante chu tûna an hmachhawn mêk fiahnate chhel taka tuar chhuak thei tûr leh an la hmachhawn tûr fiahnate tâna inbuatsaih tûrin a ṭanpui ngei ang. b

3. Engvângin nge Petera lehkha thawnte chu kan bih chian ang?

³ Petera chuan chûng a lehkha thawnte chu kum zabi khatnaa  Kristiante tâna a ziah ni mah se, Jehova chuan chûng lehkha thawnte chu Bible-ah a chuantîr a. Chuvângin, keini pawhin chûng lehkha thawnte chu kan hlâwkpui thei a ni. (Rom 15:4) Nungchang bawlhhlawh chawi lârna khawvêlah kan awm avângin keini pawhin Jehova rawngbâwl ti harsa thei fiahnate kan hmachhawn a. Chu bâkah, nakin lawkah Judate kalhmang tâwpna thlentu aia nasa zâwk hrehawm nasa tak kan hmachhawn bawk ang. Petera lehkha thawn pahnihah hriatnawntîrna pawimawh tak ṭhenkhat kan hmu a. Chûngte chuan Jehova nî beisei tlat tûr te, mihring hlauhna hneh tûr te leh, inhmangaih tawn nasa lehzual tûrtein min ṭanpui ang. Chu bâkah, chutiang hriat nawntîrnate chuan upate chu an berâmte mamawh ang zêla ṭha taka ngaihsak dân hre tûrin a ṭanpui thei bawk a ni.

4. 2 Petera 3:3, 4-a sawi angin, engin nge kan rinna chu tinghîng thei?

⁴ Bible hrilh lâwkna ring lotute hual vêlin kan awm a. Kum tam tak chhûng tâwpna kan beisei avângin ring lo mite chuan min nuihsawh thei a. Sawisêltu ṭhenkhat chuan tâwpna chu a thleng ngai lo vang tiin an sawi a ni. (2 Petera 3:3, 4 chhiar rawh.) Thu hrilhnaa kan mi tawnte, kan hnathawhpuite, a nih loh leh chhûngkaw zîng aṭanga chutianga sawisêlna kan tawh hunah kan rinna a nghîng thei a. Petera chuan rinna nghet tak nei tûra kan tihtheihte a sawi a ni.

5. Engin nge he khawvêl tâwpna chungchânga thlîr dân dik nei tûra min ṭanpui ang? (2 Petera 3:8, 9)

⁵ Mi tam tak tân Jehova chu he khawvêl suaksual tak tâwpna thlentîr tûrin muang hle angin a lang thei a. Petera sawite chuan thlîr dân dik tak nei tûrin min ṭanpui thei a, Jehova hun thlîr dân chu mihringte thlîr dân nên a inan lohzia min hriat nawntîr a ni.(2 Petera 3:8, 9 chhiar rawh.) Mihringte tâna kum sâng khat chu Jehova tân chuan nikhat ang lek a ni a. Jehova chu a dawhthei a, tumah tihboral a duh lo. A ni tiam a thlen hunah he khawvêl suaksual tak hi a titâwp ang. Tâwpna thlen hmaa hnam zawng zawngte hnêna thu hrilh theihna hun remchâng kan la nei hi chanvo hlu tak a ni.

6. Engtin nge Jehova nî chu beisei leh ‘ṭhahnem ngai taka kan duh’ ang? (2 Petera 3:11, 12)

⁶ Petera chuan Jehova nî chu beisei leh ‘ṭhahnemngai taka duh’ tûrin min fuih a. (2 Petera 3:11, 12 chhiar rawh.) Chu chu engtin nge kan tih theih ang? A theih chuan nî tin khawvêl thara kan dawn tûr malsawmnate chu kan ngaihtuah thei a ni. Thlifîm takte dawngin ei tûr hrisêl takte i ei a, hmangaih tak tholehte i lo hmuak a, hmân lai kum zabi tam taka mite chu Bible hrilh lâwkna thlen famkim dân chungchâng zirtîr angin han inmitthla teh. Chutianga ngaihtuahna chuan chumi nî chu ṭhahnemngai taka beisei tlat tûr leh tâwpna a lo thleng thuai dâwn tih hre tûrin min ṭanpui ang. Hma lam hun chungchâng kan hriat lâwk avângin zirtîrtu dik lote hruai bovin kan awm lo vang.—2 Pet. 3:17.

7. Engtin nge mihring hlauhna chuan min nghawng theih?

⁷ Jehova nî kan beisei tlatna chuan mi dangte hnêna chanchin ṭha hril tûrin min chêttir a. Mahse, dinhmun ṭhenkhatah chuan hlauh châng kan nei mai thei. Engvângin nge? Mihring hlauhna kan neih vâng a ni. Chutiang chu Petera pawhin a tawng a ni. Isua chung thu an rêl zânah Petera chuan Isua zirtîr a nih thu a sawi duh lo va. (Mt. 26: 69-75) A hnûah, Petera vêk chuan: “An hlauhawmna chu hlau suh ula, mangang hek suh u,” tiin rinnghehna nên a sawi a ni. (1 Pet. 3:14) Petera thute chuan mihring hlauhna chu kan hneh thei tih min hriat chiantîr a ni.

8. Engin nge mihring hlauhna hneh tûra min ṭanpui thei? (1 Petera 3:15)

⁸ Mihring hlauhna hneh tûrin engin nge min ṭanpui thei? Petera chuan: “In thinlungah Krista chu Lalah ruat rawh u,” tiin min hrilh a. (1 Petera 3:15 chhiar rawh.) Chutah chuan kan Lal, Krista Isua nihna leh thiltihtheihna chhût ngunna a tel a ni. Mi dangte hnêna chanchin ṭha hrilhna hun remchâng i neih hunah zâmna emaw, hlauhna emaw i nei a nih chuan kan Lal chu hre reng ang che. Ani chu vântirhkoh chhiar sên lohte hual vêla awmin vâna rorêl angin mitthla la. Ani chuan “lei leh vâna thuneihna zawng zawng a nei” tih leh ‘kumkhuain, khawvêl tâwp thleng pawhin, i hnênah a awm zêl ang’ tih hre reng ang che. (Mt. 28:18-20) Petera chuan kan rinna humhim tûra “inpeih reng” tûrin min fuih a. Hnathawhnaah te, school-ah te, leh hmun dangahte thu hrilh i duh em? Chutianga i tih theih hun tûr chu ngaihtuah lâwkin, i thusawi tûr chu inbuatsaih la. Huaisenna dîlin ṭawngṭai la, mihring hlauhna hneh tûrin Jehova’n a ṭanpui ang che tih ring tlat rawh.—Tirh. 4:29.

9. Ṭum khat chu, engtin nge Petera’n hmangaihna a lantîr loh? (Milem en bawk rawh.)

⁹ Petera chuan hmangaihna lantîr dân a zir a. Isua’n “thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula,” tia a sawi lai khân ani pawh a awm a. (Joh. 13:34) Mahse, a hnuah Petera chuan Juda Kristiante a hlauh avângin Jentail unaute nêna ei tlân a duh ta lo va. Tirhkoh Paula chuan “vervêk” taka a thiltih chu a sawi chhuak a ni. (Gal. 2:11-14) Petera chuan chu zilhna chu pawmin a insiam ṭha ta a. A lehkha thawn pahnihah chuan unaute chu rilrua hmangaih tûr chauh ni lovin, a takin kan lantîr tûr a ni tiin a sawi uar a ni.

10. “Vervêkna tel lo hmangaihna tak tak” kan lantîrna chhan chu eng nge ni? Hrilhfiah rawh. (1 Petera 1:22)

¹⁰ Petera chuan kan unaute chu kan “hmangaih tak tak” tûr a ni tiin a sawi a. (1 Petera 1:22 chhiar rawh.) Chu kan hmangaihna chu thutak kan zawmna aṭanga lo awm a ni a. Chu thutakah chuan “Pathianin mi duhsak bîk a nei lo” tih zirtîrna a tel a ni. (Tirh. 10:34, 35) Kohhrana unau ṭhenkhat chungah chauh hmangaihna kan lantîr a nih chuan, hmangaihna chungchânga Isua thupêk zâwm kan ni thei lo vang. Ni e, Isua angin ṭhian ngainat bîk kan nei ngei ang. (Joh. 13:23; 20:2) Mahse, Petera chuan unau zawng zawngte chu kan chhûngkaw zînga mite an nih avângin hmangaih vek tûrin min hriat nawntîr a ni.—1 Pet. 2:17.

11. ‘Thinlunga ṭhahnemngai taka’ mi dangte hmangaihnaah chuan eng nge tel?

¹¹ Petera chuan ‘thinlunga ṭhahnem ngai taka inhmangaih tawn’ tûrin min fuih a. He thuziaka “ṭhahnem ngai taka” hmangaih tihah hian hmangaihna lantîr harsa kan tih tu emaw chungah pawh theih tâwp chhuaha hmangaihna lantîrna a tel a ni. Entîr nân, unau pakhat chuan kawng eng emaw takin min tilungni lo emaw, kan rilru a tina emaw a nih chuan engtin nge ni ang? A tîrah chuan hmangaihna lantîr aiin thungrulh kan duh mai thei. Mahse, Petera chuan thungrulhnain Pathian a tilâwm lo tih Isua hnên aṭangin a zir a ni. (Joh. 18:10, 11) Ani chuan: “Sual, sualin thungrûl suh ula, hauna haunain thungrûl hek suh ula, malsâwm hlauh zâwk rawh u,” tiin a ziak a ni. (1 Pet. 3:9) Hmangaihna nasa tak kan neih chuan kan rilru tinatute pawh ngilnei tak leh ṭha takin kan cheibâwl ang.

12. (a) Hmangaihna nasa tak chuan eng thil dang ti tûrin nge min chêttîr? (b) Remna Siamna Chuan Malsâwmna A Thlen tih video-a târ lan angin eng tih nge i tum tlat?

¹² A lehkha thawn pakhatnaah, Petera chuan ‘ṭhahnem ngai taka inhmangaih tawn’ tih ṭawngkam a hmang a. Chutiang hmangaihna chuan sual tlêmtê chauh ni lovin, “sual tam tak” a khuh a. (1 Pet. 4:8) Ani chuan kum tam tak kaltaa Isua’n ngaihdamna chungchâng a zirtîr chu a hre chhuak a ni mai thei. Chutih lai chuan, ani chuan a unaute chu “vawi sarih thlengin” ngaidam tûra a sawi khân mi ṭha tak niin a inngai ngei ang. Mahse, Isua chuan amah leh keini pawh telin ‘vawi sarih hmun sawmsarih thlenga’ ngaidam tûrin a zirtîr a. Chu chu tiam chin nei lo tihna a ni. (Mt. 18:21, 22) He fuihna hi nunpui harsa i ti a nih chuan lunghnual suh! Jehova chhiahhlawh ṭha famkim lote chuan mi dangte ngaihdam chu harsa tih châng an nei a ni. Unaute ngaidam tûr leh inrem taka awm tûra kan tih theihte tih chu thil pawimawh tak a ni. c

13. Engin nge upate chu unaute ngaihsakna kawngah harsatna siam thei?

¹³ Petera chuan Isua’n a thawhleh hnua “Ka berâmte enkawl rawh” tia a hrilh chu a theihnghilh lo va. (Joh. 21:16) Upa i nih chuan, chu fuihna chu nang pawhin i nunpui tûr a ni tih i hre ngei ang. Mahse, upate tân chu chanvo pawimawh tak atâna hun pêk chu a harsat châng a awm thei a. Upate chuan an chhûngkaw tisa lam, rilru lam leh thlarau lam mamawhte chu an ngaihsak hmasa tûr a ni. Anni chuan thu hrilh rawngbâwlnaah leh, inkhâwm leh inkhâwmpuitea chanvote atâna inbuaitsaihna kawngah entawn tûr ṭha an siam tûr a ni. Upa ṭhenkhat chuan Hospital Liaison Committee-ah leh Local Design/Construction Department-ah te chanvo an chelh bawk. Upate chu an buai tak zet!

14. Engin nge upate chu berâmte ngaihsak tûra chêttîr thei? (1 Petera 5:1-4)

¹⁴ Petera chuan upa dangte chu “Pathian pâwlho awmte enkawl” tûrin a fuih a. (1 Petera 5:1-4 chhiar rawh.) Upa i nih chuan i unaute chu i hmangaihin ngaihsak i duh tih kan hria a ni. Mahse, i buai lutuk emaw, i chauh lutuk emaw avângin chu chanvo chu hlen thei lo nia inhriat châng i nei mai thei. Eng nge i tih theih? Jehova hnênah i rilru hahnate chu hrilh ang che. Petera chuan: “Rawngbâwltu pawhin Pathianin chakna a pêk angin bâwl rawh se,” tiin a ziak a ni. (1 Pet. 4:11, C. L. Re-edited.) I unaute chuan he khawvêla chinfel theih loh buainate chu an hmachhawn thei a. “Berâm vêngtu lalber” Isua Krista chuan i tihtheih aia nasain a ṭanpui thei che tih hre reng ang che. Chu chu tûnah leh khawvêl tharah pawh a ti thei a ni. Pathianin upate chu an unaute hmangaih tûr te, ngaihsak tûr te leh, “berâmte tâna entawn tûr” siam tûrtein a duh a ni.

15. Engtin nge upa pakhatin berâmte a ngaihsak? (Milem en bawk rawh.)

¹⁵ Kum rei tak upa lo ni tawh unau William-a chuan berâmte ngaihsak a pawimawhzia a hria a. COVID hripui a lên ṭan khân, amah leh kohhran upa dangte chuan an awmna group-a unau tinte nên chawlhkâr tin inbiak pawhna an nei a. Ani chuan: “Unau tam takte chu mahni chauhva ina an awm avângin a thim zâwnga ngaihtuahna chu awlsam takin an nei thei a ni,” tiin a sawi.  Unau William-a chuan unaute mamawh hre thei tûrin an thusawi chu ngun takin a ngaihthlâksak a. Tichuan, chûng unaute tihchak nâna hman theih tûr thu leh hla chhuahte chu kan website-ah a zawng a ni. Ani chuan: “Tûn hma zawng aiin berâmte ngaihsakna chu a pawimawh a. Jehova chungchâng hre tûra mite ṭanpui tûra theih tâwp kan chhuah ang bawkin, Jehova berâmte ngaihsak tûr leh thutaka awm reng tûra ṭanpui tûrin theih tâwp kan chhuah tûr a ni,” tiin a sawi.

16. Eng kawngtein nge Petera lehkha thawna kan thu zirte chu kan nunpui theih?

¹⁶ Thlarauva thâwk khum Petera lehkha thawn pahnih aṭangin zir tûr tlêmtê chauh kan sawiho va. Hmasâwn i duhna lai eng emaw i chhinchhiah mai thei. Entîr nân, khawvêl thara kan dawn tûr malsâwmnate chu ngaihtuah nawn fo duhna i nei em? Hnathawhnaah te, school-ah te, a nih loh leh hmun dangahte thu hrilh chu thiltumah i insiam tawh em? I unaute chunga nasa taka hmangaihna lantîr dân kawng i hmu em? Upate u, Jehova berâmte chu inhuam tak leh châk taka ngaihsak in tum em? Dik taka mahni i inenfiah chuan i chak lohna laite i hre chhuak thei a. Mahse, lunghnual suh. ‘Lalpa chu mi khawngaih thei tak a ni a,’ hmasâwn tûrin a ṭanpui ang che. (1 Pet. 2:3) Petera chuan: “Pathian chuan rei lo tê in tuar hnuan a siam ṭha famkimin, a tinghetin, a tichak ang che u,” tiin min tiam a ni.—1 Pet. 5:10.

17. Beidawng lova Jehova zirtîrna kan pawm chuan eng nge kan dawn ang?

¹⁷ Petera chuan Pathian Fapa bula awm tlâk lo niin a inngai a. (Lk. 5:8) Mahse, Jehova leh Isua’n hmangaih taka an ṭanpui avângin ani chuan beidawng lovin Krista hnung a zui a ni. Chuvângin, ani chu “Isua Krista kan Lalpa leh Chhandamtu chatuan rama luh theihna” chu pêk a ni ta a ni. (2 Pet. 1:11) Lâwmman ropui tak a va ni êm! Petera anga beidawng lova Jehova zirtîrna i pawm chuan chatuana nunna lâwmman chu i dawng ve ngei ang a. “I rinna avângin chandam” i ni ngei bawk ang.—1 Pet. 1:9, NWT.