Chumi kum chhûng chuan inawpna pâwl chuan Bible zirlaite chu biakna kawnga inlungrualna nei tûra ṭanpui tûrin inthlâk danglamna ṭhenkhat a siam a. Tichuan, chawlhkâr tina neih Ṭawngṭaina, Fakna leh Thiltawn Sawina Inkhâwma an thusawi ṭanchhan Bible châng hrilhfiahnate chu Vênnainsâng-ah târ lan a ni ṭan a. Chu bâkah, chûng Bible Zirlaite chuan chawlhkâr tin inkhâwma sawiho tûr Bible châng leh mahnia inzirna neihnaah leh chhûngkuaa Pathian biaknaa sak theih hlate târ lanna calender an siam chhuak bawk a ni.

Bible Zirlaite chuan an inkhâwmahte chuan rawngbâwlnaa an thiltawn te, Jehova chunga an lâwmna te, hla sakna te leh ṭawngṭainate neiin “thiltawnte” sawiina an nei a. Kum 1923-a kum 15 mi nia baptisma chang unaunu Eva Barney-i chuan: “Thiltawn sawi i duh a nih chuan i ding ang a, ‘Ka chunga a ṭhat êm avângin Lalpa hnênah lâwmthu sawi ka duh,’ tia sawiin i ṭan thei ang,” tiin a sawi. Unau ṭhenkhat chuan chutianga thiltawn sawi chu nuam an ti hle a. Unaunu Barney-i chuan: “Kum upa lam unau Godwin-a hian Lalpa hnênah lâwmthu sawi tûr a nei tam thei hle a. Mahse, a nupui chuan inkhâwm kaihruaituin a ngaimawh tih a hmuh chuan, a kawr hmâwrah a pawt ṭhîn a; tichuan, unaupa chuan a thusawi chu a titâwp ṭhîn a ni,” tiin a sawi.

Thla tin hian, a bîk taka Ṭawngṭaina, Fakna, leh Thiltawn Sawina Inkhâwm vawi khat neih a ni ṭhîn a. Chu inkhâwm chungchângah kum 1923, April 1 chhuak Vênnainsâng chuan heti hian a sawi a ni: “Inkhâwma hun zât ve chu rawngbâwlnaa an thiltawnte sawi nân leh an rawngbâwlpuite tihchak nân an hmang a. . . . Chu inlungrualna thiltih chuan unaute inṭhian ṭhatna a tinghet lehzual ang tih kan ring a ni,” tiin.

Canada rama Vancouver khawpuia kum 19 mi class worker (kohhran thuchhuahtu) Unau Charles Martin-a chuan, chûng inkhâwmte chu nasa takin a hlâwkpui a. Ani chuan: “Chûng inkhâwmte chu in tin kalnaa ka sawi tûr ka zir hmasak berna hmun a ni a. Mi ṭhenkhatin in tin kalnaa an thiltawn an sawite chu ka hre fo ṭhîn a. Chu chuan sawi tûrte leh hnialkalhna chi hrang hrang chhân lêt dânte hre tûrin min ṭanpui a ni,” tiin a sawi.

“Rawngbâwlna nî” chuan unaute chu inlungrualna a neihtîr bawk. Kum 1923, April 1 chhuak Vênnainsâng chuan “Lungrual taka rawng kan bâwlho theih nân . . . , Kum 1923, May 1, Thawhlehni  chu a huhova rawngbâwlna nî atâna ruat a ni. Chutiang bawkin thla tina Thawhlehnî hmasa ber chu rawngbâwlna nîa ruat a ni a. . . . Kohhrana thuchhuahtu apiang chu chumi nîa rawngbâwlnaah chuan an tel tûr a ni,” tiin a târ lang a ni.

Chu rawngbâwlnaah chuan tleirâwl Bible Zirlaite pawh an tel a. Chûng hun lai chuan kum 16 mi unau Hazel Burford-i chuan: “Bulletin tia kan koh ṭhinah chuan by-heart tûr (thusawi dân tûr entîrna) a awm a. a Chûng thiltihna zawng zawngah chuan ka pu nên phûr takin kan tel ṭhîn,” tiin a sawi. Mahse, Unaunu Burford-i chuan a beisei lo tak tu emaw hnên aṭangin dodâlna a tâwk a. Ani chuan: “Kum upa unaupa chuan mite hnêna ka thu hrilh chu min khap ta tlat a. Chûng hun lai chuan mi ṭhenkhat chuan Bible Zirlai zawng zawng ‘nula leh thlangvâlte leh, naupangte’ pawh tiamin Siamtu Ropui Ber faknaah an tel tûr a ni tih chu an hre thiam lo,” tiin a sawi. (Sâm 148:12, 13) Mahse, Unaunu Burford-i chuan thu a hril zawm zêl a. Ani chu Gilead School ṭum hnihna a kal a, Panama rama missionary niin rawng a bâwl a ni. A hnuah, chûng unaupate chuan rawngbâwlnaa ṭhalaite chungchânga an rilru put hmang chu an siamrem ta a ni.

Inkhâwmpuite chuan unaute chu inlungrual lehzual tûrin a ṭanpui bawk. Chûng inkhâwmpui tam takah chuan, Canada ram, Winnipeg khawpuia neih tawh ang chi, rawngbâwlna nî chu buaisaih a ni a. March 31-a neih, chu inkhâwmpuiah chuan inkhâwmpuia lo kal zawng zawngte chu “Special Bombardment of Winnipeg,” tia hming an pêk rawngbâwlnaa tel tûra sâwm an ni. Chutianga a bîk taka thu hrilhna nî chuan mi tam tak hnêna thu hrilh theihna remchâng a pe a, rah chhuah ṭha tak a awmtîr a ni. August 5-a Winnipeg khawpuia inkhâwmpui dang neih lehah chuan mi 7,000 vêl an tel a. Chu inkhâwmpui chu chutih hun laia Canada rama inkhâwmpuia mi an tel tam ber ṭum a ni.

Kum 1923, August 18-26-ah California Los Angeles khawpuiah Jehova mite chuan inkhâwmpui pawimawh tak an nei a, inkhâwmpui hmaa chawlhkârahte chuan inkhâwmpuia lo tel tûra sâwmnate chu chanchinbuah chhuah a ni a. Bible Zirlaite’n lehkha sem 5,00,000 chuang an sem chhuak a. Inkhâwmpui puanzarhna milem târ chhuahte (banners) chu motor bangahte târ a ni bawk.

 August 25, Inrinnîah chuan Unau Rutherford-a chuan “Kêl leh Berâm” tih thupui hmangin thu a sawi a, chutah chuan “berâm” chu mi rilru ṭha pû lei paradis-a chêng tûrte an ni tih chiang takin a sawi a. Chu a thusawiah vêk chuan “Vaukhânna” tih thupui nei thuchah a chhiar chhuak a. Chu thuchah chuan Kristianna ram sakhuate a dem bâkah, mi rilru ṭha pûte chu “Babulon Khaw Ropui” aṭanga chhuak tûrin a fuih bawk. (Thup. 18:2, 4) A hnuah, khawvêl puma chu thuchah copy maktaduai têl sem chhuahnaah Bible Zirlai ṭhahnemngai takte chu inlungrual takin an tel a ni.

Chu inkhâwmpui tâwp ber nî chuan Unau Rutherford-a’n mi 30,000 aia tam hmaah “Hnam Zawng Zawngin Armageddon An Hmachhawn Ang; Mahse, Tûna Nung Mi Maktaduai Tam Takte Chuan Thihna An Tem Lo Vang,” tih thupui nei Vântlâng thusawi chu a sawi a. Bible Zirlaite’n mi tam tak lo tel an beisei avângin Los Angeles Coliseum sak thar chu an hawh a. Inkhâwmpuia tel zawng zawngin thusawite an hriat theih nân, unaute chuan chutih hun laia thiamna thar hmanga siam au rinna (loudspeaker) chu an hmang a ni. Mi tam takin program chu radio hmangin an ngaithla bawk.

Kum 1923-ah thu hrilh rawngbâwlna chu Africa, Europe, India, leh South America-ah te zauh a ni a. India ramah chuan A. J. Joseph-a chuan a nupui leh a fa parukte enkawl chungin, kan thu leh hla chhuahte chu Hindi, Tamil, Telugu, leh Urdu ṭawnga tihchhuahnaah a ṭanpui a.

Sierra Leone ramah chuan, Bible Zirlai Unau Alfred Joseph-a leh Leonard Blackman-a te chuan New York Brooklyn-a world headquarters-ah ṭanpui dîlna lehkha an theh lût a. Kum 1923, April 14-ah chu an dîlna chu chhân a ni ta a ni. Unau Alfred-a chuan, “Inrinnî zân reh hnuah rin loh takin phone call ka dawng a. Min phone-tu chuan aw ring takin, “Watch Tower Society-a thuhriltu chahtu kha i ni em?” tia min zawh chuan, “Aw, ni e,” ka ti a. “Kei hi an mi tirh chu ka ni e,” tiin min chhâng a. Min phone-tu chu Unau Brown-a a ni. Chumi nî chuan Caribbean thliarkâr aṭangin, a nupui Antonia-i leh an fanute pahnih, Louise-i leh Lucy-i te nên an lo thleng a. Unaute chuan an chhûngkua chu an va hmuak ta thuai a.

Unau Alfred-a chuan: “A tûk zînga Leonard-a nêna Bible zirna kan neih lai chuan pa lian tak mai hi kawngka bulah a rawn lang hlawl mai a, ani  chu Unau Brown-a a ni. Thutak atâna ṭhahnemngai tak a ni a, a tûk maia vântlâng hmaa thusawi a duh nghâl,” tiin a sawi a. Thla khat pawh a liam hmain, Unau Brown-a chuan thu leh hla chhuah a rawn kente chu a sem zo ta mai a. A hnu lawkah lehkhabu 5,000 chuang a dawn belh a. Mahse, chu pawh chu rei lote chhûngin a sem zo leh ta a. Chutih rualin, Unau Brown-a chu lehkhabu zuartu anga hriat a ni lo. Ṭhahnemngai taka Jehova rawng a bâwl chhûng chuan a thusawiahte Bible châng tam tak a ṭanchhan ṭhin avângin, mi tam takin ani chu Bible Brown-a tiin an ko ṭhîn a ni.

Chutih lai chuan Germany ram Barmen khawpuia branch office-ah chuan rawngbâwl an tam hle a, khawpui chu ram ṭhenawm France-in a rûn mai theih dinhmunah a awm bawk. Bible Zirlaite chu ṭha taka lehkha chhut chhuah theihna hmun Magdeburg-a in pakhatah an insawn a. June 19-ah chuan unaute’n, lehkha chhutna hmanrua leh bungraw dangte chu Magdeburg-a Bethel tharah chuan an sawn ta a ni. Chumi nîa insawn zawh a nih thu world headquarters-a hriattîr a nih hnu chuan, chanchinbute chuan France-in Barmen khawpui a lâk thu a puang a. Unaute chuan chutianga an insawn chu Jehova malsâwmna leh vênhimna a ni tih hriain an lâwm hle a ni.

Unau George Young-a chu Brazil ramah hmun hla takahte zinin chanchin ṭha a theh darh a, branch thar dinnaah leh Portuguese ṭawnga Vênnainsâng tihchhuahnaah a ṭanpui bawk. Ani chuan thla rei lote chhûngin thu leh hla chhuah 7,000 aia tam a sem chhuak a. Brazil rama awm a nih avângin Sarah Ferguson-i’n hun remchâng phûrawm tak a neih phah a ni. Ani chuan kum 1899 aṭang tawhin Vênnainsâng chu a lo chhiar tawh ṭhîn a; mahse, baptisma changa inpumpêkna lantîr theihna hun remchâng a la nei lo va. Thla rei lote hnuah, amah leh a fa palite’n baptisma an chang thei ta a ni.

Kum tâwp dâwn lamah chuan Bible Zirlaite’n Pathian be tûra inlungrual taka hma an lâkna chu kum 1923, December 15 chhuak Vênnainsâng chuan heti hian a târ lang a ni: “Kohhrante chu rinnaah . . . chak takin an awm tih chiang takin a hriat theih a . . . Kum 1924 chhûnga tam lehzuala hna thawk tûr leh, ṭhahnemngai tak leh hlim taka Pathian rawngbâwl zawm zêl tûrin i inpeih ang u,” tiin.

Kum 1924 chu Bible Zirlaite tân kum chhinchhiah tlâk tak a ni a. Bethel-a unaute chuan Brooklyn-a an headquarters aṭanga hnai têa awm Staten Island-a hmun pakhatah thla eng emawti chhûng insak hna an lo thawk tawh a. Kum 1924 tîr lamah chuan chu hmun thara insak hna chu zawh fel a ni a, unaute chu inpumkhat lehzual tûr leh a hma aia nasaa chanchin ṭha theh darh nasa lehzual tûrin a ṭanpui a ni.