ZIR TUR THUZIAK 39
Thuhnuairawlhna Chu I Chakna Ni Rawh Se
“Lalpa bâwih chuan a hnial buai tûr a ni lo va, mi zawng zawng chungah a hawihhâwmin, a zirtîr thiamin, mi dawhthei a ni zâwk tûr a ni.”—2 TIM. 2:24 Baptist Mid-Mission.
HLA 120 Krista Thuhnuairawlhna Entawnin
THLIR LAWKNA a
1. Hnathawhna leh school-ah eng chungchâng nge zawh kan nih theih?
I HNATHAWHPUI emaw, i school kalpui emawin i rinna chungchâng a zawh che chuan engtin nge i awm? I zâm em? A tam zâwk chu kan zâm ṭhîn a ni. Mahse, chutianga zawhnate chuan a zâwttu ngaihtuahna leh an rinnate min hriattîr a, chanchin ṭha hrilh theihna hun remchâng min pe a ni. A châng chuan tu emawin min hnial duh vângin zawhna khirh takte min zâwt a. Chu chu mak kan ti tûr a ni lo. A chhan chu, mi ṭhenkhat chuan kan rinna chungchâng dik lo taka an hriat vâng a ni. (Tirh. 28:22) Chu bâkah, “ni hnuhnûngahte” kan awm a, mi tam tak chu “huaikawmbâwl te leh mi kawlhsen te” an ni.—2 Tim. 3:1, 3.
2. Engvângin nge thuhnuairawlhna lantîr chu kan duh ang?
2 Heti hian i ngaihtuah mai thei, ‘Tu emawin, Bible ṭanchhan ka rinna chungchânga min hnial hunah engtin nge zaidam tak leh thiam taka ka chhân lêt theih?’ tiin. Engin nge ṭanpui ang che? Ṭawngkam khata sawi chuan thuhnuairawlhna a ni. Mi thuhnuairawlh chu rilru hrehawm taka a awm a, a duh anga a chhân lêt theih loh hunah pawh a thinrim mai lo va, insûmtheihna a nei a ni. (Thuf. 16:32) Thuhnuairawlhna chu a taka nunpui aiin ṭawngkaa sawi chu awlsam i ti mai thei. Engtin nge thuhnuairawlhna chu i neih chho theih? Tu emawin i rinna chungchângah a hnial che a nih chuan, engtin nge thuhnuairawlh taka i chhân lêt theih? Nu emaw, pa emaw i nih chuan, engtin nge i fate chu thuhnuairawlh taka an rinna humhim dân hre tûra i ṭanpui theih? I lo ngaihtuahho vang u.
THUHNUAIRAWLHNA NEIH CHHOH DAN
3. Engvângin nge thuhnuairawlhna chu chak lohna ni lovin, chakna tia kan sawi theih? (2 Timothea 2:24, 25)
3 Thuhnuairawlhna chu chak lohna ni lovin, chakna a ni zâwk a. Dinhmun khirh tak hmachhawn huna rilru dam taka awm tûr chuan chhûngrila chakna kan neih a ngai a. Thuhnuairawlhna chu “thlarau rah” pêng pakhat a ni. (Gal. 5:22, 23) Grik ṭawnga “thuhnuairawlhna” tih thu mal chu ram sakawr khawi ngam tawh sawi nâna hman a ni a. Ram sakawr kawlh tak pakhat chu zaidam hle niin han mitthla teh. Zaidam mah se, a chak reng tho a ni. Keini pawh engtin nge thuhnuairawlh chunga kan chak reng theih? Chu chu mahni chauhva tih theih a ni lo. A pawimawh ber chu, chu mize duhawm tak nei chho tûra min ṭanpui tûrin Pathian thlarau kan dîl tûr a ni. Chutianga an tih avânga thuhnuairawlhna nei tam tak an awm tawh a. Thuhretu tam tak chuan dodâltute hnialkalhna an hmachhawn hunah, thuhnuairawlh takin an chhâng lêt a. (2 Timothea 2:24, 25 chhiar rawh.) Engtin nge thuhnuairawlhna chu i chakna pêng pakhat a nih theih?
4. Isaaka entawn tûr siam aṭangin, thuhnuairawlhna chungchângah eng nge kan zir theih?
4 Bible-ah hian thuhnuairawlhna chu mize hlu tak a nih dân târ lanna tam tak a awm a. Isaaka entawn tûr siam hi han ngaihtuah teh. Philistia mite biala Gerar ruama a awm lai chuan, a chheh vêla amah îtsîktute’n a pa chhiahhlawhte tui chhunchhuah laih chu an lo hnawhkhahsak vek a. Isaaka chuan chumi avânga do lêt aiin a pa chhiahhlawhte chu hmun dangah insawnpuiin, tui chhunchhuah dang a lai ta zâwk a ni. (Gen. 26:12-18) Mahse, Philistia mite chuan chûng tui chhunchhuaha tuite chu an ta a ni tiin an chuh leh a. Chuti chung pawhin, Isaaka chuan inrem takin thil a ti a ni. (Gen. 26:19-25) Chutianga mi dangin tihthinrim an tum hunah pawh, engin nge ani chu thuhnuairawlhna nei reng tûra ṭanpui? Ani chuan a nu leh pate entawn tûr siam chu a hmu a, a pa Abrahama’n remna kawnga thil a tih dânte leh a nu Sari ‘rilru thuhnuairawlhna leh nunnêmna’ aṭangin thil tam tak a zir ngei ang.—1 Pet. 3:4-6; Gen. 21:22-34.
5. Kristian nu leh pate chuan an fate chu thuhnuairawlhna mizia lantîr hlutna an zirtîr thei tih eng thiltawnin nge târ lang?
5 Kristian nu leh pate u, nangni pawhin in fate chu thuhnuaihrawlhna mize lantîr hlutna in zirtîr ve thei tih hre reng ang che u. Kum 17 mi Maxence-a entawn tûr siam hi lo ngaihtuah ta ila. Ani chuan school-ah leh rawngbâwlnaah mi thinchhe takte a tawng ṭhîn a ni. A nu leh pate chuan thuhnuairawlhna nei tûrin dawhthei takin an ṭanpui a. Anni chuan, “Maxence-a tân tihthinrima a awm hunah thinrim tak leh tharum thawha chhân lêt chu awlsam hle mah se, mahni inthunun a, zaidam taka chhân lêtna chu chakna a ni tih tûnah a hre thiam ta a ni,” tiin an sawi. Thuhnuairawlhna mizia Maxence-a chakna a ni chu thil lâwmawm tak a ni.
6. Engtin nge ṭawngṭaina chuan thuhnuairawlhna lantîrna kawnga hmasâwn chho zêl tûra min ṭanpui theih?
6 Tu emawin, kan Pathian hming a sawi chhiatna emaw, Bible a nuihsawhna emaw ang chi dinhmun khirh tak kan hmachhawn hunah eng nge kan tih theih? Thuhnuairawlh taka chhâng lêt tûrin Jehova hnênah a thlarau thianghlim leh finna kan dîl tûr a ni. Chhân lêt dân tûr angin kan chhâng lêt lo tih a hnua kan hriat chhuah hunah eng nge kan tih ang? Chumi chungchângah kan ṭawngṭai thei a, a hnua kan tawh leh huna ṭha lehzuala kan chhân lêt theih dân kan ngaihtuah thei a ni. Chutianga kan tih chuan, Jehova’n mahni inthunun thei tûr leh thuhnuairawlhna mizia lantîr thei tûrin a thlarau thianghlim min pe ang.
7. Engtin nge Bible châng ṭhenkhat hriat rengna chuan kan ṭawngkam leh thiltihte thunun tûra min ṭanpui? (Thufingte 15:1, 18)
7 Bible châng ṭhenkhat chuan dinhmun khirh tak kan hmachhawn hunah kan ṭawngkam chhuak thunun tûrin min ṭanpui thei a. Pathian thlarau thianghlim chuan chûng Bible chângte hre chhuak tûrin min ṭanpui thei a ni. (Joh. 14:26) Entîr nân, Thufingte bu-a kan hmuh thu bulte chuan thuhnuairawlhna nei tûrin min ṭanpui thei a. (Thufingte 15:1, 18 chhiar rawh.) Chu Thufingte bu chuan dinhmun khirh tak kan hmachhawn huna insumtheihna neih kan hlâwkpui dân a târ lang bawk a ni.—Thuf. 10:19; 17:27; 21:23; 25:15.
HRIATTHIAMNAIN THUHNUAIRAWLHNA NEI TURA MIN ṬANPUI DAN
8. Engvângin nge tu emawin kan rinna hnialkalh zâwnga zawhna min zawh chhan chu kan ngaihtuah ang?
8 Hriatthiamna chuan thuhnuairawlhna nei tûrin min ṭanpui thei a. (Thuf. 19:11) Hriatthiamna neitu chuan a rinna chungchânga hnialkalh a nih hunah insûmtheihna a lantîr a ni. Mihring thinlunga ngaihtuahnate chu tui thûk tak ang a ni a, tu emaw chuan zawhnate min zâwt thei a; mahse, a zawh chhan dik tak chu kan hre lo ṭhîn a ni. Chuvângin, chhânna kan pêk hmain, chu zawhna a zawh chhan chu kan hre lo thei tih kan pawm tûr a ni.—Thuf. 16:23.
9. Engtin nge Gideona chuan Ephraim-hote a hmachhawn khân, hriatthiamna leh thuhnuairawlhna a lantîr?
9 Gideona’n Ephraim-hote a chhân lêt dân hi han ngaihtuah teh. Ephraim-hote chuan Israel hmêlmate dopui tûra a sâwm loh chhan chu thinrim takin an zâwt a. Chutianga an thinrim hle nachhan chu eng nge ni? An chapona avânga rilru na an ni thei ang em? Eng pawh ni se, Gideona chuan an rilru awm dânte hriatthiampuiin, thuhnuairawlh takin a chhâng lêt a ni. Eng nge a rah chhuah? Bible chuan, “an thinrim chu a reh ta a,” tiin a sawi a ni.—Ro. 8:1-3.
10. Engin nge kan rinna chungchâng min zâwttute chu chhân dân hre tûra min ṭanpui ang? (1 Petera 3:15)
10 Kan hnathawhpuite emaw, kan school kalpuite emaw chuan Bible tehnate kan nunpui chhan min zâwt thei a. Min ngaithlatute thlîr dân chu kan zahsak rualin, kan rinna chu theih tâwp chhuahin kan humhim ang. (1 Petera 3:15 chhiar rawh.) Chûng zawhnate chu min sawisêl duh vânga zâwt anga thlîr lovin, rilrua a ngaihven zâwngte hriat theih nân kan hmang thei a ni. A zawh chhan chu eng pawh ni se, zaidam tak leh ngilnei takin kan chhâng lêt ang. Kan chhân lêt dân chuan a thlîr dânte pawh a ngaihtuah nawntîr thei a. Zah lo tak leh mi tiel takin lang mah se, ngilnei taka chhân lêt kan tum tlat tûr a ni.—Rom 12:17.
Piancham lawmnaa tel tûra min sâwm chhan kan ngaihtuah hmasak chuan ṭha takin kan chhâng lêt thei ang (Paragraph 11-12-na en rawh)
11-12. (a) Zawhna khirh tak kan chhân hmain eng nge kan ngaihtuah theih?(Milem en bawk rawh) (b) Tu emaw zawhna siamin tîtîna hun remchâng a hawn dân entîrna pe rawh.
11 Entîr nân, kan hnathawhpui pakhat chuan piancham kan lawm loh chhan mi zâwt a nih chuan, heti hian ngaihtuah ang che: Hun hlimawm neih phal kan nih leh nih loh a ngaihtuah a ni thei ang em? tiin. A nih loh leh, piancham kan lawm lohna chuan hnathawhpuite nêna inṭhian ṭhatna tihchhiat a hlauh vâng a ni thei ang em? Hnathawhpuite chunga ngaihsakna a lantîr avânga fakin, keini pawhin hnathawhpuite nêna inrem leh nuam taka thawhho kan duh thu hriattîrin a rilru kan tihdamsak thei a. Chu chuan piancham chungchânga Bible sawite sawipui theihna remchâng a hawng thei a ni.
12 Zawhna khirh tak dang min zawh hunah pawh chutiang chuan kan chhâng lêt thei a ni. I school kalpui chuan Jehova Thuhretute chu neih inang kawp chîngte chunga an thlîr dân an thlâk danglam tûr a ni tiin a sawi thei a. Chu chu Jehova Thuhretute chungchângah ngaih dân dik lo a neih vâng a ni thei ang em? A nih loh leh, neih inang kawp chîng ṭhian emaw, chhûngte emaw a neih vâng a ni thei ang em? Neih inang kawp chîng mite hua nia min ngaih vâng a ni thei ang em? Mi zawng zawng kan ngaihsakin, mi tin hian mi mal duh thlan theihna an nei tih kan hriat thu zahthiam takin kan hrilh thei a. b (1 Pet. 2:17) Tichuan, nungchang lama Bible tehna sâng takte kan hlâwkpui theih dân kan hrilh thei a ni.
13. Engtin nge Pathian awm rinna nuihsawhtu tu emaw chu i ṭanpui theih?
13 Ngaih dân nghet tak nei tu emaw kan hmachhawn hunah, a rin dân chungchângah mahniin ngaih dân kan siam nghâl mai tûr a ni lo. (Tit. 3:2) Entîr nân i school kalpuiin, Pathian awm rin chu thil âtthlâk tak nia a sawi chuan engtin nge ni ang? Ani chu chanchhâwnnaa rinna nghet tak neitu leh chumi chungchâng hre tak niin i ngai nghâl tûr a ni em? Dik tak chuan chumi chungchâng mi dangte sawi a hriat chu a sawi chhuak mai pawh a ni thei. Chanchhâwnna chungchânga inhnialna neih ai chuan, i school kalpui chu a hnua ngaihtuah tûr thil engemaw i kawhhmuh thei a ni. Kan website jw.org-a thilsiam chungchâng pho chhuahte chu i kawhhmuh thei a. A hnuah chuta thuziak emaw, video emaw a hmuhte chu sawipui a duh thei a ni. Ni e, zahthiam taka i chhân lêtna chuan a thlîr dânte ngaihtuah nawn tûrin a chêttîr thei a ni.
14. Engtin nge Niall-a chuan kan website chu Jehova Thuhretute chungchânga ngaih dân dik lo nei a school kalpui ṭanpui nâna a hman?
14 Tleirâwl Niall-a chuan Jehova Thuhretute chungchânga ngaih dân dik lote chu kan website hmangin a hrilhfiah a. Ani chuan, “Ka school kalpui pakhatin thu dik aia, thawnthu phuahchawp chuanna Bible kan rin avânga science ring lo niin min sawi ṭhîn,” tiin a sawi. Chu a school kalpui chuan Niall-a chu a rinna chungchâng hrilhfiahna hun remchâng a pêk loh tâkah chuan jw.org-a “Science leh Bible,” tih chu a kawhhmuh ta a. A hnuah, a khawhhmuhte chu a chhiar tih a hria a; tichuan, nun inṭan dân chungchâng chu a sawipui thei ta a ni. Nang pawhin chutiang chuan i hlâwkpui ve thei a ni.
CHHUNGKUAIN INBUATSAIH RAWH
15. Engtin nge nu leh pate chuan an fate chu an school kalpuite’n an rinna chungchânga an hnialkalh hunah thuhnuairawlh taka chhâng lêt tûra an ṭanpui theih?
15 Nu leh pate chuan an fate chu an rinna chungchânga hnialkalhna an tawh huna thuhnuairawlh taka an chhân lêt dân chu thiam takin an zirtîr thei a. (Jak. 3:13) Nu leh pa ṭhenkhat chuan chhûngkuaa Pathian biakna an neih hunah tihchhinna an neihpui a ni. An fate chu School-a an sawi theih tûr thupuite an ngaihtuahpui a, an chhân dân tûr entîrin an sawipui a, thuhnuairawlh tak leh hriat nuam taka sawi an zirtîr a ni.—“ Tihchhinna Chuan I Chhûngkua A Ṭanpui Thei,” tih bâwm chu en rawh.
16-17. Engtin nge ṭhalaite chu tihchhinnain a ṭanpui?
16 Tihchhinna chuan Kristian ṭhalaite chu mahniah rin nachhan tûr ṭha tak a neihtîr a, chu chu mi dangte hnêna hrilh tûrin a ṭanpui a ni. Kan website jw.org-a “Ṭhalaite Zawhna,” tih thuziak inzawmah tleirâwlte tâna mahnia inzawh tûr thute telh a ni a. Chûngte chu ṭhalaite tân an rinna tinghet tûr leh mahni irâwm chhuaka chhânna pe thei tûra ṭanpui nâna buaisaih a ni. He thuziak inzawm hi chhûngkuaa kan zir chuan thuhnuairawlh tak leh hriat nuam taka kan rinna humhim dân kan hre ṭheuh thei ang.
17 Ṭhalai Matthew-a chuan tihchhinnain a ṭanpui dân chu a sawi a. Matthew-a nu leh pate chuan school-a sawiho theih tûr thupuite chu chhûngkuaa Pathian biaknaah zir bingna an nei ṭhîn a ni. Ani chuan: “Mite’n min zawh mai theih tûr zawhnate chu kan ngaihtuah a, zir bingna kan neihte ṭanchhanin chhân dân tûrte kan tichhin a ni. Kan rin nachhan chu rilrua kan chian hle chuan inrintâwkna kan nei a, chu chuan thuhnuairawlh taka mi dangte cheibâwl a tiawlsam lehzual a ni,” tiin a sawi.
18. Kolossa 4:6-naah eng hlutna nge târ lan a nih?
18 Mahse, chiang taka kan hrilhfiah pawhin mi zawng zawngin kan thusawite chu an pawm duh lo va. Remhre tak leh thuhnuairawlh taka sawiin kan ṭanpui thei a ni. (Kolossa 4:6 chhiar rawh.) Tu emaw hnêna kan thu rinte hrilh chu ball vawm nên a khaikhin theih a. Ball chu dîm têin emaw, na takin emaw a vawm theih a. Dîm têa vawm a nih chuan mi dang tân man a awlsam ang a, inkhelh chhunzawm theih a ni ang. Chutiang bawkin, remhre tak leh thuhuairawlh taka i sawi chuan, mite chuan an ngaithla duh lehzual theiin, i sawipui chhunzawm thei ang. Mahse, tu emawin kan rinna chungchânga hnial hneh a duh vâng emaw, min nuihsawh duh vâng emawa zawhnate min zâwt a nih chuan sawipui zawm a ngai lo. (Thuf. 26:4) Chutiang mi chu an tam lo mai thei a—mi tam zâwk chuan ngaihthlâk an duh ang.
19. Kan rinna kan humhim hunah thuhnuairawlhna nei tûrin engin nge min chêttîr ang?
19 Thuhnuairawlhna nei tûra theih tâwp kan chhuahna chu kan hlâwkpui nasa hle ang tih a chiang a. Inhnialna chawk chhuak thei zawhnate leh dik lo taka sawisêlnate i hmachhawn hunah Jehova hnênah thuhnuairawlhna nei reng tûra ṭanpui tûr chein ṭawngṭai ang che. I thuhnuairawlhna chuan ngaih dân inan lohna avânga inhnialna lo chhuak tûr chu a vêng thei a. I thuhnuairawlhna te, zahthiam taka i chhânnate chuan kan chungchânga a ngaih dânte leh Bible thutak chungchânga a thlîr dânte thlâk danglam tûrin a chêttîr thei a ni. ‘Thuhnuairawlh tak leh ṭih dêk chunga’ kan ‘beisei chhan zâwt apiang chhâng tûrin inpeih’ la. (1 Pet. 3:15) Thuhnuairawlhna chu i chakna ni rawh se!
HLA 88 I Kawngte Chu Min Hriattîr Ang Che
a He thuziakah hian mi dangte’n min tithinrim emaw, min hnial emaw hunah thuhnuairawlh taka kan rinna kan humhim theih dân chungchânga thurâwnte târ lan a ni.
b Thurâwn ṭangkai takte hriat belh nân, Kan wibsite jw.org-a, “Ṭhalaite Zawhna,” tih thuziak inzawma “Neih Inang Inkawp Hi A Sual Em?” tih thuziak chu en ang che.
c Thurâwn ṭangkai takte chu kan wibesite jw.org-a “Ṭhalaite Zawhna,” tih leh “Jehova Thuhretute Chungchânga Zawh Fo Ṭhin Zawhnate,” tih thuziak inzawmah i hmu thei a ni.
