PATHIAN JEHOVA chuan amah betute chu remna chên tûrin a duh a. Chu bâkah, remna ûm tûrin a duh bawk a ni. Chutianga an tih chuan Kristian kohhranah remna a awm ang a. Chu remna chuan mi tam tak chu kohhranah a hîp ang.

Entîr nân, Madagascar rama dawithiam pa pakhat chuan Jehova mite zînga remna chu a lo chhinchhiah a, heti hian a ngaihtuah a ni: ‘Sakhaw pakhat vawn ka duh ngai a nih chuan, hei ngei hi ka vawn duh chu a ni,’ tiin. A hnuah, ramhuai biakna chu a bânsan a, a nupui neihnaah inthlâk danglamna siamin remna Pathian Jehova chu a be ta a ni.

Amah ang bawkin, kum tin hian mi tam tak chu Kristian kohhrana rawn lûtin, an duh tak remna chu an zawng hmu a. Mahse, Bible-ah “itsîkna nasa tak leh inelna” chuan kohhranah inṭhianna a tichhiain, buaina a awmtîr thei tih kan chhiar a ni. (Jakoba 3:14-16) Chu bâkah, chûng buainate kan pumpelh theih dân leh unaute nêna inremna kan tihngheh theih dân tûr chungchângah thurâwn ṭha tak min pe bawk a ni. Chu thurâwn chu a taka kan tawn mêk dinhmun ṭhenkhata a ṭangkai dân i lo en ang u.

“Ka hnathawhpui unaupa nên kan inrem thei lo va. Ṭum khat chu kan inhauh vak laiin mi pahnih an lo kal a, min rawn hmu a ni.”—CHRIS-A.

“Thu hrilhnaa ka thawhpui ṭhin unaunu chuan rawngbâwlna atân kan ruahmanna siam chu a cancel thut mai a. Chuan min be duh tawh lo va. A chhan ka hre miah lo.”—JANET-I.

“Phone-in mi pathum kan inbia a. Pakhatin min mangṭha hnu chuan a phone chu a off tûrah ka lo ngai a. Chuvângin, amah ka rêl ta mai a; mahse, a lo off si lo.”—MICHAEL-A.

“Kan kohhranah pioneer pahnihin buaina an nei a. Pakhat chuan a ânkhum ta vak mai a. An inhauhna chuan mi dangte a tibeidawng a ni.”—GARY-A.

Chûngte chu buaina lian tak angin a lang lo mai thei a. Mahse, chûng dinhmunte chuan a tâwpah mite rilru a tihrehawm theiin, kohhran remna pawh a tichhe hial thei a ni. Hêng unaupate leh unaunute hian Bible kaihhruainate an zawm avânga an inrem leh thei chu a lâwmawm hle. Anmahni ṭanpui theitu Bible kaihhruainate chu eng nge nia i rin?

“Kalkawngah inhau lo tûrin fimkhur rawh u.” (Genesis 45:24) Josefa chuan a unaute chu an pa hnêna an kîr leh khân, he thurâwn fing tak hi a pe a. Miin a ngaihtuahna a thunun lohva, a lungni lo awl hle a nih chuan dinhmun chhe tak chu a chhe lehzual thei a. Mi dangte pawh an thinrim ve thei a ni. Chris-a chuan inngaihtlâwm leh kaihhruaina zui chu harsa tih châng a nei tih a inhria a. Insiam ṭhat a duh avângin a inhnialpui unaupa chu ngaihdam a dîl a ni. Tichuan, a thinurna chu thunun tûrin ṭan a la a. Theih tâwp chhuaha insiam ṭhat a tum dân chu a inhnialpui unaupain a hriat chuan, chutiang  chiah chuan a ti ve a. Tûnah chuan Jehova rawngbâwl dûnin remna an nei a ni.

“Remruat lâwk lova [“inrâwn khâwmna awm lova,” New World Translation] thil tih a hlawhtling duh lo.” (Thufingte 15:22) Janet-i chuan a ṭhianin a biak duh tawh loh khân he Bible châng hi a taka nunpui a tum a. A ṭhiannu chu râwn tûr, a nih loh leh be pawh tûrin a kal a. Amah tilungni lo thei thil tih a nei em tih a zâwt a. Atîrah chuan, tlêmin hrehawm an ti ve ve a. Mahse, ṭha takin an inbe zawm leh thei a, an rilru pawh a nuam leh ta a ni. Unaunu chuan a hriat sual vâng mai a ni tih leh amah tilungni lo tûrin Janet-i’n engmah a ti lo tih a hre thiam ta a. Janet-i hnênah ngaihdam a dîl a, tûnah chuan Jehova rawngbâwl dûnin ṭhian ṭha an ni leh ta a ni.

“Chutichuan, maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thilpêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh.” (Matthaia 5:23, 24) Isua’n Tlâng Chunga a Thusawiah he thurâwn hi a pe a. Michael-a chuan unaupa chanchin a ṭha lo zâwnga a sawi hnu chuan pawi a ti hle a ni. An inkâr a ṭhat leh theih nân thiltih ngai apiang tih a tum a. Tichuan, unaupa hnênah kalin pawi a tihzia a hrilh a. Eng thil nge thleng? Michael-a chuan, “Ka unaupa’n tih tak zetin min ngaidam,” tiin a sawi. Ṭhian an ni leh ta a ni.

“Tupawhin tu chungah pawh thupawi nei ang ula indawh tawnin inngaidam tawn ula.” (Kolossa 3:12-14) Rawngbâwlnaa inhmuh thiam lohna nei pioneer pahnihte kha i la hria em? Unau dangte an tilunghnualin, awm nuam lo khawpin an siam tih hre thiam tûrin upa pakhat chuan ngilnei takin a ṭanpui a. Indawh tawn tûr leh kohhrana remna awm reng tûra ṭanpui tûrin a hriatnawntîr bawk a ni. A fuihna chu pawmin an nunpui a. Tûnah chuan, inngeih takin chanchin ṭha an hril dûn tawh a ni.

Kolossa 3:12-14-naa kan hmuh thurâwn vêk chuan inngaitlâwm tûr te, rilru tinatute ngaidam tûr te, leh chûngte chu ngaihtuah tawh lo tûrin a ṭanpui thei che a. Mahse, ngaihdam kan tum chung pawha kan ngaidam thei lo a nih chuan engtin nge ni ang? Matthaia 18:15-ah min ṭanpui thei Bible thu bul a awm a ni. Isua’n sual lian tak chungchâng a sawina ni mah se, unaute nêna buaina kan neih hun apianga kan tih theihte a sawina a ni a. Kan unau chu panin ngilnei tak leh inngaitlâwm taka thil nih dânte sawipuiin buaina chinfel kan tum thei a ni.

Bible-ah chuan rawtna ṭangkai dang tam tak a awm a. Chûng zînga a tam zâwk chu Pathian thlarau thianghlim rinchhanna nên a inkaihhnawih avângin “thlarau rah” kan lantîr thei a ni. Chûng miziate chu “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” a ni. (Galatia 5:22, 23) Hei hi han ngaihtuah teh. Khâwl  hi a part-ahte hriak hnawih a nih hian hman a nuam hle a. Chutiang bawkin, Jehova hnên aṭanga kan dawn mize ṭhate kan lantîr chuan kan mize inan lohnate siamrem a awlsamin, mi dangte nên inzawmna ṭha kan nei ang.

Mi tinte hian mize hran kan nei ṭheuh va. Kan mizia te, thil kan hmuh dân te, leh kan ṭawng dânte chu a inang lo hlawm hle. Chûngte chuan kan inṭhianna chu hlimawm tak leh ngaihven awm tak a nihtîr thei a ni. Mahse, kan mize inan lohnate chuan inhriat sualna leh inrem lohna a thlen thei bawk. Thiltawn nei upa pakhat chuan hetiang thil a thlen theih dân entîrna pakhat pein a sawi a ni: “Mi zakzum tuemaw tân chuan mi ṭawng duh leh ri bawrh bawrh bula awm chu a hrehawm mai thei a. Chu mize inan lohna chu thil pawi lo angin a lang mai thei; mahse, chu chuan buaina lian tak a thlen thei a ni,” tiin. Chûng mite chu an mize inan lohna avângin inrem thei ngai lo tûrah i ngai em? Tirhkoh pahnihte entawn tûr siam hi i lo en ang u. Petera chungchâng kan ngaihtuah hian a rilrua awm apiang sawi chhuak ṭhîn tuemaw chu kan hre chhuak ngei ang a. Johana chungchâng kan ngaihtuah hian a thusawi hma leh a thiltih hmaa ngaihtuah hmasa ṭhîn hmangaihna ngah tak unaupa angin kan mitthla ve ngei ang. Petera leh Johana chu mize inang lo tak an ni a. Mahse, Jehova rawngbâwlnaah ṭha takin an thawk dûn a ni. (Tirhkohte 8:14; Galatia 2:9) Tûn laiah pawh chutiang tho chu a ni thei. Kristian mize inang lo tak takte pawh ṭha takin rawng an bâwl dûn thei a ni.

In kohhrana tuemawin i lungnih loh zâwng thu a sawi emaw, thil a ti emaw a nih chuan engtin nge ni ang? Krista chu i tâna a thih ang bawkin i unau tân pawh a thi tih hriat reng chu a ṭha a, ani chu i hmangaih  tûr a ni. (Johana 13:34, 35; Rom 5:6-8) Amah nên inṭhian tawh lo tûr leh inkâwm tawh lo tûra thu tlûkna siam chu a dik lo vang. Chu ai chuan, heti hian i inzâwt thei a ni: ‘Ka unau thiltih engemaw chuan Jehova dân a kalh em? Ani chuan tum rêng vângin min tihnat a tum em? Nge ni a, mize inan lohna kan neih vâng zâwk? A nihna takah chuan, neih atân ka duh ngei tûr miziate a nei em?’ tiin.

Entîr nân, ani chu a ṭawng duhin, nang erawh chu i ṭawng tlêm a nih chuan engvângin nge rawngbâwlnaah thawhpuiin, i zir theihte chu hriat i tum loh vang? A nih loh leh, ani chu nang aia thilphal zâwk a nih chuan engtin nge ni ang? Hlimna chu tar te, dam lo te, leh retheite hnêna thil pêkna aṭanga lo awm a ni tih i hria em? A hnên aṭangin thilphal tak nih dân i zir thei ang em? A pawimawh ber chu i unau nên chuan inang lo hle mah ula, a mize ṭhate i ngaihtuah tlat thei a ni. A ṭhian ṭha ber ni thei ngai lo mah la, in inhnaih lehzual ang. Chu chuan, in pahnih inkârah leh kohhranah remna a awmtîr ang.

Kum zabi khatnaah khân, unaunu Euodii leh Suntuki te an awm a. An miziate inang lo hlein lang mah se, tirhkoh Paula chuan, “Lalpaah chuan rilru hmun khat pu tûrin,” a fuih a ni. (Philippi 4:2) Keini pawhin unaute nêna Jehova biak kan duh a, kohhranah remna awmtîr kan duh bawk.

Mi dangte chunga ngaih dân ṭha lo kan neih eng pawh chu engvângin nge kan paih bo vat ang? Chûng ngaih dânte chu pangpâr huan mawi taka ṭo hnim ṭha lo tak nên kan khaikhin thei a. Hnimte chu kan thenfai loh chuan chu huanah chuan a ṭo khat vek ang. Chutiang bawkin, mi dangte chunga ngaih dân ṭha lo kan neih chu a nghet tual tual a nih chuan kohhran pum chu a nghawng thei a ni.  Mahse, Jehova leh kan unaute kan hmangaih chuan kohhrana remna vênghim tûrin kan tih theih zawng zawng kan ti ang.

Mi dangte nêna remna siam kan tum chuan ṭha taka thil inher chhuah dân chu mak kan ti mai thei a. Chutiang chu unaunu pakhatin a tawng a ni. Ani chuan heti hian a sawi: “Unaunu pakhat chuan naupang chhia ang maiin min cheibâwl ni hian ka hria a. Chu chuan min tibuai tak zet a. Ka lungnih lohna chu a nasa tawlh tawlh a, ani chu bûl deuh deuhvin ka chhâng ṭan a. Tihian ka ngaihtuah ta a ni, ‘Ani hian ka phû tâwk zahna min lantîr lo va, chuvângin a chungah zahna kan lantîr bîk lo vang,’” tiin.

Tichuan, he unaunu hian ama rilru put hmang chu a ngaihtuah ta a. Heti hian a sawi a ni: “Ka dik lohna chu ka hmu thiam ṭan a, ka beidawng hle a ni. Ka ngaihtuahna ka siam ṭhat a ngai tih ka hre thiam a. Hemi chungchânga Jehova hnêna ka ṭawngṭai hnuah, unaunu tân thilpêk tê tham tak ka lei a, card pakhat-ah ka ngaihtuahna dik lo avânga ngaihdam dîlna ka ziak a ni. Kan inpawm a, thilthlengte chu theihnghilh tûrin kan inrem ta a. Buaina dang kan nei tawh lo,” tiin.

Mi tinte hian remna kan mamawh a. Mahse, him lo nia inhriatna emaw, chapona emaw chuan mite chu remna tichhe zâwngin a chêttîr thei a ni. Chutiang chu khawvêlah thil pângngai tak ni mah se, Jehova chuan amah betute chu danglam bîk tûrin a beisei a ni. Jehova Thuhretute zîngah chuan remna leh inpumkhatna a awm tûr a ni a. Jehova’n Paula chu Kristiante dawn, “a kohna che u phua awm tûrin,” tih thu ziak tûrin a thâwk khum a. Anni chu “inngaihtlâwmna leh thuhnuairawlhna zawng zawng nei a, hmangaihnaa indawh tawn chunga dawhtheihna neia remna phuarnaah chuan thlarau inpumkhatna chu vawng,” tûrin a fuih a ni. (Ephesi 4:1-3) ‘Remnaa phuar chu’ Jehova mite chuan an ngaihlu tak zet a. Chuvângin, kan unaute tichak tûr leh kan inkâra buaina zawng zawng chingfel tûrin kan tih theih apiang i ti ang u.