ZIR TUR THUZIAK 33
HLA 130 Ngaidam Rawh
Kohhranin Jehova Entawna Sual Pawi Tak Titu A Thlîr Dân
‘Tu pawhin thil a tihsual chuan, min sawipuitu kan nei.’ —1 JOH. 2:1.
A TUM BER
Kum zabi khatnaa Korinth kohhrana sual pawi tak tihna chinfel a nih dân aṭanga kan zir theihte.
1. Jehova’n mi tinte chu eng nge a duhsak?
JEHOVA chuan zalên taka duh thlan theihna min pe a. Chu thilpêk chu thu tlûkna kan siam apiang hian kan hmang ṭhîn a. Kan thu tlûkna siam theih azawnga pawimawh ber chu Jehova hnêna inpumpêk a, amah betu chhûngkaw zînga tel tûra thu tlûkna siam hi a ni. Mi tinte chu chutianga thu tlûkna siam tûrin Jehova’n a duh a. Engvângin nge? Mite chu a hmangaihin an tâna ṭha ber tûr a duhsak vâng a ni a. Amah nêna inṭhian ṭhatna neia chatuana nung tûrin a duh a ni.—Deut. 30:19, 20; Gal. 6:7, 8.
2. Jehova’n sim duh lo thil sual titute chu eng ti tûrin nge a duh? (1 Johana 2:1)
2 Chutih rualin, Jehova chuan a rawngbâwl tûrin tu mah a tilui lo va. Mi tinte chu zalên takin duh a thlantîr a ni. A nih chuan, baptisma chang tawh Kristianin Pathian dân bawhchhiain, sual pawi tak ti ta se, engtin nge ni ang? A sim loh chuan, kohhran aṭanga chhuahtîr a ni ang. (1 Kor. 5: 13) Chutichung chuan, thil sual titu chu a hnêna kîr leh tûrin Jehova’n a duh tak zet a ni. Chu chu an simzia lantîrtute ngaihdam an nih theih nâna tlanna a buatsaih chhan ber pawh a ni a. (1 Johana 2:1 chhiar rawh.) Chuvângin, hmangaihna nei tak kan Pathian chuan sual pawi tak titute chu sima, a hnêna kîr leh tûrin a sâwm a ni.—Zak. 1:3; Rom 2:4; Jak. 4:8.
3. He thuziakah eng nge kan sawiho vang?
3 Jehova chuan thil sual titute leh an thil sual tihte chu a thlîr anga thlîr ve tûrin min duh a. Chutianga kan tih theih dân chu he thuziakah hian kan sawiho vang. Chuvângin, he thuziak i chhiar hunah (1) kum zabi khatnaa Korinth kohhrana sual pawi tak tihna chinfel a nih dân, (2) thil sual titu a sim hnua tirhkoh Paula kaihhruaina pêk leh, (3) chu thilthlengin sual pawi tak titu Kristiante chunga Jehova thlîr dân a târ lan dân chu lo chhinchhiah ang che.
KUM ZABI KHATNAA SUAL PAWI TAK TIHNA CHINFEL A NIH DAN
4. Kum zabi khatnaa Korinth kohhranah eng thil nge thleng? (1 Korinth 5:1, 2)
4 Korinth thawn khat 5:1, 2 chhiar rawh. Paula chuan missionary nia a zin ṭum thumnaah, Korinth khuaa kohhran din thara thil ṭha lo tak thleng chu a hria a. Chu kohhrana unaupa pakhat chuan a nu hrawn a mutpui a ni. Chu chu “Jentailte zîngah pawh awm ngai hlei lo” thilthleng a ni a. Kohhranin a thiltih chu a ngaihzam mai bâkah, a uanpui hial pawh a ni thei a ni. Chutianga an tih chhan ni âwm chu an zînga ṭhenkhatin mihring ṭha famkim lote chunga Pathian zahngaihna leh hriatthiamna an lantîr nia an ngaih vâng a ni thei a. Mahse, Jehova chuan a mite zînga thil sual tihna awm chu a ngaizam mai lo. Chutiang thil bawlhhlawh titu chuan kohhran hming ṭhatna a tihliau va. Chu bâkah, Kristian dangte chungah pawh nghawng ṭha lo a lo nei reng tawh thei a ni. Chuvângin, Paula chuan kohhran chu eng kaihhruaina nge a pêk?
5. Paula’n kohhran chu eng ti tûrin nge a hrilh a, a sawi awmzia chu eng nge ni? (1 Korinth 5:13) (Milem en bawk rawh.)
5 Korinth thawn khat 5:13 chhiar rawh. Jehova kaihhruainain Paula chuan kohhran hnênah sim duhna nei lo thil sual titu chu kohhran aṭanga chhuahtîr tûrin lehkha a thawn a. Kohhrana mite chuan ani chu engtin nge an cheibâwl ang? Paula chuan thil sual titu chu “pâwl lo tûrin” a hrilh a. Chutah chuan ‘a hnêna ei lo tûra’ thupêk pawh a tel tih a sawi a ni. (1 Kor. 5: 11) A sawi awmzia chu eng nge ni? Tu emaw nêna thil kan ei tlân hian awlsam takin kan inkâwm ṭan thei a. Chuvângin, chu mi chu kâwm lo tûrin Paula’n a hrilh tih a chiang hle. Chutianga an kawm lohna chuan kohhran chu a thununna ṭha lo lak ata a vênghim dâwn a. (1 Kor. 5:5-7) Chu bâkah, thil sual titu chu Jehova chungah sual lian tak a ti tih inhria a, inchhîr a, sim tûrin a chêttîr thei a ni.
Jehova kaihhruainain Paula chuan kohhran hnênah sim duhna nei lo thil sual titu chu kohhran aṭanga chhuahtîr tûrin lehkha a thawn (Paragraph 5-na en rawh)
6. Paula lehkhathawn chu kohhranin engtin nge a chhân lêt a, chu chuan thil sual titu chungah eng nghawng nge a neih?
6 Paula’n Korinth kohhrana Kristiante hnêna lehkha a thawn hnuah, an chhân lêt dân chu hriat a châk hle a. A hnuah, Tita chuan chanchin lâwmawm tak a hrilh a ni. Kohhran chuan Paula lehkhathawna kaihhruainate chu an zâwm a. (2 Kor. 7:6, 7) Chu bâkah, lehkha a thawn hnu aṭanga thla rei lo têah, thil sual titu chu a sim ta a! A nungchang leh rilru put hmangte chu thlâk danglamin, Jehova tehna felte chu a nunpui ṭan a ni. (2 Kor. 7:8-11) Tûnah, Paula’n kohhran chu eng kaihhruaina thar nge a pêk?
KOHHRANIN A SIM HNUA A CHEIBAWL DAN TUR
7. Thil sual titu kohhran aṭanga chhuahtîr a nihna chuan eng rah ṭha nge a chhuah? (2 Korinth 2:5-8)
7 Korinth thawn hnih 2:5-8 chhiar rawh. Paula chuan “mi tam takin an hrem chu a tâwk tawh,” tih a sawi a. A awmzia chu thil sual titu chuan kohhran aṭanga chhuahtîr a nih hnuah sim a ngai tih a rawn hre thiam a. Chuvângin, a sim hnuah chuan hrem chhunzawm a ngai tawh lo tihna a ni.—Heb. 12:11.
8. Paula chuan kohhran chu eng ti tûrin nge a hrilh zawm?
8 Paula chuan kohhran hnênah thil sual titu chu ‘ngaidam a, thlamuan tûr’ leh ‘amah an hmangaihna chu tinghet tûrin’ a hrilh a. Jehova mite zînga lâk luh leh mai aia tam ti tûrin a duh tih chhinchhiah ang che. Paula chuan ani chu an ngaidamin, an hmangaih tih an thusawi leh thiltihte hmanga lantîr tûrin a duh a. Chutianga tihna hmangin, kohhrana a lo kîr leh avânga an lâwmzia chu an lantîr thei dâwn a ni.
9. Engvângin nge mi ṭhenkhat tân thil sual titu a sim hnu pawha ngaihdam chu a harsat mai theih?
9 Kohhrana mi ṭhenkhat chuan thil sual titu lâk luh leh a nih chuan hlim taka lo lawm an harsat em? Bible-ah târ lan a ni lo; mahse, chu chu thil thleng thei a ni. A chhan chu, a thiltih chuan kohhran pum chungah buaina thlenin mi ṭhenkhat chungah zahna a thlen pawh a ni thei a. Mi dangte chuan nungchang lama thianghlim tûra theih tâwp an chhuah laia, kohhrana lâk luh leha a awm chu thil fel lo niin an ngai thei a ni. (Luka 15:28-30 nên khaikhin rawh.) Mahse, kohhran tân an unaupa lo lêt leh chunga hmangaihna dik tak lantîr chu engvângin nge a pawimawh?
10-11. Upate’n thil sual titu a sim hnu pawha an ngaidam duh lo a nih chuan eng nge thleng thei?
10 Upate’n a thil sual tih sim tak zettu chu kohhrana a lo kîr leh an phal lo emaw, a lo kîr leh hnua kohhranin a chunga hmangaihna an lantîr loh emaw huna thilthleng thei hi han mitthla teh. “A lungngaih lutuknain” ei ralin a dinhmun chu beisei bo niin a thlîr thei a. Pathian nêna inlaichînna ṭha siam leh tûrin hmalâk a duh tawh lo pawh a ni hial thei.
11 Chu bâkah, kohhrana unaute chuan ani chu an ngaidam duh lo a nih chuan, Jehova duhsakna an chân phah thei a ni. Engvângin nge? Simna lantîrtute ngaidamtu Jehova ni lovin, nunrâwng leh ngilneihna nei lo Setana rilru put hmang lantîrna ang a nih dâwn vâng a ni a. Chutianga an tih chuan, a thlarau lam tichhe tûra Setana hmanrua an ni thei a ni.—2 Kor. 2:10, 11; Eph. 4:27.
12. Engtin nge kohhran chuan Jehova a entawn theih?
12 A nih leh, engtin nge Korinth kohhran chuan Setana ni lovin, Jehova a entawn theih? Jehova’n simna lantîrtute a cheibâwl dân entawnna hmangin a ni. Bible ziaktu ṭhenkhatin a chungchâng an târ lan dân hi lo chhinchhiah ang che. Davida chuan: “Lalpa, nang chu i ṭha a, ngaihdam i peih a,” tiin a ziak a. (Sâm 86:5) Mika chuan: “Nang anga khawlohna ngaidamtu leh . . . bawhchhiatna kal pêltu Pathian tu nge awm?” tiin a ziak bawk a. (Mik. 7: 18) Tichuan, Isaia pawhin: “Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se: LALPA hnênah kîr leh rawh se; tichuan, anin a lo khawngaih ang; kan Pathian hnênah kîr leh rawh se, anin a ngaidam nasa khawp dâwn si a,” tiin a ziak a ni.—Is. 55:7.
13. Engvângin nge thil sual titu a sim hnua kohhrana lâk luh leh vat chu thil inâwm tak a nih? (“ Korinth Kohhrana Mi Chu Engtika Lâk Luh Leh Nge A Nih?” tih bâwm chu en rawh.)
13 Korinth kohhran chuan Jehova entawnin thil sual titu a sim hnuah ṭha taka lo lâwmin, a chungah hmangaihna an lantîr a. Kohhrana lâwm lût leh tûra Paula kaihhruaina chu zâwmin ‘kawng tinrênga thu an âwihzia’ an lantîr a ni. (2 Kor. 2:9) Ni e, kohhran aṭanga chhuahtîr a nihna chu thla rei lo tê chauh ni mah se, zilhna chuan sim tûrin a chêttîr a. Chuvângin, kohhrana lâk luh leh a nihna tûr tihkhawtlai chhan tûr a awm lo a ni.
JEHOVA ROREL DIKNA LEH ZAHNGAIHNA KAN ENTAWN THEIH DAN
14-15. Korinth kohhrana thil sual tihna chinfel a nih dân aṭangin eng nge kan zir? (2 Petera 3:9) (Milem en bawk rawh.)
14 Hmân lai Korinth kohhrana thil sual tihna chinfel a nih dân chu “kan inzir nâna” Bible-a telh a ni a. (Rom 15:4, NWT.) Jehova’n a mite zînga thil sual tihna a ngaihzam mai mai lohzia, chu thilthleng aṭang chuan kan zir thei a ni. Mi ṭhenkhat chuan Pathianin zahngaihna a ngah êm avângin sim duh lotute chu kohhrana an awm zawm zêl a phal an ring mai thei a. Mahse, chu chu Jehova zahngaihna lantîr dân a ni lo. Zahngaihna ngah tak a nih rualin, a tehnate chu tihniamin, nungchang ṭha lote chu a pawmzam lo. (Jud. 4) A pawmzam a nih chuan kohhrana mi tinte chu thlarau lama dinhmun derthâwng taka an awm dâwn avângin, chu chu zahngaihna lantîrna a ni dâwn lo a ni.—Thuf. 13:20; 1 Kor. 15:33.
15 Chutih rualin, Jehova’n tu ma boral a duh lo va. Sim duhna nei apiang chu chhandam a duh tih kan hria a. Inthlâk danglama amah nêna inlaichînna ṭha neih leh duh apiangte chungah zahngaihna a lantîr a ni. (Ezek. 33:11; 2 Petera 3:9 chhiar rawh.) Chuvângin, Korinth kohhrana thil sual titu a sim a, a thil sual tih a bânsan khân, Jehova chuan ani chu ngaidama, lâwm lût leh tûrin Paula hmangin kohhran chu a hrilh a ni.
Kohhranin Jehova hmangaihna leh zahngaihna entawnin lâk luh lehte chu hlim takin an lo lâwm (Paragraph 14-15-na en rawh)
16. Korinth kohhrana thilthleng zir chianna chuan engtin nge a awmtîr che?
16 Korinth kohhrana thilthleng zir chianna chuan Jehova’n a hmangaihna, a felna leh, a dikna a lan chhuahtîr dân hmu thiam tûrin min ṭanpui a. (Sâm 33:5) Chu chuan Jehova chawimawi lehzual tûrin a chêttîr che a ni lâwm ni? Dik tak chuan, kan zavai hian sual fate kan ni a, a ngaihdamna kan mamawh ṭheuh va. Chuvângin, sual ngaihdamna awmtîrtu tlanna avângin Jehova chunga nasa taka lâwm nachhan tûr kan nei ṭheuh a ni. Jehova’n a mite chu a hmangaih tak zetin an tâna ṭha ber tûr a duhsak tih hriat chu a va hahdamthlâkin, a va thlamuanthlâk tak êm!
17. A dawta thuziakahte eng nge kan sawiho vang?
17 A nih leh, tûn laiah thil sual tihna chu eng anga chinfel tûr nge a nih? Engtin nge kohhran upate’n Pathian Jehova hmangaihna chu entawnin thil sual titu chu sim tûra an ṭanpui theih? Upate’n tu emaw chu kohhran aṭanga chhuahtîr tûr emaw, la lût leh tûr emawa thu tlûkna an siam hunah kohhranin engtin nge a chhân lêt ang? Chûng zawhnate chu a dawta thuziakahte sawiho a ni ang.
HLA 109 Thinlung Takin Inhmangaih Rawh U
