1-2. Nu leh pate chuan an fate’n Bible ṭanchhan kan thurinte chungchâng an zawh hunah engtin nge an chhân lêt ang?

 NAUPANG enkawl seilian tûr chuan hun leh tha tam tak sên a ngai tih mi tam takin an pawm ngei ang. Fa enkawl lai nei nu leh pa i nih chuan, rinna nghet tak an neih nâna i thawhrimna avângin kan fak a che. (Deut. 6:6, 7) In fate an han ṭhan len hian, nungchang lama Bible tehnate tiamin, Bible ṭanchhan kan thurinte chungchângah zawhna pawimawh tak takte an zâwt ṭan thei a ni.

² A tîrah chuan, i fate’n chutiang zawhna an zawh avâng chuan i rilru a hah thei a. Rinna an tlâkchham vâng niin i ngai hial thei bawk. Mahse, hlauthâwng lutuk duh suh. Naupang ṭhang laite chuan mahni ngeia rinnghehna nei tûrin zawhnate an zawh a ngai a ni. (1 Kor. 13:11) Chuvângin, zawhnate an zawh hunah, chu hun chu ngun lehzuala ngaihtuah dân zir tûra ṭanpui nân i hmang thei a; chu chuan, Pathian leh Bible an rinna a tinghet ang.

3. He thuziakah hian eng nge kan sawiho vang?

³ He thuziakah hian nu leh pate’n an fate chu (1) anmahnia rinna nghet tak nei chho tûr te, (2) nungchang lama Bible tehnate ngaihhlutna nei tûr te leh, (3) an rinna chungchâng sawifiah thei tûrtea an ṭanpui theih dân kan sawiho vang a.  Naupangte’n zawhnate an zawh a ṭhat chhan bâkah, nu leh pate chu kan thurinte sawi chhuah theihna hun remchâng pe theitu, chhûngkuaa an tihho theih thil ṭhenkhat kan sawiho bawk ang.

I FATE CHU RINNA NGHET TAK NEI CHHO TURIN ṬANPUI RAWH

4. Eng zawhnate nge naupangte’n an neih mai theih a, engvângin nge?

⁴ Rinna nei saa piang tu mah kan awm lo va. Chuvângin, Pathian chunga rinna i neih avâng maiin i fate chu rinna nei nghâl mai tûrin i ngai tûr a ni lo. A châng chuan: ‘Engtin nge Pathian a awm tih ka hriat theih ang? Bible sawite hi ka ring tak zet thei em?’ tih ang chi zawhnate an zâwt mai thei. Dik takin, Bible chuan “kan ngaihtuah theihna” hmanga “engkim fiah zâwk” tûrin min fuih a ni. (Rom 12:1, NWT; 1 Thes. 5:21) Mahse, engtin nge i fate chu an rinna tinghet tûra i ṭanpui theih ang?

5. Engtin nge nu leh pate chuan an fate chu Bible-a rinna nei chho tûra an ṭanpui theih? (Rom 12:2)

⁵ I fate chu mahnia thutak fiah tûrin fuih rawh. (Rom 12:2 chhiar rawh.) I fate’n zawhnate an zawh hunah, chu hun chu Jehova Thuhretute Tâna Zir Bingna Hmanrua ang chi, hmanruate hmanga chhânnate zawn hmuh dân kawhhmuhna hun remchângah hmang ang che. Bible hi mihringte ziah lehkhabu ṭha pakhat mai a ni lo tih finfiah nân, chu lehkhabua “Bible” tih thupui hnuaia, “Pathian Thlarauva Thâwk Khum” tih chu an en thei a. Ni e, Bible chu “Pathian Thu” a ni. (1 Thes. 2:13) Entîr nân, hmân laia Assuria khawpui Ninevi chungchâng chu zir bingna an nei thei a. Hun kal tawhahte khân, Bible sawisêltu mi ṭhenkhat chuan Ninevi khawpui chu a awm ngai lo angin an sawi a. Mahse, kum 1850 vêlah khân mi thiamte chuan lei hnuaia inchhilh tawh Ninevi khawpui chu an hmu chhuak a, chu chuan Bible hi a dik tih a finfiah a ni. (Zep. 2:13-15) I fate chuan Ninevi khua tihchhiatnain Bible hrilh lâwkna a thlen famkimtîr dân hriat belh nân, Vênnainsâng November, 2021 chhuaka “I Lo Hre Tawh Em?” tih thuziak chu an en thei a. Kan thu leh hla chhuah aṭanga an thil zirte chu, encyclopedia leh zir chianna dang rin tlâk takte aṭanga an thil zir chhuahte nêna khâikhinin, Bible-in a sawite rin lehzual nachhan tûr ṭha takte an nei ang.

6. Engtin nge nu leh pate chuan an fate chu ngaihtuah thiamna hmang tûra an ṭanpui theih? Entîrna pe rawh. (Milem en bawk rawh.)

⁶ I fate chu ngaihtuah thiamna hmang tûrin ṭanpui rawh u. Nu leh pate chuan an fate nên Bible, a nih loh leh Pathian chunga rinna chungchâng sawipui theihna tûr hun  remchâng chi hrang hrang an nei a. Museum, pangpâr huan, a nih loh leh Jehova Thuhretute branch office-a museum-te an tlawh hunah chutiang hun remchâng chu an nei thei a ni. Entîr nân, a takin emaw, online atângin emawa museum i tlawhpui hunah Bible hi a dik tih a rinna tinghet theitu hmân lai thilthleng chanchin emaw, thil hlui laih chhuahte emaw chu i enpui thei a. I fate chu Moab Lung (Moabite Stone) chanchin chu i hrilh thei a. Chu lung chu kum 3,000-a upa a ni a; chutah chuan, Jehova hming a chuang a ni. Moab Lung dik tak chu France ram, Louvre Museum-a dah a ni a. Chumi anpui chu New York khawpui, Warwick-a Jehova Thuhretute World Headquaters-a “Bible leh Pathian Hming” tih museum-ah chuan pho chhuah a ni. Chu Lung chuan Israelte laka Moab Lal Mesa helna chanchin a târ lang a. Chu chanchin chu, Bible-ah pawh târ lan a ni. (2 Lal. 3:4, 5) I fate’n Bible rin tlâkzia leh dikzia an mit ngeia an hmuh hunah an rinna chu a nghet lehzual dâwn a ni.—2 Chronicles 9:6 nên khaikhin rawh.

7-8. (a) Thil siamtea kan hmuh pianzia mawi takte aṭangin eng nge kan zir theih? Entîrna pe rawh. (Milem en bawk rawh.) (b) Eng zawhnatein nge i fate’n Siamtu a awm tih an rinna chu tinghet thei?

⁷ I fate chu thil siam chungchâng ngaihtuah tûrin fuih rawh. Lova in kal hunahte, huan in enkawl hunahte thil siamtea hmuh theih pianzia ngaihven awm takte chu hmuh ang che. Engvângin nge? Chûng pianziate chuan duangtu fing leh thiam tak a awm tih a finfiah vâng a ni. Entîr nân, scientist-te chuan thil siamtea awmze nei taka thil inzem kual dân pianzia (spiral) chu an lo zir chiang tawh a. Biophysicist Nicola Fameli-a chuan thil siam ṭhenkhata awmze nei taka thil inzem kual awm zât i chhiar chuan awmze nei takin a lian chho zêl tih i hmu ang tih a sawi a. Chu chu Fibonacci sequence tiha koh a ni. Chutiang pianzia chu galaxy ṭhenkhatah te, nautilus chêngkawl kâwrah te, hnahthelah te leh, nihawi pâr laimu-ahte hmuh theih a ni. a

⁸ I fate’n school-a science subject an zir tam poh leh thil siamte thununtu dân a awm tih an hre chiang lehzual ang a. Entîr nân, thingkûng tam zâwk chuan pianzia inang an nei a. A kûng aṭangin a zârpui a lo chhuak a, a zârpui aṭangin a zâr tê; tichuan, a ṭangte a lo awm leh a. Chu chu fractals (pian hmang inang zêla awm) tiha koh a ni. Chûng pianziate chu thil siam dangahte pawh hmuh theih a ni a. Mahse, chûng pianzia mawi tak thununtu dân siamtu chu tu nge ni? I fate’n chûng zawhnate an ngaihtuah tam poh leh Pathianin engkim a siam tih rinna nghet tak an neih chhoh theih a rinawm. (Heb. 3:4) An rawn  len deuh hnu chuan, “Pathianin min siam a nih chuan, kan hlim theihna tûrin nungchang lama kaihhruaina min pêk i ring em?” tiin i zâwt thei a. Tichuan, chûng kaihhruaina hlu takte chu Bible-a hmuh theih a ni tih i hrilh thei a ni.

NUNGCHANG LAMA BIBLE TEHNATE NGAIHHLUTNA NEI TURIN ṬANPUI RAWH

9. Engvângin nge i fate chuan nungchang lama Bible tehnate chungchângah rinhlelhna neia zawhna an zawh mai theih?

⁹ I fate’n nungchang lama Bible tehnate chungchângah rinhlelhna neia zawhna an zâwt che a nih chuan, nungchang lama Bible tehnate chu an pawm lo tak tak vâng nge ni a, mi dangte hmaah an rinna an sawifiah thiam lo vâng mai zâwk tih chu hriat tum ang che. Eng pawh chu ni se, Chatuanin I Hlim Thei! tih lehkhabu chu i fate zirpuiin, nungchang lama Bible tehnate ngaihlu tûrin i ṭanpui thei a ni. b

10. Engtin nge i fate chu Jehova nêna an inlaichînna chungchâng ngaihtuah tûra i ṭanpui theih?

¹⁰ I fate chu Jehova nêna an inlaichînna ngaihlu tûrin fuih rawh. Chatuanin I Hlim Thei! tih lehkhabua ngaih dân phawrh chhuak thei zawhnate leh entîrnate chu hmangin an rilrua awmte sawi chhuak tûrin ṭanpui ang che. (Thuf. 20:5) Entîr nân, zirlai 8-na chuan Jehova chu min vênghim a, kan tâna ṭha tûrte min hriat nawntîr ṭhîntu ṭhian ṭha tak nên a tehkhin a. 1 Johana 5:3-a thute in sawiho hnuah, “Jehova chu chutianga Ṭhian ṭha tak a ni tih in hriat tawh chuan, ti tûra min duhte chu eng angin nge kan thlîr ang?” tiin i zâwt thei a. Chu chu zawhna mâwlmang tak angin lang mah se, chu chuan Pathian dânte chu a hmangaihna lan chhuahna anga thlîr tûrin i fate chu a ṭanpui thei a ni.—Is. 48:17, 18.

11. Engtin nge i fate chu Bible thu bulte ngaihlu tûrin i ṭanpui theih? (Thufingte 2:10, 11)

¹¹ Bible thu bulte nunpuina kan hlâwkpui dân chu sawipui rawh. Bible, a nih loh leh ni châng in chhiarho hunah, Bible thu bulte’n in chhûngkua a ṭanpui tawh dân chu sawiho vang che u. Entîr nân, i fate chuan taimâkna leh dik taka thiltih a ṭhatna chu an hre thiam em? (Heb. 13:18) Bible thu bulte’n tisa lam leh rilru lama min vênhim dân pawh i hrilhfiah thei bawk a. (Thuf. 14:29, 30) Chûng thu bulte sawihona chuan i fate chu Bible thurâwnte ngaihlu tûra a ṭanpui ngei a rinawm.—Thufingte 2:10, 11 chhiar rawh.

12. Engtin nge pa pakhat chuan a fapa chu Bible thu bulte ngaihlu tûra a ṭanpui?

¹² France rama awm Steve-a chuan an nupaa an fapa tleirâwl Ethana’n Jehova dânte phêna awm a hmangaihna hmu thiam tûra an ṭanpui dân chu heti hian a sawi a ni: “Thu bul eng emaw chungchângah, ‘Engvângin nge Jehova’n he thu bul hi zâwm tûra min duh? Hei hian min hmangaihzia engtin nge a târ lan? He thu bul hi i zawm loh chuan eng thil nge thleng thei?’ tih ang chi zawhnate chu kan zâwt a,” tiin. Chutianga chhûtpuina chuan Ethan-a chu nungchang lama Jehova tehnate ngaina chho tûrin a ṭanpui a. Steve-a chuan: “Bible-ah hian mihring finna aia nasa zâwk finna a chuang tih hre thiam tûra Ethan-a ṭanpui chu kan tum ber a ni,” tiin a sawi belh a ni.

13. Entin nge nu leh pate chuan an fate chu Bible thu bulte nunpui dân an zirtîr theih? Entîrna pe rawh.

¹³ I fate chu Bible thu bulte nunpui dân zirtîr rawh. Chutianga i tih theih dân pakhat chu, school-a lehkhabu eng emaw chhiar tûra tih an nih hunah a ni a. Chu lehkhabuah chuan nungchang bawlhhlawh taka nungte, a nih loh leh mi thinchhe takte chawilârna chungchâng a chuang thei a. Chuvângin, Jehova’n chûng  mite thiltihte leh thusawite a thlîr dân chu ngaihtuah tûrin i fate chu i fuih thei a ni. (Thuf. 22:24, 25; 1 Kor. 15:33; Phil. 4:8) Chutianga tihna chuan an class-a an zirtîrtu leh an ṭhian dangte nêna chumi chungchâng an sawiho huna an rinna sawi chhuak tûrin a ṭanpui thei ang.

I FATE CHU AN RINNA HUMHIM TURIN BUATSAIH RAWH

14. School-a eng subject-in nge Kristian ṭhalaite chu tizâm thei, engvângin nge?

¹⁴ Kristian ṭhalaite chuan an rinna humhim tûra inrintâwkna neih loh châng an nei thei a. School-a chanchhâwnna chungchâng an zir hian an zâm pawh a ni thei a ni. Engvângin nge? An zîrtîrtute chuan chanchhâwnna chu thil awm tak tak anga an zirtîr vâng a ni thei a. Nu leh pa i nih chuan, engtin nge i fate chu an rinnaa ding nghet a, inrintâwkna nei tûra i ṭanpui theih?

15. Engin nge Kristian ṭhalaite chu an thurinte chunga inrintâwkna nei lehzual tûra ṭanpui thei?

¹⁵ I fate chu an thurinte chunga inrintâwkna nei lehzual tûrin ṭanpui rawh. I fate chuan thil siam chungchânga thutak an hriat avângin an zâm a ngai lo. (2 Tim. 1:8) Engvângin nge? A chhan chu, scientist tam takte pawhin nunna hi amaha lo awm a ni lo tih an hre thiam a. Anni chuan nunna nei thil zawng zawngin Siamtu fing tak a awm tih an finfiah dân chu an hmu a. Chuvângin, khawvêl hmun hrang hranga school-tea an zirtîr chanchhâwnna chu an pawm lo a ni. Unau dangte’n nunna hi siam a ni tih an rinna chhan chu zir chiangin, i fate pawhin an rinna chu an tinghet thei a ni. c

16. Engtin nge nu leh pate chuan an fate’n Siamtu a awm tih rinna chu humhim tûra an ṭanpui theih? (1 Petera 3:15) (Milem en bawk rawh.)

¹⁶ I fate chu Siamtu a awm tih an rinna humhim tûrin buatsaih rawh. (1 Petera 3:15 chhiar rawh.) I fate nêna jw.org-a “Chanchhâwnna leh Thil Siam,” tih thuziak inzawm enho chu in ṭangkaipui thei a. Siamtu a awm tih hre thiam tûra mi dangte ṭanpui nâna ṭha an tih ber hrilhfiah dân chu an thlang thei a. Tichuan, chu chu tihchhinna neihpui ang che. School-a an ṭhiante chu an hnial a ngai lo tih hrilh fo la. Hriatthiam awlsam taka hrilhfiah a, chhûtpui tûrin fuih ang che. Entîr nân, school-a an ṭhian tu emaw chuan: “Ka hmuh theihte chauh ka ring; mahse, Pathian chu ka hmu thei si lova, ka ring thei lo,” ti ta se, Kristian ṭhalai chuan: “Ram ngaw takah tuichhunchhuah  ṭha tak hmu ta la, engtin nge i ngaih ang? Chu tuichhunchhuah chuan laitu a nei ngei dâwn a; chutiang bawkin, lei leh vân leh nunna nei zawng zawngte hian Siamtu an nei!” tiin a sawi thei a ni.

17. Engtin nge nu leh pate chuan an fate chu mi dangte hnêna Bible thutak hrilh tûra hun remchâng zawng tûrin an fuih theih? Entîrna pe rawh.

¹⁷ I fate chu mi dangte hnêna Bible thutak hrilh theihna hun remchâng zawng tûrin fuih rawh. (Rom 10:10) Mi dangte hnêna an rinna hrilh tûra ṭan lâk a ngaihna chu, rimawi tum zir tûra ṭan lâkna nên i tehkhin thei a. Key awlsam tê tê aṭangin a zir ṭan ang a. A hnuah chuan, awlsam takin rimawi a tum thei mai dâwn a ni. Chutiang bawkin, a tîrah Kristian ṭhalai chuan mi dangte hnêna a rinna chungchâng hrilh tûrin thu awlsam takte a hmang thei a. Entîr nân, “Engineer-te hian khawvêla thil awm sate entawnin, thil an siam ṭhîn tih i hria em? He video ngaihvenawm tak hi ka chhuahsak ang che,” tiin a sawi thei a. Siam A Ni Em? tih video series aṭanga video pakhat a entîr hnuah: “Scientist-te chuan thil awm sate entawna an thil siam chhuahte avângin chawimawina an dawng a nih chuan, khawvêla thil awm sate atân hian tuin nge chawimawina dawng ang?” tiin a zâwt thei a ni. Chutianga tluangtlam taka chhûtpuina chuan an ṭhian tu emaw chu ngaihvenna nei tûr leh hriat belh châkna nei tûrin a chêttîr thei a ni.

I FATE CHU AN RINNA TINGHET TURIN ṬANPUI ZAWM ZEL RAWH

18. Engtin nge nu leh pate chuan an fate’n Pathian an rinna chu an tihngheh zawm zêl theih?

¹⁸ Pathian Jehova ring lotu mi tam tak awmna khawvêlah kan chêng a. (2 Pet. 3:3) Chuvângin, nu leh pate u, in fate nêna Bible in zir hunah Bible leh Pathian tehnate chunga zahna tipung theitu thute chu zir belh tûrin fuih ang che u. Pathian thil siam ropui tak takte hmangin an ngaihtuah theihna chu hmang thiam tûrin ṭanpui u la. Bible hrilh lâwkna thleng famkim tawhte chu hre thiam tûrin ṭanpui ang che u. A pawimawh berah chuan, in fate chu ṭawngṭaipui u la, ṭawngṭaisak bawk ang che u. Chutianga in tih chuan, in fate rinna tinghet tûra ṭan in lâkna chu Jehova’n mal a sâwm ang tih in ring nghet tlat thei a ni.—2 Chro. 15:7.