1. Engvângin nge thuawih chu thil harsa tak a nih theih?

 THUAWIH harsa tih châng i nei em? Lal Davida chuan chutiang harsatna a neih avângin Pathian hnênah: “Thlarau tihnuamin mi chelh reng ang che,” tiin a ṭawngṭai a ni. (Sâm 51:12) Ani chuan Jehova a hmangaih a. Chuti chung chuan keimahni ang bawkin thuawih harsa tih châng a nei a ni. Engvângin nge? Pakhatna, thuawih duh lohna rilru put hmang kan rochun vâng a ni. Pahnihna, Setana chuan amah ang bawka Jehova chunga hel duhna nei tûra min thlêm reng vâng a ni. (2 Kor. 11:3) Pathumna, “tûna âwih lo fate chhûnga thawk mêktu” hel duhna rilru put hmang nei he khawvêl mite hual vêla kan awm vâng a ni. (Eph. 2:2) Thil sual tih duhna kan neih chu kan do mai bâkah, Diabola leh he khawvêlin thuawih lo tûra min nawr luihna chu do tûrin theih tâwp kan chhuah a ngai a. Jehova leh thuneihna engemaw chen a pêkte thu âwih tûrin theih tâwp kan chhuah tûr a ni.

2. ‘Thuawih’ tih awmzia chu eng nge ni? (Jakoba 3:17)

² “Chung lam aṭanga finna lo chhuak erawh chu a tîrin a thianghlim phawt a, chumi hnuah chuan inrem a duh a, a nunnêm a, thu a awih a, zahngaihna leh rah ṭhain a khat a, thlei bîk a nei lo va, a vervêk lo a ni.” (Jak. 3:17, NWT.) Thlarauva thâwk khumin Jakoba’n mi fing chuan ‘thu an âwih’ tih a sawi a. A sawi awmzia chu han ngaihtuah teh. Jehova’n thuneihna engemaw chen a pêkte thu chu châk tak leh inhuam takin kan âwih tûr a ni. Chutih rualin, Jehova chuan a thupêkte hnâwl tûra min titute thuawih tûrin min beisei lo.—Tirh. 4:18-20.

3. Engvângin nge kan chunga thuneitute thu kan awih chu Jehova tân a pawimawh?

³ Mihringte thu aia Pathian Jehova thu âwih chu awlsam kan ti zâwk thei a. A chhan chu, Jehova pêk kaihhruainate chu a ṭhat famkim vâng a ni. (Sâm 19:7) Mahse,  mihring thuneitute chu an ṭha famkim lo va. Chuti chung pawhin, kan Pa vâna mi chuan nu leh pa te, sawrkâr thuneitu te leh, kohhran upate chu thuneihna eng emaw chen a pe a ni. (Thuf. 6:20; 1 Thes. 5:12,13; 1 Pet. 2:13, 14) An thu kan âwih chuan Jehova thu kan awih a ni. Jehova’n thuneihna eng emaw chen a pêk mihringte kaihhruaina zawm leh pawm harsa tih châng kan neih hunah pawh an thu kan âwih theih dan i lo ngaihtuahho vang u.

4. Engvângin nge mi tam takin an nu leh pate thu an awih loh?

⁴ Ṭhalaite chu an rualpui “nu leh pa thu âwih lote” hual vêlin an awm a. (2 Tim. 3:1, 2) Engvângin nge mi tam takin an nu leh pate thu an âwih loh? Nu leh pa tam tak chuan an fate ti tûra an phût anga anmahni ngei an awm loh avângin fate tân rin an harsa a. Mi ṭhenkhat chuan an nu leh pate thurâwn pêk chu hmân lai tawh, hman tlâk loh leh, khirh lutuk angin an ngai bawk. Ṭhalai i nih chuan chutianga ngaih châng i nei ve em? Mi tam tak chuan: “Lalpaah chuan in nu leh in pate thu zâwm rawh u; chu chu thil dik a ni si a,” tih Jehova thupêk chu zawm harsa an ti a. (Eph. 6:1) Chu thupêk zâwm thei tûr chuan engin nge ṭanpui thei che?

5. Luka 2:46-52-a târ lan angin, engvângin nge Isua’n a nu leh pate thu a awih chu chhinchhiah tlâk tak a nih?

⁵ Entawn tûr ṭha ber Isua hnên aṭangin thuawih i zir thei a. (1 Pet. 2:21-24) Ani chu ṭha famkim ni mah se, a nu leh pate chu ṭha famkim an ni lo va. Mahse, a nu leh pate’n thil an tihsual hunah leh amah an hriatthiam loh hunah pawh anni chu a chawimawi a ni. (Ex. 20:12) Isua kum 12 mi a nih laia thilthlengte kha lo ngaihtuah ta ila. (Luka 2:46-52 chhiar rawh.) A nu leh pate chuan Jerusalem aṭangin an hawsan a; kût an hman zawha, an hawpuite zînga an fate an tel kim leh kim loh hriat chu Josefa leh Mari te mawhphurhna a ni. A tâwpa Isua an zawn hmuh hnu chuan a tih mangang êm avângin Mari chuan a hau va! Isua chuan an dik lohna chu sawi langin a chhâng lêt thei a. Chu aiin, zah thiam takin a chhâng lêt zâwk a ni. Mahse, Josefa leh Mari chuan, “an hnêna a thusawi chu a ngaihna an hre lo va.” Chuti chung chuan, Isua chu “an thu zâwmin a awm” a ni.

6-7. Engin nge ṭhalaite chu an nu leh pate thuawih tûra ṭanpui thei?

⁶ Ṭhalaite u, in nu leh pate’n thil an tihsual hunah emaw, an hriatthiam loh che u hunah emaw an thuâwih chu harsa in ti em? Engin nge ṭanpui thei che u? Pakhatna, Jehova ngaih dân tûr chu ngaihtuah rawh u. Bible chuan in nu leh pate thu in awih hian, “chu chu Lalpaah chuan a lâwmawm si a,” tiin a sawi a ni. (Kol. 3:20) Jehova chuan in nu leh pate’n an hre thiam vek lo che u, tih leh dân khirh takte zam châng an nei ṭhîn tih a hria a. Chuti chung pawha an thu in awih tih a hmuh hian a lâwm a ni.

⁷ Pahnihna, in nu leh pate ngaih dân tûr chu ngaihtuah rawh u. An thu in awih hian in tilâwmin, an rin in hlawh a ni. (Thuf. 23:22-25) In inlaichînna a nghet lehzual ngei bawk ang. Belgium rama Unau Alexandre-a chuan: “Ka nu leh pate thu ka zawm ngun poh leh kan inlaichînna pawh a ṭha lehzual a ni,”  tiin a sawi. b Pathumna, in thuawihna chu a hnua in hlâwkpui theih dân tûrte ngaihtuah rawh u. Brazil rama Unau Paulo-a chuan, “Ka nu leh pate thu ka awihna chuan Jehova leh thuneitu dangte thu âwih tûrin min ṭanpui,” tiin a sawi. Pathian Thu chuan: “Chutichuan i tân a ṭha ang a, leiah hian i dam rei bawk ang,” tiin nu leh pate thu in âwih a pawimawh chhan chu a sawi a ni.—Eph. 6:2, 3.

8. Engvângin nge ṭhalai tam takin an nu leh pate thu an awih?

⁸ Ṭhalai tam tak chuan thuawihna an hlâwkpui dân chu an hmu a. Brazil rama Unaunu Luiza-i chuan a rualpui tam takin phone an nei tih a hmuhin, hun engemawti chhûng phone neih phal a nih loh chhan chu a hre thiam thei lo va. Mahse, a hnuah chuan a nu leh pate’n vênhim an duh vâng a ni tih a hre ta a. Ani chuan, “Nu leh pate thuawih chu min phuar hrehawmtu ang ni lovin, kan nun vênghimtu seat belt angin ka thlîr thiam ta,” tiin a sawi. United States-a ṭhalai Unaunu Elizabeth-i chuan, a nu leh pate thuawih harsa tih châng a la nei reng a. Ani chuan, “Ka nu leh pate’n dân ṭhenkhat an zam chhan ka hriatthiam loh hunah, tûn hmaa an dân zamte’n min vênhim dân chu ka ngaihtuah lêt ṭhîn,” tiin a sawi. Armenia rama Unaunu Monica-i chuan, a nu leh pate thu a awih apianga a hlim zâwk thu a sawi bawk a ni.

9. Mi tam takin dân zawm chungchâng chu engtin nge an ngaih?

⁹ Mi tam tak chuan sawrkâr thuneitute kan mamawh tih leh chûng “rorêltute” dân zamte chu kan zâwm tûr a ni tih an pawm a. (Rom 13:1) Mahse, chûng mite vêk chuan dân chu dik tâwk lo anga an ngaih hunah emaw, khirh lutuk anga an ngaih hunah emaw, zawm an hreh ṭhîn a ni. Entîr nân, chhiah chawi chungchâng hi lo ngaihtuah ta ila. European ram pakhata zir chiannaa hmun lia ṭhena hmun khat chuan “Dik tâwk lo nia i hriat chuan chhiah chawi loh chu thil dik a ni,” tiin an ring a. Chuvângin, chu rama khua leh tuite chuan sawrkâr hnênah chhiah chu hmun thuma ṭhena hmun hnih chauh an pe ṭhîn a ni.

10. Engvângin nge kan duh loh, dân leh hraite pawh kan zawm ang?

¹⁰ Bible chuan mihring sawrkârna chu hrehawmna thlentu a ni tih leh Setana thununna hnuaiah a awm a, tihboral a ni thuai ang tih a sawi a. (Sâm 110:5, 6; Thur. 8:9; Lk. 4:5, 6) Chutih rualin, “tu pawh rorêltu hnial chu Pathian ruat dodâl an ni,” tiin a sawi bawk. Tûnah chuan Jehova’n thil fel taka tih a nih theih nân sawrkâr rorêltute awm chu a la phal a, an thu âwih tûrin min beisei bawk. Chuvângin, chhiah pêk te, zahna lantîrna te leh, thuawihte pawh tiamin “pêk tûr apiang” kan pe tûr a ni. (Rom 13:1-7) An dân zamte chu dik tâwk lo, zawm harsa leh khirh lutuk angin kan ngai thei a. Mahse, Jehova thupêkte bawhchhe tûra min tih loh chhûng chu, chûng rorêltute thu âwih tûra Jehova’n min hrilh avângin athu âwih chu kan duh a ni.—Tirh. 5:29.

11-12. Luka 2:1-6-a târ lan angin, Josefa leh Mari chuan an tâna zawm harsa tak dân chu engtin nge an zawm a, chu chuan eng nge a rah chhuah? (Milem en bawk rawh.)

 ¹¹ Rorêltute thuawih a harsat hun pawha an thu zâwm tûra inpeih reng Josefa leh Mari te entawn tûr siam aṭangin kan inzir thei a. (Luka 2:1-6 chhiar rawh.) Mari nau hrin dâwn hnaihah Josefa nên an thuawihna chu fiah a ni a. Rom Lalrama rorêltu Augusta chuan chhiarpui nei tûrin thu a pe a. Josefa leh Mari te chu Bethlehem thleng tûrin kilometer 150 (mêl 93)-a hla tlângram kawnga an zin a ngai a ni. A bîk takin, Mari tân chu zin kawng chu hrehawm tak a ni ngei ang. An nupa chuan amah leh an nautê la piang lo himna atân an lungkham ngei ang. An zin kawngah chuan nau nei ta se, engtin nge ni ang? Ani chuan Messia la ni tûr chu a pai si a. Chu chu sawrkâr thupêk zawm loh nachhan a tling ang em?

¹² Josefa leh Mari te chuan chûng thilte chu dân zawm loh phah nân an hmang lo va. Jehova’n an thuawihna chu mal a sâwm a. Mari chuan Bethlehemah tluang taka thlengin, naute hrisêl tak a nei a, Bible hrilh lâwkna thleng famkim tûrin a ṭanpui bawk a ni.—Mik. 5:2.

13. Engtin nge kan thuawihnain kan unaute chungah nghawng a neih theih?

¹³ Kan chunga rorêltute thu kan awih hian keimahni leh mi dangte’n kan hlâwkpui a. Engtin nge? Kan hlâwkpui dân kawng khat chu dân zawm loh vânga hremnate chu kan pumpelh a ni. (Rom 13:4) Mi mal thuawihna avângin rorêltute chuan Jehova Thuhretute zawng zawng chu a ṭha zâwngin an thlîr  thei a. Entîr nân, kum tam tak kal taah khân, Nigeria ramah kohhran inkhâwm neih a nih laiin, sipaite chu Kingdom Hall-ah lûtin chhiah pêk duh loh avânga kawng zawha buaina thlentute chu an zawng a. Mahse, chuta sipai hotu chuan, “Jehova Thuhretute chu chhiah pe lovin an awm ngai lo,” tia sawiin sipaite chu a chhuahtîr a ni. Dân i zawm apiang hian Jehova mite hming ṭhatna chu i belhchhah a, chu chuan engtik nîah emaw chuan i unaute chu a vênghim thei a ni.—Mt. 5:16.

14. Engin nge unaunu pakhat chu rorêltute ‘thu âwih’ tûra ṭanpui?

¹⁴ Chuti chung chuan kan chunga rorêltute thuawih chu harsa tih châng kan nei thei a. United States-a Unaunu Joanna-i chuan “Ka chhûngte’n dik lo taka thuneitute cheibâwlna an tawh avângin hrehawm an tuar a, an thuawih chu a harsa tak zet a ni,” tiin a sawi. Mahse, a rilru put hmang thlâk danglam tûrin theih tâwp a chhuah a. Pakhatna, thuneitute chunga a ṭha lo zâwnga thlîrna neihtîr lehzualtu social media-a thu pho chhuahte chhiar chu a bânsan a. (Thuf. 20:3) Pahnihna, mihring sawrkârte inthlâk danglamna beisei aiin Jehova rinchhan tlat tûrin a ṭanpuina a dîl a ni. (Sâm 9:9, 10) Pathumna, kan thu leh hla chhuahte aṭangin tualdawihna chungchâng thuziakte a chhiar a. (Joh. 17:16) Joanna-i’n tûnah chuan thuneitute chunga zahna lantîrna leh an thuawihnain sawi fiah theih loh “thlamuanna leh lungawina min neihtir” tiin a sawi a ni.

15. Engvângin nge Jehova inawpna pâwl aṭanga lo kal kaihhruaina chu zawm harsa kan tih mai theih?

¹⁵ Jehova chuan kohhrana “hotute thu âwih” tûrin min hrilh a. (Heb. 13:17) Kan hruaitu Isua chu ṭha famkim ni mah se, leia min kaihruai tûra a mi hmante chu ṭha famkim an ni lo. A bîk takin, anni chuan kan duh loh zâwngte ti tûra min tih hunah an thu âwih chu harsa kan ti thei a. Tirhkoh Petera pawhin thuawih harsa a ti a ni. Vântirhkohvin Mosia Dân hnuaia sa ei thiang lote ei tûra a tih khân, ani chuan vawi khat mai pawh ni lovin, vawi thum lai a hnial a ni. (Tirh. 10:9-16) Engvângin nge? Chu kaihhruaina thar chu a tân thil âwm lo tak a nih vâng a ni. Tûn hmaa a tih ṭhin dân nên a inang lo hle si a. Petera’n vântirhkoh ṭha famkim pêk kaihhruaina zawm harsa a tih chuan, mihring ṭha famkim lote kaihhruaina pêk chu zawm harsa kan va ti lehzual dâwn êm!

16. Tirhkoh Paula tân kaihhruaina a dawnte chu âwm lo tak anga ngaih theih ni mah se, eng nge a tih? (Tirh. 21:23, 24, 26)

¹⁶ Tirhkoh Paula chuan âwm lo nia a hriat kaihhruaina a dawn hunah pawh “thu a âwih” a. Juda Kristiante chuan a chungchângah “Mosia thlauhthlâkna tûr” a zirtîrin Mosia Dân a zah lo tih thuthang an hria a ni. (Tirh. 21:21) Jerusalema Kristian upate chuan Paula chu Dân a zawmzia lantîr nân, biak ina mipa pali hruai a, dân anga intithianghlim tûrin kaihhruaina an pe a ni. Mahse, Paula chuan Kristiante chu Dân hnuaiah an awm tawh lo tih leh tihsual engmah a nei lo tih a hria a. Chuti chung pawhin an hrilh ang chuan a ti vat a ni. Ani chuan, “a tûkah chuan . . . mipate chu a hruai a, an hnênah a inthian fai ve a.” (Tirhkohte 21:23, 24, 26 chhiar rawh.) Paula thuawihna chuan inpumkhatna a awmtîr a ni.—Rom 14:19, 21.

17. Unaunu Stephanie-i thiltawn aṭangin eng nge i zir?

¹⁷ Unaunu Stephanie-i chuan a awmna rama mawhphurhna nei unaupate thu tlûkna  siam chu pawm harsa a ti a. An nupain ṭawng dang hmanna group-ah hlim takin rawng an bâwl ṭhîn a. Mahse, branch office chuan chu group chu tihtâwpsakin anmahni ṭawng hmanna kohhrana rawngbâwl leh tûrin a insawntîr a ni. Ani chuan: “Ka lâwm lo hle a. Ka pianpui ṭawng hmanna kohhranin mamawh zualna a neih âwm ka hre lo,” tiin a sawi. Mahse, kaihhruaina thar chu a zâwm ta tho va. Heti hian a sawibelh a ni: “A hnuah, chu kaihhruaina finthlâkzia chu ka hre ta a. Thutaka chhûngte nei lo kohhrana unaute tân thlarau lama nu leh pate kan ni a. Thlarau lama rawn chak thar leh unaunu chu Bible ka zirpui mêk a. Chu bâkah, tûnah chuan mahnia inzir nân hun ka nei tam lehzual a. Thuawih tûrin theih tâwp ka chhuah tih ka hriat avângin chhia leh ṭha hriatna thiang ka nei bawk a ni,” tiin.

18. Engtin nge thuawihna chu kan hlâwkpui?

¹⁸ Thuawih kan zir thei a. Isua chuan a remchân vâng ni lovin, “a thil tuarahte chuan thu âwih a zir” a ni. (Heb. 5:8) Isua ang bawkin, dinhmun harsa tak hnuaiah pawh thuawih kan zir fo va. Entîr nân, COVID-19 hripui a lên ṭantîrha, Kingdom Hall-a inkhâwm leh in tin kal rawngbâwlna chu titâwp rih tûra tih kan nih khân zawm harsa i ti em? Mahse, i thuawihna chuan a vênghim che a, Kristian unaute chu a inpumkhattîrin Jehova a tilâwm a ni. Tûnah chuan kan za vai hian hrehawm nasa tak chhûnga kan dawn tûr kaihhruaina eng pawh zâwm tûrin ṭha taka buatsaih kan ni a. Chûng kaihhruainate zawmna chuan kan nun a chhanhim ang.—Job. 36:11.

19. Engvângin nge thuawih i duh?

¹⁹ Thuawihnain malsâwmna chhiarsên loh a thlen tih kan hre tawh a. Mahse, Jehova thu kan âwih chhan ber chu amah kan hmangaih vâng leh tihlâwm kan duh vâng a ni. (1 Joh. 5:3) A thil min tihsak zawng zawngte chu kan rûl sêng ngai lo vang. (Sâm 116:12) Mahse, Jehova leh kan chunga thuneitute thu chu kan âwih thei a. Chutianga thu kan awih chuan, mi fing kan nihzia kan lantîr a ni ang a. Mi fingte chuan Jehova thinlung an tilâwm a ni.—Thuf. 27:11.