ZIR TUR THUZIAK 34
Bible Hrilh Lâwknate Aṭangin Inzir Rawh
“Mi fingte erawh chuan a ngaihna an hria ang.”—DAN. 12:10.
HLA 98 Pathian Thâwk Khum Lehkha Thute
THLIR LAWKNA a
1. Bible hrilh lâwknate zir nuam ti tûrin engin nge min ṭanpui ang?
ṬHAILAI unau Ben-a chuan, “Bible hrilh lâwknate zir chu nuam ka ti hle,” tiin a sawi a. Nuam i ti ve em? Nge ni a, Bible hrilh lâwknate chu hriatthiam harsa i ti zâwk? Chumi zir chu ninawm i ti pawh a ni hial thei. Mahse, Jehova’n a Thu Bible-a chûng thute a telh chhan i hriat chuan i ngaih dân i thlâk pawh a ni thei a ni.
2. He thuziakah hian eng nge kan sawiho vang?
2 He thuziakah hian Bible hrilh lâwknate kan zir a ngaih chhan bâkah, chûng thute kan zir theih dân tûr pawh sawiho a ni ang a. Tichuan, Daniela bu-a hrilh lâwkna pahnih hriatthiamnain tûna min ṭanpui theih dân pawh kan sawiho bawk ang.
BIBLE HRILH LAWKNATE KAN ZIR A NGAIH CHHAN
3. Bible hrilh lâwknate hre thiam tûrin eng nge kan tih ngai?
3 Bible hrilh lâwknate hre thiam tûr chuan ṭanpuina kan dîl a ngai a. He entîrna hi lo ngaihtuah ta ila. I la tlawh ngai lohna hmunah chu hmun leh a kawngte hre bel tak i ṭhian pakhatin a zinpui che a. Chu i ṭhianin a zinpui che avângin i lâwm hle ngei ang! Chutiang chiah chuan, Jehova chuan kan hma lam hun chu chiang takin a hria a. Chuvângin, Bible hrilh lâwknate hre thiam tûr chuan inngaitlâwm taka Jehova ṭanpuina kan dîl a ngai a ni.—Dan. 2:28; 2 Pet. 1:19, 20.
Bible hrilh lâwknate zirna chuan hma lam huna thil lo thleng tûrte atâna inbuatsaih tûrin min ṭanpui (Paragraph 4 en rawh)
4. Engvângin nge Jehova’n Bible-ah hrilh lâwknate a chuantîr? (Jeremia 29:11) (Milem en bawk rawh.)
4 Hmangaihna nei tak nu leh pate angin, Jehova chuan a fate’n nakin hun hlimawm tak an neih chu a duh a. (Jeremia 29:11 chhiar rawh.) Mahse, mihring nu leh pate ang lo takin, Jehova chuan hma lam hun dik takin a sawi lâwk thei a ni. Chuvângin, thil pawimawh tak lo thleng tûrte chu kan lo hriat lâwk theih nân hrilh lâwknate chu a Thu, Bible-ah a chuantîr a. (Is. 46:10) Bible hrilh lâwknate chu kan Pa vâna mi hnên aṭanga kan dawn thilpêk duhawm tak a ni. Mahse, engtin nge Bible-in a sawi lâwkte chu a lo thleng ngei ang tih i chian theih?
5. Max-a thiltawn aṭangin ṭhalaite’n eng nge an zir theih?
5 Kan ṭhalaite chu school-ah Bible zahna nei lote hual vêlin an awm a. Chutiang mite thusawi leh thiltihte chuan Thuhretu ṭhalaite chu rinhlelhna a neihtîr thei a ni. Unau Max-a thiltawn hi lo ngaituah ta ila. Ani chuan, “Ka tleirâwl chhoh chuan, ka nu leh pate zirtîrna hi thutak a nih leh nih loh, bâkah Bible hi Pathian thâwk khum a nih leh nih loh chungchângah rinhlelhna ka nei ṭan a ni,” tiin a sawi. A nu leh pate’n engtin nge an chhân lêt? “An rilru a hah hle tih ka hria a; mahse, zaidam takin min chhâng lêt a ni,” tiin a sawi a. Max-a nu leh pate chuan a zawhnate chu Bible aṭangin an chhânsak a. Ani ngei pawhin engemaw tih a nei ve bawk. “Bible hrilh lâwknate chu keimahin ka zir a, chuta ka thu hriatte chu ṭhalai dangte nên kan sawiho leh ṭhîn a ni,” tiin a sawi. Chu chuan eng nge a rah chhuah? Max-a chuan, “Chumi hnu aṭang chuan, keimah ngeiin Bible hi Pathian thâwk khum a ni tih ka ringnghet ta!” tiin a sawi belh a ni.
6. Rinhlelhna i neih chuan eng nge i tih ngai a, engvângin nge?
6 Max-a angin Bible-ah thutak a awm tih i ringhlel ṭan a nih chuan inthiam lo suh ang che. Mahse, hma i lâk vat erawh a pawimawh hle. A chhan chu, rinhlelhna chu tuiêk ang a ni a. Kan ngaihthah chuan, chu chuan kan thil hlu neih chu zawi zawiin a ei chhe thei a ni. I rinna ei chhe thei “tuiêk” eng pawh tibo tûr chuan, ‘Bible-in hma lam hun chungchâng a sawi hi ka ring em?’ tiin inzâwt ang che. Rinhlelhna i nei a nih chuan, Bible-a hrilh lâwkna thleng famkim tawhte chu zir ang che. Chu chu engtin nge i tih theih?
BIBLE HRILH LAWKNA ZIR DAN
Daniela anga Jehova rinna nei chho tûr chuan Bible hrilh lâwknate chu inngaitlâwm tak, chipchiar tak leh, chêttîrtu dik tak neiin kan zir tûr a ni (Paragraph 7 en rawh)
7. Hrilh lâwknate zir dân chungchângah Daniela’n eng entawn tûr nge a siam? (Daniela 12:10) (Milem en bawk rawh.)
7 Daniela’n hrilh lâwknate zir dân chungchângah entawn tûr ṭha tak a siam a. Ani chuan chêttîrtu dik tak, thutak hriat duhna neiin hrilh lâwknate chu a zir a. Jehova’n amah hriaa, a tehna thianghlimte mila nungte hnênah hriatthiamna a pe ang tih chu inngaitlâwm takin a pawm a ni. (Dan. 2:27, 28; Daniela 12:10 chhiar rawh.) Jehova ṭanpuina chu rinchhanin a inngaihtlâwmzia a lantîr a. (Dan. 2:18) Daniela chuan chipchiar takin a zir bawk. A hun laia hmuh theih Pathian thâwk khum Lehkha Thute aṭangin zir bingna a nei a ni. (Jer. 25:11, 12; Dan. 9:2) Engtin nge Daniela chu i entawn theih?
8. Engvângin nge mi ṭhenkhatin Bible hrilh lâwknate a thleng famkim tih chu an rin loh va, eng nge kan tih ang?
8 Chêttîrtu che chu enfiah rawh. Bible hrilh lâwknate zir tûra chêttîra i awm chhan chu thutak hriat duhna nasa tak i neih vâng a ni em? Chu chu a dik a nih chuan, Jehova’n a ṭanpui ang che. (Joh. 4:23, 24; 14:16, 17) Eng chhan dang vângin nge mi chuan hrilh lâwknate chu a zir mai theih? Mi ṭhenkhatin an zir chhan chu Bible hi Pathian thâwk khum a ni lo tih finfiahna hmuh an duh vâng a ni. Bible hi Pathian hnên aṭanga lo kal a nih loh chuan thil ṭha leh ṭha lo chungchângah mahniin tehna an siam thei niin an ngai a. Chuvângin, chêttîrtu dik kan neih a ngai a ni. Chu bâkah, Bible hrilh lâwknate hre thiam tûr chuan mize pawimawh tak pakhat kan neih a ngai bawk.
9. Bible hrilh lâwknate hre thiam tûrin eng mizia nge kan neih ngai? Hrilhfiah rawh.
9 Inngaihtlâwmna nei rawh. Jehova chuan mi inngaitlâwmte chu ṭanpui a tiam a. (Jak. 4:6) Chuvângin, Bible hrilh lâwknate hre thiam tûr chuan a ṭanpuina dîla kan ṭawngṭai a ngai a ni. Chu bâkah, a hun taka thlarau lam chaw min pe tûra a mi ruatte ṭanpuina kan mamawh tih kan pawm a ngai bawk. (Lk. 12:42) Jehova chu buaina Pathian a nih loh avângin, a Thu-a chuang thutakte hre thiam tûra min ṭanpui tûrin pâwl khat chauh a hmang chu a inâwm hle.—1 Kor. 14:33; Eph. 4:4-6.
10. Esther-i thiltawn aṭangin eng nge i zir theih?
10 Chipchiar takin zir rawh. A hmasain, i ngaihven tûr hrilh lâwkna pakhat chu thlangin, zir bingna nei ang che. Chutiang chuan unaunu Esther-i’n a ti a ni. Ani chuan Messia lo lan tûr thu hrilh lâwknate chu a ngaihven hle a. “Kum 15 mi ka nih chuan, chûng hrilh lâwknate chu Isua pian hmaa ziah a ni tih finfiahnate ka zawng ṭan a ni,” tiin a sawi. Tuipui Thi Lehkha zial chungchâng a zirna chuan finfiahna a pe a ni. Ani chuan, “chûng lehkha zial ṭhenkhat chu Krista hun hmaa ziah a nih avângin, hrilh lâwknate chu Pathian hnên aṭanga lo kal a ni ngei ang. Mahse kan thu chhiarte hre thiam tûr chuan vawi eng emaw zât ka chhiar a ngai,” tiin a sawi. Theih tâwp chhuaha a zirna chuan hlimna a pe a ni. Bible hrilh lâwkna eng emaw zât chipchiar taka a zir hnuah, ani chuan, “Bible hi a dik tih keimah ngeiin ka sawi thei ta,” tiin a sawi.
11. Bible hi a dik tih mahni ngeiin chianna chu engtin nge kan hlâwkpui?
11 Pathian thua chuang hrilh lâwkna thleng famkim tawhte kan hmuh hian Jehova chungah leh min kaihhruai dânah tihchhiat rual lova nghet rinna kan nei chho a ni. Tûnah eng ang harsatna pawh tâwk mah ila, Bible hrilh lâwknate chuan hma lam hun êng tak beiseina vawng tlat tûrin min ṭanpui a ni. Daniela hrilh lâwkna pahnih tûna thleng famkim mêk chu i lo en ang u. Chumi hriatthiamna chuan thu tlûkna fing siam tûrin min ṭanpui thei a ni.
THIR LEH HLUM INPAWLH KEPHAHIN A NGHAWNG DAN CHE
12. “Thir leh hlum nêm inpawlh” kephah chuan eng nge a entîr? (Daniela 2:41-43)
12 Daniela 2:41-43 chhiar rawh. Daniela hrilhfiah Lal Nebukadnezzara’n mumanga a hmuh milim kephah chu “thîr leh hlum nêm inpawlh” a ni a. He hrilh lâwkna hi Daniela bu leh Thu Puan bua hrilh lâwkna dangte nêna khaikhinin, chu kephah chuan tûn laia khawvêl thuneitu Anglo-American ṭangrual chu a entîr tiin thu tâwp kan siam thei a ni. Chu khâwvêl thuneitu chungchângah, “ram chu a ṭhenah chuan a chak anga, a ṭhenah chuan a chhe awl ang,” tiin Daniela chuan a sawi a. Engvângin nge a ṭhenah a chhiat awl? A chhan chu, hlum nêmin a entîr mi nâwlpuite chuan thîr anga a chakna hmang thei lo tûra an siam vâng a ni. b
13. He hrilh lâwkna hriatthiamna aṭangin eng thutak pawimawh takte nge kan zir?
13 Daniela hrilhfiah mumanga milim leh a bîk takin a kephahte aṭangin thutak pawimawh takte kan zir thei a. A hmasain, Anglo-American Khawvêl Thuneitu chuan a chakzia kawng ṭhenkhatin a lo lantîr tawh a. Entîr nân, United States leh British chuan Indo Pui I-naah leh Indo Pui II-naahte hnehna an chang a. Mahse, he khawvêl thuneitu hian a chakna a hlauh ṭhen tawh a, a khua leh tuite inkâra inlungrual lohna chuan a tichak lo chhun zawm zêl ang. A dawtah, he Anglo-American Khawvêl Thuneitu hi Pathian Ramin mihring lalram zawng zawng a tihchhiat hmaa ding tûr khawvêl thuneitu hnuhnûng ber a ni. Ram dangte chuan ani chu khûm tum ṭhîn mah se, an thei chuang lo vang. A chhan chu, milim kephah Anglo-American ṭangrual chu ‘lungin’ a entîr Pathian ramin a tihchhiat dâwn vâng a ni.—Dan. 2:34, 35, 44, 45.
14. Engtin nge milim kephah thir leh hlum chungchâng hriatthiamna chuan thu tlûkna fing siam tûra min ṭanpui theih?
14 Milim kephah thîr leh hlum chungchânga Daniela hrilh lâwkna chu a dik tih i ring em? I ring a nih chuan, i nun i hman dânah nghawng a nei ngei ang. Rei lo têa tihchhiata awm tûr khawvêlah sum leh paia himna i zawng lo vang. (Lk. 12:16-21; 1 Joh. 2:15-17) Chu bâkah, chu hrilh lâwkna hriatthiamna chuan thu hrilh leh zirtîra siam hna pawimawhna hre tûrin a ṭanpui bawk ang che. (Mt. 6:33; 28:18-20) He hrilh lâwkna chungchâng i zir hnuah ti hian inzâwt ang che, ‘Ka thu tlûkna siamte chuan rei lo têah Pathian Ramin mihring sawrkârna zawng zawng a rawn titâwp ang tih ka rinzia a târ lang em?’ tiin.
“HMAR LAM LAL” LEH “CHHIM LAM LALIN” A NGHAWNG DAN CHE
15. Tûn laia ‘hmâr lam lal leh chhim lam lal’ chu tute nge an nih? (Daniela 11:40)
15 Daniela 11:40 chhiar rawh. Daniela bung 11-na chuan khawvêl thuneihna chan tuma inep lal pahnih, a nih loh leh politics thuneihna chungchâng a sawi a. He hrilh lâwkna leh Bible-a hrilh lâwkna dangte khaikhinin “hmâr lam lal” chu Russia leh a thurualpuite an ni tih leh ‘chhim lam lal’ chu Anglo-American khawvêl thuneitu a ni tih kan hre thei a ni. c
‘Hmâr lam lal leh chhim lam lal’ dodâlnain Bible hrilh lâwknate a thlen famkimtîr tih kan hriatna chuan, kan rinna a tichak theiin, a lutuka lungkhamna pumpelh tûrin min ṭanpui ang (Paragraph 16-18 en rawh)
16. “Hmâr lam lal” thuneihna hnuaia awm Pathian mite chuan eng harsatna nge an tawh?
16 “Hmâr lam lal” thuneihna hnuaia awm Pathian mite chuan tihduhdahna an tuar a. Thuhretu ṭhenkhat chu an rinna avângin vuak leh lung ina tântîr an ni a. Mahse, “hmâr lam lal” thiltihte chuan chûng unaute chu hlauhtîr ahnêkin an rinna a tinghet lehzual a ni. Engvângin nge? Pathian mite tihduhdahna chuan Daniela hrilh lâwkna thute a thlen famkimtîr tih an hriat vâng a ni. d (Dan. 11:41) Chumi hriatna chuan keini pawh beiseina tinghet reng tûr leh rinna vawng reng tûrin min ṭanpui thei a ni.
17. ‘Chhim lam lal’ thuneihna hnuaia awm Pathian mite chuan eng harsatnate nge an tawh?
17 Hun kal tawhah ‘chhim lam lal’ pawhin Jehova mite chu a tiduhdah a. Entîr nân, kum zabi 20 tîr lamah khân unau tam tak chu an Kristian tualdawihna avângin lung ina tântîr an ni a, Thuhretu naupangte pawhin chumi chungchâng avâng chuan school aṭanga hnawhchhuah an tâwk a ni. Mahse, tûn hnai kumahte khân chu lal thuneihna hnuaia awm Pathian mite rinawmna chu kawng danga fiahin a awm a. Entîr nân, inthlanpui hun chhûngin Kristiante chuan politics party pakhat emaw, an candidate emaw chu thlâwp duhna kan nei thei a. Vote thlâk lo mah ila, chutiang hunah chuan rilruah ṭan lam kan nei palh thei a ni. Chuvângin, kan thiltih mai bâkah, kan ngaihtuahna thlenga tualdawihna vawn tlat chu a va pawimawh tak êm!—Joh. 15:18, 19; 18:36.
18. Engtin nge ‘hmâr lam lal leh chhim lam lal’ inbeihna chuan min nghawng? (Milem en bawk rawh)
18 Bible hrilh lâwkna ring lotute chu “chhim lam lalin” “hmâr lam lal” a “nawr” an hmuh hunah nasa takin an mangang thei a. (Dan. 11:40) Lal pahnihte chuan khawvêla nunna zawng zawng tiboral thei nuclear râlthuam an nei a ni. Mahse, Jehova’n chutiang chu thlentîr a phal lo vang tih kan hria a. (Is. 45:18) Chuvângin, ‘hmâr lam lal leh chhim lam lal’ innawrna chuan tâwpna a hnai tih a nemngheh avângin, hma lam hun atâna lungkham aiin chu chuan kan rinna a tinghet zâwk a ni.
HRILH LAWKNATE CHU NGAIHVEN ZAWM ZEL RAWH
19. Bible hrilh lâwknate chungchângah eng nge kan hriat ang?
19 Bible hrilh lâwkna ṭhenkhat a thlen famkim dân tûr chu kan hre lo va. Zâwlnei Daniela pawhin a thu ziah zawng zawng awmzia chu a hre thiam vek lo. (Dan. 12:8, 9) Mahse, hrilh lâwkna eng emaw thlen famkim dân tûr kan hriat loh mai avângin, chu chu a thleng famkim lo vang tihna a ni lo. Jehova’n tûn hmaa a tih ṭhin angin a hun dik takah kan hriat atâna pawimawh chu hre thiam tûrin min ṭanpui ang tih kan ring nghet tlat thei a ni.—Amos. 3:7.
20. Eng Bible hrilh lâwkna phûrawm takte nge lo thleng famkim thuai ang a, eng nge kan tih zawm zêl ang?
20 “Muanna leh himna” chu puan a ni ang. (1 Thes. 5:3) Tichuan, khawvêl politics thuneihna chuan sakhaw dik lo chu beiin a tiboral ang a. (Thup. 17:16, 17) Chumi hnuah Pathian mite chu an bei ang. (Ezek. 38:18, 19) Chûng thilthleng zawng zawngte chuan Armageddon indona hnuhnûng ber chu a thlentîr dâwn a ni. (Thup. 16:14, 16) Chûng zawng zawng chu a lo thleng thuai ang tih kan chiang thei a. Chûngte a lo thlen hma chuan Bible hrilh lâwknate ngaihven tlatin leh mi dangte pawh chutianga ti tûra ṭanpuiin, kan Pa vâna mi chunga kan lâwmzia i lantîr chhun zawm zêl ang u.
HLA 95 Eng Chu A Eng Zual
a Khawvêl dinhmun chu eng ang khawpin chhe mah se, hma lam hun hlimawm takin min hmuak tih kan ring nghet tlat thei a. Chu rinnghehna chu Bible hrilh lâwknate zirna aṭangin kan nei thei a ni. He thuziakah hian, Bible hrilh lâwkte kan zir a ngaih chhante kan hria ang a. Chu bâkah, Daniela hrilh lâwkna thu pahnih zir chiangin, chumi hriatthiamna chu mi mal taka kan hlâwkpui theih dân kan hre bawk ang.
b Vênnainsâng June 1, 2012 chhuaka “Jehova Chuan ‘Thil Lo Awm Lawk Tûr’ A Puang Chhuak,” tih thuziak par. 7-9 chu en rawh.
