Mi zawng zawng deuh thawin thiltih ṭhenkhat chu a dik, a nih loh leh a dik lo tih an pawm tlâng a. Entîr nân, tualthah te, pâwngsual te leh, mipat hmeichhiatna lama naupang khawih chhiatnate chu nasa taka dem a ni a; chutih rualin, dikna, ngilneihna leh, khawngaihnate chu mite’n an ngaihlu hle a ni. Mahse, nuna dinhmun dang—mipat hmeichhiatna, rinawmna, a nih loh leh fate enkawl dân—chungchângahte chuan mi tam takin thil dik leh dik lo awm lo niin an ngai a. Anni chuan duhthlanna eng pawh chu pawm theih niin an ngai a ni. Mite chuan chumi chungchânga an ngaih dân leh an chheh vêla mite ngaih dân ṭanchhanin thu tlûkna an siam fo ṭhîn a. Mahse, chu chu tih dân ṭha a ni em?

Kan ngaih dân, a nih loh leh thil dik leh dik lo thliar theihna, kan chhia leh ṭha hriatna ṭanchhanin thu tlûkna kan siam ṭhîn a. (Rom 2:13-16) Naupangte chuan kum naupang tak an nih aṭangin, thil dik leh dik lo an thliar hrang theiin, inthiam lohna pawh an nei thei a. Hunte a liam zêl rualin, kan chhia leh ṭha hriatna chu kan chhûngte, kan rualpuite, zirtîrtute, khawtlânga mite leh, hnam ziate aṭanga kan chhawm chhoh tehnate milin a danglam zêl a. Thu tlûkna kan siam hian, kan chhia leh ṭha hriatna chuan kan duhthlanna siam chu kan tehnate nên a inmil leh mil loh min hriattîr ṭhîn a ni.

Thil dik leh dik lo kan hriat theihna chuan mi dang chunga khawngaihna te, lâwm nachâng hriatna te, dikna te leh, zahngaihnate lantîr tûrin min chêttîr thei a. Chu chuan kan hmangaihte tina thei thilte, a nih loh leh zahna leh hmingchhiatna leh, inthiam lohna min neihtîr thei thilte ti lo tûrin min dang thei bawk a ni.

Kan ngaih dân chu kaihruaitu rin tlâk a ni reng em? Garrick-a chuan “Ka tih duh apiang ka ti ṭhîn a,” tiin a tlangvâl laia a nun kawng thlan chungchâng chu a târ lang a. Mahse, dik nia a hriatte a tihna chuan sawhkhâwk ṭha lo tak a nei tih a hre ta a. A hnuah, nungchang bawlhhlawhna,  ruihhlo hman sualna, zu ruihna leh, tharum thawhnaah nasa taka a inhman avângin, a nun chu a hlim loh thu a sawi a ni.

Kan ngaih dân mai bâkah, mi dangte thlîr dân thununa awmin thu tlûkna kan siam ṭhîn a. Chu chuan an thiltawnte leh thiamnate hlâwkpui tûrin min ṭanpui thei a ni. Chu bâkah, kan chhûngte, kan ṭhiante leh, khawtlânga mite’n dik nia an ngaihte kan tih hian an zah kan hlawh ṭhîn bawk.

Mi dangte ngaih dân chu kaihruaitu rin tlâk a ni reng em? Priscila-i chuan tleirâwl a nih laiin, a ṭhiante tih ṭhin dân angin inneih hmaa awm dun chu pawi a ti lo va. Mahse, mi dangte’n dik nia an thlîrte tihna chuan hlimna a pêk loh thu heti hian a sawi a ni: “Mi dangte tih anga tih ve zêlna chuan hlimna min pe lo. Chu chuan thil âtthlâk tak leh nunna atâna thil hlauhawmte min tihtîr a ni,” tiin.

Thil dik leh dik lo chungchânga thu tlûkna kan siam hian, kan ngaih dân leh mi dangte ngaih dân ngaihtuah tel chu thil pawimawh tak a ni a. Mahse, chutianga inthununtîr rengna chuan rah ṭha a chhuah reng lo. Kan ngaihtuah thui lohna leh kan duhthlannain nghawng ṭha lo a thlen theihte ngaihtuah tel lohna chuan keimahni leh mi dangte chungah chhiatna a thlen thei a ni. (Thufingte 14:12) Kan thil ngaihhlutte leh kan chhehvêla mite thil ngaihhlutte chu kan tân a ṭha tak zetin, tihdanglam a ngai lo vang tih kan sawi thei lo. A nihna takah chuan, tûn hmaa mite pawm loh miziate chu tûn laiah pawm ni tawhin, tûn hmaa mite pawm tlân thiltihte chu tûn laiah thil mawi lo anga thlîr a ni tawh a ni.

Thi dik leh dik lote hriat theihna atâna kaihhruaina ṭha zâwk a awm em? Kum tam tak hnu pawha inchhîrna min thlen lo tûr nungchang lama tehkhâwng kan vawn theih a awm em?

Hmun tina awmte tâna nungchang lama kaihhruaina nghet leh rin tlâk a awm chu thil lâwmawm tak a ni. A dawta thuziak chuan thil dik leh dik lo chungchânga kaihhruaina rin tlâk ber kan hmuh theihna hmun a târ lang ang.