ZIR TUR THUZIAK 3
HLA 35 “Thil Pawimawh Zâwkte Thlang Rawh”
Jehova Tilâwmtu Thu Tlûkna Siam Rawh
“LALPA ṭih hi finna bul a ni a, Mi Thianghlima hriatna hi hriat thiamna a ni.”—THUF. 9:10.
A TUM BER
Thu tlûkna ṭhate siam tûra hriatna, hriatthiamna leh, ngaihtuah thiamna hman dân.
1. Thu tlûkna siamna kawngah eng harsatna nge kan tawh theih?
NI TIN thu tlûknate kan siam a ngai a. A ṭhen chu tûkṭhuan ei tûr, a nih loh leh zân mut hun tûr ang chi thu tlûkna awlsam takte a ni a. Chutih rualin, kan hrisêlna, kan hlimna, kan hmangaih takte, a nih loh leh kan biakna chunga nghawng nei thei thu tlûknate erawh siam a harsa thei a ni. Keimahni leh kan chhûngte chunga hlâwkna thlentu thu tlûknate siam kan duh a. A pawimawh berah chuan, Pathian Jehova tilâwmtu thu tlûknate siam kan duh a ni.—Rom 12:1, 2.
2. Thu tlûkna ṭha takte siam tûrin eng rahbîte nge i zawh theih?
2 Thu tlûkna ṭha tak siam tûr chuan (1) thil a nihna dik tak hriat, (2) Jehova thlîr dân ngaihtuah leh, (3) duhthlan theihte bûk a ngai a ni. He thuziak hian chûng rahbîte chu a târ lang ang a, hriat theihna, a nih loh leh ngaihtuah thiamna sawizawi theih dân hre tûr pawhin min ṭanpui bawk ang.—Thuf. 2:11.
THIL A NIHNA DIK TAK HRIAT
3. Thu tlûkna i siam hmaa thil a nihna dik tak hriat a pawimawh chhan entîrna pe rawh.
3 Thu tlûkna ṭha tak siam tûra rahbî pakhatna chu thil a nihna dik tak hriat hi a ni. Engvângin nge chu chu a pawimawh? Dam lo na tak pakhat chuan a natna chungchângah doctor a râwn a. Doctor chuan dam lo chu en fiah a, zawhnate zâwt hmasa lovin, a enkawl nghâl mai ang em? Nghâl mai lo vang. Chutiang bâwkin, i dinhmun tawh mêk nêna inkûngkaiha thil a nihna dik tak i hriat hmasak chauhvin thu tlûkna ṭha tak i siam thei dâwn a ni. Thil a nihna dik tak hre tûrin eng nge i tih theih?
4. Thufingte 18:13-a sawi angin, thil a nihna dik tak hre tûrin eng nge i tih theih? (Milem en bawk rawh.)
4 A nihna dik taka thil hre tûr chuan zawhnate i zâwt thei a. Entîr nân, intihhlimna pakhata tel tûra sâwm ni ta la, eng mah zâwt fiah hmasa lovin i tel mai ang em? A huaihawttu, a nih loh leh intihhlimna ruahman a nih dân chu i hre chiang lo a nih chuan, hêng zawhnate hi i zawh a ngai ang: “Intihhlimna chu khawiah nge neih a nih ang a, eng hunah nge ni ang? Mi eng zât nge tel ang? Tuin nge mawhphurhna la ang? Tute nge lo tel ve dâwn? Eng thiltihte nge tel dâwn? Zu lampang chi hlui a ni dâwn em?” tihte hi. Chûng zawhnate ngaihtuah lâwkna chuan thu tlûkna fing tak siam tûrin a ṭanpui ang che.—Thufingte 18:13 chhiar rawh.
Zawhnate zâwtin thil nih dân dik tak hriat tum rawh (Paragraph 4-na en rawh) a
5. Thil a nihna dik tak i hriat hnuah eng nge i tih ngai?
5 Thil a nihna dik tak i hriat hnuah, thil awm dân tûr chu kim takin chhût ang che. Entîr nân, Bible thu bul zâwm lotute an tel ve dâwn, a nih loh leh zu lampang chite chu mawhphurhna latu tel lova hlui a ni dâwn tih hre ta la, engtin nge ni ang? Intihhlimna chu thunun theih lova awmin, zu hmun hlimnaah a chang thei ang em? (1 Pet. 4:3) A nih loh leh, intihhlimna neih hun chuan kohhran inkhâwm leh rawngbâwlna hun a tibuai thei ang em? Kimchang taka thil i hriat tawh chuan, thu tlûkna ṭha tak i siam thei tawh dâwn a ni. Mahse, rahbi dang pawimawh tak a la awm a. Dinhmun chu i hmu thiam tawh a; mahse, Jehova’n engtin nge a thlîr ve ang?—Thuf. 2:6.
JEHOVA THLIR DAN NGAIHTUAH RAWH
6. Jakoba 1:5-a sawi angin, engvângin nge Jehova hnênah ṭanpui dîla kan ṭawngṭai ang?
6 Jehova hnênah a ngaihtuah dân hre thiam tûrin ṭanpuina dîl ang che. Kan thu tlûkna siam chuan amah a tihlâwm dâwn leh dâwn loh hre thiam tûrin finna pêk min tiam a. Chutiang finna chu ‘mi zawng zawng hnênah hau lo leh ui lovin a pe’ a ni.—Jakoba 1:5 chhiar rawh.
7. Engtin nge Jehova ngaihtuah dân chu i hriat theih ang? Entîrna pe rawh.
7 Jehova hnêna kaihhruaina dîla i ṭawngṭai tawh chuan, chhânna a pêk dân che chu ngaihven ang che. Entîr nân: khawi emaw i zinnaa kawng i bo a nih chuan, tualchhûng mi tu emaw hnênah ṭanpuina i dîl ngei ang a. Mahse, kawng a kawhhmuh hma chein i kalsan mai ang em? Kalsan mai lo vang. Kal dân tûr a hrilh che chu ṭha takin i ngaithla dâwn a ni. Chutiang bawkin, Jehova hnêna finna i dîl hnuah, i dinhmun nêna inkûngkaih Bible dânte leh thu bulte chu zawngin, a chhânna hriat tum ang che. Entîr nân, kan târ lan tâk intihhlimnaa i tel dâwn leh dâwn loh chungchânga thu tlûkna i siam hunah, zu hmun hlimna, ṭhian sualte leh, i mi mal duh dân aia Lalram dah hmasak a pawimawhna chungchânga Bible sawite chu i ngaihtuah thei a ni.—Mt. 6:33; Rom 13:13; 1 Kor. 15:33.
8. I thu hriat duh i zawn hunah ṭanpuina i mamawh chuan eng nge i tih theih? (Milem en bawk rawh.)
8 Chutih rualin, i thu hriat duh chungchâng zawng hmu tûrin ṭanpuina i mamawh châng a awm thei a. Chuvângin, tawn hriat ngah unau tu emaw hnên aṭangin thurâwn i la pawh a ni thei. Mahse, mahnia zir bingna neih chu i hlâwkpui thei bawk a ni. Jehova Thuhretute Tâna Zir Bingna Hmanrua, leh Kristian Nun Atâna Bible Chângte ang chi inzirna hmanruate aṭangin thu ṭha tak tak i hmu thei a. I thiltum ber chu Jehova tilâwmtu thu tlûkna siam a ni tih hre reng rawh.
Jehova ngaihtuah dân hriat tum rawh (Paragraph 8-na en rawh) b
9. Kan thu tlûkna siamin Jehova a tilâwm tih engtin nge kan chian theih? (Ephesi 5:17)
9 Kan thu tlûkna siam chuan Jehova a tilâwm tih engtin nge kan hriat theih? A hmasa berin, amah kan hriat chian a ngai a ni. Bible chuan: “Mi thianghlima hriatna hi hriat thiamna a ni,” tiin a sawi a. (Thuf. 9:10) Ni e, hriatthiamna dik tak chu Jehova mizia te, a thiltum te leh, a duh zâwng leh huat zâwngte hriatnaah a innghat a ni. Chuvângin, ‘Jehova chungchânga ka thu hriat tawhte ṭanchhanin, amah tilâwmtu eng thu tlûkna nge ka siam ang?’ tiin inzâwt ang che.—Ephesi 5:17 chhiar rawh.
10. Engvangin nge Bible thu bulte chu chhûngkaw kalphung, a nih loh leh hnam dânte aia kan ngaih pawimawh zâwk ang?
10 Jehova tilâwm tûr chuan kan hmangaih takte kan tihlung nih loh a ngaih châng a awm ngei dâwn a. Entîr nân, nu leh pate chuan an fanu hmakhua an ngaih avângin, thlarau lama chak lo, sum leh pai lama nei nung tak—man leh mual pe tam thei—tu emaw chu neihtîr an tum mai thei a. Ni e, an fanu chu sum leh pai lama lungkhamna nei lova awmtîr an duh ngei mai; mahse, tuin nge thlarau lama hmasâwn chho zêl tûrin pui ta ang? Hemi chungchânga Jehova thlîr dân chu eng nge ni? A chhânna chu Matthaia 6:33-ah kan hmu thei a. Chutah chuan Kristiante chu “a ram . . . dah hmasa zêl” tûra fuih an ni a. Kan nu leh pate chu kan chawimawiin, khawtlânga mite chunga zahna nei mah ila, kan ngaih pawimawh ber tûr chu Jehova tihlâwm a ni.
DUH THLAN THEIHTE CHU BUK RAWH
11. Philippi 1:9, 10-a târ lan eng thilin nge i duh thlan theihte bûk thiam tûra ṭanpui ang che?
11 I thu tlûkna siam tûr chungchânga Bible thu bulte i ngaihtuah hnuah, i duh thlan theihte chu i khaikhin a ngai a ni. Philippi 1:9, 10 (Baptist Mid-Missions) chuan: “Tin, in inhmangaihna chu hriatna famkim leh ngaihtuah thiamna tinrêngah a lo pun deuh deuh theih nân ka ṭawngṭai ṭhîn. Tichuan, Isua Krista nî thlenga dik tak leh sawisêl bova inawm theih nân, thil ṭha berte chu in pawm thei ang,” tiin a sawi a. Ngaihtuah thiamna chuan duh thlan theih tinte’n nghawng a neih theihte chu hre thiam tûrin a ṭanpui dâwn che a. A châng chuan, thu tlûkna ṭhenkhat chu awlsam taka siam theih a nih rualin, a ṭhen erawh awlsam taka siam theih a ni lo. Chuvângin, ngaihtuah thiamna chuan dinhmun khirh tak hnuaiah pawh thu tlûkna fing siam tûrin a ṭanpui dâwn che a ni.
12-13. Engtin nge ngaihtuah thiamna chuan hna chungchânga thu tlûkna ṭha tak siam tûra a ṭanpui theih che?
12 He dinhmun hi han ngaihtuah teh. I chhûngkaw châwm nân hna i zawng a. Hna ruak pahnih a awm a. A hna chungchâng te, hun duan te, hna kal nâna hun i hman zât tûr te leh, thil dangte chu i ngaihtuah a. A pahnih chuan, Bible thu bulte nên a inkalh lo ve ve a. Hna pakhat zâwk chu i hna thawh duh zâwng a nih vâng emaw, a hlawh a sân zâwk vângin emaw i duh zâwk a. Mahse, thu tlûkna i siam hmain, thil dang i ngaihtuah tûr a la awm a ni.
13 Entîr nân, chûng hnate chuan i inkhâwm hun a tibuai thei ang em? I chhûngte rilru lam leh thlarau lam mamawh ngaihsak nâna i mamawh hunte chu a la pêng ang em? Chûng zawhnate inzawhna chuan “thil pawimawh zâwkte [NWT]”—i thlarau lam thilte leh i chhûngte mamawh—chu tisa lam thilte aia dah hmasa zâwk tûrin a ṭanpui thei che a. Tichuan, Jehova malsâwmna thlentu thu tlûkna ṭha tak i siam thei ang.
14. Engtin nge ngaihtuah thiamna leh hmangaihna chuan mi dangte titlu lo tûra min ṭanpui theih?
14 Ngaihtuah thiamna chuan kan thu tlûkna siam hmanga ‘mi dangte titlutu’ ni lo tûra fîmkhur tûrin min ṭanpui thei a. (Phil. 1:9, 10) Silhfên leh inchei dân ang chi mi mal duh thlanna kan siam hunah fîmkhur a ngai lehzual a. Entîr nân, inchei duh dân bîk kan nei thei a. Mahse, kan inchei duh dân chu kohhran chhûng lam emaw, pâwn lama mite emawin ngai thiam lo ta se, engtin nge ni ang? Ngaihtuah thiamna chuan an rilru vei zâwngte zahsak tûrin min ṭanpui ang a. Hmangaihna chuan “mi dang” ṭhatna tûr zawng tûr leh inchawih tâwk taka inchei tûrin min ṭanpui ang. (1 Kor. 10:23, 24, 32; 1 Tim. 2:9, 10) Tichuan, mi dangte chunga hmangaihna leh zahna lantîrtu thu tlûkna chu kan siam thei dâwn a ni.
15. Thu tlûkna pawimawh tak i kalpui hmain eng ruahmanna nge i siam ngai?
15 Thu tlûkna pawimawh tak i siam hian, i thu tlûkna siam anga hma la tûra i tih ngaite chu ngaihtuah ang che. Isua chuan ‘sênso tûrte chhût tûrin’ min zirtîr a. (Lk. 14:28) Chuvângin, i thu tlûkna siam tihlawhtling tûra hun leh tha leh sum sên ngai zât chu ngaihtuah ang che. Dinhmun ṭhenkhatah chuan, i thu tlûkna siam thlâwp tûra i chhûngte tih theih hre tûrin anni chu i râwn thei a. Engvângin nge chutianga ruahman lâwk chu a pawimawh? I thu tlûkna siamah insiamrem ngaihna lai a awm tih hre tûrin emaw, duh thlan tûr ṭha zâwk hre tûrin emaw a ṭanpui theih vâng che a ni. Chu bâkah, i chhûngte i râwn a, an thurâwn pêkte i ngaihthlâksak chuan i thu tlûkna siamte tihlawhtling tûra ṭanpui che an inhuam lehzual ang.—Thuf. 15:22.
HLAWHTLING TUR THU TLUKNA SIAM RAWH
16. Eng rahbîte’n nge thu tlûkna hlawhtling siam tûra ṭanpui ang che? (“ Thu Tlûkna Ṭha Siam Dân,” tih bâwm chu en bawk rawh.)
16 Kan târ lan tâk rahbîte i zawh tawh chuan, thu tlûkna ṭha tak siam tûrin i inpeih tawh tihna a ni a. Thil a nih dân dik tak i hre tawhin, Jehova tilâwmtu thu tlûkna siam tûra ṭanpui theitu che Bible thu bulte pawh i zir chiang tawh a. Tûnah chuan, i thu tlûkna siam tihlawhtling tûrin Jehova ṭanpuina i dîl thei a ni.
17. Thu tlûkna ṭhate siam tûra thil pawimawh ber chu eng nge ni?
17 Tûn hmain, thu tlûkna ṭha tam tak i lo siam tawh a nih pawhin, siam zêl thei tûra pawimawh ber chu nangma finna emaw, thiltawn emaw rinchhan ni lovin, Jehova finna rinchhan a ni tih hre reng ang che. Amah chauhvin finna innghahna bulpui, hriatna, hriatthiamna leh, ngaihtuah thiamna dik tak chu a pe thei che a. (Thuf. 2:1-5) Jehova chuan amah tilâwmtu thu tlûkna siam tûrin a ṭanpui thei che a ni.—Sâm 23:2, 3.
HLA 28 Jehova Ṭhian Nih Theih Dân
