1-2. Engvângin nge Samsona chanchin chu kan ngaihven ang?

 SAMSONA tih hming i hriat hian i rilruah eng nge lo lang? Mi chak tak a nih dân i ngaihtuah ngei ang. Chu chu a dik a ni. Mahse, Samsona chuan thu tlûkna ṭha lo a siam avânga a rah chhuah ṭha lote a tuar a. Chuti chung pawhin, Jehova chuan Samsona nuna a lo rinawmnate chu en tlatin kan hlâwkpui atân Bible-ah a chuantîr a ni.

² Jehova chuan Samsona chu a hnam thlan Israel mite ṭanpui tûra thil ropui tak hlen chhuah nân a hmang a. Samsona thih hnu kum zabi tam takah Pathian thlarauva thâwk khumin tirhkoh Paula chuan rinawmna kawnga mi langsârte hming a ziahnaah Samsona hming pawh a telh a ni. (Heb. 11:32-34) Samsona entawn tûr siam chuan min tichak thei a. Dinhmun khirh tak a tawh lai pawhin Pathian Jehova a rinchhan tlat a. A entawn tûr siam aṭanga kan zir theihte leh chumiin min tihchak theih dânte i lo ngaihtuahho vang u.

3. Samsona chuan eng chanvo nge a dawn?

³ Samsona pian lai chuan Israel mite chu Philistia mite kut hnuaiah hnehchhiah takin an awm a. (Ro. 13:1) An rorêlna râwng tak chuan Israel mite chu a tihrehawm hle a. Jehova chuan Samsona chu ‘Philistia mite kut ata Israel mite chhanchhuaktu’ atân a thlang a ni. (Ro. 13:5) Chu chanvo chu a va harsa dâwn tak êm! Chu chanvo harsa tak hlen tûrin Samsona chuan Jehova a rinchhan a ngai ngei ang.

4. Engtin nge Jehova’n Samsona chu Philistia mite kut ata tâl chhuak tûra a ṭanpui? (Rorêltute 15:14-16)

 ⁴ Jehova leh a ṭanpuina rinchhanna kawnga Samsona entawn tûr siam pakhat hi lo ngaihtuah ta ila. Ṭum khat chu, Judai rama Lehi hmunah Philistia sipaihote chu Samsona man tûrin an lo kal a. Juda mite chuan an hlauh avângin Samsona chu hmêlma kuta pêk an tum ta a ni. Ama mite ngeiin Samsona chu hruizên thar pahniha phuarin Philistia mite hnênah an hruai a. (Ro. 15:9-13) Mahse, “Jehova thlarau” chu Samsona chungah a lo thleng a, an phuarna hruite chu a tichat ta vek a ni. Chu bâkah, “sabengtung khabe ruh tharlâm” a hmuh chuan, a la a, chu chu Philistia mi 1,000 tihhlum nân a hmang ta a!—Rorêltute 15:14-16 chhiar rawh.

5. Engtin nge Samsona sabengtung khabe ruh hmanna chuan Jehova a rinchhanzia a lantîr?

⁵ Engvângin nge Samsona chuan sabengtung khabe ruh chu a hman? Chu chu indonaa hman a ni ngai si lo va! Samsona chuan a hlawhtlinna chu a hmanrua hmanah ni lovin, Jehova a rinchhannaah a innghat tih a hriat ngei a rinawm. Ni e, chu mi rinawm chuan Jehova duh zâwng tihpuitlin nân a hmuh theihte a hmang mai a ni. Jehova a rinchhan avângin Samsona chu hlawhtlinna nasa tak nên malsâwm a ni tih a chiang hle!

6. Theocratic lama kan chanvo dawnte kan hlen chhuah hunah Samsona hnên aṭangin eng nge kan zir theih?

⁶ Keini pawh kan chanvo dawnte chu eng anga harsa pawh ni se, hlen thei tûrin Jehova’n kan mamawh chakna min pe thei a ni. Chutiang chuan mak danglam takin min ṭanpui thei a. Samsona tichaktu Jehova chuan ṭanpuitu atân Amah i rinchhan chhûng chu, a duh zâwng ti tûrin a ṭanpui ang che tih ring tlat rawh.—Thuf. 16:3.

7. Eng entîrnain nge Jehova kaihhruaina zawn a pawimawh dân târ lang?

⁷ Pathian biakna atâna in saknaa tel kan unau tam tak chuan Jehova an rinchhanzia an lantîr a. Tûn hma chuan unaupate chuan Kingdom Hall thar tam zâwk leh in dangte chu an duangin an sa ṭhîn a ni. Mahse, Jehova  inawpna pâwl a ṭhan chhoh zêl avângin, a ṭûl anga insiamrem a ngai ta a. Mawhphurhna nei unaupate chuan Jehova kaihhruaina dîlin an ṭawngṭai a, in hluite lei a, thuam ṭhat lehna ang chi tih dân tharte an hmang a ni. Tûn hnai kumahte khân, khawvêl hmun hrang hranga in sakna tam taka lo thawk tawh Unau Robert-a chuan, “A tîr chuan chu tih dân thar hman chu a awlsam lo hle a. Kum tam tak chhûng kan lo tih dân ṭhin nên a inang lo hle a ni. Mahse, unaute chuan insiamrem duhna an nei a, chu an insiamremna chu Jehova’n mal a sâwm tih a chiang hle,” tiin a sawi. Chu chu Jehova’n a duh zâwng tipuitling tûra a mite a kaihhruai dân entîrna pakhat mai a ni. Eng emaw châng chuan, ‘Jehova kaihhruaina ka zawngin, a rawng ka bâwlnaah a ṭûl angin ka insiamrem em?’ tiin mahni kan inzâwt ṭheuh tûr a ni.

8. Samsona a tui hâl êm êm ṭum khân, eng nge a tih?

⁸ Samsona thilmak tih dangte chu i hre chhuak mai thei a. Amah chauhvin sakeibaknei a that a, a hnuah Philistia khawpui Askelon-ah mi 30 a that bawk a ni. (Ro. 14:5, 6, 19) Samsona chuan Jehova ṭanpuina tel lo chuan chutiang chu a ti thei lo tih a hria a. Chu chu Philistia mi 1,000 a thah hnu, a tui hâl êm êm ṭum khân a hriat theih a ni. Eng nge a tih? A tui hâl êm êm lai chuan tui in tûr zawnga mahni inrinchhan aiin Pathian Jehova ṭanpuina a dîl zâwk a ni.—Ro. 15:18.

9. Engtin nge Jehova’n ṭanpui tûra Samsona dîlna chu a chhân? (Rorêltute 15:19)

⁹ Jehova chuan Samsona’n ṭanpui dîla a auhna chu mak danglam taka tui chik chuahtîrin a chhâng a. Samsona’n chu tui chu a in chuan “a lo chak leh ta a, a lo harh ta huai a.” (Rorêltute 15:19 chhiar rawh.) Chu tui chik chhuak chu kum tam tak a liam hnua Rorêltute lehkhabu ziak tûra zâwlnei Samuela thlarauva thâwk khum a nih thleng khân, a la awm a ni. Chu tui chik chhuak chuan a hmutu Israel mite chu Jehova betu rinawmte’n ṭanpui an mamawh hunah amah an rinchhan thei tih a hriatnawntîr ngei ang.

10. Jehova ṭanpuina dawng tûrin eng nge kan tih ang? (Milem en bawk rawh.)

¹⁰ Kan thiamnate, kan theihnate, a nih loh leh a rawng kan bâwlnaa kan hlawhtlinnate chu eng pawh ni se, Jehova ṭanpuina kan zawn a ngai a. Chutianga ti tûr chuan, thuhnuairawlhna kan neih a, Jehova kan rinchhan chauhvin hlawltlinna dik tak kan nei thei a ni. Jehova pêk tui a in hnua Samsona’n chakna a neih ang bawk khân, Jehova’n kan tâna thil min pêk zawng zawngte chu kan hman ṭangkai chuan thlarau lamah tihchakin kan awm ang.—Mt. 11:28.

11. Engtin nge Jehova ṭanpuina chu kan rinchhan theih? Entîrna pe rawh.

¹¹ Russia rama tihduhdahna nasa tak tuar kan unaute zînga pakhat Aleksey-a entawn tûr siam hi han ngaihtuah teh. Engin nge chu a dinhmun hrehawm tak chu chhel taka tuar thei tûra ṭanpui? An nupa chuan thlarau lam hun duan ṭha tak an nei a. Ani chuan: “Ka thlarau lam hun duanah mi mala inzirna leh nî tina Bible chhiarnate chu ka vawng tlat a. Tûk tin hian kan nupain ni châng chhiarin kan sawiho va, Jehova hnênah kan ṭawngṭai ṭhîn a ni,” tiin a sawi. Chu chuan eng nge min zirtîr? Mahni inrinchhan aiin, Jehova kan rinchhan tûr a ni. Engtin nge? Mi mala Bible zirnate leh theocratic thiltih dangte tih nâna hun duan ṭha tak neihna hmangin kan rinna kan tinghet thei a. Chu bâkah, Jehova chuan a rawngbâwl tûra theih tâwp kan chhuahna  chu mal min sâwm ang a. Samsona a tihchak ang bawkin, keini pawh min tichak thei a ni.

12. Samsona chuan eng thu tlûkna ṭha lo nge a siam a, chu chu a hmaa a thiltawnte lakah engtin nge a danglam theih?

¹² Samsona chu keimahni ang bawka ṭha famkim lo a nih avângin, duh thlanna ṭha lo siam châng a nei a. Thu tlûkna ṭha lo pakhat a siam avângin a sawhkhâwk pawi tak a tuar a ni. Rorêltu anga rawng a bâwl hnu chuan, ani chuan “Sorek ruama mi hmeichhe pakhat a ngaizâwng ta a, a hming chu Delili a ni.” (Ro. 16:4) Chumi hma chuan, Samsona chu Philistia hmeichhe pakhat nên an inhual a; mahse, chu inzawmna chu ‘Philistia-ho chunga remchânga zawngtu’ “LALPA tih a ni.” A hnuah, Samsona chu Philistia khawpui Gaza-a hnawhchizuar inah a riak a. Chumi ṭum chuan, Pathian pêk chakna hmangin Samsona chuan khawpui kulh kawngkhârte a pu chhuak a, khawpui dinhmun chu a tiderthâwng a ni. (Ro. 14:1-4; 16:1-3) Delili chu Israel mi ni ngeia a lan avângin, amah nêna an inlaichînna pawh a danglam ngei ang.

13. Delili chuan Samsona chu dinhmun ṭha lova awmtîr tûrin engtin nge hma a lâk?

¹³ Delili chuan Samsona chu phatsanin Philistia mite sum tam tak pêk chu a pawm a. Delili a hmangaihnain a mit a tihdelsak avângin Delili’n ti tûra a duhte chu Samsona chuan a hre thiam thei ta lo em ni? A enga pawh chu ni se, Delili chuan Samsona hnênah a chak viau nachhan chu hrilh tûrin a ngên tlut tlut a, a tâwpah a hrilh ta a. Lungchhiatthlâk takin, a thiltih chuan Samsona chu a chakna a hlohtîr bâkah, hun engemawti chhûng Jehova duhsakna a hlohtîr a ni.—Ro. 16:16-20.

14. Samsona’n Delili a rinchhan avângin a chungah eng thil nge thleng?

 ¹⁴ Samsona chuan Jehova aia Delili a rinchhan zâwk avângin a sawhkhâwk ṭha lo tak a tuar a. Philistia mite chuan an man a, a mit an kher chhuahsak a ni. Tûn hmaa a lo tihmualphote awmna Gaza khuaa lung inah an tântîr a, buh an râwt sawmtîr ṭhîn a ni. Kût nîa Philistia mite an inhmuhkhâwm chuan Samsona chu an tihmualpho hle a. Anni chuan an pathian dik lo Dagona’n an kutah Samsona pe nia ngaiin a hnênah inthawina ropui tak an hlân a. Anni chuan Samsona chu “ennawm atân” lung in ata an hruai chhuak a, nuihza siam nân an hmang a ni.—Ro. 16:21-25.

15. Engtin nge Samsona chuan Jehova a rinchhan leh tih a lantîr? (Rorêltute 16:28-30) (A kâwma milem en rawh.)

¹⁵ Samsona chuan thil sual lian tak ti mah se, a beidawng lo. Ani chuan Philistia mite do tûra Pathian pêk a chanvo chu hlen tûrin hun remchâng a zawng a ni. (Rorêltute 16:28-30 chhiar rawh.) Samsona chuan Jehova hnênah: “Phuba hi Philistia-hote chungah hian ka han la thuai teh ang,” tiin a ngên a. Pathian dik chuan Samsona khawngaih dîlna chu chhânsakin, chakna mak danglam tak a pe leh a ni. Chumi ṭuma, Samsona’n Phislitia mite a tihhlum zât chu a hmaa a tihhlumte aiin nasa takin an tam zâwk a ni.

16. Samsona thil sual tihna aṭangin eng nge kan zir theih?

¹⁶ Samsona chuan a thil sual tihte sawhkhâwk chu tuar mah se, Pathian Jehova duh zâwng tih chu a tum tlat a. Thil kan tisual a, zilh kan tâwk a, a nih loh leh kan chanvo chelhte hlihsak kan nih pawhin, kan beidawng tûr a ni lo. Jehova’n min ngaihdam a inpeih reng tih hre reng ang che. (Sâm 103:8-10) Thil kan tisual chung pawhin, Samsona angin, Jehova tân mi ṭangkai tak kan la ni thei a ni.

17-18. Engvângin nge Michael-a entawn tûr siam chuan a tihchak che? (Milem en bawk rawh.)

¹⁷ Ṭhalai unaupa Michael-a entawn tûr siam hi han ngaihtuah teh. Ani chu kohhranho rawngbâwltu leh regular pioneer a nih angin, Pathian rawngbâwlnaah a buai hle a. Mahse, lungchhiatthlâk takin, thil a tihsual avângin, kohhrana chanvo hlu a chelhte hlihsak a ni. Ani chuan: “Jehova rawngbâwlnaah ka buai reng a. Tichuan, vawilehkhatah, Jehova rawngbâwlnaah tihtheih rêng ka nei tawh lo ni hian ka inhria a ni. Jehova’n min kalsan ang tih ka ring ngai lo va; mahse, a hma anga  amah nêna inlaichînna ṭha nei lehin, kohhranah rawng ka bâwl leh thei ang em? tiin ka ngaituah ṭhîn,” tiin a sawi.

¹⁸ Michael-a a beidawng lo chu a fakawm hle. Ani chuan: “Jehova nêna inlaichînna ṭha neih leh tumin, a hnênah ka ṭawngṭai ziah a, inzirna leh chhût ngunnate ka nei ziah bawk,” tiin a sawi belh a ni. A hnuah, Michael-a chuan kohhranah chanvo hlute a chelh leh a. Tûnah, ani chu kohhran upa leh regular pioneer niin rawng a bâwl a ni. “A bîk takin, kohhran upate hnên aṭanga ṭanpuina leh fuihna ka dawnte chuan Jehova’n min la hmangaih reng tih hre tûrin min ṭanpui a. Chhia leh ṭha hriatna thiang tak neiin kohhranah rawng ka bâwl leh thei a ni. Chu chuan Jehova’n inchhîrna dik tak lantîrtu tawh phawt chu a ngaidam ang tih min zirtîr a ni,” tiin a sawi bawk. Thil kan tisual a nih pawhin, kan kawngte siam ṭha tûra theih tâwp chhuah a, Jehova kan rinchhan zawm zêl chuan ani chuan min hmangin, mal min sâwm ang tih kan ring tlat thei a ni.—Sâm 86:5; Thuf. 28:13.

19. Engtin nge Samsona entawn tûr siam chuan a tihchak che?

¹⁹ He thuziakah hian, Samsona nuna thilthleng ngaihvenawm tak zînga ṭhenkhat kan ennawn a. Ani chu mi ṭha famkim a ni lo; mahse, Delili avângin thil a tihsual hnuah pawh Jehova rawngbâwl tûra theih tâwp a chhuahna chu a bânsan lo. Chu bâkah, Jehova pawh a chungah a beidawng lo a ni. Pathianin Samsona chu thil ropui tak ti tûrin a hmang leh a. Jehova chuan ani chu Hebrai bung 11-naa mi rinawmte zîngah telhin, rinna kawnga mi langsâr tak angin a la thlîr reng a ni. A bîk takin, kan chak loh laia, min tichak tûra min ṭanpui duhtu hmangaihna ngah tak kan Pa vâna mi rawng kan bâwl tih hriat chu a va phûrawm tak êm! Chuvângin, Samsona ang bawkin, Jehova hnênah: “Khawngaih takin, mi han hre reng langin, mi han tichak la,” tiin i ngên ang u.—Ro. 16:28.