Chu thuziakah chuan, mihringte leh vântirhkohte chunga nghawng nei thubuai pawimawh tak pakhat kan zir a: Jehova hming ropui tak tihthianghlimna chungchâng a ni. Lei leh vâna thu buai—Jehova rorêl dân chu a ṭha ber—tih chu, chu thu buai nêna inkûngkaih a ni a. Chutiang bawkin, mihringte rinawmna chungchânga thu buai hi chu thu buai lian tak nêna inzawm a ni bawk.

Tûnah, engvângin nge thu buai lian ber chu Jehova hming leh chumi tihthianghlimna nêna a inkûngkaih tlat tia kan sawi theih? A chhan pathum i lo chhût ang u.

Pakhatna, Eden huanah khân, Setana chuan Jehova hming, a nih loh leh hming ṭhatna chu a do a ni. Setana’n fing vervêk taka Evi hnêna zawhna a zawhte chuan Jehova chu a mihring siamte a lutuka khuahkhirhtu, Pathian thil phal lo tak angin a chhuah a. Chumi hnuah, Jehova thusawi nêna inkalh chiah thu sawiin, Pathian chu dâwt sawiah a puh a ni. Chutiang chuan, Jehova hming chu a sawi chhia a. Ani chu “sawichhetu” tih awmze nei “Diabola” a lo ni ta a ni. (Joh. 8:44) Evi’n Pathian thu zâwm lova Setana dâwt thu a awih avângin, a lalchungnunna lakah a hel a. (Gen. 3:1-6) Vawiin nî thleng hian, Setana chuan Jehova chungchânga dâwt thu thehdarhin Pathian hming a la sawichhe reng a ni. Chûng dâwt thu ringtute chuan Jehova thu an zâwm duh lo tlângpui ṭhîn. Chuvângin, Pathian mite tân Jehova hming thianghlim sawichhiatna chu thil fel lo lian ber a ni a. Chu chu khawvêla chhiatna leh suahsualna zawng zawng lo chhuahna bul ber a ni.

Pahnihna, thil siam zawng zawng ṭhatna atân, Jehova chuan a hming chu sawichhiatna zawng zawng lak ata tihthianghlim a tum a ni. Chu chu Jehova tâna thil pawimawh ber a ni. Chuvângin, heti hian a sawi: “Ka hming ropui tak . . . chu ka tithianghlim dâwn a ni,” tiin. (Ezek. 36:23) Isua pawhin: “I hming zahawm rawh se,” tia a sawi khân, Jehova chhiahhlawh rinawm zawng zawngte’n ṭawngṭainaa an ngaih pawimawh ber tûr chu chiang takin a târ lang a ni. (Mt. 6:9) Bible chuan Jehova hming chawimawi a pawimawhzia chu a sawi nawn fo va. Chûng zînga tlêm azâwng chu han ngaihtuah teh: “LALPA chu a hming ropuina bel ula.” (1 Chro. 16:29; Sâm 96:8) “A hming ropuizia chu hlain sa chhuak ula.” (Sâm 66:2) “I hming hi kumkhuain ka chawimawi ang.” (Sâm 86:12) Jehova aw an hriatna zînga ṭum khat chu, Jerusalema biak ina Isua’n: “Ka Pa, i hming chawimawi rawh,” tia a sawi khân a ni a. Chumi ṭum chuan Jehova ngeiin: “Ka chawimawi tawh, ka chawimawi leh bawk ang,” tiin vân aṭangin a chhâng a ni.—Joh. 12:28. a

Pathumna, Jehova thiltum chuan a hming nên inkûngkaihna a nei. Hei hi han ngaihtuah teh: Krista Kum Sâng Rorêl hnua awm tûr fiahna hnuhnûng ber zawhah eng nge thleng ang? Mihringte leh vântirhkohte chu thu buai lian tak, Jehova hming tihthianghlimna thu buai chungchângah thu khat vuan thei lovin an la awm ang em? Chumi zawhna  chhâng tûr chuan, kan sawi tâk inkûngkaihna nei thil pahnih—mihringte rinawmna leh lei leh vâna lalchungnunna—lo ngaihtuah leh ta ila. Rinawmna lantîr tawh mihringte chuan rinawmna lantîr chu harsa an la ti zêl ang em? Ti tawh lo vang. Anni chuan ṭha famkim niin fiahna hnuhnûng ber an hmachhawn ang. Chatuana nunna chu an chang mai tawh dâwn a ni. Lei leh vâna lalchungnunna chu mihringte leh vântirhkohte zînga ṭhendarhna hial thlen theitu thupui ber a la ni ang em? Ni tawh lo vang. Jehova rorêl dân chu a ṭha ber a ni tih chatuan atâna finfiah a ni tawh ang. A nih chuan, Jehova hming chungchâng hi eng nge ni ve?

Jehova hming chu chutih hunah chuan tihthianghlim pumhlûm a ni tawh dâwn a, sawichhiatna lakah a fihlîm tawh ang. Mahse, Jehova hming chu lei leh vâna a chhiahhlawh rinawm zawng zawngte tâna thil pawimawh ber a la ni chhunzawm zêl ang. Engvângin nge? Jehova’n thil mak tam tak a ti chhunzawm zêl chu an hmuh dâwn vâng a ni. Han ngaihtuah teh: Isua chuan a thuneihna zawng zawng chu inngaitlâwm takin Jehova kuta a hlan kîr dâwn avângin, Pathian chu “engkima engkim” a ni tawh ang. (1 Kor. 15:28) Chumi hnuah chuan, leia mihringte chu “Pathian fate zalênna ropuiah chuan” hlim takin an lût tawh ang. (Rom 8:21) Tichuan, Jehova chuan lei leh vâna a thil siam zawng zawngte chhûngkaw inlungrual taka chantîr tûra a thiltum chu a hlen tawh ang.—Eph. 1:10.

Engtin nge chûng thilthlengte chuan lei leh vâna Jehova chhûngkuate chunga nghawng a neih ang? Chiang takin, Jehova hming mawi tak chu fak duhna nasa tak kan la nei reng ang. Fakna hla phuahtu Davida chuan thlarauva thâwk khumin: “LALPA . . . Pathian chu, fakin awm rawh se, . . . A hming ropui tak hi kumkhuain fakin awm bawk sela,” tiin a ziak a ni. (Sâm 72:18, 19) Chatuanin chutianga tihna tûr chhan thar leh phûrawm takte kan nei zawm zêl ang.

Jehova hming chuan a chungchâng engkim a târ lang a. Mahse, a hming chuan a bîk takin, a hmangaihna min hriatchhuahtîr a ni. (1 Joh. 4:8) Jehova chuan hmangaihna avângin min siam a, tlanna inthawina min pein, fel takin ro a rêl tih chu kan hre reng tawh ang a. A thil siamte chunga hmangaihna a lantîr zêl dân chu kan hmu zawm zêl bawk ang. Chatuanin, Kan Pa a nih anga amah hnaih tûr leh a hming ropui tak faka zai tûra chêttîrin kan awm ang.—Sâm 73:28.