Kumin chhûnga chhuak Vênnainsâng thuziakte chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

Pathian Jehova’n hmeichhiate cheibâwl dân tûr chungchângah eng entawn tûr nge a siam?

Hmeichhiate chu thlei bîk nei lovin a cheibâwl a, mipate chu a duhsak bîk lo. Pathian chuan hmeichhiate rilru vei zâwng leh an rilru hahnate chu a ngaihvenin a ngaihthlâksak a. A rawngbâwl tûrin a ring tâwk bawk.—w24.01, p. 15-16.

Engtin nge Ephesi 5:7-a “anmahni ṭâwmpui suh ang che u” tih thu hi kan nunpui theih?

Tirhkoh Paula chuan kan tân Pathian tehnate mila nun tiharsa theitu mite chu kâwm lo tûrin min vaukhân a. Chutiang mite zîngah chuan hmaichhana kan kawmte bâkah, social media aṭanga kan biakte pawh an tel a ni.—w24.03, p. 22-23.

Eng ang chanchin dik lote nge kan hnâwl a ngaih?

Kan ṭhian ṭhate leh kan mi hriat lohte hnên aṭanga email-te, a nih loh leh thutak ngaihven anga lang kalpêngte hnên aṭanga a dik tih finfiahna awm lo chanchinte lakah kan fîmkhur tûr a ni.—w24.04, p. 12.

Lal Solomona, Sodom leh Gomorra khuaa tihhluma awmte leh, Tuilêt laia thite chunga Jehova rorêl dân tûr chungchânga kan hriatte leh hriat lohte chu eng nge ni?

Jehova’n anni chu chatuana boral tûra a ruat tawh leh tawh lo chiang takin kan hre lo va. Chutih rualin, engkim a hriain zahngaihna nasa tak a nei tih erawh kan chiang a ni.—w24.05, p. 3-5.

Pathian “Lungpuia” a nihna chuan eng nge min hriattîr? (Deut. 32:4)

Jehova hnênah inhumhimna kan hmu thei a. A rinchhan tlâkin, a thutiamte chu a vawng reng ṭhîn a ni. A danglam ngai lova, a miziate leh a thiltumte chu a ngai reng a ni.—w24.06, p. 26-28.

I awmna kohhran thara a ṭûl anga insiamrem tûrin engin nge ṭanpui thei che?

A chhiahhlawhte ṭanpui ṭhîntu Jehova chu rinchhan la. I kohhran hmasa nêna khaikhin chu pumpelh ang che. Kohhrana thiltihnaahte rilru pe takin tel la, ṭhian tharte siam tum ang che.—w24.07, p. 26-28.

Matthaia bung 25-a tehkhin thu pathumte aṭangin eng zir tûr nge kan neih?

Kêl leh berâm tehkhin thu chuan rinawmna a pawimawhzia a târ lang a. Nula thianghlim fing leh â tehkhin thu chuan inpeih leh harhvâng renga awm a pawimawhzia a sawi uar thung. Talent tehkhin thu chuan taima leh thawk rim taka awm tûrin min fuih bawk.—w24.09, p. 20-24.

Solomona biak ina hulhliap chu eng anga sâng nge a nih?

Chronicles pahnihna 3:4-ah, hmân lai kutziak lehkhabu ṭhenkhat chuan “tawng 120” tiin a ziak a. Chu chu, meter 53-a (ft 175) sâng tihna a ni. Mahse, lehkhabu rin tlâk dangte chuan “tawng 20” tiin an ziak thung. Chu chu, meter 9-a (ft 30) sâng tihna a ni.—w24.10, p. 31.

Kohhranho rawngbâwltute tân “nupui pakhat nei” tih awmzia chu eng nge ni? (1 Tim. 3:12)

Ani chu nupui pakhat chauh nei, nungchang bawlhhlawhnaa inhnamhnawih lo a ni tûr a ni a. Chu bâkah, hmeichhe dangte chu a ngaihmelh tûr a ni lo.—w24.11, p. 19.

Johana 6:53 hi Lalpa Zanriah hman a nih dân tûr chungchânga entîrna a ni lo tih engvângin nge kan sawi theih?

Johana 6:53 chuan Isua tisa eia a thisen in a pawimawhna a sawi a. Isua’n hêng thute hi C.E. 32 khân Galili rama a chunga rinna nei lotu Juda mipuite hnêna a sawi a ni. Mahse, chumi thil a thlen hnu kum khatah chauh Lalpa Zanriah chu Jerusalem-a neih ṭan a ni a. Chutah chuan, Isua’n vâna amah nêna rorêl tûrte hnênah thu a sawi a ni.—w24.12, p. 10-11.