ZIR TUR THUZIAK 2
Hla 132 Pumkhat Kan Ni Ta
Pasalte U, In Nupuite Chawimawi Rawh U
“Pasalte u, in nupuite . . . chawimawi rawh u.”—1 PET. 3:7.
A TUM BER
Pasalte’n an nupuite ṭawngkam leh thiltiha an chawimawi theih dân.
1. Pathianin inneihna a ruahman chhan pakhat chu eng nge ni?
JEHOVA chu “Pathian hlim” a ni a, keini pawh hlim tûrin min duh a ni. (1 Tim. 1:11, NWT) Nun hlimawm tak kan neih theih nân thilpêk tam tak min pe a. (Jak. 1:17) Chûng zînga pakhat chu inneihna thilpêk hi a ni. Mipa leh hmeichhia an inneih hian inhmangaih a, inzah tawn a, inngai hlu tawn tûrin thu an tiam a. An inlaichînna nghet taka an vawn rengna chuan hlimna dik tak a neihtîr thei a ni.—Thuf. 5:18.
2. Tûn laia nupa tam takte dinhmun chu eng nge ni?
2 Lungchhiatthlâk takin, tûn laia nupa tam takte chuan an inneih nîa an thutiam chu an theihnghilh ṭhîn a. Tûn hnaia World Health Organization (WHO) report pakhatin pasalte chuan an nupuite chu kut an thlâk a, na tak taka ṭawng khumin, an rilru tinatu thilte an ti ṭhîn tih a târ lang a ni. Chutiang thil ti ṭhîntu pasalte chuan mi hmuhah chauh an nupuite chu zahthiam takin an cheibâwl ṭhîn a. Chu bâkah, pasal ṭhenkhat chuan saruak lem leh thuziakte en an chîn avângin nupa tam tak kârah buaina a thleng ṭhîn a ni.
3. Engvângin nge pasal ṭhenkhat chuan an nupuite chu hmangaihna nei lo taka an cheibâwl ṭhin?
3 Engvângin nge pasal ṭhenkhat chuan an nupuite chungah hmangaihna nei lo taka thil an tih ṭhin? Pa hmangaihna nei lo tak kut hnuaia seiliante chuan chutianga tih chu thil pângngai takah an ngai thei a. Mi ṭhenkhat chuan an seilenna hmuna mite ngaih dân dik lo tak avângin nupui hneh chu “mipa dik tak” nihna angin an thlîr a ni. A dangte chu an thinrimna pawh tiamin, an rilru awm dânte thunun tûra zirtîr an ni lo va. Mipa dang lehte chuan saruak lem leh thuziakte an en ṭhin avângin hmeichhiate leh mipat hmeichhiatna chungchângah thlîr dân veiherh tak an nei a. Report ṭhenkhat chuan COVID-19 hripui lên chhûngin chûng harsatnate chu a pun belh thu a târ lang bawk a ni. Mahse, chûngte chu pasalte tân an nupuite chunga hmangaihna nei lo taka thil ti tûra chhuanlam a tling lo.
4. Eng lakah nge Kristian pasalte chu an fîmkhur a ngaih a, engvângin nge?
4 Kristian pasalte chuan hmeichhiate chunga ngaih dân dik lo nei ve lo tûra an fîmkhur a ngai a ni. a Engvângin nge? A chhan pakhat chu, kan ngaihtuahnate chu thiltiha a lanchhuah ṭhin vâng a ni a. Tirhkoh Paula chuan Rom khuaa hriak thih Kristiante chu: “He khawvêl thunun hian awm tawh suh u,” tiin a vaukhân a ni. (Rom 12:1, 2, NWT) Chutianga a vaukhân lai chuan Rom khuaa kohhran chu kum eng emaw chen a ding tawh a. Mahse, Paula thusawite chuan kohhrana mi ṭhenkhat chu an hun laia mite ngaih dân leh thiltihte’n a la thunun tih a târ lang a ni. Chuvângin, an ngaih dân leh thiltihte chu thlâk tûrin a hrilh a. Chu a vaukhânna chu tûn laia Kristian pasalte tân pawh a ni a. Lungchhiatthlâk takin, unaupa ṭhenkhat chu he khawvêl ngaih dân thununa awmin, an nupuite chungah hmangaihna nei lo takin thil an ti a ni. Jehova’n pasalte chu an nupuite eng anga cheibâwl tûrin nge a beisei? He thuziak ṭanchhan Bible chângah a chhânna kan hmu thei a ni.
5. Petera thawn khat 3:7-a sawi angin, engtin nge pasalte’n an nupuite an cheibâwl ang?
5 Petera thawn khat 3:7 chhiar rawh. Pathianin pasalte chu an nupuite chawimawi tûrin thu a pe a. Chawimawi tih hian kan mi zah takte kan cheibâwl dân a kâwk a. Nupui chawimawitu pasal chuan a nupui chu ngilnei tak leh hmangaihna nei takin a chawimawi dâwn a ni. He thuziakah hian, pasalte’n an nupuite an chawimawi theih dân kan sawiho vang a. Mahse, a hmasain nupuite chawimawi lo thiltihte chu i lo sawiho vang u.
I NUPUI CHAWIMAWI LOTU THILTE CHU TI SUH
6. Engtin nge Jehova’n an nupuite kutthlâk ṭhînte chu a thlîr? (Kolossa 3:19)
6 Kutthlâk. Mi nunrâwngte chu Jehova’n a hua a. (Sâm 11:5) A bîkin, nupui kutthlâk chîngte chu a haw lehzual a ni. (Mal. 2:16; Kolossa 3:19 chhiar rawh.) He thuziak ṭanchhan Bible châng 1 Petera 3:7-a sawi angin, pasalte’n an nupuite ṭha taka an cheibâwl loh chuan Pathian nêna an inlaichînnain a tawrh phah thei a. An ṭawngṭaina chu Jehova’n a ngaihthlâksak lo pawh a ni hial thei a ni.
7. Ephesi 4:31, 32-a sawi angin, pasalte’n eng nge an pumpelh ang? (“Ṭawngkam Hrilhfiahna,” tih chu en bawk rawh.)
7 Ṭawngkam na tak hman. Pasal ṭhenkhat chuan an nupuite chu na tak takin an ṭawng khum a. Mahse, Pathian Jehova chuan “thinurna te, tauhna te, ânna te, sawichhiatna te” b chu a hua a ni. (Ephesi 4:31, 32 chhiar rawh.) Ani chuan eng kim a hria a. Anmahni chauhva an awm huna pasalin a nupui a biak dân chu a ngai pawimawh a ni. A nupui ṭawngkam na taka be ṭhîntu chuan an nupa inkâr bâkah, Jehova nêna an inlaichînna pawh a tichhia a ni.—Jak. 1:26.
8. Engtin nge Pathianin saruak lem leh thuziakte chu a thlîr a, engvângin nge?
8 Saruak lem leh thuziakte en. Engtin nge Jehova’n saruak lem leh thuziakte chu a thlîr? A hua a ni. Chuvângin, chutiang thil tenawmte entu chuan Pathian Jehova nêna an inlaichînna a tihchhiat bâkah, a nupui pawh a chawimawi lo tihna a ni. Pathian chuan pasalte chu an nupuite chunga an thiltihah mai pawh ni lovin, an ngaihtuahna thleng pawha rinawm tlat tûrin a beisei a. Isua chuan hmeichhe dang ngaih châka melhtu chu thinlungah a uirê tawh tih a sawi a ni. c—Mt. 5:28, 29.
9. Engvângin nge Jehova’n nupuite nawmnah taka mipat hmeichhiatna hmanpui chu a huat?
9 Nawmnah taka mipat hmeichhiatna hmanpui. Pasal ṭhenkhat chuan an nupuite chu nawmnah takin mipat hmeichhiatna an hmanpui a. Chu chuan, nupuite chu thianghlim lo leh hmangaih loh nia inhriatna a neihtîr a ni. Pathian Jehova chuan chutianga mahni hmasial tak leh ngilnei lo taka thiltihte chu a hua a. Pasalte chu an nupuite hmangaih a, ngai hlu a, an rilru awm dânte zahsak tûrin a beisei a ni. (Eph. 5:28, 29) A nih leh, pasal chu a nupui chungah nawmnah takin a che emaw, kutthlâk a chîng emaw, a nih loh leh saruak lem leh thuziakte en a chîng a nih chuan, engtin nge ni ang? Engtin nge a rilru put hmang leh thiltihte chu a thlâk danglam theih ang?
THILTIH ṬHA LOTE BANSAN THEIH DAN
10. Engtin nge pasalte’n Isua entawn tûr siam chu an hlâwkpui theih?
10 Engin nge pasal chu a chunga kan târ lan tâk thiltih ṭha lo zawng zawng bânsan tûra ṭanpui thei? Isua entawn tuma theih tâwp a chhuahnain a ni. Isua chuan nupui nei lo mah se, a zirtîrte a cheibâwl dân chu mipain a nupui a cheibâwl dân kawnga entawn tûr a ni a. (Eph. 5:25) Tûnah, Isua’n a tirhkohte a cheibâwl dân leh a biak dân aṭanga pasalte’n an zir theihte chu i lo ngaihtuahho vang u.
11. Engtin nge Isua’n a tirhkohte chu a cheibâwl?
11 Isua’n a tirhkohte chu ngilnei tak leh zahawm takin a cheibâwl ṭhîn a. Intilal takin thil a ti ngai lo. An Lal leh an Pu ni mah se, a thiltihtheihna hmangin an chunga thu a neihzia a lantîr ngai lo. Chu aiin, inngaitlâwm takin an rawng a bâwlsak zâwk a ni. (Joh. 13:12-17) Anni chu: “Thuhnuairawlh tak leh rilrua inngaitlâwm tak ka nih avângin . . . ka hnên aṭangin inzir rawh u; tichuan, hahdamna in hmu ang,” tiin a hrilh a ni. (Mt. 11:28-30, NWT) Isua chu thuhnuairawlh tak, a nih loh leh nunnêm tak a ni tih chhinchhiah ang che. Nunnêmna chu chak lohna a ni lo va. Mi nunnêm chuan inthunun tûrin chhûngrila chakna a nei zâwk a ni. Tihthinrima a awm hunah pawh thinrima chhâng lêt lovin, a rilru awm dânte chu a thunun a ni.
12. Engtin nge Isua’n mi dangte a biak?
12 Isua chuan a thusawite hmangin mi dangte chu a thlamuanin a tihahdam ṭhîn a. A hnungzuitute chu a vîn ngai lo. (Lk. 8:47, 48) Amah hawtute’n an sawichhiata tihthinrim an tum hunah pawh “a hau ve thung lo va.” (1 Pet. 2:21-23) A châng chuan, chhâng lêt lovin ngawih a chuh ṭhîn a ni. (Mt. 27:12-14) Kristian pasalte tâna entawn tûr ṭha tak a va ni êm!
13. Matthaia 19:4-6-a sawi angin, engtin nge pasal chuan ‘a nupui a vawn tlat’ theih ang? (Milem en bawk rawh.)
13 Isua’n pasalte chu an nupuite chunga rinawm tlat tûrin a zirtîr a. Pasalin “a nupui a vuan tlat ang,” tia a Pa thusawi chu a sawi chhâwng a ni. (Matthaia 19:4-6 chhiar rawh, NWT) He chânga “vuan tlat” tih Grik thu mal hian “châr bet” tih a kâwk a. Chuvângin, nupate inkâra inlaichînna chu châr beh tlat angin a nghet tûr a ni a. Chu inlaichînna a chah chuan an nupain an tuar dâwn a ni. Chuvângin, a nupui hmangaih êm êmtu pasal chuan saruak lem leh thuziak eng pawh chu a hnâwl dâwn a. “Thil engmah lo mai mai” lakah a mit a la sawn nghâl ang. (Sâm 119:37) Chu bâkah, a nupui ni lo hmeichhe dang ngaih melh lo tûrin a mit atân thuthlung a siam a ni.—Job. 31:1.
Pasal rinawm tak chuan saruak lem leh thuziakte a en duh lo (Paragraph 13-na en rawh) e
14. Hmangaihna nei lo taka thil ti ṭhîntu pasal chuan Jehova leh a nupui nêna an inlaichînna siam ṭha tûrin engte nge a tih ngai?
14 Nupui kutthlâk chîng leh ṭawngkam na tak hmang ṭhîn pasal chuan Pathian leh a nupui nêna an inlaichînna siam ṭha tûra tih ngai ṭhenkhat a nei a ni. Engte nge? Pakhatna, harsatna lian tak a nei tih a pawm a ngai a ni. Jehova lakah eng mah thup theih a awm lo. (Sâm 44:21; Thur. 12:14; Heb. 4:13) Pahnihna, a nupui laka a thiltih ṭha lote a bânsan a, a inthlâk danglam a ngai a ni. (Thuf. 28:13) Pathumna, Jehova leh a nupui hnênah tih tak zetin ngaihdam a dîl tûr a ni a. (Tirh. 3:19) Inthlâk danglam duhna nei tûr leh a ngaihtuahna, thusawi leh thiltihte thunun thei tûrin Jehova hnênah ṭanpuina a dîl bawk tûr a ni. (Sâm 51:10-12; 2 Kor. 10:5; Phil. 2:13) Palina, a ṭawngṭaina nêna inmilin tharum thawhna leh ṭawngkam na tak eng pawh huat dân a zir ang. (Sâm 97:10) Pangana, kohhrana hmangaihna nei tak berâmpute hnên aṭangin a rang thei ang berin ṭanpuina a dîl ang. (Jak. 5:14-16) Parukna, nakin zêlah pawh chûng thiltih ṭha lo zawng zawngte chu pumpelh theih dân a ngaihtuah lâwk ang. Saruak lem leh thuziakte en chîng pasalte pawhin kan târ lan tâkte ang hian hma an la tûr a ni a. Jehova’n an ṭan lâknate chu mal a sâwm dâwn a ni. (Sâm 37:5) Mahse, an thiltih ṭha lote bânsan mai chu a tâwk lo va. An nupuite chawimawi dân an zir a ngai bawk a ni. Engtin nge chutianga an tih theih ang?
I NUPUI I CHAWIMAWI THEIH DAN
15. Engtin nge pasalin a nupui a hmangaihzia a lantîr theih?
15 Hmangaihna lantîr rawh. Inneihna hlimawm tak nei unaupa ṭhenkhat chuan an nupuite an hmangaihzia lantîr tûrin nî tinin thil eng emaw an ti ṭhîn a. (1 Joh. 3:18) Pasal chuan kut vawnsak leh kuah ang chi thiltih pângngai takte hmangin a nupui chungah hmangaihna a lantîr thei a ni. “Ka ngai che,” a nih loh leh “Vawiin i tluang em?,” tih ang chi text message a thawn thei bawk a ni. A chângin, a hmangaihzia lantîr nân lehkha tawi têin a ziahsak thei a, a nih loh leh a chawhmeh duh zâwng a siamsak thei bawk. Pasalin chutianga a tih chuan a nupui a chawimawiin an inneihna a nghet lehzual sauh dâwn a ni.
16. Engvângin nge pasalin a nupui a ngaihhlutzia a hrilh ang?
16 Amah i ngaihhlutzia hrilh rawh. A nupui chawimawitu chuan a ngaihhlut chhante hrilhin inrintâwkna nei tûrin a ṭanpui a. Amah ṭanpui tûra a thil tihsak zawng zawngte avânga lâwmthu sawiin chutiang chuan a ti a ni. (Kol. 3:15) Pasalin thinlung taka a nupui a fak hian a rilru a tihlim hle a. Him, hmangaih leh, chawimawi nia inhriatna a neihtîr a ni.—Thuf. 31:28.
17. Engtin nge pasalin a nupui a zah tih a lantîr theih?
17 Ngilnei tak leh zahawm takin cheibâwl rawh. A nupui hmangaihtu chuan a ngaihlu a. Pathian Jehova hnên aṭanga thilpêk duhawm tak angin a thlîr a ni. (Thuf. 18:22; 31:10) Chuvângin, nupa nun an hman dun hun pawh tiamin, thil an tihdun hunahte ngilnei tak leh zahawm takin a cheibâwl a ni. Mipat hmeichhiatna an hman hunah a awm tinuam lotu, ngaihhlut loh nia inhriatna neihtîrtu, a chhia leh ṭha hriatna tibuaitu thilte chu a tihluihtîr lo vang. d Amah ngei pawhin Pathian Jehova hmaa chhia leh ṭha hriatna thiang tak nei tûrin ṭan a la dâwn a ni.—Tirh. 24:16.
18. Pasalte’n eng nge tih an tum tlat ang? (“ Nupuite Chunga Zahna Lantîr Theih Dân Kawng Li,” tih bâwm chu en rawh.)
18 Pasalte u, in nun kawng hrang hranga in nupuite chawimawi tûra ṭan in lâknate chu Jehova’n a hmuin a ngaihlu tih in chiang thei a. In nupuite tina thei thiltih eng pawh pumpelh a, an chungah ngilneihna, zahna leh, hmangaihna lantîrin chawimawi tum tlat ang che u. Chutianga in tih chuan an chungah hmangaihna leh ngaihhlutna in lantîr a ni ang. In nupuite in chawimawi chuan, inlaichînna azawnga pawimawh ber Jehova nêna in inṭhian ṭhatna chu in humhim thei dâwn a ni.—Sâm 25:14.
HLA 131 “Pathianin A Zawm Tawh Chu”
a Vênnainsâng January 2024 chhuaka “Hmeichhiate Chu Jehova’n A Cheibâwl Angin I Cheibâwl Em?” tih thuziak chhiar chu pasalte’n an hlâwkpui thei a ni.
b ṬAWNGKAM HRILHFIAHNA: “Sawichhiatna” tihah chuan mawi lo taka inkohna leh na taka insawisêl rengna te a tel a. Chuvângin, a nupui rilru tihnat tuma a sawi apiang, a nih loh leh ṭawngkam na a hman eng pawh chu sawichhiatna a ni.
c Saruak lem leh thuziakte en chîng pasal neitu chuan Vênnainsâng August 2023 chhuaka “I Kawppuiin Saruak Lem Leh Thuziak A En Ṭhîn A Nih Chuan,” tih thuziak chu a hlâwkpui thei a ni.
d Bible chuan mipat hmeichhiatna hman dân thianghlim leh thianghlim lo chungchâng chipchiar taka sawi a nei lo va. Hemi chungchângah, Kristian nupate chuan Pathian Jehova chawimawi a, lungawina inthlen tawn a, chhia leh ṭha hriatna thiang tak neih an tumzia târ langtu thu tlûknate an siam tûr a ni. A tlângpui thuin, hemi chungchâng hi chu mi dangte an sawipui lo vang.
e MILEM HRILHFIAHNA: Unaupa chu Thuhretu ni lo a hnathawhpuite’n saruak lem leh thuziakte entîr an tum.
