1-2. (a) Engtin nge sawrkâr ṭhenkhatin Jehova mite chu an dodâl a, anni chuan engtin nge an chhân lêt? (b) Engtin nge tihduhdahna chuan hlimna a thlen theih? (A kâwma milem aṭangin chhâng bawk rawh.)

 KHAWVEL puma ram 30 chuangah kan rawngbâwlna hi khuahkhirh, a nih loh leh khap beh a ni mêk a. Chûng ram zînga ṭhenkhatah chuan, thuneitute’n kan unaute chu tân inah an khung hial a ni. Eng nge an tihsual? Jehova mithmuhah chuan thil an tisual lo. An thiltih chu Bible chhiar leh zir te, mi dangte hnêna an thurin hrilh chhâwn te, leh an Kristian unaute nêna inkhâwmte a ni a. Politics-ah ṭan lam neih an duh lo bawk. Chûng Pathian chhiahhlawhte chuan dodâlna nasa tak an tâwk chung pawhin, Jehova hnêna an inpumpêkna chu tihchhiat theih a ni lo tih lantîrin an rinawmna an vawng tlat a ni. Chutianga an tih avâng chuan an hlim hle!

² Chûng Thuhretu huaisen takte thlalâk leh an nui hmêlte chu i hmu tawh ngei ang. An rinawmna an vawn tlatna chuan Jehova a tilâwm tih an hriat avângin an hlim a. (1 Chro. 29:17a) Isua chuan: “Felna avânga tihduhdah tuar hnute chu an eng a thâwl e . . . Lâwm ulangin, nasa takin hlim rawh u; . . . in lâwmman a awm hnem si a,” tiin a sawi a ni.—Mt. 5:10-12.

3. Tirhkohte 4:19, 20-nain a sawi angin, kum zabi khatna hun laiin tirhkohte’n tihduhdahnate chu engtin nge an chhân lêt a, engvângin nge?

³ Kum zabi khatnaa tirhkohte’n Isua chanchin an hril  avânga tihduhdahna an tawrh ang chiah chu kan unaute’n an tuar mêk a. Judate rorêlna sâng chuan tirhkohte chu ‘Isua hminga thu sawi tawh lo tûrin’ thu an pe fo ṭhîn a ni. (Tirh. 4:18; 5:27, 28, 40) Engtin nge tirhkohte chuan an chhân lêt? (Tirhkohte 4:19, 20 chhiar rawh.) Anni chuan thuneihna sâng zâwk neituin Krista chanchin chu ‘mite hnêna tlângaupui leh hriattîr tûrin thu a pe,’ tih an hria a. (Tirh. 10:42) Chuvângin, Petera leh Johana chuan chûng rorêltute thu aia Pathian thu an awih zâwk tûrzia leh Isua chanchin sawi an bânsan loh tûrzia huaisen takin an sawi a ni. Chu chu, chûng thuneitute hnêna, ‘Engtin nge in thupêkte chu Pathian thupêkte aia chungnung zâwk anga in sawi ngam zâwk?’ tia zâwt lêt ang mai an ni.

4. Tirhkohte 5:27-29-nain a târ lan angin, tirhkohte chuan Kristian dik zawng zawngte tân eng entawn tûr nge an siam a, engtin nge anni chu kan entawn theih?

⁴ Tirhkohte chuan ‘mihring thu aia Pathian thu zawm’ chungchângah Kristian dik zawng zawngte tân entawn tûr ṭha tak an siam a. (Tirhkohte 5:27-29 chhiar rawh.) An rinawmna avânga vuak an tawrh hnu chuan Judate rorêlna sâng chu an chhuahsan a, “[Isua] hming avânga mualpho tuar tlâka ruat an nih avângin an lâwm hle a,” thu an hril zawm zêl a ni.—Tirh. 5:40-42.

5. Eng zawhnate nge kan chhân ngai?

⁵ Tirhkohte entawn tûr siam chuan zawhna ṭhenkhat a tichhuak a ni. Entîr nân, engtin nge tirhkohte chuan mihring thu aia Pathian thu an zawm zâwk ruala ‘rorêltute thu thua awm’ tûra Bible thupêk chu an zawm theih? (Rom 13:1) Engtin nge tirhkoh Paula sawi anga “lalte leh thuneitute laka intulût” tho siin, Rorêltu sâng ber Pathian chunga kan rinawmna chu kan vawn chhunzawm zêl theih?—Tit. 3:1, 2.

6. (a) Rom 13:1-naa târ lan “rorêltute” chu tute nge an nih a, an chungah eng mawhphurhna nge kan neih? (b) Mihring rorêltu zawng zawngte chungchânga thu dik chu eng nge ni?

⁶ Rom 13:1 chhiar rawh. He Bible chânga “rorêltute” tih ṭawngkam hian thiltihtheihna nei, mi dangte chunga thuneitu mihring  rorêltute a kâwk a. Kristiante chuan chûng rorêltute thu chu an awih tûr a ni. Rorêltute chuan vântlâng tâna thupêkte leh dânte chu an kengkawh a, Jehova Thuhretute an ṭan châng pawh a awm a ni. (Thup. 12:16) Chu bâkah, an beisei anga lei man pe tûr te, chhiah chawi tûr te, leh anmahni ṭiha ngai pawimawh tûrtea thu pêk kan ni bawk. (Rom 13:7) Mahse, chûng thuneitute chuan an thuneihna chu Pathian Jehova’n a remtih vâng chauhva nei an ni. Isua’n chu thu bul chu Rom Ram Awptu Pontia Pilata zawhna a chhân khân chiang takin a târ lang a. Pilata’n Isua hnêna tihhlum a nih tûr leh tûr loh chungchânga thu tlûkna siam tûrin thuneihna a neih thu a sawi khân, Isua chuan: “Chung lam aṭanga pêk i nih loh chuan, ka chungah hian tih theih rêng rêng i nei lo vang,” tiin a chhâng a. (Joh. 19:11) Pilata ang bawkin, tûn laia rorêltute leh politician zawng zawngte thuneihna pawhin chin tâwk a nei a ni.

7. Eng dinhmunahte nge mihring rorêltute thu chu kan zawm loh vang a, chûng rorêltute chuan eng nge an hriat ngai?

⁷ Kristiante chuan Pathian dân nêna a inkalh loh phawt chuan, mihring thuneitute dân siamte chu an zâwm tûr a ni a. Mahse, Pathian duh loh zâwng ti tûra min tih hunah, a nih loh leh Pathianin ti tûra min tihte khapsak kan nih hunah erawh chuan an thu kan zâwm tûr a ni lo. Entîr nân, ṭhalai mipate chu sipaia ṭanga râl do tûrin an phût pawh a ni thei. * A nih loh leh, “New World Translation” Bible leh Bible ṭanchhan kan thu leh hla chhuahte chu khap betin, thu hril tawh lo tûr leh Pathian be tûra inhmu khâwm tawh lo tûrin thu min pe pawh a ni thei bawk. Roreltute’n Krista zirtîrte tihduhdahna ang chi hmanga an thuneihna an hman sual hian, Pathian hmaah an chanchin an sawi ngei a ngai dâwn a ni. Pathian Jehova’n a hmu reng si a!—Thur. 5:8.

8. Pathian Jehova leh mihring rorêltute inan lohna chu eng nge ni, engvângin nge chu chu kan hriat a ngaih?

⁸ “Rorêltute” chuan thuneihna an nei thei a, thil ṭha tam tak an tiin, mi dangte chungah thuneihna an nei bawk. Mahse, chu chu ṭha famkim an ni tihna a ni lo va, an chungnung bîk tihna lah a ni hek lo. Mi dang zawng aia ṭha famkim leh chungnung bîk Pakhat a awm a, ani chu Pathian Jehova a ni. Bible-ah hian Pathian Jehova nihna sawi nân “Chungnungbera” tih chu vawi tam tak hman a ni.—Dan. 7:18, 22, 25, 27.

9. Zâwlnei Daniela’n inlârnaah eng thilte nge a hmuh?

⁹ Zâwlnei Daniela chuan thuneitu dang zawng zawngte aia Jehova thuneihna a chungnun bîkzia chiang taka târ langtu inlârna a hmu a. A hmasain, Daniela chuan tûn hmaa khawvêl thuneitute—Babulon, Medo-Persia, Grik, Rom, leh tûn laia khawvêl thuneitu nia rorêl mêk Anglo-America entîrtu sakawlh pali chu a hmu a. (Dan. 7:1-3, 17) Chumi hnuah, vâna lalṭhutthlênga ṭhu Pathian Jehova chu a hmu leh a ni. (Dan. 7:9, 10) A hnua chu zâwlnei rinawm thil hmuhte chu tûn laia rorêltute tâna vaukhânna a ni.

10. Daniela 7:13, 14, 27-nain a sawi angin, Jehova’n tute hnênah nge leia rorêlna chu a pêk a, chu chuan A chungchâng eng nge a târ lan?

¹⁰ Daniela 7:13, 14, 27 chhiar rawh. Pathianin mihring thuneitute rorêlna zawng zawng chu lâksakin, a phu zâwk leh thiltithei zâwk hnênah a pe a ni. Tu hnênah nge a  pêk? ‘Chatuana’ rorêl tûr “mihring fapa ang,” Isua Krista hnênah leh “Chungnungbera mi thianghlimte,” mi 1,44,000 hnênah a pe a ni. (Dan. 7:18) Jehova chauh chu chutianga titheitu awm chhun a nih avângin, ani chu “Chungnungbera” a ni tih a chiang hle.

11. Hnam tinte chunga thuneitute aia Jehova chungnun zâwkzia târ langtu eng thil dang nge Daniela’n a ziah?

¹¹ Daniela’n inlârnaa a hmuh thilthlengte chu a hmaa a lo sawi tawhte nên a inmil a. Ani chuan, “vân Pathianin lalte a sawn bo va, lalte a tungding,” tih a sawi a. Chu bâkah: “Chungnungbera chuan mihringte lalna ram chungah thu a nei a, a duhsak apiang a pe,” tih a sawi bawk. (Dan. 2:19-21; 4:17) A nih leh, Jehova’n lalte sawn bo va, lalte a tundin hun chu tûn hmain a lo thleng tawh em? Thleng teh rêng mai!

12. Jehova’n hmân laia lalte an lalṭhutthlêng aṭanga a paihthlâk dân entîrna pe rawh. (Milem en rawh.)

¹² Jehova chuan “rorêltute” aia a chungnun bîkzia chiang takin a târ lang a ni. Entîrna pathumte hi han ngaihtuah teh. Aigupta Lal Pharaoa chuan Jehova mite chu salah tântîrin, chhuahtîr tûra tihna chu vawi tam tak a hnâwl a. Mahse, Pathian chuan a mite chu chhuah zalênin, Pharaoa chu Tuipui Senah a tihlum a ni. (Ex. 14:26-28; Sâm 136:15) Babulon Lal Belsazzara chuan ruai a ṭheh a, ‘vân Lalpa chunga a inchawisân’ bâkah, Jehova aiin ‘tangkarua leh rangkachaktea siam pathian chu a chawimawi’ a ni. (Dan. 5:22, 23) Mahse, Pathianin chu mi chapo tak chu a tlâwmtîr a. “Chumi zânah chuan” Belsazzara chu thah a ni a, a lalram chu Media leh Persia hnêna pêk a ni ta a ni. (Dan. 5:28, 30, 31) Palestina Lal Herod Agrippa I-na chuan tirhkoh Jakoba a that a, tirhkoh Petera pawh tihhlum tumin tân inah a khung bawk. Mahse, Jehova chuan Heroda chu a ruahmanna siamte tihlawhtling lo tûrin a dang a. ‘Lalpa vântirhkohvin a man a,’ a thi ta a ni.—Tirh. 12:1-5, 21-23.

13. Jehova’n rorêltu ṭangrual zawng zawngte a hneh dân târ langtu entîrna pe rawh.

¹³ Jehova chuan rorêltu ṭangrual zawng zawngte aia a chungnun zâwkzia a lantîr bawk a. Israelte chu beihsakin, Kanaan lal ṭangrual 31-te a hnehtîr a, Ram Tiama hmun zau tak a lâktîr bawk a ni. (Jos. 11:4-6, 20; 12:1, 7, 24) Chu bâkah, Lal Ben-hadada leh  Israelte beitu Suria lal dang 32-te chu a tlâwmtîr bawk.—1 Lal. 20:1, 26-29.

14-15. (a) Lal Nebukadnezzara leh Daria te chuan Jehova lalchungnunna chungchâng eng nge an sawi? (b) Fakna hla phuahtu chuan Jehova leh A hnamte chungchâng eng nge a sawi?

¹⁴ Jehova chuan Chungnungber a nihzia a lantîr fo va! Babulon Lal Nebukadnezzara’n chawimawi phu Ber chu Pathian Jehova a ni tih inngaitlâwm taka pawm aia ‘ama chakna leh ropuina mawina’ a chapopui avângin Pathianin ani chu mi âah a chantîr a. A ṭhat chhuah leh hnuah, Nebukadnezzara chuan ‘Chungnungbera chu a fak a, a rorêlna chu chatuan rorêlna a ni,’ tih a pawm ta a ni. “Tu mahin a kut an chawlhtîr thei lo,” tiin a sawi belh bawk. (Dan. 4:30, 33-35) Pathian chunga Daniela rinawmna fiah a nih hnuah leh Pathian Jehova’n sakeibaknei pûk aṭanga a chhanchhuah hnuah Lal Daria chuan: “Miten Daniela Pathian chu hlauvin khûr rawh se, . . . Ani chu Pathian nung a ni a, a nghet kumkhua a, a ram chu tihchhiat rual a ni lo vang a, awp pawh a tâwp thleng zakin a awp dâwn si a,” tiin a sawi a ni.—Dan. 6:7-10, 19-22, 26, 27.

¹⁵ Fakna hla phuahtu chuan: “LALPAN hnam tin remruat chu engmahlovah a chantîr a; mi tin ngaihtuahte chu eng mah sâwtna nei lovin a siam ṭhîn,” tiin a sawi a. “LALPA Pathiana nei hnam chu an eng a thâwl e; Ama rochana a thlan mite chu,” tiin a sawi belh bawk. (Sâm 33:10, 12) Chu chu Jehova chunga kan rinawmna vawn tlat chhan tûr ṭha tak a va ni êm!

16. “Hrehawm nasa tak” chungchângah eng nge kan rin tlat theih a, engvângin nge? (Milem en rawh.)

¹⁶ Tûn hmaa Jehova thiltihte kan chhiar tawh a. A nih leh, kan hma lawkah eng thil nge lo thleng tûra kan beisei theih? “Hrehawm nasa tak” chhûngin Jehova’n a chhiahhlawh rinawmte chu a chhanhim ang tih kan ring tlat thei a ni. (Mt. 24:21; Dan. 12:1) Ani chuan a chhiahhlawh rinawmte chu Magog  rama Goga tia hriat hnam insuih khâwmin khawvêl pum huapa nasa taka a beih hunah a chhanhim ang. Chu hnam insuih khâwmah chuan United Nation member ram 193-te hi tel mah se, Chungnungbera leh a vân lam sipaite chu an hneh lo vang! Jehova chuan: “Ka ropuizia leh ka thianghlimzia ka tilang ang a; tin, hnam tam takte mit hmuhah ka intilang ang. Tichuan, kei hi LALPA ka ni tih an hria ang,” tiin min tiam si a.—Ezek. 38:14-16, 23; Sâm 46:10.

17. Khawvêla lalte leh Jehova chunga rinawmna vawngtute hma lam hun tûr chungchâng Bible-in eng nge a sawi lâwk?

¹⁷ Goga beihna chuan Jehova indona hnuhnûng ber Armageddon chu a thlentîr ang a, chu indonaah chuan Jehova’n “khawvêl zawng zawnga lalte” chu a tiboral ang. (Thup. 16:14, 16; 19:19-21) Chumi nêna inkalh takin, “mi tluangte chu leilungah hian an chêng ang a, ṭha famkimte [a nih loh leh, rinawmna vawngtute] chu chutah chuan an awm reng ang.”—Thuf. 2:21.

18. Kristian dik tam tak chuan eng nge tih an inhuam a, engvângin nge? (Daniela 3:28)

¹⁸ Kum zabi tam tak chhûngin, Kristian dik tam tak chuan Pathian Jehova an hmangaih avâng leh Rorêltu Chungnungber anga an pawm avângin an zalênna chân inhuamin, an nun pawh an thâp hial a. Anni chu Chungnungbera chunga an rinawm tlat avânga rawhtuina mei laka chhanchhuaha awm Hebrai mi pathumte ang bawka rinawmna vawngtute an ni.—Daniela 3:28 chhiar rawh.

19. Jehova’n a mite chu eng ṭanchhanin nge ro a rêlsak ang a, tûnah eng nge kan tih ngai?

¹⁹ Fakna hla phuahtu Davida chuan Pathian chunga rinawm tlat a pawimawhzia chungchângah: “LALPAN mi tin ro a rêl ṭhîn; aw LALPA, keimaha ka felna leh ka rilru ṭhatna awm ang zêl hian ro mi rêl ang che,” tiin a ziak a. (Sâm 7:8) Davida vêk chuan: “Ka rilru ṭhatna leh ka diknain mi chhanhim rawh se,” tiin a ziak bawk. (Sâm 25:21) Nun dân kawng ṭha ber chu, kan chungah eng thil pawh lo thleng se, Jehova chunga rinawm tlat hi a ni. Chutianga kan tih chuan: “Mi ṭha famkimte [a nih loh leh, rinawmna vawngtute] chu an eng a thâwl e, LALPA dân zawhtute chu,” tia sawitu fakna hla phuahtu rilru put hmang ang chu kan nei ve ang.—Sâm 119:1.