1. Jehova’n eng beiseina nge min pêk?

 JEHOVA chuan chatuan nun beiseina ropui tak min pe a. Ṭhenkhat chuan thlarau thi thei lo neia vâna chatuana nun beiseina an nei a. (1 Kor. 15:50, 53) A tam zâwkte erawh chuan hrisêlna ṭha famkim leh nun hlimawm tak neia leia chatuana nun beiseina an nei thung. (Thup. 21:3, 4) Kan beisei chu vâna chatuana nun emaw, leia chatuana nun emaw pawh ni se, kan tân a hlu hle a ni.

2. Beiseina chu engah nge a innghah a, engvângin nge chutianga kan sawi theih?

² Bible-a “beiseina” tih thu mal hi “thil ṭhate lo thleng tûra beiseina,” tia hrilhfiah theih a ni a. Hma lam hun atâna kan beiseina chu Jehova hnên aṭanga lo kal a nih avângin, a thleng ngei ang tih kan chiang a ni. (Rom 15:13) A thutiamte chu kan hria a, a hlen ngei ṭhîn tih kan hre bawk. (Num. 23:19) Jehova chuan a thiltih tûr a sawi tawh zawng zawngte tihhlawhtlin châkna leh tihlawhtlin theihna a nei tih kan ring nghet tlat a ni. Chuvângin, kan beiseina hi duhthusâm thil maia innghat a ni lo va; finfiahna leh thil nihna dik taka innghat a ni zâwk a ni.

3. He thuziakah hian nge kan sawiho vang? (Sâm 71:5)

³ Kan Pa vâna mi chuan min hmangaihin, amah rinchhan tûrin min duh a. (Sâm 71:5 chhiar rawh.) Jehova rinchhan a, kan beiseina kan tihngheh tlat chuan, fiahnate chu chhel takin kan tuar thei ang a, hma lam hun chu huaisenna nên hlim takin kan hmanchhawn thei ang. Kan beiseinain min vênhim dânte chu i lo sawiho vang u. A hmasain, beiseina chu thîrchakai leh lukhum ang a nih dân kan ennawn ang a. Chumi zawhah, kan beiseinna  kan tihngheh tlat theih dân kan sawiho bawk ang.

4. Engtin nge beiseina chu thîrchakai ang a nih? (Hebrai 6:19)

⁴ Hebrai mite hnêna a lehkhathawnah, tirhkoh Paula chuan kan rinna chu thîrchakai nên a tehkhin a. (Hebrai 6:19 chhiar rawh.) Vawi tam tak lawnga a zin ṭhin avângin, thîrchakai chu lawng tih din nân an hmang ṭhîn tih a hria a ni. Ṭum khat chu, lawnga a zin laiin thlipui na tak a tleh a. Chutianga thlipui a tleh lai chuan, lawngin lungpui a su tûr vên nân lawngpute’n thîrchakai tuia an thlâk lai chu a hmu a. (Tirh. 27:29, 39-41) Thîrchakaiin lawng a chelh ding tlat angin, kan beiseina chuan hun khirh tak kan hmachhawn huna Jehova kalsan lo tûrin min tichak a ni. Kan beiseina chuan fiahna khirh takte kan tawh hunah pawh, dinhmunte chu a ṭha chho leh thuai dâwn tih ring tlata hahdam taka awm tûrin min ṭanpui a ni. Isua chuan tihduhdahna kan tawrh tûr thu a sawi lâwk tih hre reng ang che. (Joh. 15:20) Chuvângin, kan hma lam hun atâna Jehova min tiam malsâwmnate chhût ngunna chuan a rawng bâwl zawm zêl tûrin min ṭanpui a ni.

5. Engtin nge beiseinain Isua chu thihna a hmachhawn lai pawha rinawm reng tûra a ṭanpui?

⁵ Râwng taka tihhlum a ni dâwn tih a hre chung pawha, beiseinain rinawm reng tûra Isua a ṭanpui dân hi han ngaihtuah teh. C.E. 33 Pentikost nî khân, tirhkoh Petera chuan Isua’n rilru hahdamna leh inrintâwkna a neihzia mawi taka târ langtu Sâm bu-a hrilhlâwkna chu la chhâwngin heti hian a sawi a ni: “Ka tisa pawh beisei takin a awm bawk ang. Ka thlarau chu mitthi khuaah i hnutchhiah lo vang a, i mi thianghlim ṭawih ral i phal hek lo vang a, . . . nangin i hmêlin lâwmin mi tikhat ang,” tiin. (Tirh. 2:25-28; Sâm 16:8-11) Isua chuan a thi dâwn tih inhre mah se, a Pa, Pathian Jehova’n a kaitho leh dâwn tih leh vânah hlim takin an awm dûn leh dâwn tih beiseina nghet tak a nei a ni.—Heb. 12:2, 3.

6. Unaupa pakhatin beiseina chungchângah eng nge a sawi?

⁶ Kan Kristian beiseina chuan unau tam takte chu an harsatnate tuar chhuak tûrin a lo ṭanpui tawh ṭhîn a ni. England rama awm unaupa rinawm tak Leonard Chinn-a entawn tûr siam hi han ngaihtuah teh. Khawvêl Indopui Pakhatna hun lai khân sipaia ṭan a duh loh avângin lung ina tântîr a ni a. Thla hnih chhûng khung hran a ni a, hna hahthlâk tak thawhtîr a ni bawk. Ani chuan, “Ka thiltawnte chuan chhel taka tuar chhuak tûra beiseina kan neih a pawimawhzia hre tûrin min ṭanpui a ni. Isua, tirhkohte, leh zâwlneite entawn tûr siam bâkah, Bible-a thutiam hlu takte chu kan nei a. Chûng zawng zawngte chuan, hma lam hun atâna beiseina ropui tak min pein, chhel taka tuar chhuak tûra kan mamawh chakna min pe bawk a ni,” tiin a sawi. Beiseina chu Unau Leonard-a tân chuan thîrchakai ang a ni a, kan tân pawh a ni thei a ni.

7. Engtin nge fiahnate chuan kan beiseina a tihngheh? (Rom 5:3-5; Jakoba 1:12)

⁷ Fiahnate kan tawrh chhuah hnuah leh Jehova ṭanpuinate dawnga a pawm kan hlawh hnu chuan, kan beiseina chu a nghet lehzual a ni. (Rom 5:3-5; Jakoba 1:12 chhiar rawh.) Chuvângin, chanchin ṭha kan pawm tirh lai aiin kan beiseina chu a nghet lehzual suah tawh bawk. Setana chuan fiahna kan tawhte’n min tihchauh a duh a; mahse, Jehova ṭanpuinain chûng fiahte chu kan tuar chhuak vek thei a ni.

8. Engtin nge beiseina chu lukhum ang a nih? (1 Thessalonika 5:8)

⁸ Bible chuan kan beiseina chu lukhum nên  a tehkhin a. (1 Thessalonika 5:8 chhiar rawh.) Sipai chuan hmêlmate beihna laka a lu vênhim nân lukhum a khum ṭhîn a. Kan thlarau lam inbeihnaah pawh, Setana beihna lak ata kan rilru kan vênhim a ngai a ni. Ani chuan min thlêm nân leh kan ngaihtuahnate a thunun theih nân thil chi hrang hrang a hmang a. Lukhumin sipai lu a vênghim ang bawkin, kan beiseina chuan Jehova chunga kan rinawm reng theih nân kan ngaihtuahnate chu a vênghim a ni.

9. Mite’n beiseina an neih loh hian an chungah eng nge thleng?

⁹ Chatuana nun kan beiseina chuan fing taka thil ti tûr leh thu tlûkna fing tak siam tûrin min ṭanpui ang. Kawng leh lamah chuan, kan beiseina a ngheh lo va, kan duh zâwngte ringawt kan ngaihtuah ṭan a nih chuan, chatuana nun kan beiseina chu kan theihnghilh thei a ni. Hmân lai Korinth khuaa chêng Kristian ṭhenkhatte chungchâng kha han ngaihtuah teh. Anni chuan Pathian thutiam bul ber—mitthi tawhleh beiseina—an rinna chu an hloh va. (1 Kor. 15:12) Paula chuan thawhlehna ring lotute chu anmahni duh dân ang chauhvin an nung tih a sawi a ni. (1 Kor. 15:32) Tûn laia Pathian thutiamte ring lotu mi tam tak pawhin nuam an tih zâwng apiang an ti a. Mahse, keini erawh chuan hma lam hun atâna Pathian thutiam chu kan ring tlat a ni. Kan beiseina chu kan ngaihtuahna vênghimtu entîr nei lukhum ang a ni a, chu chuan Jehova nêna kan inlaichînna tichhe thei mahni chauh inngaihtuahna nun kawng zawh lo tûrin min vêng a ni.—1 Kor. 15:33, 34.

10. Engtin nge beiseina chuan ngaihtuahna dik lo laka min vênhim theih?

¹⁰ Kan beiseina lukhum chuan, Pathian tihlâwm tumnain awmzia a nei lo anga ngaihtuah lo tûrin min vênghim bawk. Entîr nân, mi ṭhenkhat chuan: ‘Chatuan nunna nei tûrte zîngah ka tel ve thei ngai lo vang. Chumi nei tûr chuan ka tling tâwk lo. Pathian tehnate pawh ka zâwm thei ngai lo vang,’ tiin an ngaihtuah mai thei. Chutiang chiah chu thlamuantu der Elifaza’n Joba hnênah a sawi tih hre reng ang che. Ani chuan: “Thianghlim tûr chuan mihring hi eng nge a nih?” tiin a sawi a. Pathian chungchângah: “Ngai teh, a mi thianghlimte chungah rinna a nghat lo va, a ni, a mit hmuhah chuan vân pawh a fai lo,” tiin a sawi. (Job. 15:14, 15) Dâwt a va sawi chiang tak êm! Chutianga ngai tûr chuan Setana’n a duh che tih hre reng rawh. Chutianga ngaihtuah rengna chuan beiseina a hloh ṭantîr thei che tih a hria a ni. Chuvângin, chutiang dâwt thute chu hnâwlin, Jehova thutiamte chu ngaihven tlat la. Chatuana nung tûrin a duh che tih leh chatuana nun nei thei tûra ṭanpui che a duh tih ringhlel ngai suh.—1 Tim. 2:3, 4.

11. Engvângin nge kan beiseina a thlen famkim hun kan nghah laia dawhtheihna kan neih a ngaih?

¹¹ Kan beiseina tihngheh chu a awlsam reng lo. Pathian thutiamte kan nghah lai hian dawhtheihna kan tlachham palh thei a ni. Mahse, Jehova chu chatuana awm a ni a; chuvângin, hun rei zâwng a thlîr dân leh kan thlîr dân chu a inang lo. (2 Pet. 3:8, 9) A thutiamte chu a ṭha thei ang berin hlen dâwn mah se, kan beisei hunah a thlentîr lo pawh a ni thei. A nih leh, Pathianin a thutiamte a thlen famkimtîr hun dawhtheia taka kan nghah lai hian, engin nge kan beiseina tinghet reng tûra min ṭanpui thei?—Jak. 5:7, 8.

12. Hebrai 11:1, 6-nain a sawi angin, engtin nge beiseina chu rinna nêna thlunzawm a nih?

¹² Beiseina min petu Jehova kan hnaih tlat chuan, kan beiseina chu a nghet reng ang. Dik takin, Bible chuan beiseina chu Jehova a awm tih leh ani chu “[amah] zawngtute hnêna lâwmman pêk hmang a ni,” tih rinna  nên a thlunzawm tlat a. (Hebrai 11:1, 6 chhiar rawh.) Jehova chu kan tâna a tak poh leh, a thutiam tawh zawng zawngte a thlen famkimtîr ngei ang tih kan rinna chu a nghet lehzual ang. Jehova nêna inlaichînna ṭha lehzual nei tûr leh kan beiseina tinghet reng tûra kan tih theih kawng pawimawh takte chu i lo sawiho vang u.

13. Engtin nge Pathian kan hnaih theih?

¹³ Jehova hnênah ṭawngṭai la, Bible chhiar rawh. Jehova chu hmu thei lo mah ila kan hnaih thei a. Kan thusawite chu min ngaihthlâksak ang tih ring tlat chungin ṭawngṭaiin kan be thei a ni. (Jer. 29:11, 12) Bible chhiara chhût ngunna hmangin Pathian thusawite chu kan ngaithla thei a. Tûn hmaa a chunga rinawmte a ngaihsak dân kan chhiarna chuan, kan beiseina a tinghet lehzual sauh vang. Pathian Lehkhathu zawng zawng hi “chhelna leh thlamuanna hmua beiseina kan neih theihna tûrin, . . . keimahni min zirtîrna turin ziak a ni si a.”—Rom 15:4.

14. Engvângin nge mi dangte tâna Jehova’n thil a lo tih tawhte chu kan chhût ang?

¹⁴ Jehova’n a thutiamte a hlen dân chu chhût ngun rawh. Abrahama leh Sari tâna Pathian thiltihte kha han ngaihtuah teh. Fa an neih theih hun a pêl tawh a. Mahse, Pathianin fa an neih ngei tûr thu a tiam a ni. (Gen. 18:10) Engtin nge Abrahama’n a chhân lêt? Bible chuan heti hian a sawi a ni: “Beisei takin a ring a, chi tam takte pa a lo nih theih nân,” tiin. (Rom 4:18) Mihring thlîrna aṭang chuan an dinhmun chu beisei bo angin lang mah se, Abrahama chuan Jehova’n a thutiam a hlen ang tih a ring tlat a. A rin ang ngei chuan a thleng ta rêng a ni. (Rom 4:19-21) Chûng thute chuan Jehova thutiamte chu mihringte thlîrna aṭang chuan thil theih loh angin lang mah se, Jehova chuan a thlen famkimtîr ngei ang tih ring tlat tûrin min zirtîr a ni.

15. Pathianin thil min tihsak tawhte chu engvângin nge kan chhût ang?

 ¹⁵ I tâna Jehova thiltihte chu ngaihtuah rawh. Bible-a thutiam thleng famkim tawhte mi mal taka i hlâwkpui tawh dân chu han ngaihtuah teh. Entîr nân, Isua chuan nuna kan mamawh zualpuite chu a Pain min pêk tûr thu min tiam a. (Mt. 6:32, 33) Thlarau thianghlim kan dîl hunah min pe ang tih min tiam bawk. (Lk. 11:13) Jehova chuan chûng thutiamte chu a vawng reng a ni. A thutiam ṭhenkhat i chunga a thlen famkim tawh dân pawh i ngaihtuah chhuah theih ngei a rinawm. Entîr nân, ngaihdam che, thlamuan che, leh thlarau lama châwm che a tiam a. (Mt. 6:14; 24:45; 2 Kor. 1:3) Pathianin thil a tihsak tawh che i chhût ngun chuan, nakina i tâna a la tih tûrte i beiseina chu a nghet lehzual ang.

16. Engvângin nge beiseina hi thilpêk hlu tak a nih?

¹⁶ Chatuan nun beiseina hi Pathian hnên aṭanga kan dawn thilpêk hlu tak a ni a. A thleng ngei dâwn tih kan hriat chian, hma lam hun duhawm tak chu kan beisei a ni. Chu kan beiseina chu kan tân thîrchakai ang a ni a, chu chuan fiahnate leh tihduhdahnate chhel taka tuar chhuak tûra min ṭanpui theih bâkah, thihna meuh pawh huaisen taka hmachhawn tûrin min ṭanpui thei a ni. Kan tân lukhum ang a ni bawk a, thil dik lote hnâwl tûr leh ngaihtuah lo tûrin kan ngaihtuahna min vênhimsak a ni. Bible ṭanchhan kan beiseina chuan Pathian min hnaih lehzualtîrin, min hmangaihna thûkzia a târ lang a. Kan beiseina kan tihngheh reng hian nasa takin kan hlâwkpui a ni.

17. Engvângin nge kan beiseinain lâwmna a thlen?

¹⁷ “Beiseina kawngah chuan lâwm ula,” tih hi tirhkoh Paula’n Rom mite hnêna a lehkhathawna a ziak fuihna thu a ni a. (Rom 12:12) Paula chuan a rinawm reng chuan vâna chatuan nunna a chang ngei dâwn tih a hriat avângin a lâwm thei a ni. Chutiang bawkin, keini pawh Jehova’n a thutiamte a hlen ngei dâwn tih kan chian avângin, kan beiseinaah chuan kan lâwm thei a ni. Fakna hla phuahtuin: “LALPA Pathiana beiseina nghattute chu [an nihlawh e], . . . A thutiam pawh a hlen zêl ṭhîn,” tiin a sawi si a.—Sâm 146:5, 6, C.L. Re-edited.