Thuhnuairawlhna A La Pawimawh Reng Chhan
“Thuhnuairawlhte hnênah chuan finna a awm.”—THUFINGTE 11:2, New World Translation.
HLA: 33, 41
1, 2. Engvângin nge Pathianin Saula chu a hnâwl? (A thupui chunga milem en rawh.)
JEHOVA’N lal ni tûra Saula a thlan khân, Saula chu thuhnuairawlh tak a ni a. (1 Samuela 9:1, 2, 21; 10:20-24) Mahse, Lal a nih hnuah chuan a lo chapo ta a ni. Ṭum khat chu, Philistia mi a sângtêlte chu Israel mite bei tûrin an rawn kal a. Zâwlnei Samuel chuan a lo kal ang a, Jehova hnênah thil hlan a rawn hlân ang tiin Saula chu a hrilh a. Mahse, a lo thlen hmain Israel mite chu an lo hlau ta a, an zînga ṭhenkhat chuan Saula chu an tlân bosan a ni. Saula chuan dawhtheihna a nei lova, Samuela nghah aiin amah ngeiin thil hlan chu a hlân ta a. He thil ti tûr hian thuneihna a nei lo va, a chungah Jehova a lâwm lo hle a ni.—1 Samuela 13:5-9.
2 Samuela a rawn thlen chuan, Jehova thu Saula’n a awih loh avângin a zilh a. Mahse, Saula chuan thil sual tiah a inngai lo rêng rêng. Chhuanlam zawn a tum a, a thil tihsualah mi dangte 1 Samuela 13:10-14) Chuta ṭangin, Saula chuan chapona thiltih dang tam tak a nei leh a. Chuvângin, Jehova’n lal atân a hnâwl ta a ni. (1 Samuela 15:22, 23) Saula nun inṭan dân chu ṭha hle mah se, a tawp dân erawh a lungchhiatthlâk hle.—1 Samuela 31:1-6.
a mawhpuh hial a ni. (3. (a) Mi tam takin thuhnuairawlhna hi engtin nge an ngaih? (b) Eng zawhnate nge kan chhân ang?
3 Tûn lai mi tam tak chuan, thuhnuairawlhna leh nun hlawhtling hi neih kawp theihah an ngai lo va. Mi dangte aia ṭha zâwka lan tumin an inchhuang hle ṭhîn. Entîr nân, film star lar tak leh politician nikawp chuan: “Thuhnuairawlhna tih thumal hi engti kawng mahin ka tân hman a ni lo—engtikahmah ka hmang ngai hek lo vang,” tiin a sawi. Mahse, Kristiante tân chuan thuhnuairawlhna chu engvângin nge a pawimawh? Thuhnuairawlhna chu eng nge a nih a, eng nge a nih loh? He thuziakah hian, chûng zawhnate chu chhân a ni ang a. A dawta thuziakah chuan, hun harsaah pawh thuhnuai kan rawlh reng theih dân kan hmu bawk ang.
ENGVANGIN NGE THUHNUAIRAWLHNA HI A PAWIMAWH?
4. Chapona chu eng nge a nih?
4 Bible chuan chapona chu thuhnuairawlhna nên inkalh chiah a nih thu a târ lang a. (Thufingte 11:2 chhiar rawh.) Davida chuan Jehova hnênah: “I chhiahhlawh hi chapona lakah min vêng la,” tiin a ngên a ni. (Sâm 19:13, C.L. Re-edited) Chapona chu eng nge ni? Ti tûra dikna leh thuneihna nei lova thil tih a ni a, dawhtheih lohna leh chapona vânga tih a ni mai thei. Kan vai hian kan ṭhat famkim loh avângin chapo taka thil tih châng kan nei a. Mahse, chu chu chîn ṭhanah kan neih erawh chuan, lal Saula thiltawn aṭanga kan hriat angin Jehova a lâwm lo vang. Sâm 119:21-na chuan Jehova’n ‘mi chapote chu a zilhhau vang’ tih a sawi a. Engvângin nge chutianga a tih?
Mi thuhnuairawlh kan nihna hmangin Jehova kan zahzia kan lantîr
5. Engvângin nge chapona chu thil sual pawi tak a nih?
5 A hmasa berin, chapo taka thil kan tih chuan, Pathian leh kan Rorêltu kan zah lohzia kan lantîr tihna a ni. A pahnihnaah, ti tûra thuneihna nei si lova thil kan tih chuan, mi dangte nên kan inhauvin kan inrem lo ngei ang. (Thufingte 13:10) A pathumnaah, chapo takin thil kan ti tih mi dangte’n an hriat hian mâwl tak angin kan lang mai thei. (Luka 14:8, 9) Jehova’n thuhnuairawlh tûra min duh chhan chu kan hre chiang hle a ni.
THUHNUAIRAWLHNAAH CHUAN ENG NGE TEL?
6, 7. Engtin nge thuhnuairawlhna leh inngaihtlâwmna chu a inthlunzawm?
6 Thuhnuairawlhna hi inngaihtlâwmna nên awmze inhnaih tak a ni a. Inngaitlâwm tak Kristian chu a chapo lo va, mi dangte chu a aia ṭha zâwkah a ngai a ni. (Philippi 2:3) Mi inngaitlâwm chu a tlângpui thuin mi thuhnuairawlh a ni ṭhîn. A theihnain chin tâwk a nei tih a hria a, a thil tih sualte chu inngaitlâwm takin a pawm a ni. Mi dangte ngaih dân chu ngaihthlâk a duhin, an hnên aṭangin a inzîr ṭhîn. Mi inngaitlâwm chuan Jehova a tilâwm tak zet a ni.
7 Mi thuhnuairawlh chuan a inhre chiang a, a tih theih loh leh a tâna tih phal loh thil a awm tih a pawm thu Bible chuan a târ lang a. Chutianga a pawmna chuan mi dangte zah tûr leh ngilnei taka cheibâwl tûrin a ṭanpui a ni.
8. Thuhnuairawlh reng tûr chuan, engtiang ngaihtuahna nge kan pumpelh ang?
8 Kan hriat loh kârah, chapo takin thil kan lo ngaituah ṭan thei a. Chu chu engtin nge a thlen theih? Keimahni emaw, kan ṭhian ṭhate emawin kohhranah chanvo ṭhenkhat kan chelh avângin mi dangte aia pawimawh zâwk angin kan inngai ṭan thei a. (Rom 12:16) A nih loh leh, mite ngaihsak hlawh tumin thil kan ti ṭan pawh a ni thei. (1 Timothea 2:9, 10) Mite tih tûr leh tih loh tûrte kan hrilh ṭan pawh a ni hial thei bawk.—1 Korinth 4:6.
9. Engvângin nge mi ṭhenkhat chu an rawn chapo tâk? Bible-a entîrna pakhat pe rawh.
9 Kan châkna ṭha lote kan thunun loh chuan chapo takin thil kan ti ṭan thei a. Mi tam takte chu mahni inchawimawi an duh vâng te, mi dang an thîk vâng te, leh an thinurna an thunun loh vângtein an rawn chapo a ni. Absaloma te, Uzzia te, leh Nebukadnezzara te chu chutiang chuan an awm tih Bible-in a sawi a. Inngaihtlâwmna an neih a ngai tih Jehova’n chiang takin a hrilh a ni.—2 Samuela 15:1-6; 18:9-17; 2 Chronicles 26:16-21; Daniela 5:18-21.
10. Engvângin nge mite rilru put hmang chu kan sawisêl loh vang? Bible-a entîrna pakhat pe rawh.
10 Mite’n engemaw chânga thuhnuairawlhna an neih loh chhan dang pawh a awm mai thei. Abimeleka leh Petera te entîrna chu ngaihtuah teh. (Genesis 20:2-7; Matthaia 26:31-35) Anni chu mi chapo an ni em? A nih loh leh thil an hriat chian loh vâng leh ngaihtuah lova thil ti an ni thei ang em? Thinlung kan hriat theih loh avângin, mi dangte rilru put hmang chu kan sawisêl tûr a ni lo.—Jakoba 4:12 chhiar rawh.
PATHIAN RUAHMANNAA I CHANVO
11. Eng nge kan hriatthiam ngai?
11 Mi thuhnuairawlh chuan Pathian ruahmannaa a chanvo chu a hria a. Jehova chu inrêlbâwlna fel tak nei a ni a. Kohhrana mi tinte chu chanvo a pe ṭheuh a ni. Ka vai hian kan inmamawh tawn ṭheuh va. Jehova’n thilpêk hrang hrang, thiamna te, theihna te min pe ṭheuh va, chûngte kan hman dân tûrah duh thlan theihna min pe a ni. Mi thuhnuairawlh kan nih chuan, kan thilpêk dawn chu Jehova duh dân angin kan hmang ngei ang. (Rom 12:4-8) Kan thilpêk dawnte chu Jehova’n amah chawimawi nân leh mi dangte ṭanpui nân hmang tûrin min beisei tih kan hria a ni.—1 Petera 4:10 chhiar rawh.
Kan chanvo dawn a inthlâk danglam hunah Isua hnên aṭangin eng nge kan zir theih? (Paragraph 12-14-na en rawh)
12, 13. Jehova rawng kan bâwlnaah kan chanvote a inthlâk danglam a nih chuan eng nge kan hriat reng ang?
12 Hunte a liam zêl rualin Jehova rawngbâwlnaa kan chanvote chu a inthlâk danglam thei a. Entîrna pakhat, Isua chanvo inthlâk danglam nasatzia chu han ngaihtuah teh. A hmasa berin, a Pa bulah amah chauhvin a awm a. (Thufingte 8:22) Tichuan, vântirhkoh te, lei leh vân te, leh mihringte siamnaah Pathian Jehova a ṭanpui a ni. (Kolossa 1:16) A hnuah, leiah tirh a ni a. Mihring niin a rawn piang a, tichuan a rawn puitling chho zêl a ni. (Philippi 2:7) A thih hnuah, vânah a kîr leh a, kum 1914-ah Pathian Ramah Lal a ni ta a ni. (Hebrai 2:9) Chu mi hnu aṭang chuan, lei leh vâna thuneihna zawng zawng pêk a ni leh a. (Matthaia 28:18) Chu bâkah, Lal nia kum sângkhat chhûng ro a rêl hnuah, “Pathian chu engkima engkim a nih theihna tûrin” Lalram chu Jehova hnênah a pe leh ang.—1 Korinth 15:28.
Hebrai 6:10.
13 Kan nunah inthlâk danglamna tam tak kan tawng ve mai thei a. A châng chuan, kan chanvote chu kan thu tlûkna siam avângin a inthlâk danglam thei. Entîr nân, nupui pasal nei lo kan ni a, a hnuah neih kan tum leh ta a. A nih loh leh fate pawh kan nei mai thei. A hnuah, hun kima Jehova rawng kan bâwl theih nân inthlâk danglamna siam kan rêl thlu a. Kan dinhmunte avângin kan mawhphurhnate inthlâk danglam chângte pawh a awm thei. Kan thawh tam zâwk a ngai emaw, kan thawh tlêm zâwk a ngai emaw pawh a ni thei. Ṭhalai kan ni emaw, kum upa kan ni emaw, kan hrisêl emaw, hrisêl lo emaw pawh ni se, Jehova’n a ṭha thei ang bera a rawng kan bâwl theih dân chu a hria a. Kan tih theih aia tam ti tûrin min beisei lo. Atâna kan thiltih apiangah a lâwm êm êm a ni.—14. Eng dinhmun hnuaiah pawh ni se, thuhnuairawlhna chuan engtin nge lungawi tûr leh hlim tûra min ṭanpui theih?
14 Isua chuan Jehova pêk a chanvo zawng zawng chu lâwm takin a pawm a, keini pawh chutiang chu kan ni ve thei. (Thufingte 8:30, 31) Mi thuhnuairawlh chu a chanvo dawnah leh kohhrana a mawhphurhnaahte a lungawi a. Mi dangte thil tih ringawt chu a ngaituah lo. Chu aiin, Pathian inawpna pâwla a chanvo dawnah a lungawi a ni. Chu chanvo chu Jehova hnên aṭanga a dawn angin a thlîr a. Chu bâkah, mi thuhnuairawlh chuan mi dangte chu a zahin, hlim takin a ṭanpui a ni. Anni pawh Jehova’n chanvo a pe ve tih a hria.—Rom 12:10.
THUHNUAIRAWLHNA THLIR DAN DIK
15. Gideona entawn tûr siam aṭangin eng nge kan zir theih?
15 Gideona chu thuhnuairawlhna kawnga entawn tûr ṭha tak a ni a. Jehova’n Midian Rorêltute 6:15) Mahse, Jehova rinchhanin chu chanvo chu a pawm a ni. Tichuan, Jehova’n ti tûra a duh chu hriatthiam a tum a, a kaihhruaina dîlin a ṭawngṭai a ni. (Rorêltute 6:36-40) Gideona chu chak tak leh huaisen tak a nih bâkah, a fingin a fîmkhur thiam hle bawk. (Rorêltute 6:11, 27) A hnuah, mite’n an chunga rorêl tûra an duh khân a hnâwl a. Jehova sawi anga a tih hnuah, a inah a haw leh a ni.—Rorêltute 8:22, 23, 29.
mite laka Israel mite chhan chhuak tûra mawhphurhna a pêk khân, Gideona chuan: “Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” tiin a sawi a ni. (16, 17. Engtin nge mi thuhnuairawlh chu hma a sâwn theih?
16 Mi chuan chanvo thar a pawm emaw, kohhran tân thil tam tak tih a duh emaw a nih chuan, chu chu mi thuhnuairawlh a ni lo tihna a ni lo. Jehova chhiahhlawh pakhatin a unaute tân tam leh zuala rawngbâwl a, hmasâwn a duh chuan chu chu thil ṭha a ni tih Bible-in a sawi a. (1 Timothea 4:13-15) Mahse, hmasâwn tûrin chanvo thar kan dawn a ngai kher em? Ngai kher lo. Kan vai hian Kristian mizia kan tihmasâwn reng thei a, Jehova’n a rawng ṭha lehzuala kan bâwl theih nân leh kan unaute kan ṭanpui theih nân theihnate min pe a ni.
17 Mi thuhnuairawlh chuan chanvo a pawm hmain, a laka phûtte chu hriat a tum a. Chu mi chungchângah a ṭawngṭai a, a hlen theih dâwn leh dâwn loh fîmkhur takin a ngaihtuah a ni. Thil dang pawimawhte ti tûrin hun leh tha a la nei tho ang em? A nei lo a nih chuan, tûna a chelh mêk chanvo ṭhenkhat chu mi dangin an chelh thei ang em? A ngaihtuah hnuah, mi thuhnuairawlh chuan he chanvo thar hi ṭha taka a chelh theih dâwn leh dâwn loh thu tlûkna a siam thei ang. Mi thuhnuairawlh kan nih chuan, kan theih loh thu kan sawi tûr a ni.
18. (a) Mi thuhnuairawlh chuan chanvo a dawn hunah eng nge a tih ang? (b) Engtin nge Rom 12:3 chuan thuhnuairawlh tûrin min ṭanpui theih?
18 Jehova chuan amah nêna ‘thuhnuairawlh taka lêng dûn’ tûrin min duh a. (Mika 6:8) Chuvângin, chanvo thar kan dawn hunah, Gedeona tih angin a kaihhruaina zawngin a ṭanpuina kan dîl a ni. Jehova’n Bible leh a inawpna pâwl hmanga a thu min hrilhte chu ngun takin kan ngaihtuah tûr a ni a. A rawngbâwlnaa kan tih theih engpawh hi theihna kan neih vâng ni lovin, Jehova a inngaihtlâwm a, min ṭanpui a duh vâng a ni tih i hre reng ang u. (Sâm 18:35) Mi thuhnuairawlh chuan ‘inngaihhlut tâwk aliamin a inngaihlu lo vang.’—Rom 12:3 chhiar rawh.
19. Engvângin nge thuhnuai kan rawlh ang?
19 Mi thuhnuairawlh chuan Jehova chu Siamtu a ni a, lei leh vâna Chungnungber a nih avângin amah chauhvin chawimawina zawng zawng a phû tih a hria. (Thu Puan 4:11) Thuhnuai kan rawlh chuan, Jehova rawngbâwlnaa kan tih theih eng thilah pawh kan hlim ngei ang. Kan unaute rilru vei zâwng leh ngaih dânte chu kan zah ang a, chu chuan min inpumkhattîr ang. Mi thuhnuairawlh chuan thil engemaw a tih hmain, ngun takin a ngaihtuah a, chutiang chuan thil sual pawi tak tih a pumpelh a ni. Jehova chuan mi thuhnuairawlh chu a lâwm hle a. Chuvâng chuan, thuhnuairawlhna chu Pathian mite tân thil pawimawh tak a ni. A dawta thu ziakah, harsat hunah pawh thuhnuai kan rawlh reng theih dân kan hmu ang.