Thil Dik leh Dik Lo: Min Ṭanpui Theitu Kaihhruaina
Mi maktaduai tam takin an nuna Bible kaihhruaina an hlâwkpui dân kawng li i lo ngaihtuahho vang u.
1. Inneihna
Inneihna leh inneihna hlimawm neih theih dân chungchângah mi tam takin ngaih dân chi hrang hrang an nei a ni.
BIBLE SAWI DAN: “Eng pawh ni se, tu pawhin mahni a inhmangaih angin mahni nupui hmangaih ṭheuh sela, nupui pawhin a pasal hlau thiam rawh se.”—Ephesi 5:33.
A AWMZIA: Pathian chu inneihna bul ṭantu a ni a; chuvângin, nupate hlim taka an awm theih nâna thil pawimawhte chu a hria a ni. (Marka 10:6-9) Nupate chu mahni chauh inngaihsak lova, an inngaihsak tawn hian hlimna an nei theiin an inneihna a nghet lehzual a ni. Pasal chuan a nupui a cheibâwl dân leh a ngaihsak dânah a hmangaih tih a lantîr thei a. Nupui pawhin a pasal a biak dân leh a chêtzia hmangin a zah tih a lantîr thei a ni.
BIBLE KAIHHRUAINA A RIN TLAK: Vietnam rama Quang-a leh Thi-i te chuan inneihna hlimawm an neih theih an ring lo va. Quang-a chuan ngilnei lo takin thil a ti ṭhîn a. Ani chuan: “Thi-i rilru vei zâwngte chu ngaihsak lovin zak takin ka siam ṭhîn,” tiin a sawi. Thi-i chuan inṭhen mai a duh a. “Ka pasal chu ka ringin ka zah thei tawh lo,” tiin a sawi a ni.
A hnuah, Quang-a leh Thi-i te chuan Bible zirtîrna leh an inneihnaah Ephesi 5:33-a thute nunpui dân an zir a. Quang-a chuan: “He châng hian ngilneihna lantîr ka mamawh tih leh Thi-i chu tisa lam, taksa leh rilru lama ngaihsak leh hmangaih nia inhriatna neihtîr a pawimawh tih hre thiam tûrin min ṭanpui a. Chutianga ka cheibâwl chuan min hmangaihin min zah a ni,” tiin a sawi. Thi-i pawhin, “Ephesi 5:33-a thute nunpuia ka pasal chunga zahna ka lantîr lehzual poh leh, hmangaih leh vênhim nia inhriatna ka nei lehzualin rilru hahdamna ka nei a ni,” tiin a sawi bawk.
Inneihna chungchâng hriat belh nân, jw.org website-a Awake! No. 2 2018, “Chhûngkaw Hlawhtlinna Thurûk 12,” tih chu en ang che.
2. Mi Dangte Cheibâwl Dân
Mite chuan mi dangte chu an hnam, an ram, an lan dân, an sakhua leh, mipat hmeichhiatna lama an thlîr dân avângin dik lo takin an cheibâwl fo ṭhîn.
BIBLE SAWI DAN: “Mi zawng zawng chawimawi rawh u.”—1 Petera 2:17.
A AWMZIA: Bible chuan hnam inthliarna, neih inang kawp chîngte hmuhsitna leh, hnam dangte hmuhsitna chu a thlâwp lo va. Chu aiin, mi dangte chu an hnam, an ram, a nih loh leh khawtlânga an dinhmun chu eng pawh ni se, zah thiam taka cheibâwl tûrin min fuih a. (Tirhkohte 10:34) An thurin chungchâng emaw, an thil tih dân chungchângah emaw kan ngaih dân a inan loh hunah pawh ngilnei tak leh zah thiam takin kan cheibâwl thei a ni.—Matthaia 7:12.
BIBLE KAIHHRUAINA A RIN TLAK: Asia rama mite chu an ram tâna mi hlauhawm anga thlîr tûrin Daniel-a chu zirtîr a ni a. Ani chuan Asian mi tawh phawt chu a huain vântlâng hmaah a diriam ṭhîn a ni. “Ka thiltih chu ‘ram leh hnam hmangaihna’ a ni tiin ka inthiam chawp a. Ka thil tih dân leh ngaihtuah dân chu thil dik lo angin ka thlîr ngai lo,” tiin a sawi.
A hnuah, Daniel-a chuan Bible a zir a. Ani chuan:“Ka ngaihtuah dân chu ka thlâk danglam a ngai a. Mite chu Pathian hmuh dân anga ka hmuh thiam a ngai a—mi chu khawi hmun aṭanga lo kal pawh ni se, kan inang vek tih hi a ni,” tiin a sawi. Tûnah chuan, Daniel-a’n mite a hmuh huna a awm dân chu heti hian a sawi a ni: “An ṭobul pawh ka ngaihven tawh mang lo va. Mi chi hrang hrangte chu ka ngainain khawvêl pumah ṭhiante ka nei tawh,” tiin a sawi a ni.
Hriat belh nân, jw.org website-a Awake! No. 3 2020, “Is There a Cure for Prejudice?” tih chu en ang che.
3. Sum Leh Pai
Mi tam tak chuan hlimna leh hma lam hun ṭha lehzual an neih theih nân sum leh pai an ûm a ni.
BIBLE SAWI DAN: “Finna hi himna a ni si, tangka sum himna a ni bawk; hriatna ṭangkaizia erawh chu, a neitu nun chu, finnain a tiharh ṭhîn.”—Thuhriltu 7:12.
A AWMZIA: Sum leh pai chu kan mamawh a; mahse, kan hlimna leh hma lam hun atân innghahna a tling lo. (Thufingte 18:11; 23:4, 5) Chu aiin, hlimna dik tak leh nakin hun muanawm tak chu Bible-a Pathian finna kan nunpuinaah a innghat a ni.—1 Timothea 6:17-19.
BIBLE KAIHHRUAINA A RIN TLAK: Indonesia-a awm Cardo-a chuan hausak dân tûr ringawt a ngaihtuah a. Ani chuan: “Mite duh ang zawng zawng chu ka nei vek a. Ka zin kual thei a, thil man to tak takte, motor-te leh, inte pawh ka lei thei,” tiin a sawi. Mahse, a hausakna chuan rei a daih lo. “Bum ka tâwk a, kum tam tak chhûng rim taka ka thawhchhuah ka sum khâwl sate chu mit khap kâr lekah ka chân vek a. Ka nun pumin sum leh pai ka ûm a; mahse, a tâwpah chuan engmah nei lo, hlutna nei lo leh, beidawng takin ka awm,” tiin a sawi zawm a ni.
Cardo-a chuan sum leh pai chungchânga Bible thurâwn chu a nunpui ṭan a. A hun leh thate chu sum leh pai zawn nân chauhva hmang tawh lovin, samkhai zâwka nun a tum ta a. Ani chuan: “Tûnah chuan Pathian nêna inlaichînna ṭha ka neih avângin hausakna dik tak ka nei tawh a. Tui takin ka muhîl thei tawh a, ka hlim hle bawk,” tiin a sawi.
Sum leh pai chungchânga Bible thlîr dân hriat belh nân, jw.org website-a Vênnainsâng No. 3, 2021 chhuaka “Zir Sânna leh Hausakna Hian Nakin Hun Muanawm Tak A Neihtîr Thei Tak Tak Che Em?” tih thuziak chu ang che.
4. Mipat Hmeichhiatna
Mite chuan mipat hmeichhiatna chungchângah ngaih dân chi hrang hrang an nei a ni.
BIBLE SAWI DAN: “Inngaih bânsan ula; Pathian hre lo Jehtailhote anga hur kawng châk lovin, thianghlim leh chawimawiin mahni bêl vawng thiam ṭheuh ula.”—1 Thessalonika 4:3-5.
A AWMZIA: Bible chuan mipat hmeichhiatna lama châkna lan chhuahtîr dân chungchângah chin tâwk nei tûrin min zirtîr a. “Inngaihna,” tih thu mal chuan uirêna, nawhchizawrhna, nupa ni lote inkâra mipat hmeichhiatna hmanna, neih inang inkawpna leh, ramsa nêna inpâwlnate a huam tel a ni. (1 Korinth 6:9, 10) Mipat hmeichhiatna chu Pathian thilpêk a ni a, chu chu innei tawh mipa leh hmeichhiate chauh hman atâna ruahman a ni.—Thufingte 5:18, 19.
BIBLE CHU A RIN TLAK: Australia-a awm Kylie-i chuan heti hian a sawi a ni: “Ka nulât lai chuan mipat hmeichhiatna ka hman chauhvin hmangaih leh him nia inhriatna nei tûrah ka inngai a. Mahse, chutiang chu a ni lo. Him lo leh rilru na takin ka awm a ni,” tiin.
A hnuah, Kylie-i chuan mipat hmeichhiatna chungchânga Bible zirtîrna chu zirin a nunpui a. “Pathian tehnate chu intihnatna laka min vênghimtu a ni tih ka hre thiam a. Tûnah chuan, Jehova duh zâwng mila thil ka tih avângin him leh hmangaih nia inhriatna ka nei a. Bible kaihhruaina zawmna chuan rilru natna tam tak lakah min vênghim a ni!” tiin a sawi.
Hriat belh nân, jw.org website-a “Innei Lova Chên Dun Chungchâng Bible-in Eng Nge A Sawi?” tih thuziak chu en ang che.
Min Siamtu chuan thil dik leh dik lo hre tûrin min ṭanpui a. Nungchang lama a tehnate mila nun chu harsat châng awm mah se, theih tâwp chhuaha nunpui chu manhla tak a ni a. Chumi zawmna chuan hlimna tluantling min neihtîr ang tih kan ring tlat thei a ni.
