Thu hrilh rawngbâwlna zauh a nih rualin, thu leh hla chhuahte mamawhna pawh a sâng chho zêl a. Brooklyn Bethel-a rawngbâwl unaute chuan magazine-te an tichhuak ṭhîn a; mahse, a bu-a tichhuak tûrin lehkha chhut chhuahna khâwl neitu company-te chu man chawia an rawih a la ngai a ni. Thla eng emaw chhûng chu, company-te chuan rawngbâwlna atâna kan mamawh zât min chhut chhuahsak thei ta lo va. Tichuan, Unau Rutherford-a chuan Brooklyn Bethel-a factory manager Unau Robert Martin-a chu biain, thu leh hla chhuahte mahnia kan chhut chhuah theih a rin leh rin loh a zâwt ta a ni.

Unau Martin-a chuan, “Lehkhabu chhut chhuahna factory din ang kan nih dâwn avângin, ngaih dân ṭha tak a ni,” tiin a sawi. Unaute chuan Brooklyn khawpuia 18 Concord Street-ah apartment pakhat luahin, an hmanraw mamawhte chu an nei thei ta a ni.

He kan hmasâwnna thar avâng hian mi zawng zawng an lâwm vek lo. Kan lehkhabute min chhut chhuahsak ṭhîntu company president chuan kan lehkha chhut chhuahna hmun thar chu a rawn tlawh a. “Lehkha chhut chhuahna khâwl ṭha ber chi in nei a; mahse, tu mahin a hman dân in thiam bawk si lo. Thla ruk chhûngin in tikhawlo vek dâwn a nih hi,” tiin a sawi ta mai a.

Unau Martin-a chuan, “Chu chu a ni thei khawp ang. Mahse, Jehova chuan tûn hmaa min ṭanpui ṭhin tawh angin min ṭanpui zawm zêl ang,” tiin a chhâng a ni. Unau Martin-a chuan a va sawi dik tak êm! A hnu lawkah, kan khâwl thar chuan nî tin lehkhabu 2,000 lai a tichhuak thei ta a ni.

Jehova mite chuan mahnia lehkhabu ṭhenkhat an chhut chhuah mai bâkah, chanchin ṭha theh darh dân kawng thar an hmang a, chu chu radio kal tlanga chanchin ṭha theh darh a ni. Kum 1922, February 26, Chawlhni chawhnu lamah Unau Rutherford-a chuan a hmasa ber atân radio-ah thu  a sawi a. U.S.A. ram, California state, Los Angeles khawpuia KOG radio station-ah, “Tûna Nung Mi Maktaduai Tam Takte Chuan Thihna An Tem Lo Vang,” tih thupui hmangin thu a sawi a ni.

Chu thusawi chu mi 25,000-in an ngaithla anga chhût a ni a. Chûng zînga ṭhenkhat chuan chu thusawi avânga an lâwmzia târ lanna lehkhate an thawn a. Lehkha thawntu zînga pakhat chu Santa Ana, California-a chêng Willard Ashford-a a ni. Unau Rutherford-a chu a thusawi “phûrawm tak leh ngaihvenawm tak” avângin a fak a. “Kan chhûngkuaah dam lohna avânga pâwn chhuak thei lo pathum an awm a, i thusawi hi radio kal tlanga pêk chhuah ni lo se chuan, kan awmna bul lawkah sawi pawh ni la, i thusawi ngaithla tûrin kan rawn kal thei lo vang,” tiin a sawi bawk a ni.

A hnuah, tam lehzuala radio kal tlanga thusawi tihchhuah a ni a. Kum 1922 a tâwp meuh chuan, Vênnainsâng chuan “radio kal tlangin chanchin ṭha chu a lo berah mi 3,00,000-te hnêna thlen” a nih thu a târ lang a ni.

Chhân lêtna ṭha tak an dawn avângin, Bible Zirlaite chuan Brooklyn Bethel aṭanga hla vak lo, Staten Island-a an hmun neih pakhatah radio station din an tum ta a. A hnu kumahte chuan, Bible Zirlaite chuan an radio station WBBR chu mi a tam thei ang berte hnêna Lalram thuchah hrilh nân an hmang a ni.

Kum 1922, June 15 chhuak Vênnainsâng-ah chuan September 5 aṭanga 13 chhûng awh tûr inkhâwmpui chu Cedar Point, Ohio-a neih a nih tûr thu târ lan a ni a. Bible Zirlaite chu Cedar Point an thlen chuan an phûr hle a ni.

Unau Rutherford-a chuan a thusawi hmasa ber chu ngaithlatu mipuite hnêna: ‘He inkhâwmpui hi Lalpa’n mal a sâwmin, tûn hma zawng aia nasain thu hrilhna a thlentîr ngei ang tih ka ring nghet tlat a ni,’ tia sawiin bul a ṭan a. Chu inkhâwmpuia thusawitu zawng zawngte chuan unaute chu thu hril tûrin an fuih nawn reng a ni.

September 8, Zirtâwpni chuan inkhâwmpuina hall-a pung khâwm mi 8,000 vêl chuan Unau Rutherford-a thusawi hun tûr chu nghâkhlel takin an lo ngaichâng a. Sâwmna lehkhaa “ADV” tih inziak awmzia chu a hrilhfiah an beisei a ni. Ṭhutna tûr an thlan fel hnu chuan, mi tam tak chuan dawhsân chunga thil inzial lian tak chu an hmuh ngei a  rinawm. U.S.A. ram, Oklahoma state, Tulsa khawpui aṭanga inkhâwmpui hmang tûra kal Arthur Claus-a pawhin fiah taka thusawite hriat theihna hmunah ṭhutna tûr a hmu fuh a; chutih hun lai chuan aurinna leh aw tihrinna khâwlte a la awm loh avângin thusawitute aw chu hriat fiah a har ṭhîn a ni.

Thusawi tihbuai a nih loh nân, chairman chuan inkhâwmpuia rawn tlaite chu Unau Rutherford-a thusawi laia hall chhûnga luh phalsak an nih loh tûr thu a puang a. Tichuan, zîng dâr 9:30-ah Unau Rutherford-a chuan Matthaia 4:17-a kan hmuh: “Vânram chu a hnai tawh e,” tih thu hmangin a thusawi chu a ṭan ta a. Mihringte’n chu Lalram chanchin an hriat dân tûr chungchângah heti hian a sawi a ni: “Isua ngeiin a lo awm leh hunah a mite seng khâwm hna a thawk ang a; chutih hunah chuan, mi dik leh rinawmte chu amah ngeiin a hruai khâwm dâwn tih a puang a ni,” tiin.

Inkhâwmpuina hall chhûnga ṭhu Unau Claus-a chuan: “Thu mal tinte chu ngun takin kan ngaithla a ni,” tiin a hnuah a sawi leh a. Mahse, a dam loh thut avângin loh theih lova inkhâwmpuina hall chu a chhuah a ngai ta a. Hall chhûnga luh leh an phalsak tawh dâwn lo tih a hriat avângin a phûr loh phah sawt a ni.

Rei lo te hnuah a rawn zia chho leh ṭan a. Hall lam pana a lêt leh lai chuan, ring taka mipuite kut bêng thâwm a hria a. Chu chuan a va tiphûr tehlul êm! Chu thusawi ṭha tak chu a tâwp thlenga a ngaihthlâk theih nân hall chunga lâwn a ngai a nih pawhin lâwn ngei a tum ta a. Chutih laia kum 23-a upa Unau Claus-a chuan lâwn chhohna tûr a hmu fuh ta hlauh mai! Ni êng luhna tûra siam tukverhte chu hawn a ni a, chumi bul a han thlen chuan thusawi chu “fiah takin a hre thei ta” tih a sawi.

Mahse, hall chunga lâwn chu Arthur-a chauh a ni lo va. A ṭhian ṭhenkhat pawh chutah chuan an lo awm ve reng a. An zînga pakhat Frank Johnson-a chuan rawn panin, “Chemtê hman mai tûr i nei em?” tiin a zâwt a.

“Nei e,” tiin Arthur-a chuan a lo chhâng a.

 “Kan ṭawngṭaina chhânna i ni. He thil inzial lian tak hi i hmu em? Thuziak inzial a nih hi. Rorêltu * thusawi khu ngun takin ngaithla la. ‘Puang chhuak rawh, puang chhuak rawh,’ tia a sawi veleh, thuziak inzial ṭâwnna hrui hi i zai chat dâwn nia,” tiin a hrilh a ni.

Tichuan, Arthur-a chuan chemtê a keng a, hrui an zai chah hun tûr, Unau Rutherford-a’n “puang chhuak rawh,” tih a sawi hun chu a ṭhiante nên chuan an nghâk ta rân a. Unau Rutherford-a pawhin a thusawia a pawimawh lai ber chu a sawi thleng ta thuai a. Phûrna leh ṭhahnemngaihnaa khat Unau Rutherford-a chu au chhuakin: “Lalpa tâna mi rinawm leh thuhretu dik ni la. Babulon tihchhiat ṭhak a nih thlengin ṭan la ang che. Pathian thuchah chu khawvêl pumah puang chhuak rawh. Khawvêl hian Jehova chu Pathian a nihzia leh Isua Krista chu lalte Lal leh hotute Hotu a nihzia an hriat a ngai a ni. Tûn hi hun zawng zawnga hun pawimawh ber a ni. Ngai rawh, Lalin ro a rêl e! Nang hi chu mi puang chhuaktu tûr chu i ni. Chuvângin, Lal leh a Lalram chanchin chu puang chhuak rawh, puang chhuak rawh, puang chhuak rawh!” tiin a sawi a ni.

Unau Arthur-a chuan amah leh a ṭhiante’n thuziak inzial ṭâwnna an han zai chah chuan, muang chânga a inphelh thlâk riai riai thu a hnuah a sawi a. Tichuan, sâwmna lehkhaa “ADV,” tih inziak nêna inmil takin, chu thuziak inzialah chuan: “Lal leh Lalram Chanchin Chu Puang Chhuak Rawh,” tih a inziak a ni.

Cedar Point-a inkhâwmpui chuan unaute chu hna pawimawh tak, Lalram thu hrilh hna dah pawimawh tûrin a ṭanpui a, mahni inpêkna rilru put hmang nei unaute chu thu hrilhnaah hlim takin an tel a ni. U.S.A. ram, Oklahoma state-a colporteur (tûna pioneer tia hriat) unaupa pakhat chuan, “Lungalhthei laih chhuahna bial chhûngah rawng kan bâwl a, chulai hmuna awmte chu an rethei hle,” tih a sawi a. Golden Age magazine-a thuziakte an han chhiar chuan, “an mittui a tlâk” fo ṭhin thu a sawi belh a. “Hêng mite kan thlamuan thei hi malsâwmna nasa tak a ni,” tiin a thusawi chu a khaikhâwm a ni.

Hêng Bible Zirlaite hian Luka 10:2-a Isua thusawi: “Buh seng tûr a tam hle a; nimahsela, a thawktute an tlêm,” tih thu a hmanhmawhthlâkzia an hria a ni. Chumi kum a han ral chuan, tûn hma zawng aia nasa leh zau zâwka Lalram thu puan chhuah chu an tum lehzual sauh a ni.