ZIR TUR THUZIAK 45
HLA 138 Lu Ṭuak Ropuina
Mi Rinawmte Thuchah Hnuhnûng Aṭangin Inzir Rawh
“Upate an fing nge nge a, dam reiten thil hriat an ngah.”—JOB. 12:12, C.L. Re-edited.
A TUM BER
Pathian Jehova thu kan âwih chuan tûnah malsâwmna kan dawng ang a, nakinah chatuana nunna min pe ang.
1. Engvângin nge kum upate hnên aṭanga kan inzir ang?
NUNA thu tlûkna pawimawh takte kan siam hunah kaihhruaina kan mamawh ṭheuh va. Chûng kaihhruainate chu kohhran upate leh Kristian mi puitlingte hnên aṭangin kan dawng thei a ni. Kum upa tawh tak an nih pawhin, an thurâwn pêkte chu kan hnâwl mai tûr a ni lo. Keini aiin tawn hriat leh thil hriat an ngah zâwk a, an fin zâwk avângin Jehova’n an hnên aṭanga inzir tûrin min duh a ni.—Job. 12:12.
2. He thuziakah eng nge kan sawiho vang?
2 Bible hun lai chuan, Pathian Jehova’n a mite tichak a, kaihruai tûrin a chunga rinawm kum upate a hmang ṭhîn a. Entîr nân, Mosia, Davida leh, tirhkoh Johana a hman dân hi lo ngaihtuah ta ila. Anni chu hun inang lo leh dinhmun inang lo tak takah an nung ṭheuh va. An nun tâwp dâwn hnaih lamah kum lama naupang zâwkte hnênah thurâwn fing takte an pe a ni. Pathian thuawih a pawimawhzia chu an sawi uar ṭheuh va. Chûng an thusawite aṭanga kan inzir theih nân, Pathian chuan Bible-ah a chuantîr a. Chumi zirna chu naupang kan ni emaw, puitling kan ni emaw kan hlâwkpui ṭheuh thei a ni. (Rom 15:4; 2 Tim. 3:16) He thuziakah hian chûng mi rinawm pathumte thuchah hnuhnûngte leh chûng thuchahte aṭanga kan zir theihte chu kan sawiho vang.
“NUNNA CHU THLANG RAWH U, IN NUN THEIH NAN”
3. Mosia chuan eng kawngtein nge rawng a bâwl?
3 Mosia chu Jehova tân a inpe pumhlûm a. Zâwlnei, rorêltu, sipai hruaitu leh, chanchin ziaktu angin rawng a bâwl a ni. Mosia chuan thiltawn a va ngah dâwn êm! Aigupta rama an sal tânna ata Israelte chu a hnam pumin a hruai chhuak a, Jehova thil mak tih tam takte chu mit ngeiin a hmu bawk. Pathian chuan Bible bu hmasa pangate leh Sâm 90-na ziak tûrin a hmang a. Sâm 91-na leh Joba bu pawh ama ziah a nih a rinawm.
4. Mosia’n tute nge a fuih a, engvângin nge?
4 Mosia chuan kum 120 a nih a, a thih hma lawkin, Israel mi zawng zawngte chu ko khâwmin, tûn hmaa an thil hmuhte leh an thil tawnte chu a hriat nawntîr leh a. An zînga tam tak chuan an naupan laiin, Pathian Jehova thil mak tihte leh Aigupta chunga ro a rêl dân chu an lo hmu tawh a. (Ex. 7:3, 4) Tuipui Sen chu kânin Pharaoa sipaite tihboral an nih lai chu an hmu bawk a. (Ex. 14:29-31) Thlalêrah Jehova vênhimna leh ngaihsakna an dawng bawk. (Deut. 8:3, 4) Tûnah chuan, Israel mite chu Ram Tiamah an lût ṭêp tawh a, chu hun remchâng chu lain, Mosia’n a thih hma lawkin mite chu a fuih a ni. a
5. Deuteronomy 30:19, 20-a Mosia thuchah hnuhnûng chuan Israel mite chu eng rinnghehna nge a neihtîr?
5 Mosia’n eng nge a sawi? (Deuteronomy 30:19, 20 chhiar rawh.) Israel mite chuan hma lam hun ropui tak an nei a. Jehova malsâwmnain a Ram Tiamah chuan rei tak an awm thei dâwn a ni. Chu ram chu a leilung a ṭhain a mawi hle! Mosia chuan Israel mite hnênah: ‘In din ni hauh lo, khaw ropui leh mawi tak tak te, in tihkhah ni hauh lo, thil ṭha tinrênga khat in te, in chhun ni hauh lo, tuikhur chhun sa te, in chîn ni hauh lo, grêp huan leh oliv thing te awmna,’ tiin a ram chungchâng chu a hrilh a ni.—Deut. 6:10, 11.
6. Engvângin nge Pathianin hnam dang mite’n Israel mite an hneh chu a phal?
6 Mosia chuan Israel mite hnênah vaukhânna thu a sawi bawk a. An rama nuam taka awm reng thei tûr chuan Jehova thupêkte an zawm a ngai dâwn a ni. Chuvângin, Mosia chuan Jehova thu âwiha “amah vuan tlatin” “nunna chu thlang” tûrin a fuih a. Mahse, Israel mite chuan Jehova thu chu an âwih lo va. Chuvângin, a hnuah Assuria mite leh Babulon mite’n an hneh a, sala an hruai chu a phal a ni.—2 Lal. 17:6-8, 13, 14; 2 Chro. 36:15-17, 20.
7. Mosia thusawite aṭangin eng nge kan zir theih? (Milem en bawk rawh.)
7 Kan tân zir tûr eng nge awm? Thuawihna chuan kan nun a chhanhim ang. Ram Tiama lût mai tawh tûr Israel mite angin, keini pawh he khawvêl hi paradis-a a chan lehna tûr Pathian thutiam khawvêl tharah kan lût ṭêp tawh a. (Is. 35:1; Lk. 23:43) Chutih hunah chuan, Diabola leh a ramhuaite chu an awm tawh lo vang a. (Thup. 20:2, 3) Pathian Jehova laka mite hruai pêngtu sakhaw dik lo pawh a awm tawh lo bawk ang. (Thup. 17:16) An rorêlna hnuaia awmte rapbettu mihring sawrkârnate pawh a awm tawh lo vang a. (Thup. 19:19, 20) Hel hmangte pawh an awm tawh lo bawk ang. (Sâm 37:10, 11) Mi zawng zawngin inlungrualna leh remna awmtîrtu Jehova dân fel takte chu an zâwm tawh ang a, an inhmangaihin an inring tawn tawh dâwn a ni. (Is. 11:9) Hma lam hun ropui tak a va ni êm! Jehova thu kan âwih chuan, lei paradis-ah chuan kum za têl mai ni lovin, chatuanin kan awm thei dâwn a ni.—Sâm 37:29; Joh. 3:16.
Jehova thu kan âwih chuan, lei paradis-ah kum za têl mai ni lovin, chatuanin kan awm thei dâwn a ni (Paragraph 7-na)
8. Chatuana nunna thutiam chuan kum tam tak missionary nia rawng lo bâwl tawht unaupa pakhat chu engtin nge a ṭanpui? (Juda 20, 21)
8 Pathian thutiam chatuana nunna chu kan thinlunga kan vawng tlat a nih chuan eng harsatna pawh tâwk mah ila, amah vawn tlat kan duh ang. (Juda 20, 21 chhiar rawh.) Chu thutiam chuan mi mal chak lohnate do lêt tûrin min tichak thei bawk a. Africa khawmuala kum tam tak chhûng missionary nia rawng lo bâwl tawht unaupa pakhat chuan a mi mal chak lohna do tûra ṭan a lâk fo a ngaih thu a sawi a. Ani chuan: “Jehova thu ka âwih loh chuan paradis-ah chatuanin ka nung thei dâwn lo tih hriatna chuan chu ka chak lohna chu do fan fan tûr leh Jehova hnêna tih tak zeta ṭawngṭai duhna nei tûrin min ṭanpui a. Tichuan, a ṭanpuinain ka chak lohna chu ka do hneh thei a ni,” tiin a sawi.
‘I HMUINGIL ANG’
9. Davida’n a nunah eng harsatnate nge a hmachhawn?
9 Davida chu lal ropui tak a nih bâkah, rimawi tum thiam, hla phuah thiam, sipai huaisen leh, zâwlnei a ni bawk. Ani chuan harsatna tam tak a tâwk a. Kum tam tak chhûng amah ertu Lal Saula hnên aṭanga a tlânchhiat a ngai a. Lal a nih hnuah pawh, a fapa lal Absaloma’n a lalṭhutthlêng chhuhsak a tum avângin a nunna atân a tlânchhiat a ngai leh a. Chûng harsatnate chu hmachhawnin thil sual tih châng nei mah se, Davida chu a thih thlengin Pathian chungah a rinawm tlat a. Pathian Jehova’n ani chu: “Ka thinlung ang pu mi,” tiin a ko hial a. Chuvângin, a thurâwn pêkte chu kan ngaithla tûr a ni.—Tirh. 13:22; 1 Lal. 15:5.
10. Engvângin nge Davida’n a lalna rochungtu a fapa Solomona hnêna thurâwn a pêk?
10 Entîr nân, Davida’n a lalna rochungtu a fapa Solomona hnêna thurâwn a pêkte hi lo ngaihtuah ta ila. Jehova’n ani chu biakna dik chhawm nung zêl tûr leh Amah chawimawina thlentu biak in sa tûrin a ruat a. (1 Chro. 22:5) Solomona chuan harsatna tam tak a hmachhawn dâwn a ni. A hnênah Davida’n eng nge a sawi? I lo en ang u.
11. Davida’n Solomona chu 1 Lalte 2:2, 3-ah eng fuihna nge a pêk a, chûng a thusawite dikzia chu Solomona nunah engtin nge a lan chhuah? (Milem en bawk rawh.)
11 Davida’n eng nge a sawi? (1 Lalte 2:2, 3 chhiar rawh.) A fapa hnênah Jehova thu a âwih chuan a hmuingîl ang tih a hrilh a. Kum tam tak chhûng chu a thiltih engkimah a hmuingîl zêl a. (1 Chro. 29:23-25) Biak in ropui tak sain, Bible bute a ziah bâkah, a thusawite chu Bible bu danga telh a ni bawk a. A finna leh a hausakna avângin a hming thang êm êm bawk a ni. (1 Lal. 4:34) Mahse, Davida sawi angin, Pathian Jehova thu a âwih chauhvin a hmuingîl thei dâwn a. Lungchhiatthlâk takin a hnuah, Solomona chuan pathian dangte a bia a; chuvângin, Jehova lawm a hlawh tawh lo va, dik leh fel taka rorêl tûra a neih finna pawh a hloh bawk a ni.—1 Lal. 11:9, 10; 12:4.
A fapa Solomona hnêna Davida thuchah hnuhnûng chuan Jehova thu kan âwih chuan thu tlûkna ṭhate siam tûra kan mamawh finna min pe ang tih hre tûrin min ṭanpui (Paragraph 11-12-na) b
12. Davida thusawite aṭangin eng nge kan zir theih?
12 Kan tân zir tûr eng nge awm? Thuawihna chuan hmuingîlna a thlen. (Sâm 1:1-3) Pathian Jehova chuan Solomona neih ang hausakna leh ropuina pêk min tiam lo ngei mai. Mahse, a thu kan âwih chuan thu tlûkna fingte siam thei tûrin finna min pe ang. (Thuf. 2:6, 7; Jak. 1:5) A thu bulte chuan hna te, zirna te, intihhlimna te leh, sum leh pai chungchângahte thu tlûkna fing siam tûrin min kaihruai thei a. A thurâwn pêkte zawmna chuan amah nêna inlaichînna ṭha nei a, chatuana nunna nei thei tûrin min vênghim ang a. (Thuf. 2:10, 11) Ṭhian ṭha siam thei tûrin leh chhûngkaw hlim tak nei thei tûrin min kaihruai bawk ang.
13. Engin nge Carmen-i chu nun hlawhtling tak nei tûra ṭanpui?
13 Mozambique rama chêng Carmen-i chuan zirna sâng chu nun hlawhtling neih nâna thil pawimawh tak angin a ngai a. University kalin engineering lam a zir a. Ani chuan: “Ka thil zir chu nuam ti hle mah ila, ka hun leh tha tam tak ka sên a ngai a. Zîng 7:30 aṭangin tlâi 6:00 thleng school kan kal a. Inkhâwma tel ziah ka harsat phah a. Chuvângin, thlarau lamah ka chak loh phah a. Hotu pahnih rawngbâwl kawp ka tum tih ka inhre thiam ta a ni,” tiin a sawi. (Mt. 6:24) A dinhmun tawh chungchângah ṭawngṭaiin kan thu leh hla chhuahte aṭangin zir bingna a nei a. “Upate leh ka nu hnên aṭanga thurâwn fing takte ka dawn hnu chuan university chawlhsana hunbi kima Jehova rawngbâwl ka thlang ta a. Chu chuan inchhîrna min thlen lo tûr thu tlûkna ṭha ber berte siam tûrin min ṭanpui a ni,” tiin a sawi belh bawk.
14. Mosia leh Davida thuchah chu eng nge ni?
14 Mosia leh Davida chuan Jehova an hmangaihin, a thuawih a pawimawhzia an hria a. Chuvângin, an thuchah hnuhnûngah chuan mi dangte chu anmahni entawn a, Pathian Jehova chunga rinawm reng tûrin an fuih a ni. Chu bâkah, Jehova kalsantute chuan a duhsakna leh a thutiam malsâwmnate an chân tûr thu an vaukhân bawk a. Tûn laiah, kan tân pawh an thurâwn pêkte chu a ṭangkai hle a. Kum zabi tam tak hnuah, Pathian chhiahhlawh dangin a chunga rinawm tlat a pawimawhzia a târ lang bawk a ni.
“LAWMNA NASA ZAWK RENG KA NEI LO”
15. Tirhkoh Johana chuan a nunah eng thilte nge a tawn?
15 Johana chu Isua hmangaih tak tirhkoh a ni a. (Mt. 10:2; Joh. 19:26) Isua rawngbâwlnaah a zui a, a thil mak tihte a hmu a, hun harsa a tawhin a bulah a awm tlat bawk. Isua tihhlum a nih laia thlîrtu zîngah a tel a, a thawhleh hnuah a hmu bawk a ni. Chu bâkah, kum zabi khatna hun laia mi rinawm pâwl tlêm tê aṭanga, chanchin ṭha “vân hnuaia thilsiam zawng zawngte zînga tlângaupui” a nih thlenga Kristianna darh zau dân a hmu bawk a ni.—Kol. 1:23.
16. Johana lehkhathawnte chu tute’n nge hlâwkpui?
16 Johana chuan a thih dâwn hnaihah Pathian thâwk khum Thu ziah theihna chanvo hlu a dawng a. “Isua Krista thu puan chhuah” ropui tak chu a ziak a ni. (Thup. 1:1) A hming chawitu Chanchin Ṭha bu leh thlarauva thâwk khum lehkhathawn dang pathum a ziak bawk a. A lehkhathawn pathumna chu a thlarau lam fa duh tak, Kristian mi rinawm Gaia hnênah a thawn a ni. (3 Joh. 1) Chutih lai chuan, Johana’n a thlarau lam fate anga a en mi dang tam tak an awm ngei ang. He mi rinawm kum upa tak thuziahte hian tûn laiah pawh Isua hnungzuitu zawng zawngte chu a tichak a ni.
17. Johana thawn thumna châng 4-a sawi angin, engin nge lâwmna nasa tak thlen?
17 Johana’n eng nge a ziah? (3 Johana 4 chhiar rawh.) Unaute’n Pathian thu an âwih avânga hlimna a neih chu a ziak a ni. A lehkhathawn pathumna a ziah lai chuan mi ṭhenkhatin zirtîrna dik lote theh darhin inṭhen hranna an awmtîr a. Chutih rualin, mi dangte chu ‘thutakah an awm reng a.’ Jehova thu an âwihin ‘a thupêk ang zêlin an awm a.’ (2 Joh. 4, 6) Chûng Kristian mi rinawmte chuan Johana bâkah Jehova pawh an tilâwm a ni.—Thuf. 27:11.
18. Johana thusawite aṭangin eng nge kan zir theih?
18 Kan tân zir tûr eng nge awm? Rinawmnain hlimna a thlen. (1 Joh. 5:3) Entîr nân, Jehova kan tilâwm tih kan hriat avângin kan hlim a. He khawvêl thlêmnate hnâwl a, thutak kan pawm tih a hmuh hian Jehova pawh a lâwm tak zet a. (Thuf. 23:15) Vântirhkohte pawh an lâwm a ni. (Lk. 15:10) Keini pawh kan unaute’n harsatna leh thlêmna kâra rinawmna an vawng tlat kan hmuh hian kan hlim a. (2 Thes. 1:4) Chu bâkah, Setana khawvêl a tâwp hunah, a thununna hnuaia awm khawvêla awm chungin Jehova chungah rinawmna kan lantîr tih kan hriat avângin lungawina kan nei bawk ang.
19. Unaunu Rachel-i chuan mi dangte thutak zirtîrna chungchângah eng nge a sawi? (Milem en bawk rawh.)
19 A bîk takin, mi dangte hnêna thutak kan hrilh hian kan hlim a. Dominican Republic rama chêng Rachel-i chuan kan biak Pathian ropui tak chungchâng mi dangte hnêna zirtîr theihna hi chanvo ropui tak angin a thlîr a. A thlarau lam fate chungchângah heti hian a sawi a ni: “Ka Bible zirpuite’n Jehova an rawn hmangaih chhoh va, an innghahna an nihtîr a, amah tilâwm tûra an nun an thlâk danglam tih ka hmuh hian sawi fiah thiam rual lohvin ka hlim a. Anmahni zirtîr tûra theih tâwp ka chhuahna leh ka inpêkna zawng zawng chu a manhla tak zet,” tiin.
Jehova hmangaih tûr leh a thuawih tûra mi dangte zirtîrna aṭangin hlimna kan hmu (Paragraph 19-na)
MI RINAWMTE THUCHAH HNUHNUNG CHU HLAWKPUI RAWH
20. Mosia, Davida leh, Johana te nêna kan inanna chu eng nge ni?
20 Mosia, Davida leh, Johana te hun lai chu kan hun lai lakah danglam hle mah se, inanna tam tak kan nei a. Anmahni ang bawkin Pathian dik rawng kan bâwl a. A hnêna ṭawngṭaiin kan rinchhan a, a kaihhruaina kan zawng bawk. Chu bâkah, chûng mi rinawmte ang bawkin, Jehova’n a thuawihtute chu nasa takin mal a sâwm ṭhîn tih kan ring nghet tlat bawk a ni.
21. Mi rinawm Mosia, Davida leh, Johana te thurâwn zâwmtute chu eng malsâwmnate’n nge hmuak?
21 Jehova thupêkte chu nunpuiin, chûng mi rinawmte thuchah hnuhnûng chu i zâwm ang u. Tichuan, kan thiltihna kawng engkimah kan hmuingîl ang a. Pathian thuawihna chu kan tân “dam reina” a ni a, chatuanin kan nung dâwn a ni. (Deut. 30:20) A thusawi zawng zawngte kan beisei leh rin phâk bâka ropuia thlen famkimtîrtu, hmangaihna ngah tak kan Pa vâna mi tihlâwmna aṭanga lo awm hlimna chu kan nei dâwn a ni.—Eph. 3:20.
HLA 129 Kan Chhel Zêl Ang
a Tuipui Sena Jehova thil mak tih hmutu Israel mi a tam zâwkte chu Ram Tiamah chuan an lût lo va. (Num. 14:22, 23) Pathian chuan kum 20 achin chung lam chhiar tawh zawng zawng chu thlalêrah an thi ang tih a sawi lâwk a ni. (Num. 14:29) Chutih rualin, Josua, Kaleba, chhuan thar tam takte leh, Levia chite chuan Jordan Lui kâna Kanaan rama lûtin Jehova thutiam thlen famkimna chu an hmu a ni.—Deut. 1:24-40.
b MILEM HRILHFIAHNA : Vei lam: Davida chuan a fapa Solomona chu thuchah hnuhnûng finthlâk tak a hrilh. Ding lam: Pioneer Rawngbâwlna School-a kalte’n theocratic zirtîrna an hlâwkpui.
