1. Hebrai 12:1, 2-in a sawi angin, nun intlânsiaknaa a tâwp thlenga tlân thei tûrin eng nge kan tih ngai?

 BIBLE chuan kan Kristian nun chu intlânsiakna nên a khaikhin a. A tâwp thlenga tlân thei apiang chatuana nun lâwmman chu pêk an ni ang. (2 Tim. 4:7, 8) Intlânsiakna tâwp chu kan hnaih tawh êm avângin tlân chhun zawm zêl tûra theih tâwp kan chhuah a ngai a ni. Nun intlânsiaknaa hlawhtling taka tlân tawh tirhkoh Paula chuan intlânsiaknaa hnehna kan chan theih nâna min ṭanpui thei thilte chu a sawi a. Ani chuan min ‘tihnawk apiang daha kan hmaa intlânsiakna awmah hian chhel taka tlân’ tûrin min hrilh a ni.—Hebrai 12:1, 2 chhiar rawh.

2. ‘Min tihnawk apiang dah’ tih awmzia chu eng nge?

² Paula’n ‘min tihnawk apiang kan dah’ tûr a ni tia a sawi hian Kristiante’n eng phur mah kan phur tûr a ni lo a tihna a ni em? Ni lo ve. Chu aiin, phur ṭûl lo zawng chu kan dah tûr a tihna a ni. Chutiang phurte chuan min timuang theiin min tichau thei a. Chhel taka tlân zawm zêl thei tûr chuan, kan tlânnaa min timuang thei phur ṭûl lo eng pawh chu rang taka hriata kan dah vat a ngai a ni. Chutih rualin, kan phurh ngei tûr phurte chu paih thlâk kan duh lo vang. Chuti a nih loh chuan, intlânsiaknaah kan tlân zawm zêl thei dâwn lo a ni. (2 Tim. 2:5) A nih leh, kan phurh tûr phurte chu eng nge ni?

3. (a) Galatia 6:5-in a sawi angin, eng phur nge kan phurh ngai? (b) He thuziakah hian eng nge kan sawiho vang a, engvângin nge?

³ Galatia 6:5 chhiar rawh. Paula’n kan phurh ngei tûr thil  chu a târ lang a. “Mi tinin mahni phur an phur ṭheuh dâwn si a” a ti a ni. Chu chu mahnia kan phurh tûr thil, Pathian hmaa kan mawhphurhnate a sawina a ni a. He thuziakah hian, “mahni phur” a tiha thil telte leh chûngte kan phurh theih dân chu sawiho a ni ang. Chu bâkah, thil ṭûl lo tak kan phurhte leh chûngte kan paihthlâk theih dânte pawh kan hre bawk ang. Mahni phur kan phurh a, thil ṭûl lo phurte kan paihthlâkna chuan nun intlânsiaknaa hlawhtling taka tlân thei tûrin min ṭanpui ang.

4. Engvângin nge kan inpumpêkna thutiam chu phurrit a nih loh? (Milem en bawk rawh.)

⁴ Kan inpumpêkna thutiam. Pathian Jehova hnêna kan inpumpêk hian amah bia a, a duh zâwng ti tûrin thu kan tiam a. Chu thutiam chu kan vawng reng tûr a ni. Kan inpumpêkna mila nun chu mawhphurhna lian tak a ni a; mahse, phurrit a ni lo. A nihna takah chuan Jehova duh zâwng ti tûra siam kan ni si a. (Thup. 4:10, 11) Ani chuan thlarau lam mamawh neiin leh ama anpuiin min  siam a. Chuvângin, amah kan hnaih theiin a duh zâwng tihna aṭangin lâwmna kan nei thei a ni. (Sâm 40:8) Chu bâkah, Pathian duh zâwng kan tih a, a Fapa hnung kan zui hian “chawlhna” kan hmu ang.—Mt. 11:28-30.

5. Engin nge i inpumpêkna mila nung tûra ṭanpui thei che? (1 Johana 5:3)

⁵ Engtin nge chu phur chu i phurh theih? Thil pahnihin a ṭanpui thei che. A hmasain, Jehova i hmangaihna chu tinghet zawm zêl ang che. Chu chu i tâna thil ṭha a tihte leh malsâwmna a pêk tûr che ngun taka ngaihtuahna hmangin i ti thei a ni. Pathian i hmangaih lehzual poh leh a thuawih chu awlsam i ti lehzual ang. (1 Johana 5:3 chhiar rawh.) A dawtah, Isua entawn rawh. Ani chuan ṭanpuina dîlin Pathian hnêna a ṭawngṭai avâng leh a lâwmman dawn tûr chu a thlîr tlat avângin Pathian duh zâwng a tihnaah hlawhtlinna a nei a. (Heb. 5:7; 12:1-2) Isua angin Jehova hnênah chakna dîlin ṭawngṭai la, chatuana nun beiseina chu i rilruah vawng tlat ang che. Pathian i hmangaihna a ṭhan chhoh zel a, a Fapa i entawn chuan i inpumpêkna milin i nung thei ang.

6. Engvângin nge chhûngkaw mawhphurhnate chu kan lâk ang? (Milem en bawk rawh.)

⁶ Chhûngkuaa kan mawhphurhna. Nun intlânsiaknaah hian chhûngte aiin Pathian Jehova leh Isua chu kan hmangaih zâwk tûr a ni a. (Mt. 10:37) Mahse, chumi awmzia chu chhûngkaw mawhphurhnate chu Pathian leh Krista kan tihlâwmna tûr min dâltu anga ngaiin kan ngaihthah tûr tihna erawh a ni lo. A nihna takah chuan chhûngkuaa kan mawhphurhnate kan hlen hian Pathian leh Krista pawm kan hlawh a. (1 Tim. 5:4, 8) Chutianga kan tih chuan kan hlim zâwk dâwn a ni. Pathian Jehova chuan nupate chu hmangaih tak leh zah taka an incheibâwl hunah te, nu leh pate’n fate an hmangaiha an zirtîr hunah te, naupangte’n nu leh pa thu an awih hunahte hlimna an nei thei tih a hria a ni.—Eph. 5:33; 6:1, 4.

7. Engtin nge chhûngkuaa i mawhphurhna chu i hlen theih?

⁷ Engtin nge chu phur chu i phurh theih? Chhûngkuaa i chanvo chu eng pawh ni se, mahni rilru vei zâwng te, hnam dân te leh, mi thiamte thusawi rinchhan aiin Bible-a finna thute chu rinchhan zâwk ang che. (Thuf. 24:3, 4) Chu bâkah, Bible ṭanchhan kan thu leh hla chhuahte chu hmang ṭangkai bawk ang che. Chûngah chuan Bible thu bulte nunpui theih dân thurâwn ṭangkai takte a chuang a ni. Entîr nân, Chhûngkaw Hlim Engtin Nge I Neih Theih tih brochure leh Chatuanin I Hlim Thei tih lehkhabu zirlai 49 leh 50-naa chuang thu bulte chuan nupate, nu leh pate leh, ṭhalaite chu a ṭanpui thei a ni. I chhûngte’n Bible sawite chu zâwm lo mah se, zawm tum tlat ang che. Chutianga i tih chuan, in chhûngkuain in hlâwkpui ang a, Jehova malsâwmna i dawng ngei ang.—1 Pet. 3:1, 2.

8. Engtin nge kan thu tlûkna siamte’n kan chungah nghawng a neih theih?

⁸ Kan thu tlûkna siamte chunga mawhphurhna lâk. Jehova’n zalên taka duh thlan theihna min pe a, thu tlûkna ṭhate kan siamna aṭanga hlâwkna nei tûrin min duh a ni. Mahse, thu tlûkna ṭha lote sawhkhâwk lak ata chu min vênghim lo. (Gal. 6:7, 8) Chuvângin, kan duh thlanna ṭha lote, ngaihtuah chiang lova kan thiltih leh thusawite avângin kan chhia leh ṭha hriatnain min tibuai pawh a ni thei. Mahse, kan thu tlûkna siamah mawhphurhna kan la tûr a ni tih hriatna chuan sual puang tûr te, insiam ṭha tûr te leh, chutianga tisual tawh lo tûrtein min chêttîr a. Chûng hma  lâknate chuan nun intlânsiaknaa tlân chhunzawm zêl tûrin min ṭanpui thei a ni.

9. Thu tlûkna ṭha lo i siam a nih chuan eng nge i tih theih? (Milem en bawk rawh.)

⁹ Engtin nge chu phur chu i phurh theih? I thu tlûkna ṭha lo siam chu i sût lêt thei lo a nih chuan tûna i dinhmun chu pawm la, thil kal tawh chu i siam ṭha thei tawh lo tih hria ang che. Mahni inthiam tûrin emaw, nangmah leh mi dangte mawhpuh tûrin emaw i rilru leh ngaihtuahna sêng duh suh. Chu aiin, i thil tihsual chu pawm la, tûn dinhmuna i tihtheih ṭha ber chu ti ang che. I thil tihsual avânga inthiam lohna i nei a nih chuan inngaitlâwm taka ṭawngṭaiin Jehova pan la, i sualte puangin a ngaihdamna dîl ang che. (Sâm 25:11; 51:3, 4) Tu emaw rilru i tina palha nih chuan ngaihdam dîl la, a ṭûl a nih chuan upate ṭanpuina dîl ang che. (Jak. 5:14, 15) I thil tihsualte aṭanga inzirin tihnawn tawh loh tum ang che. Chutianga i tih chuan Jehova’n i chungah khawngaihna lantîrin, i mamawh ṭanpuina a pe ang che tih i chiang thei a ni.—Sâm 103:8-13.

10. Engvângin nge beiseina inâwm lote chu phurrit a nih? (Galatia 6:4)

¹⁰ Beiseina inâwm lote. Mi dangte nêna kan inkhaikhin hian beiseina inâwm lo takte kan nei thei a. (Galatia 6:4 chhiar rawh.) Chutianga kan inkhaikhin zawm zêl a nih chuan îtsîkna leh inel duhna te kan nei ṭan thei a ni. (Gal. 5:26) Mi dangte tih theih ang tih ve kan tum a nih chuan, kan theihna leh kan dinhmunin a tlin ai bâkin mahni kan innawr thei a. “Beiseina tihkhawtlai hian thinlung a tinâ” a nih chuan, kan tlin ngai loh tûr inbeiseina chuan min va tina lehzual dâwn êm! (Thuf. 13:12) Chu chuan nun intlânsiaknaah min tichauvin min timuang thei a ni.—Thuf. 24:10.

11. Engin nge beiseina inâwm lote nei lo tûra ṭanpui thei che?

¹¹ Engtin nge chu phur chu i dah theih? Jehova’n a beisei che aia sângin inbeisei suh. Ani chuan engtikah mah i pêk theih aia tam pe tûrin a beisei lo che a. (2 Kor. 8:12) I thiltih leh mi dangte thiltih a khaikhin lo tih chu ring nghet tlat ang che. (Mt. 25:20-23) Thinlung kima i rawngbâwlna te, i rinawmna te leh, i chhelnate chu a ngaihlu hle a ni. I kum zât, hrisêlna leh, dinhmunte a zirin tih theih chin tâwk i nei tih chu thuhnuairawlh takin pawm la. Barzilaia angin, i chaknain a tlin loh chanvo hlute hnâwl chu hreh suh. (2 Sam. 19:35, 36) Mosia angin, mi dangte ṭanpuina dîlin, a rem chuan i chanvo sem ṭhen ang che. (Ex. 18:21, 22) Chutianga thuhnuairawlhna chuan nun intlânsiaknaa chauhna thlen thei beiseina inâwm lote nei lo tûrin a vêng dâwn che a ni.

12. Mi dangte thu tlûkna ṭha lo siam avângin mawh kan phurh a ngai em? Hrilhfiah rawh.

¹² Mi dangte thu tlûkna ṭha lo siama mawhphurhna nei nia inhriatna. Mi dangte chu thu tlûkna kan siamsak thei lo va; an thu tlûkna ṭha lo sawhkhâwk lakah kan vênghim reng thei lo. Entîr nân, i fanu emaw, fapa emaw chuan Jehova rawngbâwl bânsan a thlang thei a. Chu thu tlûkna chuan nu leh pate tân sawifiah theih rual loh lungngaihna a thlen thei a ni. Mahse, fate thu tlûkna ṭha lo siam avânga nu leh pate’n mahni an inmawhpuh hian phurrit an insiam a ni. Chu chu an phurh atâna Jehova beisei a ni lo.—Rom 14:12.

13. Engtin nge nu leh pate’n an fate thu tlûkna ṭha lo siam chu an ngaih ang?

¹³ Engtin nge chu phur chu i dah theih? Pathian Jehova’n zalên taka duh thlan theihna  min pe ṭheuh tih hria ang che. Chutah chuan, a rawngbâwl tûr leh bâwl lo tûra duh thlanna pawh a tel a. Jehova chuan nu leh pa ṭha famkim i ni lo tih a hria; a duh chu theih tâwpa a ṭha thei ang bera i tih hi a ni. I fa thu tlûkna siam chu nangmah ni lovin, ama mawhphurhna a ni. (Thuf. 20:11) Chuti chung pawhin, i fa enkawl dâna i tihsualte avângin i la lungngai reng pawh a ni thei. Chutiang a nih chuan, i tawrh dânte chu Jehova hrilh la, a ngaihdamna dîl ang che. Ani chuan tûn hma hunah i kîr thei tawh lo tih leh thilthleng tawhte chu i thlâk danglam thei lo tih a hria a ni. Chutih rualin, i fa chu a tuh rah seng lo tûra dang tûrin a beisei lo che. Jehova hnêna kîr leh tûra hma lâkna eng pawh a nei a nih chuan, ani chu lâwm takin A lo pawm ang tih hre reng ang che.—Lk. 15:18-20.

14. Engvângin nge a lutuka inthiam lohna chu kan dah ngai phur a nih?

¹⁴ A lutuka inthiam lohna. Thil kan tihsual avânga inthiam lohna kan nei hi thil pângngai tak a ni a. Mahse, a lutuka inthiam lohna chu kan phurh tûr phur a ni lo. Kan dah tûr phur a ni zâwk. Engtin nge a lutuka inthiam lohna kan nei tih kan inhriat ang? Kan sual kan puan a, kan inlamlêt a, tisual leh tawh lo tûra hma kan la mêk a nih chuan, Jehova’n min ngaidam tawh tih kan ring thei a ni. (Tirh. 3:19) Chûng rahbite kan rah hnu chuan Jehova’n inthiam lohna nei reng tûrin min duh lo. Inthiam lohna neih rengnain min tihnat theih dân chu a hria a. (Sâm 31:10) Kan lungngaihna kan thunun zo lo a nih chuan, nun intlânsiakna chu kan tlâwmsan thei a ni.—2 Kor. 2:7.

15. Engin nge a lutuka inthiam lohna nei lo tûra ṭanpui thei che? (1 Johana 3:19, 20) (Milem en bawk rawh.)

¹⁵ Engtin nge chu phur chu i dah theih? A lutuka inthiam lohna i la nei reng a nih chuan, Pathian “ngaihdamna” chu ngaihtuah tlat ang che. (Sâm 130:4) Ani chuan inchhîrna dik tak lantîrtute a ngaihdam hian, “an sualna pawh ka hre reng dâwn tawh si  lo,” tiin a tiam a. (Jer. 31:33, 34) Chumi awmzia chu Jehova’n tûn hmaa i thil tihsualte chu a ngaihtuahnawn tawh lo tihna a ni. Chuvângin, i thil tihsual sawhkhâwkte chu Pathian ngaihdamna i dawn loh vâng niin ngai lo la. Kohhrana mawhphurhna ṭhenkhat i chân avâng pawhin lungngai suh ang che. Jehova’n i sualte a ngaihtuahnawn tawh lo ang bawkin, nang pawhin ngaihtuah nawn tawh lovang che.—1 Johana 3:19, 20 chhiar rawh.

16. Intlânsiaknaa telte kan nih angin, eng nge kan hriat ngai?

¹⁶ Nun intlânsiaknaa kan tlân hian ‘lâwmman kan hmuh theih nân kan tlân’ tûr a ni. (1 Kor. 9:24) Kan phurh tûrte leh kan dah tûr phurte kan thliar hran thiam chuan chutiang chuan kan ti thei ang. He thuziakah hian, kan phurh tûrte leh kan dah tûr phurte chungchâng tlêm azâwng kan lo sawiho tawh a. Mahse, thil dangte pawh a la awm. Isua chuan “ei puar lutuk nên, zu ruih nên, dam chhûng khawsak ngaihtuah nên, [kan] rilru a khat lutuk” thei tih a sawi a. (Lk. 21:34) Hêngte leh Bible châng dangte’n nun intlânsiaknaa i mamawh inthlâk danglamnate hre thiam tûrin a ṭanpui thei che a ni.

17. Engvângin nge nun intlânsiaknaah lâwmman kan hmu ang tih kan sawi theih?

¹⁷ Pathian Jehova’n kan mamawh chakna min pêk dâwn avângin nun intlânsiaknaah lâwmman kan hmu ang tih kan chiang thei a. (Is. 40:29-31) Chuvângin, muangchâng suh! A hmaa lâwmman awm hmu tûra theih tâwp chhuaha tlân tirhkoh Paula chu entawn ang che. (Phil. 3:13, 14) He intlânsiaknaah hian tu mahin an tlânsak thei lo che a; mahse, Jehova ṭanpuinain i hlawhtling thei a ni. Ani chuan i phurte phur tûr leh thil ṭûl lote dah tûrin a ṭanpui thei che a. (Sâm 68:19) Nun intlânsiaknaah Jehova i lama a ṭan chuan, lâwmman hmu tûrin chhel takin i tlân thei ang!