1. Engvângin nge dawhtheihna neite chu kan ngainat?

 KAN za hian dawhtheihna neite chu kan ngaina ṭheuh va. Engvângin nge? Thil engemaw nghah a ngaih hun pawha beidawng mai lote chu kan ngaihsân vâng a ni. Thil kan tihsual huna mi dangte’n kan chunga dawhtheihna an lantîr hian kan lâwm a. Bible zir a, kan thuzirte pawm a, nunpui harsa kan tih huna Bible min zirtîrtuin kan chunga dawhtheihna a lantîr hian kan lâwm hle bawk. Eng dang zawng aiin, Jehova’n kan chunga dawhtheihna a lantîr avângin kan va lâwm tak êm!—Rom 2:4.

2. Eng dinhmunahte nge dawhtheihna lantîr chu harsa kan tih mai theih?

² Mi dangte’n dawhtheihna an lantîr chu ngaihhlu hle mah ila, keimahni ngeiin dawhtheihna lantîr harsa tih châng kan nei thei a. Entîr nân, thil eng emaw ti tûra kan tlai a, traffic jam avânga kan tân hunahte hian rilru dam taka awm chu harsa kan ti mai thei a. Mite’n min tihthinrim hunah insûm harsa kan ti thei bawk a ni. Chu bâkah, Jehova tiam khawvêl thar chu nghah harsa kan ti thei a. Dawhtheihna neih lehzual i duh em? He thuziakah hian, dawhtheihna kan lantîr theih dân leh chutianga tih a pawimawh êm êm chhan chu kan sawiho vang a. Dawhtheihna nei lehzual tûra min ṭanpui thei thilte pawh kan sawiho bawk ang.

3. Mi dawhthei tak chuan mi dangte’n an tihthinrim hunah engtin nge a chhân lêt?

³ Dawhtheihna kan lantir theih dân kawng li i lo ngaihtuah ang u. Pakhatna, mi dawhthei tak chu a thin a nel. Tihthinrima a awm hunah emaw, rilru hahna a neih hunah emaw thinrima thungrulh loh chu a tum tlat a. “Thinnel” tih ṭawngkam Bible-a kan hmuh hmasak berna chu, Jehova chu “Pathian lainatnaa  khat, mi khawngaihthei tak, thinnel tak, ngilneihna leh thu tak ngah,” tia târ lan a nih khân a ni.—Ex. 34:6.

4. Mi dawhthei tak chu nghah a ṭûl hunah engtin nge a awm?

⁴ Pahnihna, mi dawhthei tak chuan rilru dam takin a nghâk. Thil engemaw a tum aia rei nghah a ngaih hunah pawh phî ruai leh thinrima awm loh a tum a. (Mt. 18:26, 27) Rilru dam taka kan nghah a ngaihna dinhmun tam tak a awm a ni. Entîr nân, tu emawin thu a sawi hunah lo tibuai lovin, dawhthei taka kan ngaihthlâk a ngai a. (Job. 36:2) Bible zirlaiin Bible zirtîrnate a hriatthiam theih nân leh a thil chîn ṭha lote bânsan thei tûra kan ṭanpui hunah dawhtheihna kan neih a ngai bawk a ni.

5. Dawhtheihna kan lantîr theih dân kawng dang chu eng nge ni?

⁵ Pathumna, mi dawhthei chuan ngaihtuah chiang mang lovin thil a ti lo. Dinhmun ṭhenkhatah chuan hmanhmawh taka thil kan tih a ngai ṭhîn a. Mahse, mi dawhthei tak chuan thil tih tûr pawimawh tak a neih hunah tih zawh thuai tumin hmanhmawh takin thil a ti lo. Chu aiin, hun a mamawh tâwk inpein a thiltih tûr atân a inruahman lâwk a. Chumi hnuah a thiltih tûr chu ṭha taka a tihtheih nân hun a insiam a ni.

6. Mi dawhthei tak chu harsatna a tawh hunah engtin nge a awm?

⁶ Palina, mi dawhthei tak chuan harsatna a tawh hunah phunnawi lova tawrh chhuah a tum. Hetiang kawng hian, dawhtheihna chu chhelna nên awmze inhnaih tak a ni. Chutih rualin, harsatnate kan tawh chungchângah kan ṭhian ṭha tak hnêna rilrua awmte sawi chhuah chu thil dik lo a ni lo. Mahse, mi dawhthei tak chuan rilru put hmang dik vawng tlat chunga tuar chhunzawm zêl tûrin theih tâwp a chhuah ang. (Kol. 1:10-11) Kristiante kan nih angin, kawng tin rênga dawhtheihna kan lantîr a ngai a. Engvângin nge?  Chutianga kan tih a ngaih chhan i lo enho vang u.

7. Jakoba 5:7, 8-nain a sawi angin, engvângin nge dawhtheihna chu a pawimawh tak zet? (Milem en bawk rawh.)

⁷ Dawhtheihna chu chhandam kan nih theih nâna thil pawimawh tak a ni a. Hmân lai mi rinawmte ang bawkin, Pathian thutiamte thlen famkim hun chu dawhthei taka kan nghah a ngai a ni. (Heb. 6:11, 12) Bible chuan kan dinhmun chu lo neitu nên a tehkhin a. (Jakoba 5:7, 8 chhiar rawh.) Lo neitu chuan a thlai chînte ṭhan hun tûr tak chu hre lo mah se, rim taka thlaite chîngin tui pein a châwm ṭhîn a ni. Ani chuan thlai tharte chu a seng ngei ang tih ring tlatin, dawhthei takin a nghâk a. Chutiang bawkin, keini pawh ‘eng niah nge kan Lalpa chu a lo kal dâwn tih kan hre lo’ chung pawhin thlarau lam thiltihah theih tâwp chhuahin kan tel a ni. (Mt. 24:42) Jehova’n a hun taka a thutiam zawng zawng a thlen famkimtîr tûr chu dawhthei takin kan nghâk a. Dawhtheihna kan hloh a nih chuan, chu hun nghah chu harsa kan tiin, zawi zawiin thutak aṭangin kan tawlh bo thei a ni. Tisa châkna tipuitling nghâl thei thilte ûm duhna kan nei thei bawk. Mahse, dawhtheihna kan neih chuan a tâwp thlenga chhel taka tuarin chhandam kan ni thei a ni.—Mik. 7:7; Mt. 24:13.

8. Engtin nge dawhtheihna chuan mi dangte nêna inlâichînna ṭha nei tûra min ṭanpui? (Kolossa 3:12, 13)

⁸ Dawhtheihna chuan mi dangte nêna inlaichînna ṭha nei tûrin min ṭanpui a. Mi dangte thusawi ngun taka ngaithla tûrin min ṭanpui a ni. (Jak. 1:19) Dawhtheihna chuan remna a awmtîr bawk. Manganna kan neih hunah pawh rang taka chhâng lêt lo tûr leh mi tina thei thute sawi lo tûrin min vêng a. Chu bâkah, dawhtheihna kan neih chuan, tu emawin kan rilru a tihnat hunah pawh kan thin a rim nghâl mai lo vang. Thungrûl mai lovin, kan ‘indawh tawnin kan inngaidam tawn’ thei ang.—Kolossa 3:12, 13 chhiar rawh.

9. Engtin nge dawhtheihnain thu tlûkna siam a ngaih hunah min ṭanpui? (Thufingte 21:5)

⁹ Dawhtheihna chuan thu tlûkna ṭha siam tûrin min ṭanpui thei bawk a. Hmanhmawh tak leh ngaihtuah lâwk lova thilti lovin, zir chianna nei a, duhthlan theihte hre tûrin hun kan pe thei a ni. (Thufingte 21:5 chhiar rawh.) Entîr nân, hna kan zawn hunah, Pathian Jehova kan biakna tibuai thei tûr a nih pawhin, kan hna hmuh hmasa ber chu thawh duhna kan nei mai thei a. Mahse, dawhtheihna kan neih chuan kan hnathawhna hmun tûr te, hnathawh hunbi te leh, chumiin kan chhûngkua leh thlarau lam nuna nghawng a neih dân tûrte ngaihtuah nân hun kan pe ang. Chu bâkah, thu tlûkna ṭha siam tûrin min ṭanpui ang.

10. Engtin nge Kristian chuan dawhtheihna a neih chhoh va, a vawn reng theih?

¹⁰ Dawhtheihna nei lehzual tûrin ṭawngṭai rawh. Dawhtheihna chu thlarau rah pêng pakhat a ni a. (Gal. 5:22, 23) Chuvângin, Jehova hnênah thlarau thianghlim dîlin kan ṭawngṭai theih bâkah, chu thlarau rah nei tûra min ṭanpui tûrin kan dîl thei a ni. Kan dawhtheihna fiah a nih hunah dawhthei taka awm tûrin thlarau thianghlim ṭanpuina kan “dîl” thei a. (Lk. 11:9, 13) Jehova thlîr anga dinhmunte thlîr thiam tûrin a ṭanpuina kan dîl thei bawk. Chutianga kan ṭawngṭai hnuah nî tin dawhthei taka awm tûrin theih tâwp kan chhuah a ngai a ni. Dawhtheihna dîla kan ṭawngṭai a, dawhtheih kan tum poh leh chu mizia chuan kan thinlungah zung kaiin kan mize pêng pakhat a lo ni ang.

11-12. Engtin nge Jehova’n dawhtheihna a lantîr?

 ¹¹ Bible-a entîrnate chu chhût ngun rawh. Bible chuan dawhtheihna neitu mi tam tak chungchâng a târ lang a. Chûng mite chungchâng chhût ngunna aṭangin dawhtheihna lantîr dân kawngte kan hre thei a ni. Chûng entîrna ṭhenkhat kan ngaihtuah hmain, dawhtheihna lantîrtu ropui ber—Jehova chungchâng hi i lo en ang u.

¹² Eden huanah khân, Setana chuan Jehova hming sawi chhiain, Rorêltu dik tak leh hmangaihna nei tak nia A hming ṭhatna chu a sawichhia a. Jehova chuan a rorêlna chu a ṭha ber tih finfiah nân hun engemaw chen a liam a ngai tih a hriat avângin chu sawichhetu chu tiboral nghâl lovin, dawhtheihna leh insûmtheihna a lantîr a ni. Chutianga a nghah lai chuan a hming sawichhiatna tam tak chu chhel takin a tuar bawk. Chu bâkah, Jehova chuan mi tam takin chatuana nunna an neih theih nân dawhthei takin a nghâk a ni. (2 Pet. 3:9, 15) Chuvângin, mi maktaduai tam takin amah an rawn hria a. Jehova dawhtheihna avânga hlâwknate kan ngaihtuah tlat chuan tâwpna a thlentîr hun tûr nghah pawh kan tân a awlsam lehzual ngei ang.

13. Engtin nge Isua’n a Pa dawhtheihna chu ṭha famkima a entawn? (Milem en bawk rawh)

¹³ Isua chuan a Pa dawhtheihna chu ṭha famkima entawnin, chu mizia chu leia a awm lai khân a lantîr a. A tân dawhtheihna lantîr chu a awlsam reng lo va; a bîk takin, lehkhaziaktute leh Pharisai vervêk takte chungah a ni lehzual a ni. (Joh. 8:25-27) Mahse, Isua chu a Pa ang bawkin thinnel tak a ni a. Mi hauhva a awm emaw, an tihthinur emaw pawhin a thungrûl lo. (1 Pet. 2:23) Hrehawm a tawrh lai pawhin phunnawi lovin dawhthei  takin a tuar chhuak a ni. Bible-in “mi sualte chutianga hnialkalhna tuartu chu ngaihtuah teh u khai,” tia min hrilh pawh hi a mak lo ve! (Heb. 12:1-3) Keini pawhin Jehova ṭanpuinain eng anga hrehawm pawh ni se, dawhthei takin kan tuar chhuak ve thei a ni.

14. Abrahama dawhtheihna aṭangin eng nge kan zir theih? (Hebrai 6:15) (Milem en bawk rawh.)

¹⁴ Kan beisei anga tâwpna a la thleng lo a nih chuan engtin nge ni ang? Tâwpna lo thlen hun tûr kan beiseina chu a rei tawh hle pawh a ni thei a. Kan dam chhûnga a lo thlen loh kan hlau pawh a ni thei. Engin nge dawhthei taka nghâk chhunzawm zêl tûra min ṭanpui thei? Abrahama entawn tûr siam hi han ngaihtuah teh. Ani chu fa nei lo kum 75 mi a nih khân, Jehova chuan a hnênah: ‘Chi ropui takah ka siam ang che,’ tiin a tiam a ni. (Gen. 12:1-4) A nih leh, Abrahama chuan chu thutiam thlen famkimna chu a hmu em? A hmu kim vek lo. Euphrates Luipui a kân aṭanga kum 25 hnuah, Abrahama chuan Pathian thil mak tihtheihnain fapa Isaaka a nei a; tichuan, kum 60 dang a liam hnuah a tupa Esauva leh Jakoba an piang a ni. (Hebrai 6:15 chhiar rawh.) Abrahama chuan a thlahte chi ropui tak an nih a, Ram Tiam an luah chu a hmu hman lo. Mahse, chu mi rinawm chuan amah Siamtu nêna inṭhianna ṭha tak a nei a ni. (Jak. 2:23) Abrahama’n a thawhleh hunah a rinna leh a dawhtheihna avânga khawvêla hnam tinte malsâwmin an awm tih a hriat chuan a va hlim dâwn tak êm! (Gen. 22:18) Kan zir tûr chu eng nge ni? A mi mal takin, Jehova thutiam zawng zawngte thlen famkimna chu tûnah kan hmu nghâl vek lo pawh a ni thei. Mahse, Abrahama anga dawhtheihna kan neih chuan, tûnah pawh Jehova’n mal min sâwm ang tih leh a thutiam  khawvêl tharah pawh chu aia nasain mal min sâwm ang tih kan ring nghet tlat thei a ni.—Mk. 10:29, 30.

15. Mi mala inzirnaah eng chungchâng nge kan zir theih?

¹⁵ Bible-ah hian dawhtheihna lantîrtu entîrna dang tam tak a chuang a. (Jak. 5:10) Engvângin nge chûngte chu inzirna atâna i hman loh vang? b Entîr nân, Davida chu naupang tê a nih laiin Israel lal ni tûra hriak thih a ni a, lalna a chan hmain kum tam tak a nghah a ngai a ni. Sumeona leh Anni te chuan thutiam Messia lo lan hun tûr an nghah laiin rinawm takin Jehova rawng an bâwl a. (Lk. 2:25, 36-38) Chûng chanchinte i zir hunah, hêng zawhnate chhânna hi hmuh tum ang che: Engin nge ani chu dawhtheihna lantîr tûra ṭanpui? Engtin nge dawhtheihna chu a hlâwkpui? Engtin nge ani chu ka entawn theih? Chu bâkah, dawhtheihna lantîr lotute chungchâng zirna pawh i hlâwkpui thei bawk. (1 Sam. 13:8-14) Heti hian inzâwt rawh: ‘Dawhtheihna an tlâkchham chhan chu eng nge ni? Dawhtheihna an neih loh avângin eng thil ṭha lo nge an tawrh?’ tiin.

16. Dawhtheihna kan hlâwkpui dân ṭhenkhat chu eng nge ni?

¹⁶ Dawhtheihna kan neih avânga hlâwknate chu ngaihtuah rawh. Dawhtheihna kan neih hian, kan hlim lehzualin, kan rilru a hahdam a. Chuvângin, dawhtheihna chuan rilru lam leh tisa lamah hrisêlna ṭha min neihtîr thei a ni. Mi dangte chunga kan dawhtheih hian, anmahni nêna kan inlaichînna a ṭha lehzual a. Kohhran pawh a inpumkhat lehzual a ni. Tu emawin min tithinur a nih chuan, kan thinnelna chuan dinhmunte chu chhe zual lo tûrin a vêng thei a. (Sâm 37:8; Thuf. 14:29) A pawimawh berah chuan dawhtheihna kan neih hian, kan Pa vâna mi kan entawn a, amah kan hnaih lehzual a ni.

17. Eng tih nge kan tum tlat ang?

¹⁷ Dawhtheihna chu mize duhawm tak leh ṭha tak a va ni êm! Chu mizia lantîr chu awlsam reng lo mah se, Jehova ṭanpuinain dawhtheihna chu kan nei chhunzawm zêl thei a ni. Dawhthei taka khawvêl thar kan nghah rualin, “LALPA mit chu amah ṭihtute chungah chuan a fu reng ṭhîn a, a ngilneihna beiseitute chungah chuan,” tih chu kan ring tlat thei a ni. (Sâm 33:18) Kan za vai hian dawhtheihnaa inthuam chhun zawm zêl i tum ṭheuh vang u.