1. Engtin nge Pathianin hmân laia a chhiahhlawh rinawmte chu a tihchak?

 PATHIAN Thu chuan mi rinawmte chu mi chak tak angin a târ lang fo va. Mahse, anni chuan chak niin an inhre reng lo. Entîr nân, Lal Davida chuan dinhmun ṭhenkhatah ‘tlâng din ngheh tawh’ anga inhriat châng a nei a; mahse, dinhmun dangah chuan ‘a mangang’ leh ṭhîn a ni. (Sâm 30:7) Samsona chu Pathian thlarau thianghlima chêttîra a awm chuan chakna danglam tak a nei a; mahse, Pathian hnên aṭanga thiltihtheihna tel lo chuan ‘a chak lo vang a, mi dang ang mai bawk’ a ni ang tih a hria a. (Ro. 14:5, 6; 16:17) Jehova pêk chakna avâng chauhvin chûng mi rinawmte chuan chakna an nei a ni.

2. Engvângin nge tirhkoh Paula chuan a chak loh lai pawha chakna nei nia a insawi? (2 Korinth 12:9, 10)

² Tirhkoh Paula pawhin Jehova hnên aṭanga chakna a mamawh tih a hria a. (2 Korinth 12:9, 10 chhiar rawh.) Kan zinga tam tak ang bawkin, ani chuan hrisêlna lamah harsatna a nei a ni. (Gal. 4:13, 14) Thil dik tih harsa tih châng a nei bawk a. (Rom 7:18, 19) Mangan châng leh a chunga thilthleng theite ngaihtuaha hlauh châng a nei ṭhîn bawk. (2 Kor. 1:8, 9) Mahse, Paula chuan a chak loh lai pawhin chakna a nei a ni. Engtin nge? Jehova’n a mamawh chakna pein, Paula chu a tichak a ni.

3. He thuziakah hian eng zawhnate nge kan sawiho vang?

³ Jehova chuan keini pawh min tichak ang tih min tiam a. (1 Pet. 5:10) Mahse, keimahni lama hma lâkna awm lovin chu chakna chu kan beisei thei lo. Entîr nân, mortor chu engine chakna hmangin a tlân thei a. Mahse, a khalhtuin a kaltîrtu  (accelerator) a rah phawt loh chuan a kal sawn thei lo. Chutiang bawkin Jehova chuan kan mamawh chakna min pe tûrin a inpeih reng a; mahse, chu chakna dawng tûra hma kan lâk hmasak a ngai a ni. Jehova’n min tichak tûrin eng thilte nge min pêk? Chu chakna dawng tûr chuan eng nge kan tih ngai? Jehova’n Bible-a mi pathum—zâwlnei Jona te, Isua nu Mari te leh, tirhkoh Paula te a tihchak dân ngaihtuahna aṭangin chûng zawhnate chhânna chu kan hria ang. Jehova’n tûn laia a chhiahhlawhte a tihchak zawm zêl dân kan sawiho bawk ang.

4. Engtin nge Jehova hnên aṭanga chakna kan dawn theih?

⁴ Jehova hnên aṭanga chakna kan neih theih dân kawng khat chu ṭawngṭaia amah pan hi a ni a. Kan ṭawngṭaina chu chhângin Jehova’n ‘thiltihtheihna nasa tak’ min pe thei a ni. (2 Kor. 4:7) A Thu chhiar a, chhût ngunna hmangin chakna kan nei thei bawk a. (Sâm 86:11) Bible-a kan tâna Jehova thuchahte chuan “thil a ti thei” a ni. (Heb. 4:12) A hnêna i ṭawngṭai a, a Thu i chhiar hian, chhelna nei tûr te, hlimna nei reng tûrte leh, chanvo harsa tak i dawnte hlen thei tûrtein i mamawh chakna i nei ang. Jehova’n zâwlnei Jona a tihchak dân hi lo chhinchhiah ang che.

5. Engvângin nge zâwlnei Jona chuan chakna a mamawh?

⁵ Zâwlnei Jona chuan chakna a mamawh a. Jehova tirhna hmuna a kal ngam loh avângin hmun dangah lawngin a tlân chhia a. Chuvângin, thlîpui na tak lakah amah leh a lawng chuanpuite chuan an nun an chân ṭêp a ni. Lawng aṭanga theh chhuah a nih chuan, a awm ngai lohna—nghapui kawchhûng thim takah a awm ta a. Engtin nge Jona chu a awm i rin? Chuta a thih chu a inring ang em? Jehova’n a kalsan tawh angin a inngai ang em? Jona chu a mangang hle ngei ang.

6. Jona 2:1, 2, 7-na ṭanchhanin, nghapui kawchhûnga a awm laiin, engin nge Jona chu tichak?

⁶ Jona chuan nghapui kawchhûnga amah chauhva a awm laiin, chakna nei tûrin eng nge a tih? Pathian Jehova hnênah a ṭawngṭai a ni. (Jona 2:1, 2, 7 chhiar rawh.) Jehova thu âwih lo mah se, Jona chuan inngaitlâwm tak leh inchhîr taka a ṭawngṭainate chu Jehova’n a ngaihthlaksak ang tih a ring tlat a ni. Ani chuan Bible thute a ngaihtuah a. Engvângin nge chutianga kan sawi theih? Jona bung 2-naa târ lan, a ṭawngṭainaah, Sâm ziaka kan hmuh ṭawngkam leh ṭawngkauchheh tam tak a hmang a ni. (Entîr nân, Jona 2:2, 5 leh Sâm 69:1; 86:7 khaikhin rawh.) Chûng thuziakte chu Jona’n a hria tih a târ lang chiang hle. Dinhmun harsa taka a awm laia, chhûng thute a ngaihtuahna aṭangin, Jehova’n a ṭanpui ang tih rinnghehna a neihtîr a ni. A hnuah, Jona chu Jehova’n a chhanchhuak a, a chanvo thar dawn hlen tûrin a inpeih ta a ni.—Jon. 2:10–3:4.

7-8. Engtin nge Taiwan-a unaupa chuan harsatna a tawh laiin, chakna a neih?

⁷ Jona entawn tûr siam chuan harsatna chi hrang hrang kan tawh hunah min ṭanpui thei a. Entîr nân, Taiwan-a unau Zhiming-a b chuan natna khirh tak a tuar a. Chu bâkah, Jehova a rin avângin a chhûngte dodâlna nasa tak a tuar bawk. Ṭawngṭaina leh inzirna a neihna aṭangin Jehova pêk chakna a nei a. “A châng chuan buainate a lo chhuah hian, mi mala inzirna nei thei lo khawpin ka mangang ṭhîn,” tiin a sawi. Mahse, a beidawng lo. “A hmasa berah, Jehova hnênah ka ṭawngṭai  a. A hnuah, earphone vuahin kan Lalram hlate ka ngaithla a. Ka rilru a hahdam thlengin zawi têa sak châng pawh ka nei a. Tichuan, inzirna chu ka nei ṭan thei a ni,” tiin a sawi bawk.

⁸ Mi mala inzirna chuan Unau Zhiming-a chu besei loh tak kawngin chakna a pe a. Entîr nân, inzeipui a tawh hnu chuan thisen a neih tlêm êm avângin thisen thun a ngai dâwn tih nurse chuan a hrilh a. Unau Zhiming-a chuan a inzei hma zânah amah anga zeipui tâwk unaunu pakhat chanchin a lo chhiar a. Chu unaunu chu amah ai pawha thisen nei tlêm zâwk nimah se, thisen thun chu a hnâwl a, a ṭha chhuak leh thei a ni. Chu thiltawn chuan Unau Zhiming-a chu rinawm reng tûrin a tichak a ni.

9. I harsatna tawhin a tichau che a nih chuan eng nge i tih theih? (Milem en bawk rawh.)

⁹ Harsatnate i tawh lai hian, ṭawngṭaia chham tûr hre lo khawpin i mangang ṭhîn em? A nih loh leh, inzirna nei lo khawpin i chau ṭhîn em? Jehova’n i dinhmun chu a hre chiang hle tih hre reng ang che. Chuvângin, tâwi têa i ṭawngṭai pawhin i mamawh chu a pe ang che tih i chiang thei a ni. (Eph. 3:20) Tisa lam leh rilru lama i hrehawm tawrh chuan lehkha chhiar leh zir a tiharsa a nih chuan, Bible leh Bible ṭanchhan thu leh hla chhuah aw thunsate chu i ngaithla thei a. Kan website jw.org-a kan hlate ngaihthlâkna leh video enna chuan a ṭanpui thei bawk che a ni. Jehova hnêna ṭawngṭaina leh thlarau lam chaw min buatsaihsakte aṭanga i ṭawngṭaina chhânna i zawn hian amah i intihchaktîr tihna a ni.

10. Engtin nge kan Kristian unaute chuan min tihchak?

¹⁰ Jehova chuan min tihchak nân kan Kristian unaute chu a hmang thei a. Fiahna kan hmachhawn hunah, a nih loh leh chanvo khirh tak hlen tûra harsa kan tih hunah anni chu “mi thlamuantute” an ni thei a ni. (Kol. 4:10, 11) A bîk takin, ṭhiante chu ‘mangan nîahte’ kan mamawh lehzual a. (Thuf. 17:17) Kan chak loh hunah kan unaute chuan tisa lamah, rilru lamah leh thlarau lamah min  ṭanpui thei a ni. Isua nu Mari’n mi dangte hnên aṭanga chakna a dawn dân hi i lo ngaihtuah ang u.

11. Engvângin nge Mari chuan chakna a mamawh?

¹¹ Mari chuan chakna a mamawh a. Vântirhkoh hnên aṭanga chanvo rit tak a dawn hnua a rilru hah dân tûr kha han ngaihtuah teh. Ani chuan pasal nei si lovin nau a pai dâwn a. Fa enkawl dân chungchângah thiltawn a nei lo va, Messia la ni tûr naupang chu a enkawl dâwn a ni. Chu bâkah, a pasal hual Josefa nên an la awm dûn ngai lo va, engtin nge chûng zawng zawng chu Josefa hnênah chuan a hrilhfiah tâk ang?—Lk. 1:26-33.

12. Luka 1:39-45-a sawi angin, engtin nge Mari chuan a mamawh chakna a neih?

¹² Mari chuan chu chanvo rit tak leh danglam tak chu hlen tûrin engtin nge a mamawh chakna chu a neih? Mi dangte hnên aṭangin ṭanpuina a zawng a ni. Entîr nân, a chanvo chungchânga a hriat duhte chu vântirhkoh Gabriela a zâwt a. (Lk. 1:34) A hnu lawkah, a laichînnu Elizabeti tlawh tûrin “thingtlângah” Judai rama khaw pakhatah a kal ta a ni. Chu chu a hlâwkpui hle a. Elizabeti chuan Mari chu a fak a, Pathian thlarauva thâwk khumin a fapa lo piang tûr chungchânga Jehova hrilh lâwkna phûrawm tak chu a hrilh a ni. (Luka 1:39-45 chhiar rawh.) Chu chu Mari chuan Jehova’n “a bâna a tha chakzia a entîr” angin a sawi a. (Lk. 1:46-51) Jehova chuan Mari chu Gabriela leh Elizabeti hmangin a tichak a ni.

13. Engtin nge Bolivia rama unaunu pakhat chuan Kristian unaute hnêna ṭanpuina a dîlna chu a hlâwkpui?

¹³ Mari ang bawkin, nang pawh i unaute hnên aṭangin chakna i nei thei a. Bolivia rama unaunu Dasuri chuan chutiang chakna chu a mamawh a. A pa chu enkawl dam theih loh natna khirh tak veia damdawi ina a awm chuan a pa enkawl chu a mawhphurhna anga ngaiin theih tâwp a chhuah a ni. (1 Tim. 5:4) Chu chu a tân a awlsam ṭhîn lo hle a. “Vawi tam tak chu enkawl zawm thei tawh lo tûrin ka inngai,” tiin a sawi. Ani chuan ṭanpuina a zawng em? A tîr chuan a zawng lo va. “Ka unaute chu tihbuai ka duh lo va, ka mamawh ṭanpuina chu Jehova’n min pe ang tih ka ngaihtuah a ni. A hnuah, hetianga ka inkulh hran hian ka buainate chu mahnia chinfel tum mai ka ni tih ka inhre chhuak a ni,” tiin a sawi. (Thuf. 18:1) Unaunu Dasuri-i chuan a ṭhian ṭhenkhatte hnênah lehkha ziakin a dinhmun chu hrilh a tum ta a. “Ka Kristian unaute’n min tihchak nasat dân chu sawi dân pawh ka thiam lo. Damdawi inah ei tûrte rawn kengin, mi thlamuan thei tak Bible chângte min chhiar sak a. Ka mal lo tih hriat chu thlamuanthlâk tak a ni. Min ṭanpui a, min ṭahpui a, tawrhpui inhuam Jehova chhûngkaw lian takah kan awm a ni,” tiin a sawi a ni.

14. Engvângin nge kohhran upate hnên aṭanga ṭanpuina chu kan pawm ang?

¹⁴ Jehova’n chakna min pêk dân kawng khat chu kohhran upate hmangin a ni a. Anni chu min tichak tûr leh tiharh tûra a hman thilpêkte an ni. (Is. 32:1, 2) Chuvângin, i mangan hunah upate chu hrilh ang che. Ṭanpuina an pêk che hunah lâwm takin pawm la. Anmahni hmangin Jehova’n a tichak thei che a ni.

15. Kristiante tân eng beiseina hlu tak nge awm?

¹⁵ Bible ṭanchhan kan beiseina chuan chakna min pe thei a. (Rom 4:3, 18-20) Kristiante kan nih angin, lei paradis din thar lehah, a nih loh leh vân lam Lalrama chatuan  nun beisei theihna lâwmawm tak kan nei a. Kan beiseina chuan fiahnate chhel taka tuar chhuak thei tûr te, chanchin ṭha hril tûr te leh, kohhrana chanvo hrang hrang chelh thei tûrtein min tichak a. (1 Thes. 1:3) Chu beiseina vêk chuan tirhkoh Paula chu a tichak a ni.

16. Engvângin nge tirhkoh Paula’n chakna a mamawh?

¹⁶ Paula pawhin chakna a mamawh a. Korinth khuaa mite hnêna a lehkhathawnah hlumbêl nên a inkhaikhin a ni. Ani chu ‘nêksâwr, thaw ipik, tihduhdah leh, vuak thlûkin’ a awm a. A nunna chu tihderthâwnin a awm bawk. (2 Kor. 4:8-10) Paula chuan chûng thute chu missionary nia an zin ṭum thumnaa a ziah a ni a. Chûng hun lai chuan a harsatna tawhte chu a tâwp mai dâwn lo tih a hre lo pawh a ni mai thei. Ani chuan mipui tharum thawhna te, man te, lawng keh chhiatna te leh tân ina khungte chu a la hmachhawn dâwn a ni.

17. 2 Korinth 4:16-18-a sawi angin, engin nge Paula chu fiahnate chhel taka tuar chhuak thei tûra tichak?

¹⁷ Paula chuan a beisei chu ngaihven tlatin chhel taka tuar chhuak tûrin chakna a nei a. (2 Korinth 4:16-18 chhiar rawh.) Ani chuan Korinth khuaa mite hnênah a taksa chu “lo awngrawp telh telh mah sela,” chu chuan a tihlunghnual loh tûr thu a hrilh a ni. Paula chuan a nakin hun beiseina chu a ngaihven tlat a. Vâna chatuana nun a beiseina chu a tân ‘a ropui tulh tulh’ avângin harsatna eng pawh tawrh a inhuam a ni. Ani chuan chu beiseina chu a chhût ngun avângin, nî tina “siam thar zêlin” a awm a ni.

18. Engtin nge beiseina chuan Unau Tihomir-a leh a chhûngte chu a tihchak?

¹⁸ Bulgaria rama unau Tihomir-a chuan a beiseinaah chakna a hmu a. Kum kalta rei vak lovah khân, a nau Zdravko-a chu accident avângin a boral a. Unau Tihomir-a chuan a hnu kum engemaw chhûng chu, nasa takin a sûn a ni. Thlamuanna nei tûrin an chhûngkua chuan thawhlehna awm dân tûr chu an ngaihtuah a. Ani chuan: “Entîr nân, Zdravko-a kan hmuahna hmun tûr te, ei leh in kan siamsak tûr te, a rawn thawh leh  huna inkawmhona kan neih hmasak bera kan sâwm tûr te leh ni hnuhnûng chungchâng kan hrilh tûrte kan sawiho ṭhîn,” tiin a sawi. Tihomir-a chuan an beiseina ngaihven tlatna chuan chhel taka tuar chhuak tûr leh Jehova’n a unaupa a kaihthawh hun chu nghâk tlat tûrin a chhûngte chu chakna a pe tih a sawi bawk.

19. I beiseina tinghet tûrin eng nge i tih theih?(Milem en bawk rawh.)

¹⁹ Engtin nge i beiseina chu i tihngheh theih? Entîr nân, leia chatuana nung tûra beiseina i nei a nih chuan Bible-in Paradis chungchâng a sawite chu chhiarin, chhût ngun ang che. (Is. 25:8; 32:16-18) Khawvêl thara nun awm dân tûr chu ngaihtuah ṭhîn la. Chuta awm angin inmitthla ang che. Tu nge i hmuh? Eng rite nge i hriat? Engtin nge i awm? I mitthla thiam lehzual nân, kan thu leh hla chhuaha Paradis lemte chu en la, a nih loh leh kan music video, entîr nân, New World to Come, Just Around the Corner, leh Imagine the Time tihte chu en ang che. Kan rilrua khawvêl thar kan beiseina kan tingheh tlat chuan, kan harsatnate chu “nêp tak, tûn mit khap kâr chhûng chauhva awm” a ni ang. (2 Kor. 4:17) Jehova’n chu beiseina a pêk che hmang chuan a tichak ang che.

20. Kan chak loh hunah pawh engtin nge chakna kan neih theih?

²⁰ Kan chak loh hunah pawh, “Pathian zârah chakna kan nei ang.” (Sâm 108:13, NWT) Jehova chuan a hnên aṭanga chakna dawng tûra i mamawhte pêk chu a inpeih reng a. Chuvângin, i chanvo dawn hlen thei tûr te, chhel taka tuar chhuak thei tûr te leh, hlimna nei reng thei tûrtea ṭanpuina i mamawh hunah tih tak zeta ṭawngṭaiin Jehova pan la, mi mala inzirna hmangin a kaihhruaina zawng ang che. Kristian unaute fuihna chu pawm la. I beiseina chu vawng tlat ang che. Chuti chuan “hlim taka chhelna leh dawhtheihna tinrêng nei tûra a ropuina chakzia ang zêla chakna tinrênga lo chakin” i awm ang.—Kol. 1:10,11.