1, 2. (a) Pathianin kan rawngbâwlna a thlîr dân chungchângah Eliphaza leh Bildada’n eng nge an sawi? (b) Chumi chungchângah Jehova’n eng nge a sawi?

KUM tam tak kalta khân, mi pathumte chuan Pathian chhiahhlawh rinawm Joba chu an va bia a. An zînga pakhat chu, Eliphaza Temani mi a ni a, Joba hnênah: “Mihring hian Pathian tân ṭangkaina a nei em ni? Miin a fin chu a ṭangkaipui ngei tak e, mi fel i nih chu Engkimtitheia tân a hlu em ni? I kawngte i tihfamkim chu a tân a hlâwk em ni?” tiin zawhna rilru la tak takte a zâwt a. (Joba 22:1-3) Eliphaza chuan chu zawhna chhânnate chu a ni lo tiin a ring nghet tlat a ni. Mi dang pakhat leh chu, Bildada Shuhi mi a ni a, ani chuan mihringte hi Pathian hmâah mi fel an ni thei lo tiin a sawi ve bawk.—Joba 25:4 chhiar rawh.

² Eliphaza leh Bildada chuan Joba chu Jehova rawngbâwl tûra theih tâwp a chhuahna chu ṭangkai lo anga ngaihtîr an tum a. Phêngphehlep te, thil lung te, leh changpâtte aiin Pathian tân kan hlu bîk hran lo tih Joba chu rintîr an duh a ni.  (Joba 4:19; 25:6) Chutianga an sawi chu an inngaihtlâwm vâng a ni em? (Joba 22:29) Jehova chu a ropui tak zetin, amah nêna inkhaikhin chuan kan tê hle tih chu a dik ngei mai. Tlâng chhîpa kan awm hunah emaw, thlawhna tukverh aṭanga pawn lam i thlîr hunah emaw hian kan têtzia leh kan pawimawh lohzia chu kan inhre thei a. Mahse, chu chu Jehova’n a rawngbâwlnaa theih tâwp kan chhuahna leh Lalram tâna kan thawhrimna a thlîr dân a ni em? Ni lo! Jehova chuan Eliphaza, Bildada, leh Zopharate hnênah dâwt an sawi tih a hrilh a. Chu bâkah, Pathian chuan Joba chunga a lâwm thu sawiin, ani chu “ka chhiahhlawh” tiin a ko a ni. (Joba 42:7, 8) Chuvângin, mihring ṭha famkim lote chu ‘Pathian tân ṭangkaina an nei’ tih kan chiang thei a ni.

3. Jehova rawngbâwl tûra theih tâwp kan chhuahna chungchângah Elihua’n eng nge a sawi? A sawi tum chu eng nge ni?

³ Tleirâwl Elihua chuan Joba leh chûng mi pathumte inbia chu a lo ngaithla a. An inbiak zawh hnu chuan, Elihua’n Jehova chungchângah Joba chu: “I fel pawhin a tân eng nge i hnemhnân? I kut ata eng nge a dawn?” tiin a zâwt a ni. (Joba 35:7) Pathian rawngbâwl tûra theih tâwp kan chhuahna chu a ṭangkai lo tih Elihua’n sawi a tumna a ni ang em? Ni lo. Jehova’n chûng mi pathumte a zilh angin Elihua chu a zilh ve lo. Elihua sawi tum chu thil dang daih a ni a. Jehova’n amah be tûrin min mamawh lo a tihna a ni. Jehova chu a famkim vek tawh a. Amah tihausa zâwk tûr leh tichak zâwk tûrin tih theih engmah kan nei lo. Dik tak chuan, kan neih mize ṭha leh theihnate hi Pathian laka kan dawn a ni a, chumi kan hman dânte chu a hria a ni.

4. Mi dangte chunga zahngaihna kan lantîr hian Jehova’n engtin nge a ngaih?

⁴ Jehova’n amah betute chunga hmangaihna rinawm kan lantîr chuan chûng thiltihte chu a chûnga ti angah a ngai a. Thufingte 19:17-ah: “Mi rethei khawngaih chuan LALPA a pûktîr a ni a, a thiltih ṭhat chu a rûl ang,” tiin kan chhiar a ni. Jehova chuan mi dangte chunga zahngaihna kan lantîrte hi a hre vek a ni. Ani chu lei leh vân Siamtu a ni chung pawhin, chûng kan thiltihte chu a hnênah thil kan pûktîr angin a ngai a, thil hlu tam tak nên min rûl leh ṭhîn a. Pathian Fapa, Isua’n chu thu a dikzia a sawi a ni.—Luka 14:13, 14 chhiar rawh.

5. Eng zawhnate nge tûnah kan sawiho vang?

⁵ Hmân laiin, Jehova’n zâwlnei Isaia chu amah aiawhtu ni tûr leh kawng danglam taka a rawngbâwltu ni tûrin a sâwm a. (Isaia 6:8-10) Isaia’n chu sâwmna chu inhuam taka pawmin, heti hian a sawi a ni: “Kei heta hi ka awm, mi tîr ta che,” tiin. Tûn laiah pawh, Jehova’n mi rinawmte hnênah a hnathawh theihna hun remchâng a pe a. Jehova chhiahhlawh sâng tam takte chuan Isaia rilru put hmang ang an neih ve tih an târ lang a ni. Anni chuan kawng hrang hrang,  hmun hrang hrang leh dinhmun harsaahte pawh Jehova rawngbâwl tûra mawhphurhnate chu inhuam takin an pawm a. Mahse, mi chuan heti hian a sawi mai thei: ‘Jehova rawngbâwl theihna ka neih chu ka hlut tak zet a; mahse, ka lo tih ve chu ṭangkaina a nei ang em? Ka tel pawhin, tel lo pawhin Jehova’n a hna chu a thawk zo thei tho lo vem ni?’ tiin. Chutiang chuan i ngaihtuah tawh ṭhîn em? Chûng zawhnate chhâng tûra min ṭanpui theitu, tûn hmaa Jehova chhiahhlawh Debori leh Baraka te nuna thilthleng ṭhenkhat chu i lo ngaihtuah ang u.

6. Engvângin nge Jabina sipainte tân Israelte chu awlsam taka hneh thei tûr anga an lan?

⁶ Baraka chu Israel sipai a ni a, Debori chu zâwlnei a ni. Kum 20 chhûng chu, Kanaan lal Jabina’n Israel mite chu “nasa takin a hnehchhiah a.” Jabina sipaite chu an kawlhin, an râwng hle a, khuaa awm Israelte chuan an hlauh avângin an inte an chhuahsan hial a ni. Jabina sipaite chuan chem kawm ang pianhmang nei râlthuam invuah thîr tawlailîr 900 an nei a; mahse, Israelte chuan indona hriamhrei ṭha leh mahni invênhim nân phawte an nei lo a ni.—Rorêltute 4:1-3, 13; 5:6-8. * (Footnote en rawh.)

7, 8. (a) Jehova’n Baraka hnêna kaihhruaina a pêk hmasakte chu eng nge ni? (b) Engtin nge Israel mite’n Jabina sipaite an hneh? (A thupui chunga milem en rawh.)

⁷ Jabina sipaite nêna khaikhin chuan, Israel mite chu chak lo leh hneh awlsam tak angin an lang a. Mahse, Jehova’n zâwlnei Debori hmangin Baraka hnênah: “Tabor tlângah han kal langin, Naphtalia thlahte leh Zebuluna thlahte mi sîngkhat hruai rawh. Tichuan Kison luiah Jabina sipai hotu Sisera chu a tawlailîrte leh a hote nên ka rawn tîr ang a; tin, ani chu ka pe che,” tiin thu a pe a ni.—Rorêltute 4:4-7.

⁸ Sâwmna avângin, mipa 10,000 chu tlâwmngaiin Tabor Tlângah an kalkhâwm a. Tichuan, Baraka leh a mite’n Taanak tia koh hmunah chuan hmêlmate chu an do ta a ni. (Rorêltute 4:14-16 chhiar rawh.) Jehova’n Israelte chu a ṭanpui em? Ṭanpui e. Vawi leh khatah ruah nasa takin a sûr a, indona hmun ro tak chu chirhdiakah a chang ta a. Chu chuan Israelte tân hun remchâng a siam a ni. Baraka chuan Sisera sipaite chu Haroseth an tihna hmun thlengin mêl 15 (kilometer 24) laia hla a ûm a. Kalkawnga hmun pakhatah, Sisera tawlailîr chu chirhdiakah a tâng a ni. Chuta ṭanga chhuakin, Kedes bul hnai ni thei âwm, Zaanannim-ah a tlân chhe ta a. Chutah Sisera chu Jaeli puan inah a va biru a. A chauh êm avângin a muhîl ta nghâl mai a. A muthilh laiin, Jaeli’n huaisen takin a tihlum a ni. (Rorêltute 4:17-21) Jehova’n Israel mite chu an hmêlmate chungah hnehna a chantîr ta a ni! * (Footnote en rawh.)

9. Sisera beihna chungchângah Rorêltute 5:20, 21 aṭangin eng nge kan zir?

⁹ Rorêltute bung 4-a târ lan thilthlengte hre fiah tûr chuan bung 5-na kan chhiar a ngai a. Rorêltute 5:20, 21 chuan: “Vân  aṭangin an rawn bei a; arsiten an hmun aṭangin Sisera chu an rawn bei a. Kison luiin anni chu a hnâwl vek a,” tiin min hrilh a ni. Chu chu vântirhkohte’n Israel mite indonaah an ṭanpui tihna nge ni a, vân boruak aṭanga thil a lo tla a tihna zâwk? Bible-in a hrilhfiah lo va. Mahse, tawlailîr 900 awlsam taka an chêt sawn theih loh nân Jehova’n a hun leh a hmun dik takah ruah nasa tak sûrtîrin a mite a chhanhim nia ngaih chu thil inâwm tak a ni. Rorêltute 4:14, 15-ah, Israelte hnehna avângin Jehova chu vawithum lai chawimawi a ni tih kan chhiar a. Israel mi 10,000 mahnia inpete chuan hnehna avângin chawimawina an dawng thei lo.

10, 11. Meroz chu eng nge ni? Engvângin nge ânchhia hlawh a nih?

¹⁰ Tûnah thil ngaihven awm tak i lo ngaihtuah ang u. Israelte’n hnehna an chan hnuah, Debori leh Baraka chuan Jehova an fak a. “‘Meroz chu ânchhia lawh r’u,’ LALPA vântirhkohvin a ti, ‘Chuta awmte chu nasa takin ânchhia lawh rawh u; LALPA ṭanpuiin, LALPAN mi chak tak a beihnaa ṭanpui tûra an lo kal loh avângin,’” tiin hla an sa a ni.—Rorêltute 5:23.

¹¹ Meroz chu eng nge a nih chiah? Eng a nih chiah erawh kan hre lo. Anchhia hlawh a nih angin amah nêna inhnamhnawih zawng zawng hmuh tûr a awm tawh lo. Meroz chu indonaa Baraka ṭanpui tûra mahni inpe duh lo mite chênna khawpui a ni thei a. Kanaan mite do tûra mi 10,000 an inpêk avângin Meroz mite pawhin mahni inpe tûra sâwmna chu an hre ve ngei ang. A nih loh leh, Meroz chu Baraka laka Sisera tlân chhiat a tumna khawpui a ni thei bawk. Meroz mite chuan Sisera chu man duh se chuan, an man thei a; mahse, chutiang chuan an ti lo. Chu sipai rawng takin dam khawchhuah nân an kalkawnga a tlânchhe lai Meroz mite’n an hmu angin han mitthla teh! Jehova thiltum hlawhtling tûrin thil engemaw an ti thei a. Chutiangin lo ti se chuan, mal a sâwm ngei ang. Mahse, Jehova tân thil engemaw ti thei pawh ni se, engmah an ti duh lo. Meroz mite chu huaisen taka thil ti Jaeli lakah chuan an danglam hle niin a lang.—Rorêltute 5:24-27.

12. Rorêltute 5:9, 10-ah eng rilru put hmang inang lo nge chuang? Hei hian eng anga min nghawng tûr nge a nih?

¹² Rorêltute 5:9, 10 New World Translation aṭangin, mahni inpe mi 10,000 te rilru put hmang chu inpe ve lote rilru put hmang lakah chuan a danglam hle tih kan hria a. Debori leh Baraka chuan “Israel-hote rorêltu, mipuite hnêna châk taka inpete” chu an fak a ni. Inpe thei lo khawpa inngai pawimawh “sabengtung vâr chunga chuang te” lakah chuan an danglam hle. Chûng mite chu “puan phah chhah taka ṭhute” leh “lamtluang zawhtute” anga sawi an ni a, nun nuam tak an chên a ni. Chumi nêna inkalh takin, châk taka inpete chu Tabor tlâng khawkrawk kârah leh Kison ruam hnâwng takah chuan ral do tûrin Baraka hovin an kal chhuak a. Nuamsa taka nung duhte hnênah chuan: “Inngaihtuah rawh u!” tia hrilh an ni a. Anni chuan Jehova hna thawk tûra an inpêk loh avânga an thil chân chu an ngaihtuah  chian a ngai a ni. Tûn laiah pawh, Pathian rawngbâwlnaa kan rilru put hmang chu kan endik ve tûr a ni.

13. Reuben, Dan, leh Aser hnamte rilru put hmang chu Zebulun leh Naphtali hnam lakah engtin nge a danglam?

¹³ Rorêltu Chungnungber anga Jehova thiltih dân chu mahni inpe mi 10,000 te’n an hmu a. “LALPA thil fel tihte” an sawi hunah an thil hmuhte chu mi dang an hrilh thei a ni. (Rorêltute 5:11) Chumi nêna inkalh takin, Reuben hnam, Dan hnam, leh Aser hnamte chuan Jehova hna thawh aiin an berâm te, an lawng te, leh litengsâwlte ang chi mani hausakna tûr an ngai pawimawh zâwk a. (Rorêltute 5:15-17) Mahse, hnam zawng zawngte chu chutiang an ni vek kher lo. Zebulun hnam leh Naphtali hnam chu Debori leh Baraka ṭanpuinaah “thih huam reng mi” an ni. (Rorêltute 5:18) Mahnia inpe rilru put hmang danglam bîk tak neite hnên aṭangin thil pawimawh tak kan zir thei a ni.

14. Tûn laiah Jehova lalchungnunna kan thâwp tih engtin nge kan lantîr theih?

¹⁴ Tûn laiah, indona hmangin Jehova inawpna kan thlâwp lo va. Chu aiin, huaisen tak leh ṭhahnemngai taka thu hrilhna hmangin kan thlâwp zâwk a ni. Tûn hma zawng aiin, Jehova hna thawk tûra mahnia inpete mamawh lehzual a ni a. Unau maktaduai tam takte leh ṭhalaite chu hun kima rawngbâwlna chi hrang hrangah mahni duh thuin an inpe a. Entîr nân, tam tak chu pioneer te, Bethel hna te, Kingdom Hall sakna te, leh inkhâwmpui leh regional inkhâwmpuitea hnathawk tûrin mahni duhthuin an inpe a ni. Upa ṭhenkhatte chu Hospital Liaison Committees-ah (HLC) leh inkhâwmpui huaihawtnaahte rim takin an thawk a. A ṭûl dân azira inhuam taka rawng kan bâwlna chu Jehova’n a hlutin, kan thawhrimnate chu a theihnghilh lo vang tih kan chiang thei a ni.—Hebrai 6:10.

15. Jehova hnaah kan ṭhahnemngaihna kan hloh lo tih engtin nge kan chian theih?

 ¹⁵ Mahni duhthua inpêkna chungchângah kan rilru kan endik a ngai a. Heti hian kan inzâwt thei a ni: ‘Keimah avângin mi dangin hna tam zâwk an thawh phah em? Jehova rawngbâwl aiin hausakna lam ka ûm em? A nih loh leh, Jehova rawngbâwlnaah engpawh chân dâwn ila, Baraka, Debori, Jaeli, leh mahni duhthua inpe mi 10,000 te rinna chu ka entawn em? Sum tam tak nei tûr leh nun nuam tak hmang tûrin khawpui dangah emaw, ram dangah emaw kal ka ngaihtuah em? Ka ngaihtuah a nih chuan, ka insawnnain ka chhûngte leh kohhran a nghawng dân tûr chungchângah Jehova hnênah ka ṭawngṭai em?’ tiin. * (Footnote en rawh.)

16. Jehova chuan engkim nei mah se, a hnênah eng nge kan pêk theih?

¹⁶ Jehova’n a rorêlna thlâwp min phalsakna hmangin chawimawina ropui tak min pe a. Adam leh Evi te hun aṭangin, Diabola chuan mihringte chu Jehova lamah ni lovin a lama ṭang tûrin a duh a. Mahse, Jehova rorêlna kan thlâwp chuan tu lam ṭang nge kan ni tih Setana kan hriattîr a ni. Kan rinna leh rinawmna chuan Jehova rawngbâwlnaah mahni duhthua inpe tûrin min chêttîr a, chu chuan amah a tihlim tak meuh a ni. (Thufingte 23:15, 16) Pathianin rinawm taka amah kan thlâwpna leh a thu kan âwihna chu Setana sawichhiatna chhân nân a hmang thei a. (Thufingte 27:11) Kan thuâwihna hi Jehova hnêna kan pêk theih thil a ni a, chu chu atâna hlu tak leh amah tilâwm thei thil a ni.

17. Rorêltute 5:31 hian nakina thil lo thleng tûr chungchâng eng nge min hrilh?

¹⁷ Leia mi zawng zawngte hian nakin lawkah chuan thil dang zawng aiin Jehova rorêlna hi an duh zâwk tawh ang. Chu hun chu kan va nghâkhlel tak êm! “Aw LALPA, i hmêlmate zawng zawng chu boral vek sela: amah hmangaihtute erawh chu chak taka kal, nî ang hi ni rawh se,” tia hla satu Debori leh Barak te ang nih kan duh a ni. (Rorêltute 5:31) Jehova’n Setana khawvêl suaksual a tihboral hunah chutiang chuan a thleng ang. Armageddon indona a inṭan hunah, Jehova chuan hmêlmate tiboral tûrin mahnia inpe mihringte a mamawh lo vang. Chu aiin, kan “ding ngawt mai” ang a, ‘LALPA chhandamna chu kan en reng mai’ dâwn a ni. (2 Chronicles 20:17) Chumi lo thlen hma chuan, Jehova rorêlna chu huaisen tak leh ṭhahnemngai taka thlâwpna hun ṭha kan nei a ni.

18. Mahni duhthua inpêkna chu mi dangin engtin nge an hlâwkpui?

¹⁸ Debori leh Baraka te hnehna hla chu mihringte ni lovin, Jehova faknain a inṭan a. Heti hian hla an sa a ni: “Mipuite chu châk takin an lo inpêk tâk hi, LALPA chu fak rawh u,” tiin. (Rorêltute 5:1, 2) Chutiang bawkin, a ṭûl dân anga Jehova rawng kan bâwlna chuan mi dangte pawh ‘LALPA fak’ ve tûrin a chêttîr ang.