1. Kan “thlarau lam mamawh” chu eng nge ni a, engtin nge chu chu hlimna nên a inkûngkaih?

 HLIMNA dik tak chu hlimna satliah mai a ni lo. Chu chuan dam chhûng a daih thei a ni. Engtin nge? Isua chuan Tlâng Chunga a Thusawiah: “An thlarau lam mamawh hriate chu an eng a thâwl e,” tiin a sawi a. (Mt. 5:3, NWT) Ani chuan mihringte chu an Siamtu, Pathian Jehova hriat duhna leh biak duhna nasa tak neia siam an ni tih a hria a ni. Chu chu kan “thlarau lam mamawh” chu a ni. Chu bâkah, Jehova chu “Pathian hlim” a nih avângin amah betute chu an hlim thei bawk a ni.—1 Tim. 1:11, NWT.

2-3. (a) Isua sawi angin, tu dangin nge hlimna nei thei? (b) He thuziakah hian eng nge kan sawiho vang a, engvângin nge chutianga sawiho chu a ngaih?

² Harsatnate kan neih loh hunah chauh kan hlim thei tihna a ni em? Ni lo. A thusawiah, Isua chuan thu ngaihvenawm tak a sawi a. “Lungngaite”—an thil tihsualte avânga rilru hrehawma awmte leh an nuna dinhmun harsa tak tâwkte—chuan hlimna an nei thei tih a sawi a. Chutiang bawkin, ‘felna avânga tihduhdah tuarte’ leh Krista hnung an zui avânga “hau” tâwktute pawhin hlimna an nei thei tih a sawi bawk. (Mt. 5:4, 10, 11) A nih leh, engtin nge chutiang dinhmunah chuan hlimna dik tak an neih theih?

³ Isua chuan hlimna chu harsatnate kan neih loh vâng ni lovin, kan thlarau lam mamawhte kan phuhhrûk avâng leh Pathian kan hnaih avânga lo awm a ni tih min zirtîr. (Jak. 4:8)  Engtin nge chutianga kan tih theih? He thuziakah hian, hlimna dik tak nei tûra kan tih tûr thil pathum kan sawiho vang.

4. Hlimna dik tak nei tûra kan tih tûr hmasa ber chu eng nge ni? (Sâm 1:1-3)

⁴ TIH TUR 1: Hlimna dik tak nei tûr chuan thlarau lam chaw kan ei tûr a ni. Mihringte leh ramsate hian dam khawhchhuah theih nân tisa lam chaw an mamawh a. Mahse, mihringte chauhvin thlarau lam chaw an ei thei a ni. Chu chu kan mamawh tak a ni a. Isua chuan: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” tiin a sawi. (Mt. 4:4) Chuvângin, Pathian Thu, Bible hlu tak aṭanga thlarau lam chaw ei lovin ni khat chauh pawh kan liamtîr tûr a ni lo. Fakna hla phuahtu chuan: “[Mi hlim thei] lâwmna chu LALPA dânah a ni zâwk a, a dân thu chu a chhûn a zânin a ngaihtuah ṭhîn,” tiin a sawi a ni.—Sâm 1:1-3 chhiar rawh.

5-6. (a) Bible aṭangin eng nge kan hriat theih? (b) Eng kawngtein nge Bible chhiarna chuan min ṭanpui theih?

⁵ Jehova chuan Bible-ah hian nun hlimawm kan neih theih nâna kan tih ngaite chu hmangaih takin min hrilh a. Kan tâna a thiltumte kan hria a ni. Amah kan hnaih theih dân leh kan sualte min ngaihdam theih dân kan hre bawk. Hma lam hun atâna a thutiam beiseina ropui tak chungchâng pawh kan hria a ni. (Jer. 29:11) Bible zirna aṭanga kan hriat chûng thutakte chuan hlimna min va pe tak êm!

⁶ Bible chu nî tina kan nunpui theih tûr fuihna ṭangkai tak taktein a khat tih kan hria a.  Chûng fuihnate kan zawm chuan hlimna kan nei thei a ni. Nuna harsatnate i tawh avânga i lunghnual hun apiangin, Jehova Thu chhiar nân leh chhût ngun nân hun tam lehzual pe ang che. Isua chuan: “Pathian thu hriaa zâwmte hi mi hamṭha [“mi hlim tak,” NWT] an ni zâwk e,” tiin a sawi a ni.—Lk. 11:28.

7. Engtin nge Pathian Thu chhiar nâna i hun hmante chu i hlâwkpui lehzual theih?

⁷ Pathian Thu i chhiar hian, i thu chhiarte chhût ngun nân hun hmang rawh. Entîr nân, hetiang hi i tawng tawh ngai em? Tu emawin i chawhmeh tui tih zâwng tak a siam a. Mahse, i hmanhmawh lutuk emaw, thil dangin i rilru a luah khah lutuk emaw avângin a tuina pawh hre hman lovin i lem ta zung zung mai a. I ei zawh hnu chuan, i ei ranzia i hre chhuak a, a tuinate pawh tûrin muang chângin lo ei ta zâwk la i inti hle a ni. A thute chhût ngun hman lo khawpa rangin Bible i chhiar tawh ṭhîn em? Pathian Thu chhiar nân hun pe la; thil thlen dânte chu mitthlain, an aw rite chu hriat tum la, i thu chhiarte chu ngaihtuah ang che. Chutianga tihna chuan i hlimna a belhchhah ang.

8. Engtin nge “bawih rinawm, fing tak” chuan a mawhphurhnate chu a hlen chhuah? (Footnote en bawk rawh.)

⁸ Isua chuan a hun taka thlarau lam chaw min pe tûrin “bawih rinawm, fing tak” a ruat a, thlarau lamah ṭha taka châwm kan ni. * (Mt. 24:45) Bible hi bawih rinawmin thlarau lam chawte a buatsaihnaa hmanraw pawimawh ber a ni a. (1 Thes. 2:13) Chûng thlarau lam chawte chuan Bible-a târ lan Jehova ngaihtuah dânte hre tûrin min ṭanpui a ni. Chuvângin, Vênnainsâng leh Awake! magazine-te bâkah, jw.org-a thuziakte chu kan chhiar ṭhîn a. Chawlhkâr chhûng leh chawlhkâr tâwpa inkhâwmte atân kan inbuatsaih a ni. Chu bâkah, a theih phawt chuan thla tina tihchhuah JW Broadcasting^® chu kan en bawk. Thlarau lam chaw ṭha taka eina chuan, hlimna dik tak neih theih nâna tih tûr pahnihna chu tithei tûrin min ṭanpui ang.

9. Hlimna dik tak neih theih nâna kan tih tûr pahnihna chu eng nge ni?

⁹ TIH TUR 2: Hlimna dik tak nei tûr chuan Jehova tehnate mila kan nun a ngai a ni. Fakna hla phuahtu chuan: “LALPA ṭih apiang chu an eng a thâwl e, A kawng zawhtute chu,” tiin a ziak a. (Sâm 128:1) Pathian Jehova ṭih tih awmzia chu amah zahna thûk tak kan neih avânga a duh loh zâwng apiang hnâwlna hi a ni. (Thuf. 16:6) Chuvângin, Bible-a târ lan angin, thil dik leh dik lo chungchânga Pathian tehnate zawm zêl chu kan tum tlat a ni. (2 Kor. 7:1) Jehova duh zâwngte kan tih a, a huat zâwngte kan hnâwl chuan hlimna kan nei ang.—Sâm 37:27; 97:10; Rom 12:9.

10. Rom 12:2-nain a sawi angin, eng mawhphurhna nge kan neih?

¹⁰ Rom 12:2 chhiar rawh. Mi tu emaw chuan Jehova’n thil dik leh dik lo chungchânga thu tlûkna siam tûrin thuneihna a nei tih a hria pawh a ni thei; mahse, amah ngeiin Pathian tehnate chu a zawm a ngai a ni. Entîr nân, tu emaw chuan kawngpuia motor tlân chak dân tûr chungchânga dân siam tûrin sawrkâr thuneitute’n dikna an nei tih a hria pawh a ni thei a. Mahse, chuti chung pawhin an dân siamte chu zawm a duh lo thei a. Chuvângin, dân phal chin aia chakin a khalh a ni. Keini erawh chuan, Jehova tehnate zawm chu nun dân kawng ṭha ber a ni tih kan rin tlatzia kan thiltihin kan lantîr a. (Thuf. 12:28) Davida pawhin chu chu a hriat avângin, Jehova chungchângah: “Nangin nunna kawng chu  mi hriattîr ang a: I hmaah chuan hlima khah liamna a awm a; I kut ding lamah chuan kumkhaw lâwmna tûr a awm,” tiin a sawi a ni.—Sâm 16:11.

11-12. (a) Kan mangan emaw, lunghnual emaw hunah eng thilah nge kan fîmkhur ang? (b) Intihhlimna kan thlan hunah Philippi 4:8-naa thute chuan engtin nge min ṭanpui theih?

¹¹ Kan mangan emaw, lunghnual emaw hunah, kan buainate laka tâl chhuak tûrin thil eng emaw kan tih a ngai niin kan hre mai thei. Chu chu hriatthiamawm tak ni mah se, Jehova huat zâwngte ti lo tûrin kan fîmkhur tûr a ni.—Eph. 5:10-12, 15-17.

¹² Tirhkoh Paula chuan Philippi khuaa mite hnêna a lehkhathawnah Kristiante chu “a fel . . . a thianghlim . . . a duhawm . . . [leh] ṭhatna” ngaihtuah chhunzawm zêl tûrin a fuih a ni. (Philippi 4:8 chhiar rawh.) He thu hi intihhlimna chungchâng a ziahna bîk ni lo mah se, a thu ziahte chuan intihhlimna kan thlanna kawngah min thunun tûr a ni. Entîr nân, helai châng hi heti hian in rilruin han siamrem chhin teh u: “In hla ngaihthlâkte chu a thianghlimin, in film en leh lehkhabu chhiarte chu a ṭhain, in video games khelhte chu fak tlâk a nih leh nih loh ngaihtuah rawh u,” tiin. Chutianga tihna chuan Pathian thlîrna aṭanga pawm theih leh theih lohte hre thiam tûrin a ṭanpui thei che a ni. Jehova tehna sâng takte mila nun chu kan duh a. (Sâm 119:1-3) Chutiang chuan, chhia leh ṭha hriatna thiang tak neiin, hlimna dik tak neih theih nâna tih tûr pathumna chu kan tithei ang.—Tirh. 23:1.

13. Hlimna dik tak kan neih theih nâna tih tûr pathumna chu eng nge ni? (Johana 4:23, 24)

¹³ TIH TUR 3: I nunah Jehova biakna i dah hmasa ber tih chian rawh. Min Siamtu a nih angin, Jehova chuan kan biak a phu tak zet a. (Thup. 4:10-11; 14:6, 7) Chuvângin, “thu tak leh tih tak zeta” a pawm zâwnga biakna chu kan nuna kan dah pawimawh ber a ngai a ni. (Johana 4:23, 24 chhiar rawh.) Kan biakna chu Bible-a kan hmuh thutak nên a inmil theih nân, Pathian thlarau thianghlim inkaihhruaitîr kan duh a. Kan rawngbâwlna khuahkhirh emaw, khap beh emaw a nihna ramah kan awm a nih pawhin, kan biakna chu kan nunah kan dah hmasa ber tûr a ni. Tûnah hian, kan unau 100 chuangte chu Jehova Thuhretute an nih vâng maiin tân ina khung an ni a. * Chuti chung pawhin, ṭawngṭai tûr te, inzirna nei tûr te, leh Pathian leh a Lalram chungchâng mi dangte hrilh tûrtein an tih theih apiang hlim taka tih an bâng chuang lo. Hau leh tihduhdah kan nih hunah pawh, Jehova’n min awmpuiin mal min sâwm ang tih kan hriat avângin kan hlim thei a ni.—Jak. 1:12; 1 Pet. 4:14.

14. Tajikistan rama awm ṭhalai unaupa chungah eng nge thleng a, envângin nge?

¹⁴ Eng dinhmun hnuaiah pawh awm mah ila, nuna thiltawn tak takte chuan kan sawiho tâk tih tûr pathumte zawmnain hlimna dik tak a thlen tih a nemnghet a ni. Sipaia ṭan duh lotu, Tajikistan rama awm kum 19-a upa Jovidon Bobojonov-a thiltawn hi han ngaihtuah teh. Kum 2019, October 4 khân an ina a awm laiin man a ni a, thla eng emaw zât tân ina khung a nih bâkah, dân bawhchhetu ang maia cheibâwl a ni a. Chu rorêlna dik lo chu ram tam takin an lo hre ta a. Sipaia ṭang tûra rinawmna thu tiam luihtîr leh sipai uniform hâk luihtîr an tumna lamah vuak a nih thu târ lan a ni a. A hnuah, an ram president-in a ngaihdam a,  chhuah tûra thu a pêk hma chu thiam loh chantîr a ni a, lung in tângte rim taka hna an thawhtîrna hmuna dah a ni. Chutih hun chhûng zawng chuan, Jovidon-a chu rinawmna vawng tlatin, a hlim reng a ni. Engtin nge chutianga a tih theih? A thlarau lam mamawhte a hriat reng avângin chutiang chuan a ti thei a ni.

15. Engtin nge Jovidon-a chuan tân ina a awm laiin thlarau lam chaw a ei?

¹⁵ Tân ina a awm laiin, Jovidon-a chuan Bible leh kan thu leh hla chhuahte nei lo chung pawhin thlarau lam chaw a ei zawm zêl a ni. Chu chu engtin nge a nih theih? Tualchhûnga unaute chuan ei tûr an pêk rualin, ei tûr dahna ipahte chuan ni châng an ziak ṭhîn a. Tichuan, nî tin Bible chhiarin, a chhût ngun theih phah a ni. Tân in aṭanga chhuah a nih hnuah: “Bible leh kan thu leh hla chhuahte chhiarna hmanga Jehova hriatna thûk lehzual nei tûra kan zalênna neih a ṭha thei ang bera hman chu a pawimawh hle,” tiin fiahna nasa tak la tâwk hrih lote hnênah thurâwn a pe a ni.

16. Jovidon-a’n eng nge a ngaihtuah tlat?

¹⁶ Kan unaupa chu Jehova tehnate milin a nung a. Thil sual ngaihtuah reng leh chûngte tihpuitlin aiin, Jehova leh A thil ngaihhlutte  chu a ngaihtuah tlat a ni. Jovidon-a chuan Pathian thil siam duhawm takte chu ropui a ti hle a. Zîng tin sava hrâmte chuan an tiharh ṭhîn a ni. Zânah chuan thla leh arsite a thlîr ṭhîn a. Ani chuan: “Hêng Jehova thilpêkte hian min tihlimin, min tichak a ni,” tiin a sawi. Jehova’n thlarau lam leh tisa lama kan mamawhte min pêk avânga kan lâwmzia kan lantîr hian, thinlung hlim kan nei a, chu hlimna chuan tuar chhuak tûrin chakna min pe thei a ni.

17. Engtin nge 1 Petera 1:6, 7-naa thute hi Jovidon-a dinhmun anga ding mai thei tu emaw chunga a thlen theih?

¹⁷ Jovidon-a chuan Jehova biakna chu a nunah a dah hmasa ber bawk a. Pathian dik chunga a rinawmna vawn tlat a pawimawhzia a hria a ni. Isua chuan: “Lalpa i Pathian chibai bûk la, ama rawng chauh bâwl rawh,” tiin a sawi. (Lk. 4:8) Sipai hotute leh sipaite chuan Jovidon-a chu a sakhua phatsan tûrin an duh a. Chutianga tih aiin, beidawng lo leh a rinna phatsan lo tûra ṭanpui tûrin Jehova hnênah a chhûn a zânin tih tak zetin a ṭawngṭai ṭhîn a ni. Dik lo taka cheibâwl a ni chung pawhin, Jovidon-a chuan a rinna a phatsan ngai lo. Chuvângin, tûnah chuan fiahna chi hrang hrang—man te, vuak te, leh tân ina khungte a tawh hmaa a neih loh rinna chak lehzual a neih tawh avângin hlimna nasa tak a nei a ni.—1 Petera 1:6, 7 chhiar rawh.

18. Engtin nge hlimna kan neih reng theih?

¹⁸ Jehova chuan hlimna dik tak nei tûra kan mamawhte a hria a. Hlimna dik tak neih theih nâna tih tûr pathumte kha kan zâwm a nih chuan, harsatnate hmachhawn chung pawhin hlimna kan nei reng thei ang. Tichuan, nang ngei pawhin: “LALPA Pathiana nei mite chu [hlim] takin an awm ṭhîn,” tiin i sawi thei ang.—Sâm 144:15.