ZIR TUR THU ZIAK 44
HLA 33 I Rit Phurh Chu Jehova Chungah Nghat Rawh
Rorêl Dik Lohna Hmachhawn Dân
“Sual inhnehtîr suh la, ṭhatnain sual chu hneh zêl zâwk ang che.”—ROM 12:21, NWT.
A TUM BER
Dinhmun so sâng lo tûr zâwnga rorêl dik lohna hmachhawn dân.
1-2. Engtin nge rorêl dik lohna chuan min nghawng ṭheuh theih?
ISUA chuan rorêltu hnêna dik taka rorêlsak tûra ngên nawn fotu hmeithai pakhat chungchâng entîrna a sawi a. Chumi hun laia mite chu dik lo taka rorêlsak an nih fo avângin, zirtîrte chuan Isua tehkhin thu sawia hmeithainu awm dân chu an hriatthiampui ngei ang. (Lk. 18:1-5) Tûn laiah pawh kawng hrang hranga rorêl dik lohna kan tawh ṭheuh avângin chu tehkhin thu chuan kan tân awmzia a nei a ni.
2 Tûn lai khawvêlah inthliar hranna, duhâmna leh, inhnehchhiahna a hluar êm avângin, dik lo taka cheibâwl kan ni thei tih kan hria. (Thur. 5:8) Chutih rualin, kan unaute’n dik lo taka min cheibâwl erawh kan beisei lo pawh a ni thei a; mahse, chutiang chu a thleng thei a ni. Kan unaute’n chutianga min cheibâwl chhan chu thutak an dodâl vâng ni lovin, an ṭhat famkim loh vâng mai zâwk a ni. Isua’n amah dodâltute hnên aṭanga dik lo taka rorêlna a hmachhawn dân aṭangin thil tam tak kan zir thei a. Min dodâltute chungah mah dawhtheihna kan lantîr a nih chuan, kan unaute chunga dawhtheihna lantîr lehzual tûr kan va ni êm! A nih leh, mi dangte’n dik lo taka min cheibâwl hian engtin nge Jehova a awm, a ngaihven em?
3. Jehova’n a mite cheibâwl an nih dân chu a ngaihven tih engtin nge kan hriat theih?
3 Pathian Jehova chuan dik taka cheibâwl kan nih a duh a. Dik tak chuan “Lalpa chuan rorêlna fel a ngaina si a.” (Sâm 37:28) Chu bâkah, Jehova’n a hun takah “rorêlna dik a thlentîr thuai ang” tih Isua’n min tiam a. (Lk. 18:7, 8) Nakin lawkah, kan tawrhna zawng zawng leh rorêlna dik lo zawng zawng a titâwp vek dâwn a ni.—Sâm 72:1, 2.
4. Tûn laiah Jehova’n eng ṭanpuina nge min pêk?
4 Rorêl dikna dinchan hun tûr kan nghah rualin, tûnah ngei pawh Jehova’n rorêl dik lohna hmachhawn thei tûrin min ṭanpui a. (2 Pet. 3:13) A Fapa entawn tûr siam hmangin rorêl dik lohna hmachhawn dân tûr min zirtîr a. Dik lo taka cheibâwl kan nih huna âtthlâk taka thil ti lo tûr pawha min zirtîr bâkah, kan zawm theih tûr fuihna ṭha takte min pe bawk a ni.
ROREL DIK LOHNA I CHHAN LET DANAH FIMKHUR RAWH
5. Rorêl dik lohna kan chhân lêt dânah engvângin nge kan fîmkhur a ngaih?
5 Rorêl dik lohna kan tawh hian rilru na tak leh mangang takin kan awm thei a. (Thur. 7:7) Mi rinawm Joba leh Habakuka te pawh chutiang chuan an awm a ni. (Job. 6:2, 3; Hab. 1:1-3) Chutianga awm chu thil pângngai tak ni mah se, chumi avânga âtthlâk taka thil ti lo tûrin kan fîmkhur a ngai a ni.
6. Absaloma chungchâng aṭangin eng nge kan zir theih? (Milem en bawk rawh.)
6 Rorêl dik lohna kan tawh hian mahnia chinfel tumin, dik lo taka thil tih duhna kan nei thei a. Mahse, chutianga tihna chuan dinhmun chu a tizualkai thei zâwk a ni. Lal Davida fapa Absaloma chungchâng hi lo ngaihtuah ta ila. Pa hmun nu hrang a unaupa Amnona’n a farnu Tamari a pâwngsual chuan a thin a rim hle a. Mosia Dân ṭanchhanin, Amnona chu thi tlâk a ni. (Lev. 20:17) Absaloma thinrim chu thil inâwm tak a nih rualin, ama thua Amnona a tihlum erawh thil dik a ni lo.—2 Sam. 13:20-23, 28, 29.
Absaloma chuan a farnu Tamari’n dik lo taka cheibâwlna a tawh avânga a thinrimna chu a thunun lo (Paragraph 6-na en rawh)
7. Rorêl dik lohnate chuan fakna hla phuahtu chu engtin nge a nghawng?
7 Dik lo taka thil titute hrem an nih loh hian, dik taka thiltihna chuan awmzia a nei lo angin kan ngai ṭan thei a. Entîr nân, fakna hla phuahtu chuan mi suaksualte’n mi felte chu dik lo taka cheibâwl chunga nun nuam tak an chên chu a hmu a; chuvângin, ‘hêng mi suaksualte hi nuamsa takin an awm ṭhîn,’ tiin a sawi a ni. (Sâm 73:12) Rorêl dik lohna thlengte a hmuh avânga a mangan êm avângin: “Hêng hi hriatthiam ka han tum ṭhîn a, harsa ka ti ngei mai,” tia sawiin, Jehova rawngbâwlna chuan hlutna a nei lo niin a ngai lek lek a ni. (Sâm 73:14, 16, C.L. Re-edited.) Chuvângin: “Nimahsela, kei zawngin ka rap pelh ṭhelh ṭhelh a; ka ke pênte hi a tleu lek lek a ni,” tiin a sawi hial a. (Sâm 73:2) Chutiang thil chu unau Alberto-a pawhin a tawng a ni.
8. Unaupa pakhat chu dik lo taka rorêlnain engtin nge a nghawng?
8 Unau Alberto-a chu kohhran sum eirû anga dik lo taka puh a ni a. Chuvângin, kohhrana a mawhphurhnate a chân bâkah, chumi chungchâng hretu unaute’n an ring tawh lo bawk. “Ka rilru a nâ a, ka thin a rim êm êm a, mangang takin ka awm a ni,” tiin a sawi. Chu a thiltawn chu thlarau lama chak loh phah nân a hman mai bâkah, kum nga chhûng rawngbâwlnaah a tel tawh lo va. He thilthleng hian rorêl dik lohna avânga kan thinrimna kan thunun loh huna kan chunga thilthleng thei chu a târ lang a ni.
ISUA’N ROREL DIK LOHNA A HMACHHAWN DAN CHU ENTAWN RAWH
9. Isua’n eng rorêl dik lohnate nge a hmachhawn? (Milem en bawk rawh.)
9 Isua chuan rorêl dik lohna hmachhawn dân chungchângah entawn tûr ṭha famkim a siam a. A chhûngte leh mi dangte’n dik lo taka an cheibâwl dân hi han ngaihtuah teh. A chhûngte chuan a â niin an puh a, sakhaw hruaitute chuan ramhuaite a thawhpui niin an puh bawk a. Chu bâkah, Rom sipaite chuan an diriamin an sawisa a, a tâwpah an tihlum hial a ni. (Mk. 3:21, 22; 14:55; 15:16-20, 35-37) Mahse, chûng rorêl dik lohna zawng zawng a hmachhawn chung pawhin, a thungrûl lo a ni. Isua hnên aṭangin eng nge kan zir theih?
Isua chuan rorêl dik lohna hmachhawn dân chungchângah entawn tûr ṭha famkim a siam (Paragraph 9-10-na en rawh)
10. Isua’n rorêl dik lohna a tawhte chu engtin nge a hmachhawn? (1 Petera 2:21-23)
10 Petera thawn khat 2:21-23 chhiar rawh. a Isua chuan rorêl dik lohna kan tawh huna kan chhân lêt dân tûr chungchângah entawn tûr ṭha famkim a hnutchhiah a. Ngawih hun leh ṭawng hun a hria a ni. (Mt. 26:62-64) Mite’n dik lo taka an puhna apiang chu a chhâng lêt lo va. (Mt. 11:19) Amah tiduhdahtute a chhân lêt hunah pawh a sawichhiain a vau lo. “Fel taka ngaihtuah ṭhîntu hnêna a inpêk” avângin a inthunun thei a. A thil hmachhawnte chu Jehova’n a hriatpui tih a hria a. A hun takah a chinfelsak dâwn tih a ring tlat a ni.
11. Kan thusawia kan fîmkhur theih dân kawng ṭhenkhat chu engte nge ni? (Milem en bawk rawh.)
11 Dik lo taka cheibâwl kan nih huna kan thusawiahte fîmkhurin Isua kan entawn thei a. Thil fel lo ṭhenkhat chu ho têa ngaiin kan en liam mai pawh a ni thei a. Kan thusawite avânga dinhmun a so sân loh nân, ngawih kan chuh pawh a ni thei. (Thur. 3:7; Jak. 1:19, 20) Mahse, dinhmun dangah chuan, dik lo taka cheibâwlna tâwktu humhim nân leh thutak humhim nân kan ṭawng chhuah a ngai thei a. (Tirh. 6:1, 2) Chutianga kan ṭawng chhuak a nih pawhin, dam tak leh zah thiam tak nih kan tum tûr a ni.—1 Pet. 3:15. b
Rorêl dik lohna kan tawh hunah, thusawi hun tûr leh thusawi dân tûr fîmkhur taka ngaihtuahin Isua kan entawn thei (Paragraph 11-12-na en rawh)
12. Engtin nge “fel taka ngaihtuah ṭhîntua” chu kan rinchhan tih kan lantîr?
12 Keini pawhin “fel taka ngaihtuah ṭhîntua” chu rinchhanin Isua kan entawn thei a. Mite’n dik lo taka min puh hunah emaw, ṭha lo taka min cheibâwl hunah emaw Jehova’n thu dik a hria tih kan ring thei a. Jehova’n dik takin ro a rêl ang tih hriatna chuan rorêl dik lohnate chu chhel taka tuar chhuak tûrin min ṭanpui thei a ni. Jehova kuta engkim kan nghat a nih chuan thinrim leh lungni lovin kan awm reng lo vang. Mi dangte chunga thinrimna pai rengna chuan thil ṭha lote min tihtîrin, hlimna min hlohtîr thei a, Jehova nêna kan inlaichînna pawh a tichhe thei bawk a ni.—Sâm 37:8.
13. Engin nge rorêl dik lohna chu dawhthei taka tuar chhuak tûra min ṭanpui thei?
13 Isua chu famkim takin kan entawn thei lo ngei mai. Kan inchhîr lehna tûr thute sawiin thilte tih châng kan nei ṭhîn a. (Jak. 3:2) Chu bâkah, rorêl dik lohna kan tawh ṭhenkhat chuan rilru lamah leh taksa lamah ser reh thei lo a siam thei a ni. Chutiang dinhmuna i awm a nih chuan, Jehova’n a hriatpui che tih i ring nghet tlat thei a. Rorêl dik lohna lo tuar tawhtu Isua pawhin i rilru awm dânte chu a hriatthiampui che a ni. (Heb. 4:15, 16) Pathian Jehova chuan Isua entawn tûr ṭha famkim min pêk bâkah, rorêl dik lohna hmachhawn tûrin fuihna ṭangkai takte min pe bawk a. Tûnah Rom bu aṭanga Bible châng pahnih chu i lo ngaihtuah ang u.
“THINURNA KIAN ZAWK RAWH U”
14. “Thinurna kian” tih awmzia chu eng nge ni? (Rom 12:19)
14 Rom 12:19 chhiar rawh. Tirhkoh Paula chuan Kristiante chu “thinurna kian zâwk” tûrin a fuih a. Tu thinurna a sawina nge ni? A thu hnu leh thu hma en chuan Jehova thinurna a ni. Jehova’n a hun taka ṭha a tih dân kawnga rorêlna dik a thlen hun tûr chu nghâkin a thinurna kan kian thei a ni. Unau John-a chuan dik lo taka cheibâwl a nih hnuah: “Mahni thua beih lêt duhna chu ka do a ngai a. Rom 12:19-na chuan: “Jehova nghâk tlat tûrin min ṭanpui a ni,” tiin a sawi.
15. Engvângin nge kan buaina tawhte chingfel tûra Jehova nghah chu a ṭhat ber?
15 Jehova hma lâk hun tûr ngaihchân chu kan hlâwkpui thei a. Chutianga kan tih chuan, dinhmunte mahnia chinfel tumna aṭanga lo awm thei phurritte leh mangannate chu kan pumpelh thei ang. Jehova’n min ṭanpui a duh avângin, ‘Rorêl dik lohna chu ka kutah dah rawh; keima’n ka chingfel vek mai ang,’ tia sawi ang a ni a. “Keiman ka thungrûl ang,” tih a thutiam chu kan rin chuan rorêl dik lohna kan tawh chu a ṭha thei ang berin min chinfelsak ang tih rinnghehna nei chungin dinhmun chu a kutah kan nghat thei dâwn a ni. Chu thutiam rinna chuan kan târ lan tâk John-a chu a ṭanpui a. Ani chuan: “Jehova ka nghâk a nih chuan ka tih theih aia ṭhain min chinfelsak ang,” tiin a sawi a ni.
“ṬHATNAIN SUAL CHU HNEH ZEL ZAWK ANG CHE”
16-17. Engtin nge ṭawngṭaina chuan ‘ṭhatnaa sual hneh zêl’ tûra min ṭanpui theih? (Rom 12:21)
16 Rom 12:21 chhiar rawh. Paula chuan Kristiante chu ‘ṭhatnaa sual hneh zêl’ tûrin a fuih bawk a. Isua pawhin Tlâng Chunga Thusawiah: “In hmêlmate chu hmangaih zawm zêl ula, a tiduhdahtu che u chu ṭawngṭaisak zawm zêl ang che u,” tiin a sawi a. (Mt. 5:44, NWT) Chutiang chuan amah pawhin a ti a ni. Rom sipaite’n nghaisakna bana an khenbeh laia Isua’n nâ a tawrh nasat tûrzia chu kan ngaihtuah thei a. Kan suangtuah phâk bâka nasain hrehawmna, mualphona leh, rorêl dik lohnate chu a tuar a ni.
17 Isua chuan rorêl dik lohna a tawhte chu a inthununtîr lo va. A Pa hnênah Rom sipaite hrem tûra ngen aiin: “Ka Pa, anni hi ngaidam rawh, an thiltih hi an hre lo a ni,” tiin a ṭawngṭaisak zâwk a. (Lk. 23:34, NWT) Dik lo taka min cheibâwltute ṭawngṭaisakna chuan an laka kan lungnih lohna leh thinrimnate chu a thawi dam theiin, anmahni kan thlîr dân pawh a thlâk danglam hial thei a ni.
18. Engtin nge ṭawngṭaina chuan Alberto-a leh John-a te chu rorêl dik lohna hmachhawn tûra a ṭanpui?
18 Ṭawngṭaina chuan kan târ lan tâk unaupa pahnihte chu rorêl dik lohna an tawhte hmachhawn thei tûrin a ṭanpui a. Alberto-a chuan: “Dik lo taka min cheibâwltu unaupate chu ka ṭawngṭaisak ṭhîn a. Ka thiltawnte avânga lungni lova awm reng lo tûra min ṭanpui tûrin Jehova hnênah ka dîl bawk,” tiin a sawi a. A hnuah, rinawm taka Jehova rawng a bâwl zawm leh thei chu a lâwmawm hle. John-a pawhin: “Rilru nâa min siamtu unaupa tân vawi tam tak ka ṭawngṭai a, chutianga ṭawngṭaisakna chuan a chunga thinrim reng lo tûrin leh ngaidam thei tûrin min ṭanpui a. Chu bâkah, chutianga ṭawngṭainate chuan rilru muanna min pe bawk a ni,” tiin a sawi.
19. Setana khawvêl a tâwp hma chu eng nge kan tih ngai? (1 Petera 3:8, 9)
19 Setana khawvêl a tâwp hma chuan eng ang rorêl dik lohnate nge kan hmachhawn ang tih kan sawi lâwk thei lo va. Eng pawh tâwk mah ila, Jehova ṭanpuina i dîl zawm zêl ang u. Isua’n dik lo taka cheibâwlnate a hmachhawn dân chu entawnin, Bible thu bulte chu i nunpui zawm zêl bawk ang u. Chutianga kan tih chuan Pathian Jehova malsâwmna kan dawng ang tih kan chiang thei a ni.—1 Petera 3:8, 9 chhiar rawh.
HLA 38 A Tichak Reng Ang Che
a Tirhkoh Petera chuan a lehkhathawn pakhatna bung 2 leh bung 3-ah kum zabi khatna hun laia Kristiante’n an pute, a nih loh leh ring lotu an pasalte hnên aṭanga an tawh dik lo taka cheibâwlna chungchâng a târ lang a ni.—1 Pet. 2:18-20; 3:1-6, 8, 9.
b Kan website jw.org aṭangin Hmangaihnain Remna Dik Tak A Thlen Dân tih video chu en rawh.
