1. Tûn laia mi tam takin eng nge an ngaihven?

 TUN laia mi tam tak chuan mahni chauh an inngaihtuah tih i hmu ṭhîn ang a. Entîr nân, mi ṭhenkhat chuan anmahni leh an thil hlen chhuahte chungchânga mite ngaihven hlawh nân social media-ah nasa takin an inthehlâr a. Chutih rualin, mi tlêm tê chauhvin Pathian Jehova an chawimawi a ni. He thuziakah hian Jehova chawimawi tih awmzia leh kan chawimawi a ngaih chhan kan sawiho vang a. Pathian chu a phû anga kan chawimawi theih dân leh nakin lawka amah ngeiin a hming a chawimawi dân tûr pawh kan sawiho bawk ang.

JEHOVA CHAWIMAWI TIH AWMZIA CHU ENG NGE NI?

2. Engtin nge Jehova’n Sinai Tlângah a ropuizia a lantîr? (A kâwma milem en bawk rawh.)

² Bible chuan Jehova chu Pathian ropui tak a ni tih a târ lang a. Aigupta sal tânna ata Israelte chhuah zalen an nih hnu rei vak lovah a thiltihtheihna chu ropui takin a lantîr a ni. Hei hi han mitthla teh: Sinai Tlâng bulah Israel mi maktaduai têl chu Pathian be tûrin an pung khâwm a. Tlâng chu chhûm chhah takin a tuam mup a. Thâwklehkhatah, lîr nasa takin a rawn nghîng dur dur a, kâwl te rawn phêin, khawpui rî leh tawtawrâwt rî chu ring êm êmin a thang chhuak a ni. (Ex. 19:16-18; 24:17; Sâm 68:8) Pathianin a thiltihtheihna ropui taka a lantîr laia Israel mite mak tih dân tûr chu mitthla ang che.

3. Jehova chawimawi tih awmzia chu eng nge ni?

 ³ Jehova chu Pathian ropui tak a ni a. Chu chu hre thiam tûra mi dangte ṭanpuiin amah kan chawimawi thei a. Chutianga kan tih theih dân kawng khat chu a thiltihtheihna mak takte leh a mize duhawm tak takte chungchâng hrilh hi a ni. A ṭanpuina zâra kan hlen chhuahte avânga lâwmthu sawiin kan chawimawi thei bawk a. (Is. 26:12) Pathian Jehova chawimawina kawngah Lal Davida chuan entawn tûr ṭha tak a siam a ni. Israel mite hmaa a ṭawngṭainaah ani chuan: “Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; lei leh vâna awm zawng zawng hi i ta a ni si a,” tia sawiin Pathian a fak a. Tichuan, a ṭawngṭaina a tihtâwp chuan “mipui zawng zawng chuan . . . Pathian chu an fak” a ni.—1 Chro. 29:11, 20.

4. Engtin nge Isua’n Jehova a chawimawi?

⁴ Leia a awm lai khân Isua chuan a thil mak tihtheihna chu Jehova pêk a nih thu sawiin a Pa a chawimawi a. (Mk. 5:18-20) A Pa chungchâng mite hnêna a sawi dân leh mi dangte a cheibâwl dân hmangin Pathian chu a chawimawi bawk a ni. Ṭum khat chu, Isua’n inkhâwmna ina a zirtîr laiin a thu ngaithlatute zîngah chuan kum 18 chhûng ramhuaiin a man hmeichhe pakhat a tel ve a. Ramhuai chuan zângkûl tûra a siam avângin a ding ngîl thei tawh lo a ni. A va hrehawm dâwn tak êm! Isua chuan a khawngaih êm avângin ngilnei taka biain a hnênah: “Hmeichhia, i dam lohna ata tihdam i ni ta,” tiin a sawi a ni. A chunga kut a nghah chuan chawplehchilha ding ngîlin “Pathian a chawimawi ta a.” Pathianin hrisêlna ṭha a pêk leh avângin a lâwm hle! (Lk. 13:10-13, NWT) Chu hmeichhia chuan Pathian Jehova chawimawina tûr chhan ṭha tak a nei a, keini pawhin kan nei a ni.

ENGIN NGE JEHOVA CHAWIMAWI TURA MIN CHETTIR?

5. Jehova zahna tûr chhan engte nge kan neih?

⁵ Jehova chunga zahna thûk tak kan neih avângin kan chawimawi. Pathian chu zahna tûr chhan tam tak kan nei a. Ani chu engkimtithei a ni a; a thiltihtheihna chuan tâwp chin a nei lo. (Sâm 96:4-7) A thilsiamte aṭangin a finna chu chiang taka hmuh theih a ni bawk a. Chu bâkah, kan nunna Hnâr leh kan nunna Châwmtu a ni. (Thup. 4:10, 11) Pathian chu a rinawm a. (Thup. 15:4, NWT) A thiltih eng kimah hlawhtlingin, a thutiamte a vawng reng a ni. (Jos. 23:14) Chuvângin, zâwlnei Jeremia’n Jehova chungchângah: “Hnamte mi fing zawng zawng zîngah te, an ram rêng rêng zîngah pawh, nang ang rêng an awm lo,” tia a sawi hi a mak lo ve! (Jer. 10:6, 7) Kan Pa vâna mi zahna tûr chhan tam tak kan nei tih a chiang hle. Chutih rualin, Pathian Jehova chuan kan zahna mai bâkah, kan hmangaihna dawn pawh a phû a ni.

6. Engvângin nge Jehova chu kan hmangaih?

⁶ Jehova chu kan hmangaih êm avângin kan chawimawi. Amah hmangaih tûra min chêttîrtu a mize ṭhenkhat lo ngaihtuah ta ila. Ani chu zahngaihna leh khawngaihnain a khat a. (Sâm 103:13; Is. 49:15) Mi a hre thiamin rilru naa kan awmin min tawrhpui a ni. (Zak. 2:8) Amah hre tûr leh a ṭhiante ni tûrin min ṭanpui a. (Sâm 25:14; Tirh. 17:27) Ani chu a inngaitlâwm a; ‘vâna thil awmte leh leia thil awmte en tûra intihnuaiin rethei chu vaivut ata a kai tho ṭhîn a ni.’ (Sâm 113:5-7) Kan Pathian ropui tak chu tuin nge chawimawi lo thei teh lul ang?—Sâm 86:12.

7. Eng chanvo hlu tak nge kan neih?

⁷ Jehova chungchâng mi dangte hre tûra kan duh avângin kan chawimawi. Mi tam  tak chuan a chungchânga thutak an hre lo a ni. Engvângin nge? Satana chuan a chungchânga dâwt thu tenawm tak takte theh darhin mite rilru a tihdelsak vâng a ni. (2 Kor. 4:4) Pathian Jehova chu phuba lâk hmang, mihringte ngaihsak lo leh, khawvêla hrehawmna tam tak thlentu angin mite chu a rintîr a ni. Mahse, kan Pathian chungchânga thutak chu kan hria! Chuvângin, mite hnêna thu dik chu hrilhin amah chawimawi theihna hun remchâng kan nei a ni. (Is. 43:10) Sâm 96-na chuan Pathian hnêna chawimawina pêk chungchâng a thlûr bing a. He Sâm ziaka thâwk khum thu ṭhenkhat kan ngaihtuah rualin, Jehova hnêna a phû anga chawimawina i pêk theih dân tûr kawngte chu ngaihtuah ang che.

ENGTIN NGE JEHOVA CHU A PHU ANGA KAN CHAWIMAWI THEIH?

8. Jehova kan chawimawi theih dân kawng khat chu eng nge ni? (Sâm 96:1-3)

⁸ Sâm 96:1-3 chhiar rawh. A chungchânga kan thusawite hmangin Jehova kan chawimawi. Hêng Bible chângahte hian Jehova mite chu ‘amah chawimawia zai’ tûr te, “a hming fak” tûr te, “a chhandamna thu chu hriattîr” tûr te leh, “a thilmak tihte chu hril” tûrtea sâwm an ni a. Chûngte chu kan Pa vâna mi kan chawimawi theih dân kawngte a ni a. Juda mi rinawmte leh kum zabi khatnaa Kristiante chuan mi dangte hnênah Pathian Jehova’n thil ṭha a tihsakte hrilh tûr leh a hming ṭhatna humhim tûrin an inpeih reng a ni. (Dan. 3:16-18; Tirh. 4:29) Engtin nge chutiang chuan kan tih ve theih ang?

9-10. Angelena-i thiltawn aṭangin eng nge i zir? (Milem en bawk rawh.)

⁹ United States-a awm unaunu Angelena-i a thiltawn hi lo ngaihtuah ta ila. A hnathawhnaah chuan Pathian Jehova hming ṭhatna chu huaisen takin a humhim a ni. Company-a lût thar a nih angin, an hnathawhpuite hnêna a lût tharte’n inhmêlhriattîrna an neihna meeting-a tel tûra sâwm a ni a. Jehova Thuhretu a nih anga a hlimzia târ langtu thlalâkte hmuh tumin a inbuatsaih a ni. Mahse, a hma chiaha sawitupa chuan Thuhretu nia a seilen thu sawiin kan thurinte chu a deuhsawh a. “Ka thin a phu dut dut a. Mahse: ‘Jehova chungchâng dâwt ka sawitîr dâwn nge?  A tân ka ding nghet dâwn?’ tiin ka inngaihtuah a ni,” tiin Angelena-i chuan a sawi a ni.

¹⁰ A hmaa sawitupa a inhmêlhriattîr zawh chuan Angelena-i chu ri lovin a ṭawngṭai lawk a. Tichuan, ani chu aw dam taka biain: “Kei pawh nangmah ang thovin Thuhretu nia seilian ka ni a, tûnah pawh ka la ni reng,” tiin a sawi a. Boruak chu a rit hle a; mahse, Angelena-i chuan thlarau lam thiltihnatea a telna thlalâkte a entîr paha a rinna a vênhim rualin, a rilru thunun a tum tlat a ni. (1 Pet. 3:15) Eng nge a rah chhuah? Unaunuin inhmêlhriattîrna a neih zawh chuan chu pa chuan a rilru put hmang chu a nêm ta deuh va. A naupan lai, Thuhretu a nih laia a thiltawn ṭhate chu a sawi chhuak hial a ni. Angelena-i chuan: “Pathian Jehova chuan ṭan a phû a. A hming ka humhim thei hi chawimawina a ni,” tiin a sawi. Mi dangte’n Pathian chungchâng zah lo taka an sawi hunah keini pawhin amah faka chawimawi theihna chanvo hlu kan nei a ni.

11. Tûn hma aṭang tawhin betu dikte chuan Sâm 96:8-a thu bul chu engtin nge an lo nunpui ṭhin?

¹¹ Sâm 96:8 chhiar rawh. Kan thil hlu neihtein Jehova kan chawimawi thei. Chutiang kawng chuan betu dikte chuan Pathian an chawimawi ṭhîn a. (Thuf. 3:9) Entîr nân, Israel mite chuan biak in sakna leh vawn ṭhatna atân thawhlâwmte an thawh a. (2 Lal. 12:4, 5; 1 Chro. 29:3-9) Zirtîrte chuan Krista leh a tirhkohte chu ‘an thil neihte’ hmangin rawng an bâwlsak a. (Lk. 8:1-3, NWT) Kum zabi khatna hun laia Kristiante pawhin an unaute tân chhawmdâwlnate an thawn bawk. (Tirh. 11:27-29) Tûn laiah pawh phal taka thawhlâwmte thawhin Pathian Jehova chu kan chawimawi ve thei a ni.

12. Engtin nge kan thawhlâwmte’n Jehova a chawimawi? (Milem en bawk rawh.)

¹² Kan thawhlâwmte’n Jehova a chawimawi dân târ langtu thiltawn pakhat lo ngaihtuah ta ila. Kum 2020 khân Zimbabwe ramah nasa takin khua a khêng a. Unaunu Prisca-i pawh tiamin, mi maktaduai tam tak chu ei tûr neih loh avânga thi mai thei dinhmunah an awm a ni. Khawkhên chhûng, lei leh hun laite pawhin Prisca-i chuan a tih ṭhin dân angin, Nilainî leh Zirtâwpnîah te thu hrilin a chhuak ṭhîn a. Feh lova rawngbâwlnaa a chhuah avângin, a ṭhenawmte chuan deuhsawh takin, “I ṭâm mai dâwn a nia,”  an ti ṭhîn a. Chutah, unaunu chuan inring tâwk takin, “Jehova’n a chhiahhlawhte a thlahthlam ngai lo,” tiin a chhâng lêt ṭhîn a ni. A hnu rei vak lovah chuan kan inawpna pâwl aṭangin chhawmdâwlnate a dawng ta a. Chûng chhawmdâwlnate chu kan thawhlâwmte hmanga pêk chhuah a ni. Prisca-i thiltawn chuan a ṭhenawmte rilru a khawih êm avângin, “Pathianin a thlahthlam ngai lo che a nih hi; chuvângin, a chungchâng zir ve kan duh,” tiin an hrilh a. An zînga pasarih chu kohhran inkhâwmnaahte an tel ṭan ta a ni.

13. Engtin nge kan nungchangin Jehova a chawimawi theih? (Sâm 96:9)

¹³ Sâm 96:9 chhiar rawh. Kan nungchang hmangin Jehova kan chawimawi thei. Pathian biak ina rawngbâwl puithiamte chu tisa lama an thianghlim a ngai a. (Ex. 40:30-32) Mahse, chu aia pawimawh zâwk chu nungchang lama thianghlimna a ni. (Sâm 24:3, 4; 1 Pet. 1:15, 16) “Mihring hlui”—ngaihtuahna leh thiltih thianghlim lote—hlîp thla tûra ṭan kan lâk a ngaih rualin, “mihring thar”—Jehova mize ropui takte târ langtu ngaihtuah dân leh thiltihte—hmanga kan inthuam a ngai a ni. (Kol. 3:9, 10) Pathian ṭanpuinain nungchang bawlhhlawh tak leh mi sual ber pawh inthlâk danglamin mihring tharin a inthuam thei a ni.

14. Jack-a thiltawn aṭangin eng nge i zir? (Milem en bawk rawh.)

¹⁴ Ramhuai tiha an koh hial mi tawrawt tak Jack-a chanchin hi han ngaihtuah teh. A thil sual tihte avângin thi tûra a chungthu rêlsak a ni a. Mahse, tihhlum a nih hun tûr a nghah laiin Jack-a chuan a tânna hmun rawn tlawhtu unaupain Bible zir tûra a sâwmna chu a lo pawm a. Tûn hmain thil ṭha lo tak tak ti ṭhîn mah se, inthlâk danglama baptisma changin Jehova Thuhretu a rawn ni a. Tihhlum a nih hun tûr a lo thlen meuh chuan tâng vêngtu ṭhenkhat chuan mittui tla chungin an thlah a ni. Tân ina hnathawk sipai pakhat chuan: “Jack-a kha mi tângte zînga sual ber a ni ṭhîn a. Mahse, tûnah chuan tângte zînga mi ṭha ber a ni tawh a ni,” tiin a sawi. Jack-a tihhlum a nih aṭanga kâr khat hnuah, tân ina inkhâwmna kaihruai tûra kal unaupate chuan a vawi khatna atâna lo inkhâwm mi tâng pakhat chu an hmu a ni. Ani chu engin nge inkhâwmnaa tel tûra chêttîr? Jack-a inthlâk  danglamna chuan a rilru a khawih êm avângin, Pathian Jehova be tûra a tih ngaite chu hriat a duh a ni. Kan nungchangin kan Pa vâna mi a chawimawi thei tih a va chiang tak êm!—1 Pet. 2:12.

ENGTIN NGE JEHOVA’N NAKIN LAWKAH A HMING A CHAWIMAWI ANG?

15. Engtin nge Jehova’n nakin lawkah a hming a chawimawi pumhlûm ang? (Sâm 96:10-13)

¹⁵ Sâm 96:10-13 chhiar rawh. Sâm 96 châng tâwp lam hian Pathian Jehova chu Rorêltu leh Lal fel tak a ni tih a târ lang a ni. Engtin nge Pathianin nakin lawkah a hming a chawimawi ang? A rorêlna hmangin a ni. A hming thianghlim tibawrhbângtu Babulon Khaw Ropui chu a tichhe thuai ang a. (Thup. 17:5, 16; 19:1, 2) Babulon Khaw Ropui tihchhiatna mita hmutu mi ṭhenkhat chu biakna dikah an rawn tel pawh a ni thei a ni. A tâwpah, Armageddon-ah Setana kalhmang zawng zawng chu tichhiain amah dodâltute leh a hming sawichhetute chu a tiboral ang. Chutih rualin, amah hmangaih a, a thu âwih a, chawimawi duhtu zawng zawngte chu a chhandam dâwn a ni. (Mk. 8:38; 2 Thes. 1:6-10) Krista Kum Sâng Rorêl tâwpa awm tûr fiahna hnuhnûng ber zawhah chuan Jehova’n a hming chu a tithianghlim pumhlûm tawh ang. (Thup. 20:7-10) Chutih hunah chuan “tuifinriat chu tuiin a khat vek angin LALPA ropuizia hriatnain lei hi a khat vek dâwn” a ni.—Hab. 2:14.

16. Eng nge tih i tum tlat ang? (Milem en bawk rawh.)

¹⁶ Mi zawng zawngin Jehova an chawimawi hun tûr chu a va nghahhlelhawm tak êm! Chumi nî a lo thlen hma chu hun remchâng kan neih apiangah kan Pathian i chawimawi zêl ang u. Chutianga tih a pawimawhzia târ lan nân, Governing Body chuan Sâm 96:8: “Jehova chu a hming phûin chawimawi rawh u,” tih chu kum 2025 kum châng atân a thlang a ni.