Tirhkoh Paula chuan kohhran upa dang, Timothea hnênah heti hian a ziak a ni: “Hêng thu hi thleithlâk bîk nei lovin, thlei bîk neia eng mah ti lovin, Pathian leh Krista Isua leh vântirhkoh thlante mithmuhin zâwm tûrin ṭhahnemngai takin ka hriattîr a che,” tiin.—1 Tim. 5:21.

A hmasain, chûng vântirhkohte zînga tel lo tûrte chanchin chu lo sawi ta ila. Chiang takin, anni chu 1,44,000 zînga mi an ni lo. Paula’n Timothea hnêna lehkhathawn a ziah lai khân, Kristian hriak thihte chu tu mah vân nunna changa kaihthawhin an la awm lo va. Tirhkohte leh hriak thih dangte chu thlarau thilsiamte an la nih loh avângin, “vântirhkoh thlante” chu anmahni sawina a ni thei lo a ni.—1 Kor. 15:50-54; 1 Thes. 4:13-17; 1 Joh. 3:2.

Chu bâkah, “vântirhkoh thlante” chu Tuilêt hun laia vântirhkoh thuawih lote kha an ni lo bawk. Chûng vântirhkohte chu Setana lamah an ṭang a, Isua hmêlmate an lo ni ta a ni. (Gen. 6:2; Lk. 8:30, 31; 2 Pet. 2:4) Nakinah chuan, anni chu kum 1,000 chhûng leilâwtah khung an ni ang a, chumi hnuah chuan Diabola ruala tihboral an ni ang.—Jud. 6; Thup. 20:1-3, 10.

Paula’n “vântirhkoh thlante” tia a sawi hi he châng vêka târ lan, “Pathian leh Krista” thlâwptu, vâna vântirhkohte an ni ngei ang.

Vântirhkoh rinawm chhiar sên loh an awm a. (Heb. 12:22, 23) Anni chu Pathian Jehova’n hna inang vek thawk tûrin a ruat lo a nih hmêl. (Thup. 14:17, 18) Entîr nân, Jehova chuan vântirhkoh pakhat chauh chu Assuria sipai 1,85,000 tihlum tûrin a tîr a ni. (2 Lal. 19:35) Chu bâkah, ‘[Isua] Lalram aṭangin mi hruai sualtute leh thil sual titute thiar chhuak’ tûrin vântirhkoh tam tak tirh an ni ngei ang. (Mt. 13:39-41, NWT) A dangte chuan, “a thlante chu” vânah an “hruai khâwm” ang a. (Mt. 24:31, NWT) A dang lehte chu, ‘kan kawng tinrênga min humhim tûrin’ thu pêk an ni bawk a ni.—Sâm 91:11; Mt. 18:10; Mt. 4:11; Lk. 22:43 nên khaikhin rawh.

Timothea thawn khat 5:21-a târ lan “vântirhkoh thlante” chu kohhranho rawngbâwl tûra chanvo pêk, vântirhkohte an nih ngei a rinawm. A thu hnu leh a thu hma kan en chuan, upate’n mawhphurhna an hlen dân tûr leh kohhrana mi tinte’n upate chunga zahna an lantîr dân tûrah Paula’n fuihna a pe a. Upate chuan an mawhphurhnate chu ‘duhsak bîk leh thlei bîk’ nei lovin an hlen tûr a ni a, thu tlûkna siamna kawngah, a nih loh leh rorêl dânah hmanhmawh takin thil an ti tûr a ni lo. Thlarauva thâwk khum Paula thurâwn an zawm nachhan tûr pawimawh tak chu, ‘Pathian leh Krista Isua leh vântirhkoh thlante mithmuha’ an awm vâng a ni. Chuvângin, vântirhkoh ṭhenkhatte chu kohhran nêna inkûngkaih chanvo pêk an ni tih a chiang hle a. Chu chanvoah chuan vênhimna pêk te, thu hrilh rawngbâwlna kaihhruai te leh, Pathian Jehova hnêna chanchin thlente a tel a ni.—Mt. 18:10; Thup. 14:6