1. Vântirhkohvin eng nge a sawi a, chu chuan kan tân eng awmzia nge a neih?

 VANTIRHKOH pakhatin rawn be ta che se la, a thusawi chu i ngaithla ang em? Tûn laiah, vântirhkoh pakhatin “hnam tinrêng te, chi tinrêng te, ṭawng tinrêng te, mi tinrêng te” hnênah thu a sawi a. Eng nge a sawi? “Pathian chu hlau ula, chawimawi rawh u; vân te, lei te . . . siamtu chu chibai bûk rawh u,” tiin. (Thup. 14:6, 7) Jehova chu mi tinte biak tûr Pathian dik awmchhun a ni a. A thlarau lam biak in ropui taka amah chibai bûk theihna hun remchâng hlu tak min pe hi a va lâwmawm tak êm!

2. Jehova thlarau lam biak in chu eng nge ni? (“ Eng nge a nih loh” tih bâwm chu en rawh)

² Thlarau lam biak in chu eng chiah nge ni a, chumi chungchâng hrilhfiahna kimchang tak chu khawiah nge kan hmuh theih? Thlarau lam biak in chu biak in tak tak a ni lo va. Chu chu Isua tlanna inthawina ṭanchhana a pawm tlâka kan biak theih nâna Pathian Jehova ruahmanna siam a ni. Tirhkoh Paula chuan chu ruahmanna chu kum zabi khatnaa Judai rama Hebrai Kristiante hnêna a lehkhathawnah a târ lang a ni. b

3-4. Judai rama Hebrai Kristiante chungchângah Paula’n eng nge a ngaihtuah a, engtin nge anni chu a ṭanpui?

³ Engvângin nge Paula chuan Judai rama Hebrai Kristiante  hnêna lehkha a ziah? A ziah chhan ni thei pahnih a awm a. Pakhatna, anni chu a fuih duh vâng a ni. An zinga a tam zâwk chu Juda sakhuaa seilian an ni a. Kristiannaa an inleh avângin Juda sakhaw hruaitute chuan an nuihsawh a ni. Engvângin nge? Kristiante chuan biakna atân biak in ropui tak an nei lo va, Pathian hnêna inthawina maichâm tak tak pawh an neih loh bâkah, rawngbâwltu puithiam pawh an nei lo va. Chu chuan Isua zirtîrte chu a tilunghnual theiin, an rinna a tichak lo thei a ni. (Heb. 2:1; 3:12, 14) An zînga mi ṭhenkhat chuan Juda sakhuaa kîr leh hial pawh an ngaihtuah a ni.

⁴ Pahnihna, Paula chuan Hebrai Kristiante chu Pathian Thua “chaw rum” thlarau lam zirtîrna ril tak, a nih loh leh hriatthiamna thar chu hriat an tum loh thu a sawi a. (Heb. 5:11-14) Mi ṭhenkhat chuan Mosia Dân chu an la zâwm tlat a. Mahse, Paula chuan, chu Dânin a phût inthawina chuan sualna a tlêng fai zo lo tih a hrilh a. A chhan chu, chu Dân chu “paih” a nih tawh vâng a ni. Chuvângin, Paula chuan thutak ril tak ṭhenkhat a zirtîr a. A Kristian unaute chu Isua inthawina ṭanchhana “beiseina ṭha zâwk” a hrilh bâkah, chu chuan ‘Pathian a hnaih lehzualtîr’ thei tih a hrilh a ni.—Heb. 7:18, 19.

5. Bible-a Hebrai bua kan hriatthiam ngai chu eng nge ni a, engvângin nge?

⁵ Paula chuan Hebrai unaute hnênah Kristiante biakna chu Judate sakhaw biakna aia a chungnun zâwk chhan a hrilh a. Juda sakhaw biakna chu “thil lo thleng tûrte hlim a ni, a tak erawh chu Krista a ni.” (Kol. 2:17) Hlimthla chu a hlim pe chhuaktu a tak pian hmang hriat theihna mai a ni a. Chuvângin, hmân lai Juda sakhaw biakna pawh a tak lo awm tûr biakna tak tak hlimthla mai a ni. Kan biakna pawm tlâk a nih theih nâna kan sualte ngaihdam a nih theihna tûra kan tâna Jehova ruahmanna siam chu kan hriatthiam a ngai a. Hebrai bua a hrilhfiah angin “hlim” (Judate biak dân) leh “a tak” (Kristiante biak dân) chu i lo khaikhin ang u. Chutiang chuan, chu thlarau lam biak in leh chuta kan tel ve dân kan hre thiam lehzual thei a ni.

6. Engtin nge biak bûk chu hman a nih?

⁶ Judate biak dân. Paula chuan B.C.E. 1512-a Mosia hmanga siam biak bûk  ṭanchhanin sawihona a nei a. (“Judate Biak Dân—Kristiante Biak Dân,” tih chart chu en rawh.) Biak bûk chu tûn hmaa Israel mite’n an insawnna apianga an ken tel ṭhin puan in a ni. Anni chuan chu puan in chu Jerusalema biak in sak a nih hma kum 500 dâwn lai an hmang a. (Ex. 25:8, 9; Num. 9:22) Chu “inbiakna puan in” chu Israel mite tân Pathian an hnaihna hmun leh inthawina an hlanna leh an biakna hmun a ni a. (Ex. 29:43-46) Mahse, chu biak bûk chuan Kristiante tâna lo awm tûr thil ropui zâwk a entîr a ni.

7. Engtikah nge thlarau lam biak in chu din a nih?

⁷ Kristiante biak dân. Hmân lai biak bûk chu ‘vân thilte hlimthla’ a ni a, chu chuan Jehova thlarau lam biak in ropui tak a entîr a ni. Paula chuan, “chu (puan in) chu tûn lai tehkhinna hi a ni,” tiin a sawi a. (Heb. 8:5; 9:9) Chuvângin, Hebrai Kristiante hnêna lehkhathawn a ziah lai khân, Kristiante tâna thlarau lam biak in chu din a ni tawh a. Chu biak in chu C.E. 29-a din a ni. Chumi kum chuan, Isua baptisma changin, thlarau thianghlima hriak thih a ni a, chuta ṭang chuan thlarau lam biak inah “Puithiam Lalber ropui tak” niin Jehova rawng a bâwl ṭan a ni. c—Heb. 4:14; Tirh. 10:37, 38.

8-9. Hebrai 7:23-27-a sawi angin, Israel puithiam lalte leh Puithiam lal ropui ber Isua Krista inan lohna chu eng nge ni?

⁸ Judate biak dân. Puithiam lal chu Pathian hmaa mite aiawha rawngbâwl tûra ruat a ni a. Biak bûk hlan a nih lai khân, Arona chu Israel mite zînga puithiam lal hmasa ber ni tûrin Jehova’n a ruat a ni. Mahse, Paula chuan, “anni zawng thih avânga awm hlen an ṭhulh ṭhin avângin puithiama siam an tam ngei a,” tiin a sawi. d (Hebrai 7:23-27 chhiar rawh.) Ṭha famkim lo an nih avângin chûng puithiam lalte chuan, mahni tân sualna inthawina an hlan a ngai a. Chu tak chu Israel mite puithiam lalte leh Puithiam lal ropui ber Isua Krista inan lohna a ni.

⁹ Kristiante biak dân. Puthiam lal ber a nih angin, Isua Krista chu “biak bûk tak tak mihring sak ni lo, Lalpa sak zâwka rawngbâwltu,” a ni a. (Heb. 8:1, 2) Paula chuan Isua chu “chatuana a awm reng avângin a Puithiam nihna chu thlâk theih rual lohvin a nei ta zâwk,” tiin a sawi a. Isua chu Israel puithiam lalte ang lo takin, ‘bawlhhlawh kai lo, mi sualte lakah awm hrangin,’ ama sualna avânga ‘nî tin, inthawina a hlan’ a ngai lo, tiin a sawi belh a ni. Tûnah, Judate biak dân leh Kristiante biak dâna maichâm leh hâlral thilhlan inan lohna i lo ngaihtuahho vang u.

10. Dâr maichâma inthawina thil hlante chuan eng nge a entîr?

¹⁰ Judate biak dân. Biak bûk luhna pâwn lamah chuan Jehova hnêna rana hâlral inthawi nân dâr maichâm a awm a. (Ex. 27:1, 2; 40:29) Mahse, chûng inthawinate chuan mite tân sual ngaihdamna pumhlûm a pe thei lo a ni. (Heb. 10:1-4) Chutianga biak bûka rana inthawina hlan ṭhinna chuan mihringte sual ngaihdamna pumhlûm thlentu tûr a entîr a ni.

11. Isua’n eng maichâm chungah nge a nun a hlan? (Hebrai 10:5-7, 10)

 ¹¹ Kristiante biak dân. Isua chuan a lei nunna chu mihringte tâna tlanna inthawina atâna hlân tûrin Jehova’n leiah a rawn tîr tih a hria a. (Mt. 20:28) Chuvângin, baptisma a chan khân, Jehova duh zâwng ti tûrin a inpe a ni. (Joh. 6:38; Gal. 1:4) Isua chuan a nun ṭha famkim chu entîr nei maichâmah a hlân a, chu chuan mihringte tâna a nun hlân tûra Pathian “duh zâwng” a entîr a ni. Ani chuan tu pawh amah ringtu apiangte chu an sualna ngaihdam pumhlûm a nih theih nân ‘vawi khatah’ a nun a hlân a ni. (Hebrai 10:5-7, 10 chhiar rawh.) Tûnah, biak bûk chhûnga thil awmte’n a entîr chu i lo bih chiang ang u.

12. Biak bûk chhûnga pindânah chuan tu nge lût thei?

¹² Judate biak dân. Biak bûk leh a hnua Jerusalema sak biak inte chuan chhûng lamah inanna ṭhenkhat a nei a. A chhûng lamah chuan puanzâr cheimawia daidan pindan pahnih—“Hmun Thianghlim” leh “Hmun Thianghlim Ber”—chu a awm a ni. (Heb. 9:2-5; Ex. 26:31-33) Hmun Thianghlim chhûngah chuan khâwnvâr dahna, rimtui hâlna maichâm leh chhang dahna dawhkân a awm a. ‘Puithiam atâna hriak thihte’ chauhvin hmun thianghlim chhûngah chuan an rawngbâwlna thianghlim thawk tûrin an lût thei a ni. (Num. 3:3, 7, 10) Hmun Thianghlim Berah chuan Jehova’n a awmpui tih entîr nân rangkachaka siam thuthlung bâwm a awm a. (Ex. 25:21, 22) Puthiam lal chauh chu kum tina neih Inthawina Nîah puanzâr chu kaltlangin Hmun Thianglim Berah a lût thei a ni. (Lev. 16:2, 17) Kum tinin, chutah chuan amah leh hnam pumpui tân sual thawi nân  ran thisen kengin a lût ṭhîn a. A hnuah, Jehova’n a thlarau thianghlim hmangin, biak bûka chûng thilte’n a entîr chu chiang takin a târ lang a ni.—Heb. 9:6-8.

13. Kristiante tân biak bûka Hmun Thianghlim leh Hmun Thianghlim Ber chuan eng nge a entîr?

¹³ Kristiante biak dân. Krista zirtîr tlêm tê chauh thlarau thianghlima hriak thih an ni a, anni chuan Jehova nêna inlaichînna danglam tak an nei a ni. Chûng mi 1,44,000 te chuan vânah Isua nên puithiam angin rawng an bâwl ang. (Thup. 1:6; 14:1) Biak bûka Hmun Thianghlim chuan leia an awm laia Pathian fate ni tûra thlarauva hrin an nihna chu a entîr a. (Rom 8:15-17) Biak bûka Hmun Thianghlim Ber chuan Jehova awmna vân a entîr a ni. Hmun Thianghlim leh Hmun Thianghlim Ber daidangtu “puanzâr” chuan thlarau lam biak ina Puthiam Lalber ropui tak a nih anga vâna lût thei lo tûra Isua dâltu a lei taksa a entîr a. Mihringte tlan nân a lei taksa chu hlânin, Kristian hriak thih zawng zawngte tân vân nunna kawng a hawng a ni. Chûng hriak thihte chuan vâna an lâwmman dawng tûrin an lei taksa an kalsan a ngai bawk. (Heb. 10:19, 20; 1 Kor. 15:50) Isua kaihthawh a nih hnu chuan, thlarau lam biak ina Hmun Thianghlim Berah a lût a, hriak thih zawng zawngte pawh a hnênah chutah chuan an kal ve ang.

14. Hebrai 9:12, 24-26-a sawi angin, engvângin nge Jehova thlarau lam ruahmanna chu a ṭhat zâwk?

¹⁴ Heta ṭang hian tlanna inthawina leh Isua Krista puithiam nihna ṭanchhana biakna thianghlim atâna Jehova ruahmanna chungnun zâwkzia chiang takin kan hmu thei a. Israel rama puithiam lal chu mihring kuta sak Hmun Thianghlim Berah rana inthawina thisen kengin a lût a; mahse, Isua chu Jehova hmaa inlan tûrin hmun thianghlim ber “vânah ngei” a lût a ni. Chutah chuan “amah leh amah inhlânin, sual tihbo nân” a nun ṭha famkim hlutna chu a hlân a. (Hebrai 9:12, 24-26 chhiar rawh.) Isua inthawina chu sual nuai bo hlen a nih theih nâna inthawina awmchhun a ni. A dawta kan zir tûr angin, vân lam beiseina nei kan ni emaw, lei lam beiseina nei kan ni emaw pawh ni se, kan za vai hian Jehova chu a thlarau lam biak inah kan be ṭheuh thei a ni.

15. Tute nge biak bûk hung chhûng kawtlaiah chuan rawngbâwl?

¹⁵ Judate biak dân. Biak bûk chu puithiamte’n an chanvo an thawhna hmun inhungna nei—kawtlai pakhat nei a ni a. Hung chhûng kawtlaiah chuan hâlral thil hlanna dâr maichâm lian tak leh puithiamte’n an rawngbâwlna thianghlim an hlen hmaa an insilfaina tûr tui dahna dâr maihûn pawh a awm a ni. (Ex. 30:17-20; 40:6-8) Mahse, a hnua sak biak inte chuan, puithiam ni lote’n Pathian an biak theihna hmun hung chhûng kawtlaite a nei a ni.

16. Tute nge thlarau lam biak in hung chhûng kawtlaiah chuan rawngbâwl?

¹⁶ Kristiante biak dân. A unau hriak thih la bângte chu Isua nên vâna puithiam anga rawng an bâwl hmain, leia thlarau lam biak in hung chhûngnungah chuan rinawm takin rawng an bâwl a. Tui dahna maihûn chuan Kristian zawng zawngte tân nungchang lamah leh thlarau lamah thianghlim reng a pawimawhzia a hriat nawntîr a ni. A nih leh, Krista hriak thih unaute rinawm taka thlâwptu “mipui tam tak” chuan khawiah nge Jehova rawng an bâwl ang? Tirhkoh Johana chuan ‘a chhûn a zâna biak ina [Pathian] rawng an  bâwlna’ hung chhûng pâwnta zâwkin a entîr leiah chuan “lalṭhutphah hmaah,” anni chu dingin a hmu a ni. (Thup. 7:9, 13-15) Jehova buatsaih biakna thianghlima hmun kan neih avângin kan va lâwm tak êm!

17. Jehova hnênah eng thilte hlan theihna chanvo hlu nge kan neih?

¹⁷ Tûn laiah, Kristian zawng zawngte’n an hun te, tha leh zung te, leh an thil neihte hmangin Pathian Lalram tân inpêk theihna chanvo an nei a. Tirhkoh Paula’n Hebrai Kristiante hnêna a sawi angin, ‘faka inthawina a hming ṭanna hmuite rah’ chu Pathian hnênah kan hlân fo thei a. (Heb. 13:15) Pathian Jehova hnênah kan neih ṭha ber hlânin, amah kan biak theihna chanvo kan ngaihhlutzia kan lantîr thei a ni.

18. Hebrai 10:22-25-a sawi angin, eng nge kan ngaihthah loh vang a, eng nge kan hriat reng ang?

¹⁸ Hebrai 10:22-25 chhiar rawh. Hebrai mite hnêna a lehkhathawn tâwp lamah Paula chuan kan biaknaa kan ngaihthah ngai loh tûr thil chi hrang hrang a târ lang a. Chûng zîngah chuan Jehova hnêna kan ṭawngṭainate, vân tlâng hmaa kan beiseina puan chhuahna te, kohhrana inkhâwmnate leh ‘[Jehova] nî chu a lo hnai telh telha kan hriat avânga nasa lehzuala’ kan infuih tawnnate a tel a ni. Thu Puan bu tâwp lamah Pathian Jehova vântirhkoh chuan: “Pathian chibai bûk zâwk rawh,” tia vawi hnih lai sawiin chumi pawimawhzia chu a târ lang a. (Thup. 19:10; 22:9) Kan Pathian ropui tak Jehova thlarau lam biak in ropui tak chungchânga he thutak ril tak leh amah kan biak theihna chanvo hlu chu i theihnghilh ngai lo vang u.