1. Engvângin nge zâwlnei Daniela chuan Babulon mite rilru a hneh?

 ZAWLNEI Daniela chu a pianna Jerusalem aṭanga hla tak Babulona hruai a nih khân, tleirâwl mai a la ni a. Mahse, Daniela chuan Babulon thuneitute mit a la hle a ni. Anni chuan “pâwn lama lan dân” chu enin—Daniela chu “demna awm lo, hmêl ṭha tak” leh chhûngkaw pawimawh tak aṭanga lo kal a ni tih an hria a. (1 Sam. 16:7) Chuvângin, Babulon mite chuan ani chu lal ina rawngbâwltu zînga mi ni tûrin an zirtîr a ni.—Dan. 1:3, 4, 6.

2. Engtin nge Jehova’n Daniela chu a ngaih? (Ezekiela 14:14)

² Jehova chuan Daniela chu a hmangaih a; chu chu pâwn lama a lan dânte leh lal ina a chanvo neihte vâng ni lovin, Pathian hmangaih zâwng mi ni tûra a duhthlanna vâng a ni. Dik tak chuan Jehova’n Daniela chu kum tam tak chhûng Pathian hmaa hming ṭhatna vawngtu Nova leh Jobate anga mi fel tak nia a târ lan lai khân, kum 20 vêl chauh a la ni a. (Gen. 5:32; 6:9, 10; Job. 42:16, 17; Ezekiela 14:14 chhiar rawh.) Chu bâkah, ani chuan a dam chhûngin Pathian Jehova hmangaih a hlawh a ni.—Dan. 10:11, 19.

3. He thuziakah hian eng nge kan sawiho vang?

³ He thuziakah hian, Jehova tâna mi duhawm tak nihtîrtu Daniela mizia pahnihte kan bih chiang ang. A hmasain, chûng miziate a lantîrna hmun leh hun kan sawiho vang a. A dawtah, chûng miziate nei tûra Daniela ṭanpuitu leh pathumnaah, amah kan entawn theih dân kan sawiho bawk ang. He thuziak hi ṭhalaite tâna ziah ni mah se, kan za vai hian Daniela entawn tûr siam aṭangin kan inzir ṭheuh thei a ni.

4. Engtin nge Daniela chuan huaisenna a lantîr? Entîrna pe rawh.

⁴ Mi huaisente chuan hlauh châng nei mah se, chu chu thil dik tih loh phah nân an hmang lo. Daniela chu ṭhalai huaisen tak a ni a. Huaisenna a lantîrna dinhmun pahnih i lo ngaihtuah ang u. A hmasa zâwk chu Babulon mite’n Jerusalem an tihchhiat hnu kum hnih vêla thilthleng ni âwm takin a lang. Babulon Lal Nebukadnezzara chuan milim hrawl tak chungchâng mumang ṭihbaiawm tak a nei a ni. A mumang chungchângte leh chumi awmziate chu an hrilhfiah theih loh chuan Daniela pawh telin, a mi fing zawng zawngte chu tihlum vek tûrin a vau va. (Dan. 2:3-5) Chuvângin, Daniela’n hma a lâk vat loh chuan an nun an chân vek dâwn a ni. Daniela chu lal inah “a lût a, lal chu a hrilhfiahna a entîr theih nân hun kian tûrin a ngên a.” (Dan. 2:16) Chu chuan Daniela huaisenna leh rinna a târ lang a ni. Chumi hma chuan Daniela’n mumang a hrilhfiah tawh tih târ lanna a awm lo. Ani chuan Sadraka, Mesaka, leh Abednegoa tia Babulon mite hming pêk a ṭhian pathumte chu ‘chu thu inthup chungchângah vân Pathian khawngaihna dîl tûrin’ a ngên a. (Dan. 2:18) Jehova chuan an dîlna chu a chhâng a ni. Pathian ṭanpuinain, Daniela chuan Nebukadnezzara mumang chu a hrilhfiah a. Tichuan, Daniela leh a ṭhian pathumte nunna chu chhanhim a ni ta a ni.

5. Daniela chuan huaisenna chungchângah eng fiahna dang nge a la hmachhawn?

⁵ Daniela chuan milim hrawl tak chungchâng mumang a hrilhfiah hnuah, a huaisenna chu fiah a ni leh a. Nebukadnezzara chuan mumang ṭihbaiawm tak dang a nei leh a ni. Chu a mumangah chuan thingkûng lian tak pakhat a hmu a. Daniela chuan lal chu a rilru buaiin, hun engemawti chhûng chu a lalna pawh a hloh vang tih hrilhfiahna pawh telin, a mumang awmzia chu huaisen takin a hrilh a ni. (Dan. 4:25) Lal tân chu a hrilhfiahna thu chu a lalram chunga helna anga thlîrin Daniela chu tihhlum theih a ni a. Mahse, Daniela chuan mumang awmzia chu huaisen takin a hrilhfiah a ni.

6. Daniela huaisen tûra ṭanpuitu chu eng nge ni thei ang?

⁶ Daniela dam chhûng zawnga huaisen tûra ṭanpuitu chu eng nge ni thei ang? A tleirâwl lai aṭangin a nu leh pate entawn tûr siam chu a zir  tih rinhlelh rual a ni lo. Jehova’n Israel nu leh pate hnêna a pêk kaihhruainate chu zâwmin, Pathian Dânte chu an fate an zirtîr tih a chiang a ni. (Deut. 6:6-9) Daniela chuan Thusâwm pêk ang chi, Dân bulte chauh ni lovin, Israel mite ei theih leh ei theih loh chungchângte pawh chipchiar takin a hria a ni. b (Lev. 11:4-8; Dan. 1:8, 11-13) Ani chuan hmân laia Pathian mite chanchin a zir bawk a, Jehova tehnate an zawm loh avânga an chunga thilthlengte pawh a hria a ni. (Dan. 9:10, 11) A dam chhûnga a thiltawnte chuan Daniela chu eng thil pawh thleng se, Jehova leh a vântirhkoh thiltithei takte chuan an ṭanpui ang tih a rinnghehtîr a ni.—Dan. 2:19-24; 10:12, 18, 19.

7. Daniela huaisenna nei tûra ṭanpuitu dang leh chu eng nge ni? (Milem en bawk rawh.)

⁷ Daniela chuan Jeremia hrilh lâwkte pawh tiamin, Pathian zâwlneite thuziak tam tak a zir a. Chutianga a zirna aṭangin Babulona Judate rei tak an sal tâna chu a tâwp thuai dâwn tih a hria a ni. (Dan. 9:2) Bible hrilh lâwknate thlen famkimna a hmuhna chuan Jehova a rinna a tinghet lehzual a, chutianga Pathian chunga rinna nghet tak neitute chuan huaisenna nasa tak an nei a ni. (Rom 8:31, 32, 37-39 nên khaikhin rawh.) A pawimawh ber chu Daniela’n a Pa vâna mi hnêna a ṭawngṭai fo hi a ni a. (Dan. 6:10) Jehova hnênah a sualna thupha chawiin, a rilrua awmte a hrilh a. A ṭanpuina a dîl bawk a ni. (Dan. 9:4, 5, 19) Ani chu keimahni ang mihring a nih avângin huaisenna chu a pianpui mizia a ni bîk lo. Chu aiin, a huaisenna mizia chu inzirna, ṭawngṭaina, leh Jehova a rinchhanna aṭanga a neih chho a ni.

8. Engtin nge huaisenna kan neih chho theih?

⁸ Huaisenna nei chho tûrin eng nge kan tih ngai? Kan nu leh pate chuan huaisenna nei tûrin min fuih thei a; mahse, an huaisenna chu min hlân chhâwng thei lo. Huaisenna chu thiamna thar kan neih ang bawka neih theih a ni a. Thiamna sâng tak neih theih dân kawng khat chu zirtîrtu thiltih dânte ngun taka en a, a entawn tûr siamte zui hi a ni. Chutiang bawkin, mi dangte’n chu mizia an lantîr dân chu ngun taka enna leh an entawn tûr siamte zuina hmangin huaisen dân kan zir thei a ni. A nih leh, Daniela hnên aṭangin eng nge kan zir? Amah anga Pathian Thu ṭha taka kan hriat a ngai a. Jehova hnênah inthlahrung lova, kan rilrua awmte hrilh ziahna hmangin amah nên inlaichînna nghet tak kan siam tûr a ni. Min ṭanpui ang tih ring tlatin Pathian Jehova kan rinchhan a ngai a. Tichuan, kan rinna fiah a nih hunah huaisenna kan nei ngei ang.

9. Engtin nge huaisenna neih chu kan hlâwkpui?

⁹ Huaisenna neih chu kawng tam takin kan hlâwkpui a. Ben-a thiltawn hi han ngaihtuah teh. Ani chu German rama school pakhatah a kal a, a school kalpuite chuan chanchhâwnna an ring a, Bible-a chuang thilsiam chungchâng chu thawnthu mai niin an ngai a ni. Ni khat chu zirlaite hmaa dingin Bena chu nun hi siam a ni tih a rin nachhan hrilhfiah theihna hun remchâng pêk a ni a. A rinna chu huaisen takin a hrilhfiah a ni. Chu chuan eng nge a rah chhuah? Ben-a chuan, “Kan zirtîrtu chuan ngun takin min ngaithla a, thusawinaa ka hman thuziakte chu copy siamin, ka classmate zawng zawngte chu a sem a ni,” tiin a sawi. Engtin nge a classmate-te chuan an chhân lêt? “A tam zâwk chuan ka thusawi chu an ngaithla a, min ngaihsân thu an sawi,” tiin a sawi bawk. Ben-a thiltawn chuan mi huaisente chu mi dangte zah an hlawh ṭhîn tih a târ lang. Anni chuan mi rilru ṭha pute chu Pathian Jehova lamah an hîp  thei bawk a ni. Huaisenna neih chhan tûr ṭha tak kan nei tih a chiang hle.

10. Rinawmna chu eng nge ni?

¹⁰ Bible-a “rinawmna,” a nih loh leh “hmangaihna rinawm” tih Hebrai thu mal chu Pathianin a chhiahhlawhte chunga a hmangaihzia lantîr nâna hman hmangaihna duhawm tak nêna inkûngkaiha hman a ni fo ṭhîn. Chu thu mal vêk chu Pathian chhiahhlawhte zînga lantîr hmangaihna sawi nâna hman a ni bawk. (2 Sam. 9:6, 7) Kan rinawmna chu hunte a liam zêl rualin a nghet chho zêl a. Chumi dikzia chu Daniela thiltawn aṭangin i lo ngaihtuah ang u.

11. Engtin nge Daniela chu a upat lamah a rinawmna fiah a nih? (A kâwma milem en rawh.)

¹¹ Daniela chu a dam chhûngin Jehova chunga a rinawmna fiah a ni a. Kum 90 vêl a nih chuan fiahna khirh tak a hmachhawn a ni. Chutih lai chuan, Babulon chu Media leh Persia-te’n an la a, Lal Daria thuneihna hnuaiah a awm a ni. Lal ina rawngbâwlte chuan Daniela chu an duh lo va, a biak Pathian pawh zahna an nei lo. Chuvângin, Daniela chu tihhlum dân kawng an zawng ta a ni. Anni chuan Daniela chu a Pathian chungah nge a rinawm dâwn lal chungah tih fiah nân lal chu thu pêk an chhuahtîr a. Daniela’n lal chunga a rinawmna lantîra hremna a pumpelh theih dân awmchhun chu ni 30 chhûng Jehova hnêna a ṭawngṭai bansan hi a ni. Mahse, Daniela chuan Jehova chunga rinawm a thlang zâwk a. Chuvângin sakeibaknei pûka paih a ni a. Mahse, Pathian Jehova chuan sakeibaknei “kâte” ata chhan chhuakin Daniela rinawmna chu mal a sâwm a ni. (Dan. 6:12-15, 20-22) Engtin nge Daniela anga Jehova chunga kan rinawm tlat theih?

12. Engvângin nge Daniela chu Jehova chunga a rinawm tlat?

¹² Kan sawi tâk angin, rinawmna chu hmangaihna nasa tak aṭanga lo awm a ni a. Daniela’n Jehova chunga rinawmna nghet tak a neih theih chhan chu a Pa vâna mi a hmangaih êm vâng a ni. Chu a hmangaihna chu Jehova miziate leh chûng mizia a lantîr dân kawngte a ngaihtuahna aṭanga lo awm a ni tih a chiang hle. (Dan. 9:4) Chu bâkah, Jehova’n a tân leh A mite tâna thil ṭha a tihsak zawng zawngte chu lâwm takin a chhût ngun bawk.—Dan. 2:20-23; 9:15, 16.

13. (a) Ṭhalaite rinawmna chu eng anga fiah nge a nih? Entîrna pe rawh. (Milem en bawk rawh.) (b) Video-a târ lan angin, mite chuan Jehova Thuhretute’n neih inang kawp chîngte an thlâwp leh thlâwp loh an zawh che chuan engtin nge i chhân ang?

 ¹³ Daniela ang bawkin, kan ṭhalaite chu Jehova leh a tehna zah lotute hual vêlin an awm a. Chutiang mite chuan Pathian hmangaihtu nia inchhâl tawh phawt chu an duh lo va. Mi ṭhenkhat chuan Pathian chunga an rinawmna chu tihchhiat tumin, kan ṭhalaite chu hnehchhiah an tum a ni. Entîr nân, Australia rama ṭhalai Graeme-a chunga thilthleng hi lo chhinchhiah teh. Ani chuan high school a kal laiin dinhmun khirh tak a hmachhawn a. Zirtîrtu chuan zir lai naupangte chu an ṭhian tu emawin neih inang kawp chîng mi a ni tih a hrilh huna an chhân lêt dân tûr a zâwt a. Zirtîrtu chuan zirlai naupang zawng zawng hnênah chûng neih inang kawp chîng mite thlâwptute chu room sîr lama ding tûr leh a thlâwp lotute chu a lehlam sîra ding tûrin a hrilh a. Graeme-a chuan, “Kei leh Thuhretu dang pakhat tih loh mi dang zawng zawng chu neih inang kawp chîng mite thlâwptu lamah an ding vek a ni,” tiin a sawi. A hnua thilthleng chu Jehova chunga Graeme-a rinawmna fiahtu dik tak a ni. Ani chuan, “Class-a lehkha kan zir chhûng chuan zirlai naupang dangte leh zirtîrtu ngei chuan min diriam a. Ka rinna chu theih tâwp chhuahin zaidam tak leh an hriatthiam tûr zâwnga hrilhfiah ka tum a; mahse, ka thusawi chu an ngaithla duh lo,” tiin a sawi bawk. Chu a rinawmna fiahna chuan Graeme-a chu eng angin nge a nghawng? Ani chuan, “Chutianga ṭawngkama an diriam nih chu duh lo mah ila, Jehova chunga ka rinawm tlat theih avâng leh ka rinna ka humhim theih avângin ka hlim tak zet a ni,” tiin a sawi. c

14. Jehova chunga kan rinawm tlat theih dân kawng khat chu eng nge ni?

¹⁴ Daniela anga Jehova hmangaihna thûk tak kan neih chuan a chungah kan rinawm tlat thei ang. Chu hmangaihna chu Jehova miziate kan zirna aṭangin kan nei chho thei a ni. Entîr nân, a thil siamte kan zir thei a. (Rom 1:20) Jehova hmangaihna leh zahna thûk tak neih i duh chuan “Siam A Ni Em?” tih thuziak inzawma thuziak tâwite chu chhiar la, a nih loh leh video-te en ang che. Chu bâkah, Was Life Created? leh The Origin of Life—Five Questions Worth Asking, tih brochure te chu i chhiar thei bawk. Chûng thu leh hla chhuahte chungchângah Denmak rama ṭhalai unaunu Esther-i chuan: “Chûng lehkha thua hrilhfiahnate chu ṭha tak a ni. Brochure-te chuan rin tûr leh tûr loh min hrilh lo va, thil awm dân leh nih dânte tluang tlam taka târ langin, mahniin thu tlûkna min siamtîr mai a ni,” tiin a sawi. Kan târ lan tâk Ben-a chuan: “Chu thuziak chuan ka rinna a tichak hle a. Chu chuan nun hi Pathian siam a nihzia min rin nghehtîr,” tiin a sawi bawk. Chûng thuziakte i zir hnuah: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a,” tia Bible-in a sawi chu i pawm ve ngei ang.—Thup. 4:10, 11. d

15. Jehova kan hmangaihna tihngheh lehzual theih dân kawng dang chu eng nge ni?

¹⁵ Jehova kan hmangaihna tihngheh lehzual theih dân kawng dang chu a Fapa Isua nun kawng chanchin ngun taka zir hi a ni a. German rama ṭhalai Unaunu Samira-i chuan chutiang chuan a zir a ni. Ani chuan: “Isua kal tlangin Jehova ka hre chiang lehzual a ni,” tiin a sawi. A naupan lai chuan Jehova’n rilru vei zâwng a nei tih chu hriatthiam harsa a ti hle a. Mahse,  Isua rilru vei zâwngte erawh a hre thiam thei a ni. Ani chuan, “Isua chu a nêlawmna leh naupangte a hmangaihna avângin ka duh a ni,” tiin a sawi belh bawk. Isua chungchâng a zir tam poh leh Jehova a hmangaih lehzual a. Engvângin nge? Ani chuan: “Isua’n a Pa chu ṭha famkimin a entawn tih ka hre thiam chho zêl a. Inanna tam tak an nei a ni. Jehova’n Isua leia a rawn tirh chhan zînga pakhat chu mihringte’n amah an hriat chian lehzual theih nân a ni tih ka hre thiam ta a ni,” tiin a sawi. (Joh. 14:9) Jehova i hmangaihna tihngheh i duh chuan, engvângin nge theih tâwp chhuaha Isua chungchâng zir nân hun i pêk loh vang? Chutianga i tih chuan, Jehova i hmangaihna leh a chunga i rinawmna chu a nghet chho zêl ang.

16. Engvângin nge kan rinawm ang? (Sâm 18:25; Mika 6:8)

¹⁶ Mi rinawmte chuan ṭhiante nêna inṭhianna nghet tak an nei ṭhîn. (Rut. 1:14-17) Chuvângin, Jehova chunga rinawmte chuan chhûngrila thlamuanna neih nachhan tûr ṭha tak an nei a ni. Engvângin nge? Ani chuan a chunga rinawmte chu an chungah pawh a rinawm ang tih a tiam a ni. (Sâm 18:25; Mika 6:8 chhiar rawh.) Han ngaihtuah lawk teh—Siamtu engkimtitheia chuan min hmangaih reng a duh tih chu! Min hmangaih tawh chuan hrehawm tawrhna te, dodâlna te, thihna te hial pawhin amah nên min ṭhen hrang thei lo vang. (Dan. 12:13; Lk. 20:37, 38; Rom 8:38, 39) Daniela kan entawn a, Jehova chunga kan rinawm tlat chu a va pawimawh tak êm!

17-18. Daniela hnên aṭangin eng dang nge kan la zir theih?

¹⁷ He thuziakah hian Daniela miziate zînga pahnih chauh kan bih chiang a. Mahse, a hnên aṭanga kan zir theih tam tak a la awm a ni. Entîr nân, Jehova’n Daniela chu inlârna inzawm engemaw zât leh mumangte a hmuhtîr bâkah, hrilh lâwkna thute hrilhfiah theihna a pe bawk. Chûng hrilh lâwk tam tak chu a thleng famkim tawh a. Hrilh lâwkna dangte chuan nakina leia mi zawng zawngte nghawng tûr thilthleng chungchâng chipchiar takin a sawi bawk.

¹⁸ A dâwta thuziakah chuan, Daniela thu hrilh lâwk pahnihte kan bih chiang ang a. Chumi hriatthiamna chuan tûn laia ṭhalaite leh kum upate tân thu tlûkna fing siam tûrin min ṭanpui thei a ni. Chûng hrilh lâwknate chuan kan huaisenna leh rinawmnate tinghet lehzual tûrin min ṭanpui theih bâkah, kan la hmachhawn tûr fiahnate atân min buatsaih bawk a ni.