1, 2. (a) Jehova hnên aṭanga kan hmuh ro hlu tak pathumte chu eng nge ni? (b) He thuziakah hian eng nge kan sawiho vang?

JEHOVA chu lei leh vâna mi hausa ber a ni a. Engkim hi a ta a ni. (1 Chronicles 29:11, 12) Chu bâkah, mi zawng zawng chungah a thilphal hle a. Thlarau lam ro hlu tam tak min pêk avângin kan va lâwm tak em! Chûng thlarau lam ro hlu ṭhenkhatte chu eng nge ni? (1) Pathian Ram, (2) kan rawngbâwlna, leh (3) a Thu-a kan hmuh thutakte hi a ni. Mahse, kan fîmkhur loh chuan a tâwpah hêng ro hlute hlutzia hi kan theihnghilh thei a. Isua’n “in ro awmna apiangah in rilru pawh a awm dâwn si a,” tia a sawi avângin chûng thlarau lam ro hlute chu ngaihlu reng tûrin kan inhriat nawntîr reng tûr a ni—Luka 12:34.

² Pathian Ram, rawngbâwlna, thutak kan hmangaihna leh ngaihhlutna kan tihngheh reng theih dân i lo sawiho vang u. Kan sawiho laiin chûng thlarau lam ro hlute i hmangaihna a zual zêl theih dân ngaihtuah ang che.

3. Isua tehkhin thua mi pakhat chuan tuikeplung pakhat lei tûrin eng tih nge a inhuam? (A thupui chunga milem en rawh.)

³ Matthaia 13:45, 46 chhiar rawh. Isua’n tuikeplungte lei a, hralh lehtu mi pakhat chungchâng a sawi a. Ni khat chu, chu pa chuan tûn hmaa a lo hmuh tawh tuikeplungte aia ṭha zâwk tuikeplung pakhat a hmu a. A duh êm avângin a neih zawng zawng hralhin a lei ta a ni. A tâna a hlut dân tûr chu i mitthla thei em?

4. Pathian Ram tân eng tih nge kan inhuam ang?

⁴ Isua tehkhin thu aṭangin eng nge kan zir theih? Pathian Ram thutak chu, chu tuikeplung hlu tak ang chu a ni a. Tuikeplung hluttu anga Pathian Ram kan hlut chuan Pathian Ram khua leh tui ni tûr leh ni reng thei tûrin engkim chân kan inhuam ve ngei ang. (Marka 10:28-30 chhiar rawh.) Chutianga ti tawh mi pahnih chungchâng i lo en ang u.

5. Zakaia’n Pathian Ram tân eng tih nge a inhuam?

⁵ Zakaia chu chhiahkhawntu a ni a. Mite sum a lâksak avânga hausa a ni. (Luka 19:1-9) Ni khat chu, Isua’n Pathian Ram chungchâng a sawi chu a hria a. A thu hriatte a duh êm avângin inthlâk danglam a duh ta a ni. “Ngai teh! Lalpa, ka sum zâtve pachhiate hnênah ka pe ang a; tin, tu lakah pawh thil engpawh lo hlêpru ila, a let liin ka rûl leh ang,” a ti a. Zakaia chuan mite pawisa a lâksak chu pe kîr lehin, duhâmna chu a bânsan ta a ni.

6. Nu pakhatin eng inthlâk danglamna nge a siam a, engvângin nge chutianga a tih?

⁶ Nu pakhat chu kum engemaw zât kal taa Pathian Ram chanchin a hriat lai chuan, a hmeichhepui a kawp a. Neih inang inkawpte dikna humhalhtu pâwla hotu ber a ni bawk. Mahse, Bible a zir a, Pathian Ram hlutzia a hriat chuan a nunah inthlâk danglamna lian tak a siam a ngai tih a hre ta a. (1 Korinth 6:9, 10) Jehova a hmangaih avângin, chu pâwl chu a chhuahsan a, a thil chîn ṭhinte chu a bânsan ta a ni. Kum 2009-ah baptisma a chang a, a kum lehah chuan regular pioneer a thawk a. Chutianga inthlâk danglamna lian tak a siam theih chhan chu a châkna ṭha lote aia Jehova a hmangaihna a nasat zâwk vâng a ni.—Marka 12:29, 30.

7. Pathian Ram kan hmangaihna chu engtin nge kan tihngheh reng theih?

⁷ Pathian Ram khua leh tui ni tûr chuan kan zînga tam takte’n nun kan thlâk danglam a ngai a. (Rom 12:2) Mahse, kan dote chu kan hneh nghâl mai lo. Hausak duhnate leh nungchang bawlhhlawhnate ang chi thil engmah hian Pathian Ram kan hmangaihna a tikiam tûr a ni lo. (Thufingte 4:23; Matthaia 5:27-29) Pathian Ram kan hmangaihna tinghet reng thei tûrin, Jehova’n ro hlu tak dang min pe a ni.

8. (a) Engvângin nge tirhkoh Paula chuan kan rawngbâwlna chu ‘hlum bêla ro hlu’ anga a târ lan? (b) Paula chuan rawngbâwlna a hmangaih tih engtin nge a târ lan?

⁸ Isua’n Pathian Ram chanchin ṭha hril tûr leh zirtîr tûrin mawhphurhna min pe a. (Matthaia 28:19, 20) Tirhkoh Paula chuan chu rawngbâwlna chu hlum bêl emaw lei bêl emawa dah ro hlu angin a sawi a ni. (2 Korinth 4:7; 1 Timothea 1:12) Kan ṭhat famkim loh avângin, chu hlum bêl ang chu kan ni a. Mahse, kan thuchah kenin keimahni leh kan thu ngaithlatute chu chatuan nunna a pêk theih avângin chu chu ro hlu tak ang a ni. Chuvângin Paula chuan: “Chanchin Ṭha avângin engkim ka ti ṭhîn, chan ka neih ve theih nân,” tiin a sawi. (1 Korinth 9:23) Ani chuan mi dangte Pathian Ram chanchin hrilhin theih tâwp a chhuah a ni. (Rom 1:14, 15; 2 Timothea 4:2 chhiar rawh.) Chanchin ṭha a hmangaihna chuan nasa taka tihduhdahna tuar chung pawha thu hril zawm zêl tûrin a ṭanpui a ni. (1 Thessalonika 2:2) Paula rawngbâwl duhna chu engtin nge kan entawn theih?

9. Rawngbâwlna kan hmangaih tih kan lantîr theih dân kawng ṭhenkhat chu eng nge ni?

⁹ Paula’n rawngbâwlna a hmangaihzia a târ lan dân kawng khat chu hun remchâng a neih apianga mi dangte hnêna thu a hril hi a ni. Paula leh Kristian hmasate ang bawkin, keini pawhin in tinah te, vântlâng hmunah te, leh mite kan hmuh theihna apiangah chanchin ṭha kan hril ve a ni. (Tirhkohte 5:42; 20:20) A tam thei ang berte hnêna thu hrilh theih dân kawng kan zawng a. Kan theih chuan auxiliary pioneer emaw, regular pioneer emaw niin rawng kan bâwl thei a ni. A nih loh leh, ṭawng dang kan zirin kan awmna ram chhûnga hmun dangah emaw, ram dangah emaw kan insawn thei bawk.—Tirhkohte 16:9, 10.

10. Irene-i’n theih tâwp chhuaha chanchin ṭha a hrilh avângin eng hlâwkna nge a neih?

¹⁰ United States-a awm unaunu pasal la nei lo Irene-i chuan Russian ṭawng hmangte hnêna chanchin ṭha hrilh a duh a. Chuvângin, kum 1993-ah New York Kawpuia Russia ṭawng hmang group pakhatah a va awm ta a. Chu mi hun lai chuan thuchhuahtu 20 vêl chauh an awm a ni. Kum 20 vêl a liam hnuah pawh Irene-i chuan, “Russia ṭawng thiam tak ka la ni lo,” a ti a. Mahse, Jehova’n amah leh thuchhuahtu dangte chu chutiang ṭawng hmangte hnêna thu hril tûrin a ṭanpui a ni. Chuvângin, tûnah chuan New York Khawpuiah Russia ṭawng hmang kohhran paruk a awm tawh a. Irene-i chuan Bible zirpui tam tak a nei a, chung zînga mi 15 te chu baptisma an chang tawh a ni.  An zînga ṭhenkhat chu Bethel-a rawngbâwl te, pioneer te, leh upate an ni a. Irene-i chuan: “Ka ûm theih thiltum dang ka ngaihtuah hian tûn aia hlimna nasa zâwk min thlen thei thiltum ka ngaihtuah chhuak thei lo a ni,” tiin a sawi. Irene-i chuan a rawngbâwlna chu a va ngaihlu tak êm!

11. Tihduhdahna tuar chunga thu kan hrilh zawm zêlna chuan eng nge a rahchhuah?

¹¹ Kan rawngbâwlna kan ngaihhlut chuan tirhkoh Paula ang bawkin tihduhdahna kan tawh hunah pawh thu kan hril zawm zêl ang. (Tirhkohte 14:19-22) Entîr nân, kum 1930 aṭanga kum 1944 inkârah United States-a kan unaute chuan tihduhdahna nasa tak an tuar a. Mahse, thu an hril zawm zêl a ni. Thuneitute’n tihtâwp an tum chuan kan unaute’n court-ah an thlen a, thu buai an neih tam tak chu an hneh ta a. Kum 1943-ah, Unau Knorr-a chuan U.S. Supreme Court-a kan hnehna tam tak zînga pakhat chu a puang a. Unaute’n thu hril zawm zêl lo sela chuan, chu Court-ah chuan thubuai engmah kan nei lo vang tih a sawi a ni. Khawvêl puma unaute thu hrilh zawm zêlna chuan tihduhdahna chu a hlawhtling lo tih a târ lang chiang hle tiin a sawi belh bawk. Ram dangah pawh unaute’n chutiang thubuai chu an hneh a. Rawngbâwlna kan hmangaih avânga tihduhdahna chuan kan thu hrilh min tâwptîr lo vang.

12. Eng tih nge i tum tlat?

¹² Kan rawngbâwlna kan ngaihhlut chuan kan report-a dârkâr tam tak ziak dân chauh kan ngaihtuah lo vang a. “Chanchin ṭha hriattîr” tûrin kan tih theih apiang kan ti zâwk ang. (Tirhkohte 20:24; 2 Timothea 4:5) Mahse, engtin nge mi dangte kan zirtîr ang? Pathian hnên aṭanga ro hlu dang chu ngaihtuah ang che.

13, 14. Matthaia 13:52-a Isua sawi “ro bâwm” chu eng nge ni a, chu chu engtin nge kan tihkhah theih ang?

¹³ Jehova min pêk ro hlu pathumna chu kan zir thutak zawng zawng hi a ni a. Jehova chu thutak Hnâr a ni. (2 Samuela 7:28; Sâm 31:5) Thil phal tak kan Pa a nih angin, chûng thutakte chu min hriattîr a duh a. Chûng thutakte chu Bible leh thu leh hla chhuahte kan chhiarna aṭang te, inkhâwmpui te, leh chawlhkâr tin inkhâwma kan tel ziahna aṭangtein kan hria a ni. Thutak kan hriat belh zêl chuan Isua sawi thutak “ro bâwm ata thil tharte leh thil hluite” kan nei ang. (Matthaia 13:52 chhiar rawh.) Thutak chu ro phûm rûk zawn anga kan zawn chuan Jehova’n kan “ro bâwm” tikhat tûrin min ṭanpui ang. (Thufingte 2:4-7 chhiar rawh.) Chu chu engtin nge kan tih theih?

¹⁴ Bible leh thu leh hla chhuahte kan chhiar ziah a ngai a, chu bâkah ngun taka zir bingna kan neih a ngai bawk. Chu chuan tûn hmaa kan hriat ngai loh thutak “tharte” hmu chhuak tûrin min ṭanpui ang. (Josua 1:8, 9; Sâm 1:2, 3) Kum 1879-a tihchhuah Vênnainsâng thuziak hmasa ber chuan thutak chu hnim zînga pangpâr ṭo nên a khaikhin a. Chutiang pangpâr hmu tûr chuan miin ngun taka a zawn a ngai a. A zawn hmuh chuan par khat chauh chu a duh tâwk lo ngei ang. Tam tak hmu tûr chuan a zawng chhunzawm zêl tûr a ni. Chutiang bawkin, thutak pakhat chauh kan hmuh avângin kan lungngawi mai tûr a ni lo. Thutak hmuh belh zêl tûrin ṭhahnem ngai takin kan zawng chhunzawm zêl tûr a ni.

15. Engvângin nge thutak ṭhenkhat chu a “hlui” tia kan sawi theih a, chûng zîngah chuan eng hi nge i ngaihhlut ber?

¹⁵ Bible kan zir ṭan hian, thutak ṭhenkhat kan hria a. Chûng chu kan hriat hmasa berte a nih avângin thutak “hlui” tiin kan ko thei a ni. Chûng thutak hlui ṭhenkhat chu eng nge ni? Atîr lamah chuan Jehova chu min Siamtu a ni a, mihringte tân thiltum a nei tih kan hria. Sual leh thihna ata kan zalên theih nân tlanna inthawina atâna thi tûrin Pathianin a Fapa leiah a rawn tîr tih pawh kan hria a. Pathian Ramin hrehawm tawrhna zawng zawng a titâwp ang a, tichuan leiah hian remna leh hlimna chênin chatuanin kan nung thei ang tih pawh kan hre bawk a ni.—Johana 3:16; Thu Puan 4:11; 21:3, 4.

16. Bible thutak hriatthiamna siamrem a nih hunah eng nge kan tih ngai?

¹⁶ Bible hrilh lâwkna emaw, Bible châng emaw kan hriatthiamna siamrem châng a awm a. Chutiang thil a thlen chuan chûng siamremnate chu zir tûr leh chhût ngun tûra hun pêk chu a pawimawh hle. (Tirhkohte 17:11; 1 Timothea 4:15) Hriatthiamna hlui leh thar danglamnate kan hriatthiam a ngaih mai bâkah, hriatthiamna thar chungchânga hrilhfiahnate chu ngun takin kan ngaihtuah bawk tûr a ni. Chutianga ngun taka zir bingna chuan hriatthiamna tharte chu Bible thutak kan neih ro bâwmah a tel ve tih kan chiang thei ang. Chutianga theih tâwp chhuah chu engvângin nge kan tân a ṭhat?

17, 18. Engtin nge thlarau thianghlimin min ṭanpui theih?

¹⁷ Tûn hmâa kan thil hriatte hre chhuak leh tûrin Pathian thlarauvin min ṭanpui thei tih Isua’n a sawi a. (Johana 14:25, 26) Chu chuan chanchin ṭha kan hrilh hunah  engtin nge min ṭanpui theih? Unau Peter-a thiltawn hi han ngaihtuah teh. Kum 1970 khân, kum 19 mi niin Britain rama Bethel-ah rawng a bâwl ṭan a. In tina a thu hrilhnaah, khabe hmul nei pa valai pakhat a tâwk a. Bible hriatthiam a duh leh duh loh a zâwt a. Chu pa chu Juda sakhaw zirtîrtu a ni a, ṭhalai pakhatin amah Bible zirtîr thei tûra a inngai chu mak a ti hle a ni. Peter-a fiah nân Juda zirtîrtu chuan: “A nih leh, tlangvâl, Daniela lehkhabu hi eng ṭawnga ziak nge a nih?” tiin a zâwt a. Peter-a chuan: “A ṭhen chu Aramaic ṭawnga ziak a ni,” tiin a chhâng a. “A chhânna dik tak ka hria chu mak a ti hle a; mahse, amah aiin mak ka ti zâwk! Engtin nge chhânna chu ka hriat? Ina ka hâwn chuan thla hmasaa chhuak Vênnainsâng leh Awake! magazine-te chu kan en chiang leh a, thuziak pakhatah Daniela lehkhabu chu Aramaic ṭawnga ziak a ni tih ka hmu,” tiin a sawi. (Daniela 2:4.) Ni e, thlarau thianghlim chuan tûn hmâa kan lo chhiar tawhte leh kan ro bâwma kan dah ṭhatte hre chhuak leh tûrin min ṭanpui thei a ni.—Luka 12:11, 12; 21:13-15.

¹⁸ Jehova hnên aṭanga kan zir thutakte kan hmangaih a, kan ngaihhlut tak zet chuan kan ro bâwmah dah belh zêl kan duh ang. Chutianga kan tih tam poh leh mi dangte zirtîr thei tûrin kan inbuatsaih lehzual tihna a ni ang.

19. Engvângin nge kan thlarau lam ro hlute chu kan vênghim ang?

¹⁹ He thuziakah hian thlarau lam ro hlute ngaihhlut chu kan tâna thil pawimawh a nih dân kan hre tawh a. Mahse, Setana leh he khawvêlin chûng ro hlute kan hlutna chu min tihnêpsak loh nân kan fîmkhur hle tûr a ni. Kan fîmkhur loh chuan sum tam tak min hmuhtîr thei hna te, nuamsa taka nun duhna te, leh kan thil neiha inchhuan duhnate chuan kan rilru a la pêng thei a ni. Tirhkoh Johana chuan he khawvêl leh a chhûnga awmte hi a boral thuai dâwn tih min hriatnawntîr a. (1 Johana 2:15-17) Chuvângin, kan thlarau lama ro hlute chu kan ngai hluin, kan vênghim reng tûr a ni.

20. I thlarau lam ro hlute vênghim tûrin eng tih nge i tum tlat?

²⁰ Pathian Ram i hmangaihna tidai theitu engpawh chu chân inhuam rawh. Ṭhahnem ngai taka thu hrilh tum tlat la, rawngbâwlna i hmangaihna chu hloh ngai suh. Bible thutakte chu zawng chhunzawm zêl rawh. Chutianga i tih chuan “vânah rûkru kal lohnaah, sûlrûl ei chhiat lohnaah chuan tangka ip hlui thei lo te, sum ral thei lo te,” i insiam a ni ang.—Luka 12:33, 34.