1, 2. Engtin nge Jehova’n kan hrehawm tawrhnaah min thlamuan a, a Thu-ah eng thutiam nge kan hmuh?

NUPUI pasal neite’n “tisaah chuan hrehawm an tuar ang,” tih 1 Korinth 7:28-a thuziak hi tlangvâl pakhatin a ngaihtuah a. Kum rei tak nupui nei tawh upa pakhat hnênah heti hian a zâwt a ni: “Heta ‘hrehawm’ a tih hi eng nge ni a, nupui ka neih chuan chu chu engtin nge ka chinfel ang? tiin. Upa chuan a zawhna a chhân hmain, ṭhalai unaupa hnênah chuan tirhkoh Paula thuziak dang: Jehova chu ‘thlamuanna zawng zawng Pathian, . . . kan hrehawmna zawng zawnga min thlamuan ṭhîntu,’ a ni tih hi ngaihtuah tûrin a hrilh a ni.—2 Korinth 1:3, 4.

² Jehova chu min hmangaihtu kan Pa a ni tih kan hria a, harsatna kan tawh hunah pawh min thlamuan ṭhîn a ni. Jehova’n a Thu hmangin ṭanpuina leh kaihhruaina a pe ngai  tawh che tih i hre chhuak ngei ang. Hmân laia a chhiahlawhte tân thil ṭha ber a tihsak ṭhîn ang bawkin kan tân pawh min tihsak a duh tih a chiang a ni.—Jeremia 29:11, 12 chhiar rawh.

3. He thuziakah hian eng zawhnate nge kan chhân ang?

³ Buaina leh hrehawmnate a awm chhan kan hriat chuan tawrh a awlsam tlângpui ṭhîn a. A nih leh, engvângin nge nupa inkârah leh chhûngkuaah hrehawm kan tawrh theih? Bible hun lai leh tûn laia eng entîrnate hian nge kan mamawh thlamuanna hmu tûra min ṭanpui thei? Hêng zawhnate hi chhângin, hrehawm kan tawrh chhuah theih dânte kan hmu ang.

4, 5. Nupate chuan eng hrehawm nge an tawrh mai theih?

⁴ Jehova’n hmeichhe hmasa ber a siam hnuin, mipa hnênah a hruai a, tichuan nupa an lo ni ta a. Jehova chuan: “Mipain a nu leh a pa a kalsan ang a, a nupui a vuan ang: tichuan tisa pum khat an lo ni tawh ang,” a ti a. (Genesis 2:24) Ni e, ka zavai hian kan ṭha famkim lo ngei mai. (Rom 3:23) Chuvângin, inneite chuan buainate an beisei tûr a ni. Entîr nân, inneih hma chuan, hmeichhiain a nu leh pate thu a âwih a ngai a. Pathian Thu chuan an inneih hnuah pasal chu nupui lû a ni tiin a sawi. (1 Korinth 11:3) Atîrah chuan, pasalin a nupui chu a kaihruai thiam lo pawh a ni mai thei. Nupui pawhin a nu leh pate aia a pasal kaihhruaina zawm chu harsa a ti mai thei bawk. Chu bâkah, nupate chu an inneih hlim chuan an chhûngte lam ve ve nên inrem lohna an nei mai thei a, chu chu hrehawm tawrhna a ni thei bawk.

⁵ Nupate chuan fa an nei dâwn tih an hriat huna an awm dân tûr chu han ngaihtuah teh. Hlimna nasa tak an nei nachungin lungkhamna pawh an nei bawk ang. An naupai chu a ṭha chho dâwn nge, dâwn lo an ngaihtuah thei a, nausên hrisêlna chungchângah pawh an hlauthâwng mai thei bawk. Sum hmanna a tam chho zêl dâwn tih pawh an hria a. Fa an neih hnu chuan, insiamremna dang an neih a ngai a ni. Nu tân chuan naute enkawl nân a hun tam zâwk a hman a ngai a. Chuvângin, nupate chu tûn hma angin an inngaihsak tawn thei lo mai thei a. Pa ber pawhin mawhphurhna tam lehzual a nei bawk ang. A nupui fanaute thil mamawh chu a phuhhrûksak ngei pawh a ngai a ni.

6-8. Nupa tuak khat chu fa an neih theih loh chuan engtin nge an awm mai theih?

⁶ Nupa ṭhenkhat chuan hrehawm dang pawh an tuar thei a. Fa neih an châk êm êm laiin an nei thei lo va. Nuin fa a neih loh chuan rilru lamah hrehawmna a nei thei a ni. (Thufingte 13:12) Bible hun laiin, pasal nei a, fa neih chu hmeichhiate tâna thil pawimawh tak a ni a. Chuvângin, Jakoba nupui Rakili chu a unaunuin nau a pai laia, a pai ve theih loh avângin a lunghnual hle a ni. (Genesis 30:1, 2) Ram ṭhenkhatah chuan mi tam takin fa neih tam chu thil pawimawh tak niin an ngai a. Mite chuan an rama awm missionary-te chu fa an neih loh chhan an zâwt ṭhîn a ni. Missionary-te’n an neih loh chhan theih tâwpa an hrilhfiah hnuah pawh ṭhenkhat  chuan, “A nih chuan, kan ṭawngṭai sak dâwn che u nia!” an la ti cheu a ni.

⁷ Entîrna dang hi han ngaihtuah teh. England rama unaunu pakhat chuan fa neih a duh êm êm a. Khawvêl thar a thlen hma chu fa a nei thei dâwn lo tih a inhriat chuan a lunghnual hle a ni. Tichuan, an nupain mi fa lâka mahni fa anga châwm an tum ta a. Mahse, unaunu chu hun engemaw chhûng a la lunghnual reng a. Ani chuan: “Mi fa lâka mahni fa anga châwm chu mahni fa hrin nên a inang lo tih ka hria,” tiin a sawi.

⁸ Bible chuan hmeichhia chu “fa hrin avângin chhandamin an awm ang,” tih a sawi a. (1 Timothea 2:15) Mahse, fa a neih avâng maiin chatuan nunna a chang ang a tihna a ni lo. A nih leh, he Bible châng sawi tum hi eng nge ni? Nu ber chu a fate leh a in chhûng ngaihsakin a buai hle a. Chu chuan inrêlna leh mi dangte thila inrawlhna ang chite pumpelh tûrin a ṭanpui thei a ni. (1 Timothea 5:13) Chutiang a ni chung pawhin, an nupa inkârah leh an chhûngkuaah buaina a la nei mai thei bawk.

9. Nupate chuan eng hrehawm dang nge an tawrh mai theih?

⁹ Nupa ṭhenkhatte hrehawm tawrh dang leh chu kawppuite thihna hi a ni a. Hei hi tawng ngai lo tûrah inngai mah se, mi tam tak chuan he dinhmun harsa tak hi chhel taka an tawrh a ngai a ni. Kristiante chuan thawhlehna thutiam chu an ring nghet tlat a, chu chuan thlamuanna nasa tak a pe a ni. (Johana 5:28, 29) Kan Pa, Jehova chuan hun harsa tak chhûnga min thlamuantu thutiam tam tak chu a Thu-ah a dah a. Tûnah Jehova chhiahhlawh ṭhenkhatin chu thlamuanna an dawn dân leh chu miin a ṭanpui dân i lo en ang u.

10. Engtin nge Hani chu thlamuan a nih? (A thupui chunga milem en rawh.)

¹⁰ Elkana nupui duh tak Hani chunga thilthleng hi han ngaihtuah teh. Ani chuan fa neih duh hle mah se, a nei thei lo va. Mahse, a pasal nupui dang Penini chuan fa tam tak a nei a ni. (1 Samuela 1:4-7 chhiar rawh.) Penini chuan Hani dinhmun tichhe zual tûrin a fa neih theih lohna chu “kum tin” a nuihsawh ṭhîn a, chu chuan Hani chu a tihrehawm hle a ni. Hani chuan thlamuanna hmu tûrin eng nge a tih? Jehova hnênah a ṭawngṭai a. Jehova biakna hmunah kalin rei tak a ṭawngṭai a ni. Jehova hnênah fapa a dîl a, A pe ang tih a ring tlat bawk. A ṭawngṭai hnu chuan a rilru a hahdam ta hle a, “lungngai hmêl a pu ta lo va.” (1 Samuela 1:12, 17, 18) Jehova’n fapa pein emaw, kawng dangin emaw a thlamuan ang tih a hria a ni.

11. Engtin nge ṭawngṭainain min thlamuan theih?

¹¹ Kan ṭhat famkim lohna avâng leh Setana khawvêla kan awm avângin  hrehawm kan la tuar zawm zêl ang. (1 Johana 5:19) Amaherawhchu ṭanpuitu kan nei a. “Thlamuanna zawng zawng Pathian” Jehova hnênah kan ṭawngṭai thei a ni. Hani chuan chutiang chuan a ti a. Jehova hnênah a rilrute leih buain, ṭanpuina a ngên a. Chutiang bawkin, hrehawm kan tawrh hunah, Jehova hnênah kan harsatnate hrilh mai aia tam kan tih a ngai a ni. A ṭanpuina kan ngênin, kan rilrua awm zawng zawng chu kan leihbaw tûr a ni.—Philippi 4:6, 7.

12. Anni chu hrehawm tuar mah se, engin nge hlimna nei tûra ṭanpui?

¹² Fa kan neih loh avângin emaw, kan hmangaihte an boral avângin emaw kan lungngai hle thei a. Mahse, thlamuanna kan hmu thei a ni. Isua hun laia Anni chungchâng hi han ngaihtuah teh. Pasal a neih hnu kum sarihnaah a pasalin a boralsan a. Fa pakhat mah a nei lo niin a lang. Mahse, ani chu engin nge ṭanpui? ‘Ani chuan Pathian biak in a kalsan ngai lo va.’ Kum 84 mi ni tawh mah se, ṭawngṭai tûr leh Jehova be tûrin biak inah a kal reng a ni. (Luka 2:37) Chu chuan a thlamuan a, hrehawm tuar chung pawha, hlimna nei tûrin a ṭanpui a ni.

13. Kan chhûngte’n min tihlunghnual chuan ṭhian ṭhate’n engtin nge min thlamuan theih?

¹³ Kohhrana ṭhian ṭha ka siamna aṭangin thlamuanna kan hmu thei a. (Thufingte 18:24) Paula-i chu a nuin Jehova rawngbâwlna a bânsan khân, kum nga mi chauh a ni a. A lunghnual hle a, a tân thil a harsa hle a ni. Mahse, a hnuah pioneer unaunu Ann-i chuan a fuihin hmangaih takin a ngaihsak a.. Ani chuan: “Ann-i nên inkûngkaihna nei lo mah ila, hmangaih taka min ngaihsakna chu ka tân ṭanpuina ṭha tak a ni a. Jehova rawngbâwl chhunzawm tûrin min ṭanpui a ni,” tiin a sawi. Chumi hnuah chuan a nu chu kohhranah a rawn kîr leh a, chu chuan Paula-i a tihlim hle a ni. Jehova rawngbâwl chhunzawm tûra Paula-i a ṭanpui theih avângin Ann-i pawh a hlim hle bawk.

14. Mi dangte kan thlamuan hian eng hlâwkna nge kan hmuh?

 ¹⁴ Mi dangte tâna thil ṭha tia kan buai hian mahni buainate chu kan theihnghilh fo ṭhîn. Entîr nân, unaunu te, nupui pasal nei te, leh nei lo te chuan mite hnêna Ram chanchin ṭha an hrilh hian Jehova nên thawk dûnin a duhzâwng an ti tih an inhria a. Chu chuan a tihlim hle a ni. Dik tak chuan mite hnêna chanchin ṭha kan hrilh hian anmahni ngaihsakna kan lantîr tihna a ni a. Kan unaute tâna thil ṭha kan tih hian kan inhnaih lehzual bawk. (Philippi 2:4) Chu tak chu tirhkoh Paula tih chu a ni. Ani chuan mi dangte chu “nu, nau pawmin ama fate a duat angin,” a ngaihsak a. “Pain ama fate chunga a tih angin” a unaute chu a thlamuanin a fuih  bawk.—1 Thessalonika 2:7, 11, 12 chhiar rawh.

15. Naupangte chu Jehova chungchâng zirtîr tûrin tuin nge mawmphurhna nei?

¹⁵ Kohhrana awm chhûngkuate chu engtin nge kan thlamuan theih? Mi tharte chuan an fate chu Jehova chungchâng zirtîr tûrin emaw, Bible zirpui tûrin emaw ṭanpuina min dîl châng pawh a awm thei a. Jehova’n nu leh pate chu an fate zirtîr tûrin mawhphurhna a pe tih Bible chuan a sawi. (Thufingte 23:22; Ephesi 6:1-4) Dinhmun ṭhenkhatah chuan mi dangin an ṭanpui thei a; mahse, nu leh pate ngeiin an fate an zirtîr a pawimawh a ni. Nu leh pate chuan an fate chu an be ṭhîn tûr a ni.

16. Naupangte kan ṭanpui hian eng nge kan hriat reng ang?

¹⁶ Nu leh pate’n an fate Bible zirpui tûra ṭanpuina min dîl chuan nu leh pate angin an fate chungah thuneihna kan nei lo tih hriat chu a ṭha a. Thutaka awm lo nu leh pate fa nên Bible kan zir châng pawh a awm mai thei a ni. Mi dang fate Bible kan zirpui chuan an nu leh pate ina an awm hunah emaw, Thuhretu mi puitling dangte nêna zirpui emaw, a nih loh leh vântlâng hmuna zirpui emaw chu a finthlâk ang. Chutianga kan tih chuan mi dangte rinhlelh kai lo tûrin thil kan ti a ni ang. A hnuah, nu leh pate ngeiin an fate chu Jehova chungchâng an zirtîr thei ang.

17. Naupangte chuan an chhûngkuate chu engtin nge an thlamuan theih?

¹⁷ Jehova hmangaih dân zir naupangte chuan an chhûngkua chu an thlamuanin an fuih thei a. Engtin nge an tih theih? An nu leh pate zahna lantîr a, ṭha taka an ṭanpuina hmangin a ni. Chu bâkah, naupang chu Jehova chunga a rinawm tlat chuan chu chu an chhûngkaw tâna fuihna ṭha tak a ni. Tuilêt hma khân, Lameka chuan Jehova a bia a. A fapa Nova chungchângah: “He mi ngei hian Lalpa ânchhe lawh lei avânga kan hnathawhna leh kuta kan thawh rimnaah hian min thlamuan tawh ang,” tiin a sawi a. Chu hrilh lâwkna chu Tuilêt hnua Jehova’n leilung ânchhe lawh tawh lo tûra a sawi khân a famkim a ni. (Genesis 5:29; 8:21) Tûn laiah pawh, Jehova chunga rinawm naupangte chu an chhûngkaw tân thlamuanna an ni thei a. An chhûngkuate chu tûnah leh nakin hunah hrehawmna tuar chhuak thei tûrin an ṭanpui thei a ni.

18. Hrehawm tawrhna engpawh tuar chhuak thei tûrin engin nge min ṭanpui thei ang?

¹⁸ Tûn laia Jehova mite chuan ṭawngṭaina te, Bible-a entawn tûr siamte chhût ngunna te, leh unaute nêna inṭhian ṭhatnate hmangin thlamuanna an hmu a. (Sâm 145:18, 19 chhiar rawh.) Jehova chu min thlamuan tûrin a inpeih reng tih leh kan hmachhawn hrehawm tawrhnate tuar chhuak thei tûrin min ṭanpui ngei ang tih kan hria a ni!