1. Engtin nge tûn laia mi tam takin finna chu an chhân lêt? (Thufingte 1:20, 21)

 RAM tam takah chuan, thuchhuahtu hlim thei takte’n mi veivâk tamna hmuna thu leh hla chhuahte an sem chhuak lai chu hmuh a ni fo ṭhîn a ni. Chutiang rawngbâwlna phûrawm takah chuan i tel ve tawh ngai em? I tel ve tawh a nih chuan, chu chuan Thufingte bu-a kan hmuh mitthla theih ṭawngkam, finna chu mite hriat tûrin mipui awmkhâwmna hmuna au chhuak anga sawi chu a ngaihtuah chhuahtîr ngei ang che. (Thufingte 1:20, 21 chhiar rawh.) Bible leh kan thu leh hla chhuahahte chuan “finna”—Jehova finna a chuang a. Chu chu mite’n nunna kawng an zawh ṭan theih nâna an thu hriat ngai a ni. Tu emawin, kan thu leh hla chhuah zînga pakhat a lâk hian kan lâwm hle a. Mahse, mi zawng zawngin an la vek lo. Mi ṭhenkhat chuan Bible thute chu an ngaihven lo va. Mi dangte chuan min nuihsan a. Anni chuan Bible hi hmân lai lutuk leh ṭangkai tawh lo angin an ngai a ni. Mi dang lehte chuan nungchang lama Bible zirtîrna zuitute chu lainatna nei lo leh khirh lutuk anga ngaiin an sawisêl thung. Mahse, Jehova chuan finna dik tak chu mi zawng zawngte hnênah hmangaih takin a pe chhuak zawm zêl a ni. Eng kawngtein nge a pêk chhuah?

2. Engtin nge finna dik chu tûn laiah pêk chhuah a nih a; mahse, mi a tam zâwkte’n engtin nge an chhân lêt?

² Jehova’n finna dik a pêk chhuah dân kawng khat chu a Thu, Bible hmangin a ni a. Bible hi mi zawng zawng deuhthawin kan nei a ni. A nih leh, Bible ṭanchhan kan thu leh hla chhuahte chungchâng hi eng nge ni ve? Pathian Jehova malsâwmnaa  ṭawng 1,000 chuanga hmuh theih a nih tawh avângin kan va lâwm tak êm! Chûng thu ngaithlatute—an thu zirte chhiara zâwmtute—chuan an hlâwkpui ang. Amaherawhchu, mi a tam zâwkte chuan finna dik au ri chu an bengkhawn lo va. Thu tlûkna an siam a ngaih hian, mahnia thu tlûkna siam leh mi dangte thurâwn zawm mai chu an duh ṭhîn. Bible thute kan zawm avângin min hmusit hial pawh a ni thei. He thuziakah hian, chutianga mite’n min chhân lêt chhante chu kan sawiho vang. A hmasain, Jehova finna kan neih theih dân i lo sawiho vang u.

3. Finna dikah chuan eng nge tel?

³ Finna chu kan thu hriatte mila thu tlûkna ṭha siam theihna anga sawi theih a ni a. Mahse, finna dikah chuan chu aia tam a tel a ni. Bible chuan: “LALPA ṭih hi finna bul a ni a, Mi Thianghlima hriatna hi hriat thiamna a ni,” tiin a sawi. (Thuf. 9:10) Chuvângin, thu tlûkna pawimawh tak kan siam a ngaih hunah, Jehova ngaihtuahna—“Mi Thianghlima hriatna”—nêna inmilin kan siam tûr a ni. Bible leh Bible ṭanchhan kan thu leh chhuahte zirin chutiang chuan kan tithei a. Chutianga kan tih chuan, finna dik kan lantîr tihna a ni.—Thuf. 2:5-7.

4. Engvângin nge Jehova chu finna dik min pe theitu awm chhun a nih?

⁴ Jehova chu finna dik min pe theitu awm chhun a ni. (Rom 16:27) Engvângin nge Jehova chu finna lo chhuahna Bul a nih? Pakhatnaah, Siamtu a nih angin, a thil siamte a hriatna leh a hriatthiamna chuan tâwp chin a nei lo. (Sâm 104:24) Pahnihnaah, Jehova thiltih zawng zawngte chuan a finzia a târ lang. (Rom 11:33) Pathumnaah, Jehova fuihna fing tak zâwmtute chuan englai pawhin an hlâwkpui ṭhîn. (Thuf. 2:10-12) Finna dik neih kan duh chuan, chûng thu dik bulpuite chu kan pawm tûr a ni a, kan thu tlûkna siamah leh kan thiltihah kan inkaihhruaitîr bawk tûr a ni.

5. Mite’n Jehova chu finna dik chhuahna Bul anga an pawm lohnain eng nge a thlen?

⁵ Thu hrilhnaa kan mi tawn tam tak chuan leilunga thil siam ropui leh mawi takte hi hmu mah se, Siamtu a awm tih rin aiin, chanchhâwnna avânga lo awmah an ring daih thung. Mi dangte chu Pathian ring angin an insawi a; mahse, anni chuan Bible tehnate chu hmân lai tawh anga ngaiin, mahni duh dâna nun chu an thlang a ni. Chu chuan eng nge a rah chhuah? Mite’n Pathian finna aia mahni finna an rinchhan avângin khawvêl hi dinhmun ṭha zâwkah a awm phah em? Hlimna dik tak leh hma lam hun beiseina nghet tak an nei em? Kan chhehvêla thilthlengte hian he thu dik hi min rinnghehtîr a ni: “LALPA kalh zâwnga finna te, hriatna te, remruatna te a awm lo,” tih hi. (Thuf. 21:30) Chu chu Jehova hnêna finna dik dîl tûra min chêttîrtu a va ni tak êm! Mahse, lungchhiatthlâk takin, mi a tam zâwkte chuan chutiang chuan an ti lo. Engvângin nge?

6. Thufingte 1:22-25-nain a sawi angin, tute’n nge finna dik au ri chu ngaithla duh lo?

⁶ Mi tam tak chuan finna chu ‘kawtthlêrah ring takin au’ mah se, an ngaithla duh lo va. Bible chuan finna hnâwltute chu pâwl thumin a ṭhen a ni: “mi mâwlte,” “hmusittute,” leh ‘mi âte,’ tiin. (Thufingte 1:22-25 chhiar rawh.) Pathian finna hnâwl tûra chûng mite chêttîrtu miziate chu kan bih chiang ang a, chûng miziate laka kan invên theih dân pawh kan ngaihtuah bawk ang.

7. Engvângin nge mi ṭhenkhatin ‘mi mâwl’ nih zawm zêl chu an thlan?

⁷ “Mi mâwlte” chu mi thusawi apiang ring nghâl mai tute leh bum awlsam takte an ni a. (Thuf. 14:15) Chûng mite chu kan thu  hrilhnaah kan tawng fo a ni. Entîr nân, sakhaw hruaitute leh politics hruaitute buma awm mi tam takte hi han ngaihtuah teh. Mi ṭhenkhat chuan, chûng hruaitute bumin an lo awm reng tih an inhriat chuan awih harsa an ti hle a. Mahse, Thufingte 1:22-naa târ lan ang mite chuan, chutiang hruaitute zirtîrna leh kaihhruainate chu zawm nuam an tih avângin mi mâwl nih zawm zêl chu an thlang a ni. (Jer. 5:31) An duh dân anga nun chu nuam an ti a, Bible thute zir leh a tehnate zawm chu an duh lo a ni. Mi tam tak chuan Canada ram, Quebec biala sakhaw mi tak nu pakhatin amah tlawhtu Thuhretute hnêna a sawi hi an ṭâwmpui a ni, “Kan puithiamin min bum a nih chuan, chu chu kan thiam loh ni lovin ama thiam loh a ni,” tih hi. Chutiang mi, duh rêng vânga finna dik hnâwltute ang nih chu kan duh lo ngei ang!—Thuf. 1:32; 27:12.

8. Engin nge thiltawn ṭha nei tûra min ṭanpui ang?

⁸ Chhan ṭha tak avângin Bible chuan mi mâwl anga awm zawm tawh lo va, ‘rilru lama puitling’ tûrin min fuih a. (1 Kor. 14:20) Bible thu bulte nunpuina hmangin thiltawn ṭhate kan nei a. Chûng thu bulte’n buainate pumpelh tûr leh thu tlûkna fingte siam tûra min ṭanpui dânte chu zawi zawiin kan hria a ni. Kan thu tlûkna siam tawhte ngaihtuah nawn ṭhin chu thil ṭha tak a ni. Hun eng emaw chen Bible kan zirin, inkhâwmnaahte kan tel tawh a nih chuan, Jehova hnêna inpumpêka baptisma chang tûra hma kan la lâk loh chhante chu kan inzâwt thei a ni. Baptisma chang tawh kan nih chuan, chanchin ṭha hriltu leh zirtîrtu angin hma kan sâwn em? Bible thu bulin min kaihruai tih kan thu tlûkna siamte chuan a târ lang em? Mi dangte kan cheibâwl dânah Kristian miziate kan lantîr em? Hmasâwn ngaihna lai kan nei tih kan inhriat chuan, ‘mi mâwlte tifing ṭhîntu’ Jehova hriattîrnate chu i ngaihven tlat ang u.—Sâm 19:7.

9. Engtin nge “nuihsantute” chuan finna an hnâwl tih an târ lan?

⁹ Pathian finna hnâwltu dangte chu “hmusittute” an ni a. Kan thu hrilhnaah chutiang mite chu kan tawn châng a awm ṭhîn. Chung mite chuan mi dangte nuihsawh chu nuam an ti a. (Sâm 123:4) Bible chuan ni hnuhnûngahte chuan nuihsantute an awm tûr thu min vaukhân lâwk a. (2 Pet. 3:3, 4) Mi fel Lota mâkpate angin, tûn laia mi ṭhenkhat chuan Pathian vaukhânnate chu an ngaihsak lo. (Gen. 19:14) Mi tam tak chuan Bible thu bulte mila nungte chu an nuihzat a. Nuihsantute chu ‘Pathian ngaihsak lo lam, anmahni châkna ang zêlin an awm a ni.’ (Jud. 7, 17, 18) Bible-in nuihsantute chungchâng a sawi chu kalpêngte leh Jehova hnâwltute rilru put hmang nên a va inang tak êm!

10. Sâm 1:1-nain a sawi angin, engtin nge nuihsantute ni lo tûra kan invên theih?

¹⁰ Engtin nge nuihsantute ang ni lo tûra kan invên theih ang? Kan invên theih dân kawng khat chu mi dang sawisêl chîngte kawm loh hi a ni. (Sâm 1:1 chhiar rawh.) Chumi awmzia chu kalpêngte thusawi kan ngaithla lo va, an thuziakte pawh kan chhiar lo tihna a ni a. Kan fîmkhur loh chuan, awlsam taka mi dangte sawisêl duhna rilru put hmang kan neih theih bâkah, Jehova leh a inawpna pâwl kal tlanga kan dawn kaihhruainate chu kan ringhlel ṭan thei tih kan hria a ni. Chûngte chu kan pumpelh theih nân heti hian kan inzâwt thei: ‘Kaihhruaina leh hrilhfiahna thar kan dawn apiangin ka sawisêl ṭhîn em? Hruaitute chu sawisêl ka chîng em?’ tiin. Chûngte chu kan bânsan vat a nih chuan, kan chungah Jehova a lâwm ang.—Thuf. 3:34, 35.

11. Engtin nge ‘mi âte’ chuan nungchang lama Jehova tehnate chu an thlîr?

¹¹ Finna hnâwltu dang lehte chu ‘mi âte’ an ni a. Anni chu nungchang lama Pathian  dânte an zawm duh loh avânga mi â an ni. Anni chuan dik nia an hriatte chu an ti mai ṭhîn. (Thuf. 12:15) Chutiang mi chuan finna lo chhuahna Bul Jehova chu an hnâwl a ni. (Sâm 53:1) Thu hrilhnaah chutiang mite kan han tawn hian, Bible tehnate kan zah avângin nasa takin min sawisêl fo ṭhîn. Mahse, anni chuan nun ṭha zâwk min pe thei lo. Bible chuan: “Mi â tân finna chu a sâng lutuk a, kulh kawngkaah a ka a âng lo,” tiin a sawi. (Thuf. 24:7) Mi â chuan thurâwn fing tak pêk tûr a nei lo. Chuvângin, Jehova’n ‘mi â hnên ata kal chhuak’ tûra min vaukhân pawh hi a mak lo ve!—Thuf. 14:7.

12. Mi âte ang ni lo tûrin engin nge min ṭanpui ang?

¹² Pathian fuihna hnâwltute nêna inang lo takin, nungchang lama a tehnate pawh tiamin, Pathian kawngte chu kan ngaina a ni. Thuawihna leh awih lohnain a rah chhuahte khaikhinna hmangin kan ngainatna chu kan tinghet lehzual thei bawk. Mite’n âtthlâk taka Jehova thurâwn fing takte an hnâwl avânga mahni chunga buaina an inthlente chu hmuh tum la. Tichuan, Pathian thu i awih avânga chûng mite aia i nun a ṭhat zâwkzia chu ngaihtuah ang che.—Sâm 32:8, 10.

13. Jehova chuan a fuihna fing takte chu zâwm tûrin min tilui em?

¹³ Jehova chuan finna chu mi tin tân pe chhuak mah se, pawm tûrin tu mah a tilui lo. Chutih rualin, finna hnâwltute chunga thilthlengte chu min hrilh thung. (Thuf. 1:29-32) Jehova thu awih duh lotute chuan “anmahni kawng rah chu an [seng]” dâwn a ni. An nun dân chuan rilru hahna te, buaina te, leh a tâwpa chhiatnate bâk thlen tûr a nei lo. Kawng leh lamah chuan, Jehova fuihna fing takte ngaithlaa zâwmtute chu: “Ka thu pawm apiangte erawh chu him takin an awm ang a, thil ṭha lo hlau lovin an awm hle hle ang,” tia tiam an ni.—Thuf. 1:33.

14-15. Thufingte 4:23 aṭangin eng nge kan zir?

¹⁴ Pathian finna nunpui chu eng lai pawhin kan hlâwkpui ṭhîn a. Kan sawiho tâk ang khân, Jehova chuan a fuihna fing takte chu awlsam taka hmuh theih tûrin a thlâwnin a pe chhuak a. Entîr nân, Thufingte buah hian, hlâwkna min thlen theitu thurâwn ṭangkai takte min pe a ni. Chûng zînga palite chu i lo sawiho vang u.

¹⁵ Entîr nei i thinlung chu vênghim rawh. Bible chuan: “Thil dang ber aiin i thinlung vêng ṭha rawh, nunna lo chhuahna a ni si a,” tiin a sawi a. (Thuf. 4:23) Kan thinlung tak tak vênghim tûra kan tih ngaite chu han ngaihtuah teh. Chaw ṭha ei a, ṭha taka insawizawi a, thil chîn ṭha lote kan tih loh a ngai a. Entîr nei kan thinlung vênghim tûr pawhin chutiang chu kan tih a ngai a ni. Kan thinlung chu Pathian Thuin nî tin kan châwm a. Kristian inkhâwmahte chuan ṭha taka inbuatsaihin kan tel a, chhânnate kan pe a ni. Thu hrilh rawngbâwlnaa tel ziahin, harhvâng takin kan awm bawk a. Nungchang bawlhhlawhna nêna inkûngkaih film en  leh ṭhian ṭha lote kawmna ang chi kan ngaihtuahna tibawlhhlawh thei rêng rêng laka inthiar fihlimin, thil chîn ṭha lote chu kan pumpelh a ni.

16. Engvângin nge Thufingte 23:4, 5 chu kan tân a ṭangkai êm êm?

¹⁶ I thil neihah lungawi rawh. Bible chuan he thurâwn hi min pe a ni: “Intihausa tûrin intihah suh la . . . Thil awm lo chungah i mit i nghat dâwn em ni? Sum chuan thla a insiam ngei ngei a, mupui vân lama thlâwk ṭhîn ang hian,” tiin. (Thuf. 23:4, 5) Mite chuan an sum leh hausaknate chu awlsam takin an chân thei. Chuti chung pawhin, tûn laiah hian mi hausa leh retheite pawhin sum thawh chhuah chu an âtchilh tlat a. Chutiang ringawt ngaihtuahna chuan mite chu an hmingṭhatna te, mi dangte nêna an inlaichînna te, leh an hrisêlnate hial pawh tichhe thei zâwngin nun a hmantîr a ni. (Thuf. 28:20; 1 Tim. 6:9, 10) Kawng leh lamah, finna chuan sum leh pai chungchânga thlîr dân inbûk tâwk nei tûrin min ṭanpui a. Chu chuan duhâmna lakah min vênghimin, lungawina leh hlimna min neihtîr a ni.—Thur. 7:12.

17. Thufingte 12:18-in a sawi angin, engtin nge “mi fing lei” chu kan neih theih ang?

¹⁷ Thu i sawi hmain ngaihtuah rawh. Kan fîmkhur loh chuan, kan thusawi chuan mi dangte rilru nasa takin a tina thei a. Bible chuan: “Khandaih chhun anga na taka mi chhun thu sawi an awm a, mi fing lei erawh chu damna a ni,” tiin a sawi. (Thuf. 12:18) Mi dangte tlin lohna sawi darh kan chîn loh hian, inlaichînna ṭha kan vawng a. (Thuf. 20:19) Kan thusawite chu mi dangte tinatu ni lo va, thlamuantu nihtîr kan duh chuan, Pathian Thu kan chhiar ziahin kan ngaihtuah ṭhîn tûr a ni. (Lk. 6:45) Bible-in a sawite ngun taka chhûtna chuan, kan thusawite chu mi dangte tiharh sawng sawng thei, “finna lui” ang mai a nihtîr thei a ni.—Thuf. 18:4.

18. Engtin nge Thufingte 24:6 nunpuina chuan thu hrilhnaa hlawhtling tûra min ṭanpui theih?

¹⁸ Kaihhruaina zâwm rawh. Bible chuan: “Beih hmâin ngun taka râl rêl a ṭha, rem i hriat poh leh i chak zâwk ang,” tih thurâwn ṭangkai tak hi a pe a ni. (Thuf. 24:6) He  thu bul nunpuinain kan thu hrilhna leh zirtîr hnaa hlawhtlinna a thlen dân hi han ngaihtuah teh. Mahni thu thua thu hril mai lovin, tih dân tûr rawtna kan dawnte chu zui kan tum tlat a ni. Thiltawn ngah unaute’n Bible ṭanchhan an thusawite hmanga min zirtîrna hmun kan Kristian inkhâwmnaahte hian kaihhruaina fing takte kan dawng ṭhîn a. Chu bâkah, Jehova inawpna pâwl chuan mite’n Bible an hriatthiam nâna anmahni pui theitu hmanraw ṭangkai tak tak, thu leh hla chhuahte leh video-te chu a pe a ni. Chûng hmanruate chu thiam taka hman dân i zir em?

19. Engtin nge Jehova pêk finnate chu i ngaih? (Thufingte 3:13-18)

¹⁹ Thufingte 3:13-18 chhiar rawh. Pathian Thua thurâwn ṭha tak takte kan hmuh avângin kan va lâwm tak êm! Hêng thurâwnte hi dawng lo ila chuan, hlim takin kan nung thei lo vang. He thuziakah hian, Thufingte bu-a kan hmuh thurâwn ṭangkai tak takte chu kan ennawn tawh a. Bible bu pum hi Jehova min pêk thurâwn ṭha taktein a khat tak zet a ni. Jehova min pêk finna mila thiltih chu i tum tlat ang u. Khawvêlin chutiang finna a thlîr dân chu ka tân a pawimawh lo; chûng finna “kawl reng apiangte chu an hamṭha,” tih kan ring nghet tlat a ni.