Hmân Lai Israel Mite’n Râl An Do—Engvângin Nge Kan Do Ve Loh?
KHAWVEL Indopui II-na hun lai khân, Nazi officer pakhat chuan Jehova Thuhretu an man khâwmte chu, “France leh England do tûra kal duh lo apiang in thi ang!” tiin a hrâwk hrep a. Nazi sipaite’n an thuam famkim nêna an bul hnai lawka an nghâk reng chung pawhin, kan unaute zîngah râl do tûra inpe tu mah an awm lo. A va huaisenthlâk tak êm! Chûng thilthlengte chuan Jehova Thuhretute’n indona kan thlîr dân a târ lang chiang hle: He khawvêla indonaahte hian kan tel lo. Thaha vau kan nih hunah pawh, he khawvêl buainaahte hian ṭan lam neih kan duh lo.
Mahse, Kristian nia inchhâl zawng zawngte chuan chu thlîr dân chu an pawm vek lo. Mi tam tak chuan, Kristianin a ram a vênghim theiin, a vênghim tûr rêng a ni, tih ngaihdân an nei a. Anni chuan: ‘Hmân lai Israelte kha Pathian mite an niin râlte an do va, engvângin nge tûn lai Kristiante’n kan do loh bîk ang?’ tiin an ngaihtuah mai thei. Engtin nge anni chu i chhân ang? Hmân lai Israel mite leh tûn laia Pathian mite dinhmun inan lohnate chu kan hrilhfiah thei a ni. A inan lohna kawng ngate hi i lo ngaihtuahho vang u.
1. PATHIAN MITE CHU AN VAIIN HNAM PAKHAT AN NI
Hmân laiin, Jehova chuan a mite ni tûrin hnam pakhat, Israel hnam chu a thlang a. Israelte chu ‘hnam zawng zawng zînga a ro thlan bîk’ an nih thu a sawi a ni. (Ex. 19:5) Pathian chuan chênna tûr ram bîk a pe bawk. Chuvângin, Pathianin hnam dangte do tûra Israelte thu a pêk khân, an rinpuite an bei lo va, an that hek lo. *
Tûn laiah, Jehova betute chu “hnam tin zînga mi te, chi tin zînga mi te, mi tin zînga mi te, ṭawng tin zînga mi te” an ni a. (Thup. 7:9) Chûng Pathian mite chu indonaah tel ta se chuan, an rinpuite nêna inbeih tawnna—leh inthah tawnna hial pawh—a thleng thei a ni.
2. JEHOVA’N ISRAELTE CHU RAL DO TURIN THU A PE
Hmân laiin, Israel mite’n râl an do hun tûr leh an do chhan tûrah Jehova’n thu tlûkna a siam a. Entîr nân, Kanaan mite chu ramhuai an biak avâng te, nasa taka nungchang blawhhlawhnaa an inhman avâng te, leh inthawi nâna naupang an hman avângtein an lâr hle a; chuvângin, Pathianin an chunga a rorêlna kengkawh tûrin Israelte chu thu a pe a. Jehova chuan Kanaan ram chhûnga chûng thiltih suaksualte nuai bo tûrin Israelte chu kaihhruaina a pe a ni. (Lev. 18:24, 25) Ram Tiama Israel mite an luh hnuah pawh, Pathian chuan an hmêlmate laka anmahni vênhim nân râl bei tûra hrilh châng a nei a. (2 Sam. 5:17-25) Mahse, râl do tûra mahnia thu tlûkna an insiam erawh eng lai mahin a phal ngai lo. Chutianga an tih apiangin, an chungah chhiatna a thleng ṭhîn a ni.—Num. 14:41-45; 2 Chro. 35:20-24.
Tûn laiah, Jehova’n mihringte chu râl do tûrin a hrilh tawh lo. Ram hrang hrangte chu Pathian duh dân ni lovin, mihringte duh dân ang zâwkin an indo ṭhîn a. Chutianga an indo chhan chu ram zau zâwk neih an duh vâng te, sum tam zâwk neih an duh vâng te, leh politics chawi lâr an duh vângte a ni. A nih leh, an biakna humhim nâna Pathian hminga râl do emaw, Pathian hmêlma that nia inchhâlte emaw chungchâng hi eng nge ni ve? Jehova chuan nakina indona lo thleng tûr, Armageddon indonaah chuan biakna dik chu humhimin, a hmêlma zawng zawngte chu a tiboral ang. (Thup. 16:14, 16) Chu indonaah chuan, Pathian betu mihringte ni lovin, vântirhkoh thiltithei takte’n an bei ang.—Thup. 19:11-15.
3. ISRAELTE’N JEHOVA CHUNGA RINNA LANTIRTUTE CHU AN THAT LO
Tûn lai indonaahte hian, Jeriko tihchhiat a nih ṭuma Jehova’n Rahabi leh a chhûngte nunna a zuahsak ang khân, mi rinawmte nunna chu zuahsak a ni em?
Hmân laiin, Israelte chuan Pathian chunga rinna lantîrtute nunna chu an zuahsak fo va; Pathian Jehova’n thi tlâka a ruatte chauh an tihlum ṭhîn a ni. He entîrna pahnih hi lo chhinchhiah teh. Jehova’n Israelte chu Jeriko tichhe tûrin thu a pe a; mahse, Rahabi’n rinna a lantîr avângin amah leh a chhûngte nunna chu zuahsak an ni. (Jos. 2:9-16; 6:16, 17) A hnuah, Gibeon khawpui chu a chhûnga chêng Gibeon mite’n Pathian chunga zahna an lantîr avângin zuah a ni bawk.—Jos. 9:3-9, 17-19.
Tûn laiah, ram leh ram indote chuan Pathian chunga rinna lantîrtute pawh an zuah chuang lo va. A châng phei chuan, pawi sawi lo mipuite chuan indona avângin an nun an chân hial a ni.
4. ISRAELTE CHUAN RAL DO KAWNGA PATHIAN DAN SIAMTE AN ZAWM A NGAI
Hmân laiin, Jehova chuan Israel hnama râl do mite chu a kaihhruaina mila râl do tûrin a phût a. Entîr nân, a châng chuan an beih tûr khawpui chu “remna thu” sawipui tûrin a hrilh a. (Deut. 20:10) Chu bâkah, Israel sipaite chu an taksa leh an riahhmun vawng thianghlim a, nungchang lama a tehnate zâwm tûrin a beisei bawk a ni. (Deut. 23:9-14) An chhehvêla hnam dang sipaite chuan an hneh tâk rama hmeichhiate chu an pâwngsual fo ṭhin laiin, Jehova chuan Israel sipaite’n chutianga an tih chu a khap tlat a. An hmeichhe mante chu thla khat an kawl hnuah chauh nupuiah an nei thei a ni.—Deut. 21:10-13.
Tûn laiah, ram tam zâwkte chuan indo chungchânga khawvêl dân siamte chu inlungrual takin an pawm a. Chûng dânte chu mipuite vênhim nâna siam mah ni se, lungchhiatthlâk takin bawhchhiat a ni fo a ni.
5. PATHIANIN A MITE TAN A BEIHSAK
Pathianin Jeriko hneh tûra Israelte a beihsak anga a beihsak ram tûn laiah a awm em?
Hmân laiin, Jehova chuan Israel mite tâna beihsakin, hnehna ropui tak a chantîr fo a ni. Entîr nân, engtin nge Jehova’n Israelte chu Jeriko khawpui hneh tûra a ṭanpui? Kaihhruaina a pêk anga Israel mite ‘an au dur dur chuan, kulh chu a chim ta rup a,’ chu chuan khawpui lâk chu a tiawlsam lehzual a ni. (Jos. 6:20) A nih leh, Amon-ho kha engtin nge an hneh? “LALPAN vân aṭangin rial lian pui puiin . . . a zuk dentîr chiam a . . . Israel thlahten khandaiha an sah hlum ai mahin rial den hlum chu an tam zâwk a ni.”—Jos. 10:6-11.
Tûn laiah, Jehova chuan leia eng ram tân mah a beihsak tawh lo. Isua kaihhruai a Lalram chu ‘he khawvêla mi hi a ni si lo va.’ (Joh. 18:36) Chumi nêna inkalh takin, Setana chu mihring sawrkâr zawng zawngte chunga thuneitu a ni a. Khawvêla indona râpthlâk tak tak thlengte hian a nunrâwnzia a târ lang a ni.—Lk. 4:5, 6; 1 Joh. 5:19.
KRISTIAN DIKTE CHU REMNA SIAMTUTE AN NI
Kan hriat tâk ang khân, kan tûn lai dinhmun hi hmân lai Israelte lakah chuan nasa takin a danglam a. Mahse, chûng danglamnate chu indonaa kan tel duh loh chhan awm chhun a ni lo. Chhan dangte pawh a awm a ni. Entîr nân, Pathianin ni hnuhnûngahte chuan a zirtîrna dawngtute chuan “indo dân pawh an zir” tawh loh tûr thu leh tel pawh an tel tawh loh tûr thu a sawi lâwk a. (Is. 2:2-4) Chu bâkah, Isua Krista pawhin a zirtîrte chu ‘khawvêla mi an nih loh’ tûr thu a sawi a; khawvêl buainaahte ṭan lam an nei dâwn lo a ni.—Joh. 15:19.
Isua Krista chuan a hnungzuitute chu thil dang ti tûrin a fuih bawk a. Ani chuan inhuatna, thinrimna, leh indona thlen theitu rilru put hmangte chu hnâwl tûrin a zirtîr a ni. (Mt. 5:21, 22) Chu bâkah, “remna siamtute” ni tûr leh an hmêlmate hmangaih tûrin a zirtîr bawk.—Mt. 5:9, 44.
Engtin nge chutianga kan tih theih? Eng indonaah mah kan tel duh lo pawh a ni thei; mah se, kohhrana inhmuh thiam lohna leh inṭhen darhna thlen theitu huatna rilru put hmangte chu kan thinlungah kan lo pai reng em? Chutiang rilru put hmang chu paih bo tûrin theih tâwp i chhuah zawm zêl ang u.—Jak. 4:1, 11.
Ram leh ram indonaa tel aiin, kan inkâra remna leh hmangaihna a awm theih nân theih tâwp kan chhuah zâwk a ni. (Joh. 13:34, 35) Jehova’n indona zawng zawng chatuan atâna a tihtâwp hun kan nghah lai hian, kan tualdawihna vawn reng chu i tum tlat ang u.—Sâm 46:9.
^ Israel hnamte inkâra inbeihna a thlen châng pawh a awm a; mahse, chûng inbeihnaah chuan Jehova a lâwm lo. (1 Lal. 12:24) Chutih rualin, Jehova’n Israel hnam ṭhenkhatin amah an hawisan vâng emaw, thil sual lian tak an tih vâng emawa chutiang inbeihna thlen a phal châng pawh a awm a ni.—Ro. 20:3-35; 2 Chro. 13:3-18; 25:14-22; 28:1-8.
You May Also Like
ZAWH FO ṬHIN ZAWHNATE
Engvângin Nge Jehova Thuhretute Chu Sipaia An Ṭan Loh?
Jehova Thuhretute chu sipaia an ṭan loh avângin khawvêl pumah hriat an hlawh a. Sipaia kan ṭan loh chhan hria ang che.
