DAVIDA sipai rual zîngah chuan Amon mi Zeleka te, Hit mi Uria te leh, Moab mi Ithmate an tel a. a (1 Chro. 11:39, 41, 46) “Kerit mi zawng zawng te, Pelet mi zawng zawng te, Git mi zawng zawng te” pawh an tel bawk. (2 Sam. 15:18) Kerit mite leh Pelet mite chu Philistia mite nêna inlaichîn hnai tak an nih a rinawm a. (Ezek. 25:16) Chu bâkah, Git mite chu Philistia khawpui, Gatha awm an ni.—Jos. 13:2, 3; 1 Sam. 6:17, 18.

Engvângin nge Davida chuan hnam dang mite chu a sipai rual zîngah a teltîr? Amah leh a bîk takin, Jehova chungah an rinawm ang tih a rin ngheh tlat vâng a ni. Entîr nân, The New Interpreter’s Dictionary of the Bible tih lehkhabu chuan Kerit mite leh Pelet mite chungchângah: “Davida rorêl chhûnga hun harsa berahte pawh a chungah an rinawm tlat,” tiin a sawi a. Engtin nge an rinawm? “Israel mi zawng zawngin” Lal Davida kalsana “Seba, Beliala mi pakhat” an thlâwp lai khân, Kerit mite leh Pelet mite chuan a chunga rinawm tlatin Seba helna chu an titâwp a ni. (2 Sam. 20:1, 2, 7) Ṭum dangah chuan, Lal Davida fapa Adonija’n lalṭhutthlêng chuh a tum a. Mahse, Kerit mite leh Pelet mite chuan rinawm taka Davida lama ṭangin lalna rochung tûra Jehova thlan, Solomona chu lal ni tûrin an ṭanpui a ni.—1 Lal. 1:24-27, 38, 39.

Davida tâna mi rinawm tak dang pakhat chu Git mi Itaia a ni a. Davida fapa Absaloma a hel a, a pa aia lala siam tûra Israel mite a thlêm khân, Itaia leh a sipai 600-te chuan Lal Davida an thlâwp tlat a ni. A tîrah, Davida’n Itaia chu hnam dang mi a nih avângin a tâna a beih a ṭûl loh thu a hrilh a. Mahse, Itaia chuan: “LALPA nunna leh lal, ka pu nunna chhâlin ka sawi e, lal, ka pu hi i awmna tawh phawtah chuan, thih leh thih a ni ang a, dam leh dam a ni ang a, i chhiahlawh hi a awm ve zêl ang,” tiin a chhâng a ni.—2 Sam. 15:6, 18-21.

Kerit mite, Pelet mite leh, Git mite chu hnam dang mite ni mah se, anni chuan Jehova chu Pathian dik a ni tih leh Davida chu a hriak thih a ni tih an pawm a ni. Chûng mi rinawmte a lama an ṭan avângin Davida chu a va lâwm dâwn tak êm!