MI MALA inzirna neih ziah leh nuam ti taka neih harsa i ti ṭhîn em? Harsa tih châng kan neih ṭheuh a rinawm. Mahse, inbual ang chi kan tih ziah ṭhin thilte hi han ngaihtuah teh. Inbual tûrin hun leh tha sên ngai mah se, a hnuah chuan a va hahdamthlâk ṭhîn êm! Bible zirna chu ‘tuia sil a, thua’ intihharhna nên a inang thei a ni. (Eph. 5:26) Min ṭanpui thei thurâwn ṭhenkhat lo ngaihtuah ta ila:

• Hun duan siam rawh. Mi mala inzirna chu Kristiante ngaihthah hauh loh tûr “thil pawimawh zâwkte” zîngah a tel a. (Phil. 1:10, NWT) I hun duan siam chu ṭha taka i zui theih nân awlsam taka hmuh theih tûrin noticeboard-ah emaw, fridge kawngkhârah emaw engvângin nge i târ chhuah loh vang? A nih loh leh, inzirna i neih hun a thlen hma lawka electronic hmanrua hriattîrna inpêktîr chu i ṭangkaipui thei bawk a ni.

• I mamawhte milin insiamrem rawh. Vawi khata hun rei tak chhûng rilru pêk nge, tawi tê têa rilru pêk i tân awlsam zâwk? I dinhmun hre chiang bertu chu nangmah i ni a. Chuvângin, chumi milin insiamrem ang che. Inzirna i neih hun a lo thlen a hrehna i nei a nih chuan, engvângin nge minute sâwm vêl chauh inzirna i neih mai loh vang? Hun rei lo te chhûng inzirna i neihna aṭang ringawt pawhin thil tam tak i zir thei a ni. Chu bâkah, zirna i neih ṭan hnu chuan chhunzawm zêl duhna i nei pawh a ni thei asin.—Phil. 2:13.

• I zir tûr thupui thlang sa rawh. Zirna i neih dâwnah chauh i zir tûr thu i ngaihtuah chawp a nih chuan, “i hun chu a ṭha thei ang berin i hmang” dâwn lo a ni. (Eph. 5:16, NWT) Chuvângin, i zir duh thuziak emaw, thupui emaw chu eng emaw zât thlang sa la. Thil eng emaw chungchângah zawhna i nei a nih chuan, chu chu ziakin chhinchhiah bawk ang che. Chu bâkah, zirna i neih zawh apianga zir duh thupui thar hmuh chhuah i neih chuan, chu chu i thlan sa thupuite hnuaiah chuan i ziah belh thei bawk a ni.

• A ṭûl angin insiamrem rawh. I zir rei hun chhûng, a nih loh leh i zir tûr thupuite chu a ṭûl angin siamrem ang che. A pawimawh ber chu—i zir hun emaw, i zir rei chhûng emaw, i thu zir emaw chu ni lovin—i hun duan siam anga a hun taka zir ziah hi a ni.

Hun duan sa anga a hun taka inzirna neih ziahna chu nasa takin kan hlâwkpui a. Jehova kan hnaih lehzualin, fing taka thiltih dân kan zir a; chu bâkah, tihchakin kan awm ṭhîn a ni.—Jos. 1:8