1-2. Kohhran upate thawh ‘hnathawh ṭhaah’ chuan engte nge tel?

 KOHHRANHO rawngbâwltu i nih chuan, kohhran upa nih tling tûrin hma i lâk mêk a rinawm a. Chu “hnathawh ṭha” chu i thawk thei ang em?—1 Tim. 3:1.

² Kohhran upate mawhphurhnaah chuan engte nge tel? Thu hrilhnaah hma an hruai a, berâm tlawhna leh zirtîrna kawngah an thawk rim hle a; chu bâkah, an thusawi leh thiltihte hmangin kohhran an tichak bawk a ni. Chuvângin, Bible-in kohhran upate chu ‘mihringte hnêna thilpêkte’ tia a koh chu a inâwm hle.—Eph. 4:8.

3. Engtin nge unaupate chu kohhran upa ni tûra an tlin theih? (1 Timothea 3:1-7; Tita 1:5-9)

³ Engtin nge kohhran upa ni tûra i tlin theih ang? Kohhran upa ni tûra tlin chu khawvêl hna thawk tûra tlinna nên a inang lo va. Khawvêl hnaah chuan, a chhawrtu duh zâwng thiamna eng emaw chen i neih chuan hna atân i tling thei a. Mahse, kohhran upa atâna ruat ni thei tûr chuan thu hrilhna leh zirtîrnaa thiamna neih mai aia tam i mamawh a ni. 1 Timothea 3:1-7 leh Tita 1:5-9-a târ lan upate tâna Pathian Lehkha Thua thil phûtte chu i tlin a ngai a. (Chhiar rawh.) He thuziak hian upate laka thil phût pathum a târ lang ang: kohhran chhûng leh pâwn lama hming ṭha neih te, chhûngkaw lû anga entawn tûr ṭha siam te leh, kohhran tâna rawngbâwl duhna neihte hi a ni.

 HMING ṬHA NEIH

4. “Sawisêl bo” tih awmzia chu eng nge ni?

⁴ Kohhran upa ni thei tûr chuan “sawisêl bo” i nih a ngai a. A awmzia chu fel taka thil i tih avângin kohhran chhûngah hming ṭha i nei tihna a ni. Chu bâkah, ‘pâwn lama mite fak hlawh’ i nih a ngai bawk. Jehova be lotute chuan i Kristian rinna chu an sawisêl pawh a ni thei a; mahse, i thiltih leh i nungchangah sawisêlna tûr chhan tling tak an nei tûr a ni lo. (Dan. 6:4, 5) Chuvângin, ‘Kohhran chhûng leh pâwn lamah hming ṭha ka nei em?’ tiin inzâwt ang che.

5. Engtin nge “thil ṭha duh” mi i ni tih i lantîr theih?

⁵ “Thil ṭha duh” mi i nih chuan, mi dangte ṭhatna lai chu zawngin an mize ṭhate chu i fak ang a. An tâna thil ṭha tih chu nuam i tiin, an beisei aia nasain i tihsak ṭhîn dâwn a ni. (1 Thes. 2:8; Tit. 1:8, C.L. Re-edited.) a Engvângin nge chu mizia chu upate neih atâna a pawimawh êm êm? Kohhran enkawlin an mawhphurhnate hlen nân an hun hlu tam tak an hman ṭhin vâng a ni a. (1 Pet. 5:1-3) Chutiang chuan thawh tûr tam tak nei mah se, mi dangte rawngbâwlsakna aṭangin hlimna nasa tak an hmu a ni.—Tirh. 20:35.

6. “Mi lawm dân thiam” tih awmzia chu eng nge ni? (Hebrai 13:2, 16; milem en bawk rawh.)

⁶ I ṭhian hnai tak ni lo mi dangte chungah pawh thil ṭha i tih hian, “mi lawm dân thiam” i ni tih i lantîr a. (1 Pet. 4:9) Bible thu mal hrilhfiahna pakhat chuan: “Mi lawm dân thiam chuan a hriat ngai lohte chungah pawh ngilneihna lantîrin inhawng takin a ina lêng tûrin a sâwm ṭhîn,” tiin a sawi a. Chuvângin, ‘Mi dangte ṭha taka lo lâwm ṭhîn nia hriat ka hlawh em?’ tiin inzâwt ang che. (Hebrai 13:2, 16 chhiar rawh.) Mi lawm dân thiam chuan mi harsate bâkah, bial kantute, thusawi tûra kohhran rawn tlawhtute ang chi Pathian rawngbâwltu ṭhahnemngai takte pawh tiamin mi zawng zawng chungah ngilneihna a lantîr a ni.—Gen. 18:2-8; Thuf. 3:27; Lk. 14:13, 14; Tirh. 16:15; Rom 12:13.

7. Engtin nge upate chuan “tangka sum ngaina lo” an ni tih an lantîr theih?

⁷ “Tangka sum ngaina lo” tih awmzia chu  tisa lam thilte chauh i ngaihtuah lo tihna a ni a. I hausa emaw, i rethei emaw pawh ni se, i nun kawng tinrêngah Lalram i dah hmasa ber a. (Mt. 6:33) I hun, i tha leh, i thil neih dangte chu Jehova biak nân te, i chhûngkaw enkawl nân te leh, kohhran rawngbâwlsak nânte i hmang a ni. (Mt. 6:24; 1 Joh. 2:15-17) Chuvângin, ‘Sum leh pai hi engtin nge ka thlîr? Mamawh zualpui ka neihte chungah ka lungawi em? Nge ni a, sum leh paite leh tisa lam thilte chu ka ûm zâwk?’ tiin inzâwt ang che.—1 Tim. 6:6, 17-19.

8. “Insûm thei” mi i ni tih i lantîr theih dân kawng ṭhenkhat chu engte nge ni?

⁸ “Insûm thei” mi i nih chuan, i nun kawng tinrêngah inbûk tâwk takin thil i ti ang a. Chutah chuan ei leh in, incheina leh, intihhlimna thilahte a lutuka thiltih pumpelh a tel a ni. Chu bâkah, khawvêl mite nun dân zahawm lo tak chu i entawn lo bawk ang. (Lk. 21:34; Jak. 4:4) Mite’n an tihthinrim hunah che pawh thinrimin i chhâng lêt lo vang. “Uain ruih hmang” i ni lo va, a lutuka zu in mi nia hriat i ni lo bawk. Chuvângin, ‘Ka nun dân hian insûm thei mi ka ni tih a târ lang em?’ tiin inzâwt ang che.

9. “Rilru dik” put leh “mi fel” nihnaah chuan engte nge tel?

⁹ “Rilru dik” i pu a nih chuan, Bible thu bulte nêna inmilin fîmkhur takin thil i ti dâwn a ni. Chûng thu bulte chu ngun taka i ngaihtuah tawh avângin finna leh hriatthiam theihna i nei a. Ngaihtuah chiang lova thutâwp siam mai lovin, thu kimchanga hriat chu i tum ṭhîn. (Thuf. 18:13) Chuvângin, Jehova ngaihtuah dân nêna inmilin thu tlûkna inbûk tâwk takte i siam thei a ni. “Mi fel” i nih chuan, ruahmanna fel tak neiin hun i vawng dik ṭhîn a. Mi rin tlâk leh kaihhruaina zâwmtu nia hriat i hlawh a ni. Chûng mize ṭhate chuan hming ṭha chher tûrin a ṭanpui ang che. Tûnah chuan, chhûngkaw lû anga Pathian Lehkha Thua thil phûtte tlin theih dân tûr chu i lo ngaihtuahho vang u.

CHHUNGKAW LU ANGA ENTAWN TUR ṬHA SIAM

10. Engtin nge chhûngkaw lûte chuan “in chhûng khawsak” an rêl fel?

¹⁰ Chhûngkaw lû i niha kohhran upa nih i duh chuan, i chhûngte pawhin hming ṭha an neih a ngai a. Chuvângin, “mahni in chhûng khawsak rêl fel thiam mi” i nih a ngai a ni. Hmangaihna nei tak leh mawhphurhnate hlen ṭhîn chhûngkaw lû nia hming ṭha i neih a ngai a. Chutah chuan biakna pêng hrang hranga hmahruaitu nih pawh a tel a ni. Engvângin nge chu chu a pawimawh êm êm? Tirhkoh Paula chuan: “Miin ama in chhûng khawsak mah a rêl fel thiam si loh chuan, Pathian Kohhranho engtin nge a enkawl theih ang?” tiin a sawi a ni.—1 Tim. 3:5.

11-12. Engtin nge a chhûngte nungchang chuan pa ber chungah nghawng a neih theih? (Milem en bawk rawh.)

¹¹ Pa i nih chuan, kum tling lo ‘i fate chu ṭha takin i kilkawi tûr’ a ni a. Hmangaihna nei taka zirtîrin i kaihruai tûr a ni. Naupang an nih angin, hlim taka infiam tûrin i duh ngei ang a; mahse, ṭha taka i kaihhruaina avâng chauhvin thuawih tak, mi zahthiam tak leh, nungchang mawi tak nei an ni ang. Chu bâkah, i fate chu Jehova nêna inlaichînna ṭha nei a, Bible thu bulte nunpui a, baptisma chang thei tûra hmasâwn chho tûrin theih tâwp chhuahin i ṭanpui tûr a ni.

¹² “An fate pawh ringtu, nawmsak bâwl lama sawisêl kai lo leh luhlul lo ni rawh se.” (C.L. Re-edited.) Thuhretu a fa chuan sual pawi tak ti ta se, a pa chungah eng nghawng nge a neih theih? A pa chu zirtîrna leh zilhna pêk kawnga a lo inthlahdah reng a nih  chuan, upa ni tûrin a tling lo pawh a ni thei a ni.—October 15, kum 1996 chhuak Vênnainsâng (English), p. 21, par. 6-7-na en rawh.

KOHHRAN RAWNGBAWLSAKNA

13. Engtin nge “mi nunnêm” leh ‘mi tihmawh lo’ i ni tih i lantîr theih?

¹³ Kristian mize ṭhate neitu unaupate chu kohhran tân an hlu hle a. “Mi nunnêm” chuan remna a siam ṭhîn a ni. Mi nunnêm nia hriat hlawh i duh chuan, mi dangte thusawi chu ngaithlain, an thlîr dânte chu hriatthiamsak tum ang che. Kohhran upa inhmuh khâwmnaah, a tam zâwk ṭha tih zâwng chuan Bible dân emaw, thu bul emaw a kalh loh chuan thlâwp i inhuam ang em? ‘Mi tihmawh lo’ tih awmzia chu i duh dân ang chauhvin mi dangte chu thil tihtîr i tum lo tihna a ni a. Mi dangte thurâwn lâk a pawimawh tih i hria a ni. (Gen. 13:8, 9; Thuf. 15:22) ‘Kawhmawh i bâwl’ lo va, i “thinram” hek lo. A awmzia chu mi dangte chu zah lo takin i cheibâwl lo va, i hnial buai lo tihna a ni a. Chu aiin, ngilnei takin i cheibâwl zâwk a ni. Inrem duh mi i nih angin, boruak a sosân hunah pawh remna siam tûrin hma i la hmasa a. (Jak. 3:17, 18) I ṭawngkam ngilnei takte chuan min dodâltute pawh tiamin, mite rilru chu a hneh thei a ni.—Ro. 8:1-3; Thuf. 20:3; 25:15; Mt. 5:23, 24.

14. ‘Ring thar an ni tûr a ni lo’ tih leh “rinawm” tih awmzia chu eng nge ni?

¹⁴ Kohhran upate chu ‘ring thar an ni tûr a ni lo va.’ Kristian mi puitling ni tûrin baptisma i channa chu kum tam tak a nih tawh kher ngai lo mah se, hun eng emaw chen i mamawh a ni. Upa i nih hma pawhin Isua anga inngaitlâwmin, eng chanvo pawh dawng tûrin Jehova i nghâk tih i lantîr tûr a ni. (Mt. 20:23; Phil. 2:5-8) Jehova tehna fel takte chu zâwm a, a inawpna pâwl aṭanga kan dawn kaihhruainate chu zuiin i “rinawm [NWT]” tih i lantîr thei a ni.—1 Tim. 4:15.

15. Kohhran upate chu vântlâng hmaa thusawi thiam tak an nih a ngai em? Hrilhfiah rawh.

¹⁵ Bible chuan kohhrana hotute chu mite  “zirtîr thiam” an ni tûr a ni tih chiang takin a sawi a. Chu chu vântlâng hmaa thusawi thiam tak i nih a ngai tihna a ni em? Upa tam tak chu vântlâng hmaa thusawi thiam tak ni lo mah se, rawngbâwlnaah leh berâm tlawhnaah mite chu Bible hmangin thiam taka zirtîrin an fuih a. (1 Korinth 12:28, 29 leh Ephesi 4:11 khaikhin rawh.) Thusawi thiam tak i nih chu ngai kher lo mah se, zirtîrtu thiam lehzual ni tûra hma i lâk chhoh zêl erawh a ngai a ni. Engtin nge chutianga i tih theih?

16. Engtin nge zirtîrtu thiam lehzual i nih theih? (Milem en bawk rawh.)

¹⁶ “Zirtîrna ang zêl thu rinawm chu pawm tlat mi.” Zirtîrtu thiam lehzual ni tûr chuan vântlâng hmaa i thusawite leh mi dangte thurâwn i pêkte chuan Pathian Thu a ṭanchhan tûr a ni a. Chutianga ti thei tûr chuan Bible leh Bible ṭanchhan kan thu leh hla chhuahte ngun taka i zir chian a ngai a ni. (Thuf. 15:28; 16:23) Chutianga i zir hunah Bible thute dik taka i hman ṭangkai theih dân chu hriat tum la. Chu bâkah, i zirtîr hunah ngaithlatute thinlung thlen tum ang che. Thiltawn ngah upate hnên aṭanga thurâwnte la a, nunpuina hmangin zirtîrtu thiam lehzual i ni chho thei a ni. (1 Tim. 5:17) Upate chuan unaute chu ‘an fuih thei tûr’ a ni a; chutih rualin, zilhna an pêk, a nih loh leh ‘thiam loh an chantîr’ a ngaih châng a awm thei bawk. Mahse, eng dinhmun hnuaiah pawh upate chuan ngilnei takin an ti tûr a ni. Zaidam leh hmangaihna ngah tak i nih a, i zirtîrnate chuan Pathian Thu a ṭanchhan a nih chuan, Zirtîrtu Ropui Isua i entawn avângin zirtîrtu thiam tak i ni dâwn a ni.—Mt. 11:28-30; 2 Tim. 2:24.

HMA LA ZAWM ZEL RAWH

17. (a) Engin nge kohhranho rawngbâwltute chu hma la chhunzawm zêl tûra ṭanpui thei? (b) Upate chuan unaupate chu upa ni tûra an tlin leh tlin loh an en dik hunah eng nge an hriat reng ngai? (“ Mi Dangte I En Dik Hunah Inbûk Tâwkna Nei Rawh,” tih bâwm chu en rawh.)

¹⁷ Upa ni tûra tlin ngai miziate an ngaihtuah hian, kohhranho rawngbâwltu ṭhenkhat  chuan tlin thei ngai lo tûrin an inhre mai thei. Mahse, Jehova leh a inawpna pâwlin chûng miziate chu famkim taka lantîr tûrin an beisei lo che tih hre reng ang che. (1 Pet. 2:21) Chûng miziate nei chho tûra ṭanpuitu che chu Pathian thlarau thianghlim thiltithei tak a ni. (Phil. 2:13) I miziaah hmasâwn duhna lai i nei em? Chumi chungchâng chu zir chiangin Jehova hnênah ṭawngṭai la. Upa tu emaw hnên aṭangin i hmasâwn theih dân tûr thurâwnte la ang che.

18. Kohhranho rawngbâwltu zawng zawngte chu eng ti tûra fuih nge an nih?

¹⁸ Upate pawh tiamin, kan zavai hian he thuziaka kan sawiho tâk miziate chu neih chhoh zêl i tum ang u. (Phil. 3:16) Kohhranho rawngbâwltu i ni em? Hma la rawh! Jehova hnênah a rawng i bâwlna leh kohhran rawng i bâwlnaa mi ṭangkai lehzual ni tûra zirtîra, kaihruai tûr chein a ṭanpuina dîl ang che. (Is. 64:8) Upa ni tûra ṭan i lâknaah Jehova’n nasa takin malsâwm che rawh se.