1. Engtin nge mi ṭhenkhatin chatuana nun chungchâng chu an ngaih mai theih?

 MI TAM tak chuan hrisêlna ṭha tak an neih theih nân, chaw ṭhate eiin a hun takah insawizawina an nei ṭhîn a. Chuti chung pawhin, chatuana nun an inbeisei lo. Chutianga beisei chu kum upatnain a ken tel lungngaihnate avângin thil theih loh leh châkawm lo angin a lang thei a. Mahse, Johana 3:16 leh 5:24-a târ lan angin, Isua chuan “chatuana nunna” kan neih theih thu a sawi a ni.

2. Engtin nge Johana bung 6-nain chatuana nunna chungchâng a sawi? (Johana 6:39, 40)

² Ni khat chu, Isua’n mipui tam tak chu thil mak tihna hmangin chhang leh sanghain a hrai a. a Chu chu thil mak tak a ni. Mahse, a tûka Galili dîl kama awm Kapernaum khuaa a thusawite chu a mak lehzual a. Chutah chuan, mitthite chu kaihthawh an nih theih thu leh chatuana nunna an neih theih thu a sawi a ni. (Johana 6:39, 40 chhiar rawh.) Chu chuan i ṭhiante leh i hmangaih thi tawhte tâna awmzia a neih dân tûr chu han ngaihtuah teh. Isua thusawite chuan mitthi tawh tam tak chu kaihthawhin an awm thei tih a târ  lang a. Nangmah leh i hmangaih takte pawhin chatuana nunna in nei thei tih a târ lang bawk. Chutih rualin, Johana bung 6-a Isua thusawi dangte chu mi tam tak tân hriatthiam a harsa thei a. Chûng thute chu chiang lehzualin i lo enho vang u.

3. Johana 6:51-ah Isua’n eng nge a sawi?

³ Kapernaum khuaa mipuite chuan a hma lawka Isua’n chhanga a hraina leh Pathian Jehova’n an thlahtute hnêna manna a pêkte inkûngkaihna chu an hmu a. Bible chuan manna chu “vân aṭanga ei tûr chhang” tiin a sawi rêng a ni. (Sâm 105:40; Joh. 6:31, NWT) Chuvângin, Isua chuan a hnua a thu zirtîrna atân manna chu a hmang a. Manna chu thil mak tihna hmanga Pathian thilpêk ni mah se, a eitute chu a hnuah an thi leh tho va. (Joh. 6:49) Chu chhang nêna inang lo takin, Isua chuan “vâna mi chhang dik tak,” “Pathian chhang” leh, “nunna chhang” a nih thu a sawi a ni. (Joh. 6:32, 33, 35, NWT) Ani chuan: “Kei hi chhang nung, vân aṭanga lo chhuk chu ka ni. Tu pawhin he chhang hi a ei chuan chatuanin a nung ang,” tia sawiin manna chhang laka a danglamna pawimawh tak chu a târ lang a. (Johana 6:51 chhiar rawh.) Judate chuan mak an ti hle a ni. Engtin nge Isua chuan Pathianin an pi leh pute hnêna mak taka a pêk manna aia “chhang” chungnung zâwk, vân aṭanga lo chhuk ni anga a insawi theih? “Ka pêk tûr chhang chu ka tisa hi a ni si a,” tia a sawi khân an hriatthiam theih nân ngaihvenawm takin a sawi a ni. Eng nge a sawi tum ni thei ang? Keimahni leh kan hmangaihte tân chatuana nunna neih theih a nihzia a târ lan avângin, a sawi tum kan hriatthiam chu thil pawimawh tak a ni. Isua thusawi awmzia chu i lo en ang u.

NUNNA CHHANG LEH A TISA

4. Engvângin nge Isua thusawite chu mi ṭhenkhatin mak an tih?

⁴ Isua thu ngaithlatu mi ṭhenkhat chuan “khawvêlin nunna a neih theih nâna” a tisa a pêk tûr thu a sawi khân mak an ti hle a. Hring ei nihna chi khat angin a tisa tak tak chu ei tûr atân a pe dâwn niin an ngai pawh a ni thei a ni. (Joh. 6:52) Isua chuan mak an tih lehzual tûr thil dang a sawi belh a. “Mihring Fapa tisa in ei a, a thisen in in loh chuan nunna in nei lo vang,” tiin.—Joh. 6:53, NWT.

5. Engvângin nge Isua chuan mite chu a thisen tak tak in tûrin a zirtîr lo tih kan chian theih?

⁵ Nova hun lai khân Pathianin thisen ei chu a khap a. (Gen. 9:3, 4) A hnua, Israelte hnêna Dân a pêk khân chu khapna bawk chu a sawi nawn leh a ni. Tu pawh thisen ei apiang chu ‘tuithlâr,’ a nih loh leh tihhlum tûr a ni. (Lev. 7:27) Isua pawhin Pathian pêk Dân zawng zawng chu zâwm tûrin a zirtîr a. (Mt. 5:17-19) Chuvângin, Judate chu a tisa tak tak ei tûrin emaw, a thisen tak tak in tûrin emaw a ti ngai lo vang. Chuti chung pawhin, chûng thu hriatthiam har takte hmang chuan mite chu nunna—“chatuana nunna”—neih theih dân a zirtîr a ni.—Joh. 6:54, NWT.

6. A tisa eia a thisen in tûra Isua zirtîrna chu eng angin nge kan hriatthiam ang?

⁶ Isua sawi tum chu eng nge ni? A hmaa, Samari hmeichhe hnêna: “Ka pêk tûr tui in apiang erawh chu a tuihâl leh tawh ngai lo vang. Tui ka pêk chu a kawchhûngah tui hna ang a lo ni ang a, chu chuan chatuana nunna a pe ang,” tia a sawi lai ang khân entîr nei ṭangkam a hmang leh tih a chiang a. (Joh. 4:7, 14, NWT) b Isua chuan Samari hmeichhiain  tui tak tak a in avâng maiin chatuan nunna a nei ang tih a sawi lo. Chutiang bawkin, Kapernaum khuaa mipuite chu a tisa tak tak an ei a, a thisen tak tak an in chuan chatuanin an nung ang tih a sawina a ni lo.

THILTHLENG PAHNIH INAN LOHNA

7. Engtin nge Johana 6:53-a Isua thusawi chu mi ṭhenkhatin an ngaih?

⁷ Sakhaw mi ṭhenkhat chuan Johana 6:53-a Isua’n a tisa ei leh a thisen in chungchânga a thusawi chuan, Lalpa Zanriah hman dân tûr chungchângah entîrna a siam niin an ngai a. A chhan chu chumi zân chuan thu mal inang deuh a hman vâng a ni. (Mt. 26:26-28) Lalpa Zanriah inkhâwmnaa tel apiangin chhang leh uain sem chu ei a, in tûr angin an ngai a. Chu chu a dik em? Chu inkhâwmah chuan kum tinin khawvêl pum huapa mi maktaduai tam takte an lo tel ṭhin avângin, chu ngaih dân chu a dik leh dik loh kan chhui chian a pawimawh hle a ni. Johana 6:53-a kan hmuh thute leh Lalpa Zanriaha Isua thusawite inan lohna tam tak chu i lo en ang u.

8. Thilthleng pahnihte inan lohna ṭhenkhat chu eng nge ni? (Milem en bawk rawh.)

⁸ Hêng thilthleng pahnihte inan lohna hi i lo chhinchhiah ang u. Pakhatnaah, Johana 6:53-56-a thute hi Isua’n engtik hunah nge a sawi a, khawi hmunah nge a sawi? Chûng  thute chu C.E. 32 khân Galili rama Juda mipuite hnênah a sawi a. Chu chu Jerusalem-a Lalpa Zanriah a neihpui hma kum khat vêla thilthleng a ni. Pahnihnaah, chûng thute chu tute hnênah nge a sawi? Galili rama Isua thusawi ngaithlatu a tam zâwkte chuan an thlarau lam mamawhte phuhrûk aiin, hun rei lo te chhûng atâna an tisa lam mamawhte phuhrûk chu an ngaihtuah zâwk a. (Joh. 6:26) Chuvângin, Isua thusawi hriatthiam harsa an tih deuh chuan a chungah rinna an hloh nghâl mai a. A zirtîr ṭhenkhatte pawhin an kalsan hial a ni. (Joh. 6:14, 36, 42, 60, 64, 66) Chu thilthleng leh a hnu kum khat vêla Isua’n Lalpa Zanriah a kîlpuinaa telte chunga thilthlengte inan lohna chu khaikhin ang che. Chumi ṭum chuan a tirhkoh rinawm 11-te chuan a thu zirtîr zawng zawngte chu hre thiam lo mah se, a bulah an awm tlat a. Anni chuan Galili rama mipuite ang lo takin, Isua chu vân aṭanga lo chhuk Pathian Fapa a ni tih an ring a ni. (Mt. 16:16) Chuvângin, anni chu “Nangni hi fiahna ka tawh laia mi awmpui tlattute in ni” tiin a fak a ni. (Lk. 22:28, NWT) Hêng thil pahnihte inan lohna ringawt pawh hian Johana 6:53-a Isua thusawite chu Lalpa Zanriah hman dân tûr chungchâng sawina a ni lo tih a târ lang a. Chu bâkah, finfiahna dangte pawh a la awm a ni.

NANG PAWH I TEL VE

9. Lalpa Zanriah an kîl laia Isua thusawi chu tute tân nge a nih?

⁹ Lalpa Zanriah an kîl laia Isua’n a tirhkohte hnêna chhang dawidim telh loh a pêk khân, chu chuan a taksa a entîr tih a hrilh a. Tichuan, uain chu pein, a “thuthlunna thisen” a nih thu a sawi bawk a ni. (Mk. 14:22-25 NWT; Lk. 22:20; 1 Kor. 11:24) Chu thuthlung chu a pawimawh hle a. Thuthlung thar chu mi zawng zawngte nên ni lovin, “Pathian Rama” awm tûr “[thlarau lam] Israel chhûngte” nêna thlun a ni. (Heb. 8:6, 10; 9:15) Chutih lai chuan, tirhkohte chuan a thusawi awmzia chu an hre thiam lo va. Mahse, rei lo te hnuah thlarau thianghlima hriak thih an ni ang a, thuthlung tharah telin vânah Isua hnênah an awm ang.—Joh. 14:2, 3.

10. Galili rama Isua thusawi leh Lalpa Zanriah an kîl laia a thusawi huam zau zâwng chu engtin nge a inan loh? (Milem en bawk rawh.)

¹⁰ Lalpa Zanriah an kîl laia Isua thusawi chu “pâwl tlêmte” tân chauh a ni tih chhinchhiah ang che. Chu pâwl tlêm tê chu, chu pindan chhûnga a bula awm a tirhkoh rinawmte aṭangin a inṭan a ni. (Lk. 12:32, NWT) Chûng mite leh chu pâwla tel tûr mi dangte chu entîrna pahnih, chhang leh uain te chu ei leh in tûra beisei an ni. Anni chu vânah Isua hnênah an awm ang. Hemi ṭuma Isua thusawi aiin Galili-a mipuite hnêna a thusawi chuan a huam zau zâwk a. Chutah chuan mipui tam takte tân a sawi a ni.

11. Galili rama Isua thusawi chu pâwl tlêmte tâna sawi a ni lo tih engin nge târ lang?

¹¹ C.E. 32-a Galili rama Isua thusawi ngaithlatu a tam zâwkte chuan a hnên aṭanga ei tûr dawn ringawt an ngaihtuah a. Mahse, Isua chuan chaw aia pawimawh zâwk thil dang a awm tih hre thiam tûra ṭanpui a tum a. Chu chu chatuana nunna an neih theihna tûr a ni. Chu bâkah, Isua chuan ni hnuhnûngah chuan mitthite chu kaihthawh an ni leh thei ang a; tichuan, chatuanin an nung thei ang tih a sawi bawk. Hemi ṭumah hi chuan, a hnua Lalpa Zanriah an kîl lai angin mi tlêm tê thlan bîkte chungchâng a sawi lo va. Chu aiin, mi zawng zawngin an  neih theih malsâwmna chungchâng a sawi zâwk a. Dik takin, ani chuan: “Tu pawhin he chhang hi a ei chuan chatuanin a nung ang; khawvêlin nunna a neih theih nâna ka pêk tûr chhang chu ka tisa hi a ni si a,” tiin a sawi a ni.—Joh. 6:51 NWT. c

12. Isua sawi chatuana nunna nei thei tûrin eng nge kan tih ngai?

¹² Isua’n mihring lo piang tawh phawtte chuan chatuana nunna an nei dâwn a tihna a ni em? Ni lo, ‘chhang chu ei a,’ Isuaa rinna lantîrtute chauhvin an nei dâwn a ni. Tûn laia mi tam takte chuan Isua an rin thu leh anmahni chhandamtu a nih thu an sawi a. (Joh. 6:29) Mahse, chu aia tam chu tih a ngai. Galili rama mipui zînga ṭhenkhatte pawh khân, a tîrin Isua chu ring mah se, a hnuah amah an rinna chu an hloh a ni. Engvângin nge?

13. Isua hnungzuitu dik tak ni tûrin eng nge ngai?

¹³ Isua hrai mipui tam zâwkte chuan an duh zâwng a pêk chhûng chu zui nuam an ti a. Anmahni tidam tûr te, ei tûr pe tûr te leh, an hriat duh zâwngte hrilh tûrtein an duh a ni. Dik tak chuan, ani chu mite tisa lam mamawh phuhru tûr maia he leia lo kal a ni lo va. Chuvângin, a zirtîr dik tak nihnaah chuan amah zui satliah mai aia tam a tel tih a sawi a. Anni chuan Isua zirtîrna zawng zawngte chu pawma, zâwmin ‘a hnêna lo kal’ tûra a sâwmna chu an chhân lêt a ngai a ni.—Joh. 5:40; 6:44.

14. Isua tisa leh thisen hlâwkpui tûrin eng nge kan tih ngai?

 ¹⁴ Isua chuan mipuite hnênah rinna an lantîr a pawimawh tih a sawi uar a ni. Eng thila rinna lantîr tûrin nge a sawi? Nakina chhandamna thlentu tûr, an tâna a hlan tûr a tisa leh thisen chungah a ni. Chumi rinna chu, chûng Judate tân chuan a pawimawh hle a. Tûn thleng pawhin a la pawimawh reng a ni. (Joh. 6:40) Ni e, Johana 6:53-a târ lan Isua tisa leh thisen hlâwkpui tûr chuan tlanna chunga rinna kan lantîr a ngai a. Chu malsâwmna chu mi tinte tâna dawn theih a ni.—Eph. 1:7.

15-16. Johana bung 6 aṭangin eng thil pawimawh takte nge kan zir?

¹⁵ Bible-a Johana bung 6-a chhinchhiah thute chu kan tân leh kan hmangaihte tân a hlu hle a. Isua chuan mite chungah ngilneihna a lantîr tih a târ lang a ni. Galili rama a awm lai khân, dam lote a tidam a, Lalram chanchin a zirtîr a; chu bâkah, mihringte mamawh bulpui chaw chu a pe bawk. (Lk. 9:11; Joh. 6:2, 11, 12) Chu aia pawimawh zâwk chu, “nunna chhang” a nih thu a zirtîr a ni.—Joh. 6:35, 48, NWT.

¹⁶ “Berâm dang” tia a sawite chuan, kum tina neih ṭhin Lalpa Zanriah inkhâwmnaah chhang leh uain chu an eiin an in lo va, an eiin an in tûr a ni lo bawk. (Joh. 10:16) Mahse, anni chuan a inthawina hlutna chungah rinna lantîrin Isua tisa leh thisen chu an hlâwkpui a ni. (Joh. 6:53) Chutiang ang lo takin, chhang leh uain eia intute chuan thuthlung tharah an tel tih leh vân lam Lalramah rorêl tûrin beiseina an nei tih an târ lang. Chuvângin, hriak thih emaw, berâm dang emaw pawh ni ila, Johana bung 6-a thuziakte chuan kan tân awmze pawimawh tak a nei a. Chatuan nunna kan neih theih nân rinna kan lantîr a pawimawhzia a târ lang a ni.